शेयर बजाः परिसूचक नेप्से थौं मङ्गलवाः दोहोरो अङ्कं घटे जुगु दु। नेप्से थौं ३२ दशमलव २९ अङ्कं घटे जुया २ हजार सात सय ३३ दशमलव १४ विन्दुइ कुहावंगु दु।

थौं मेमेगु दक्को समूहया शेयर घटे जुगुलि होटल, विकास बैंक, उत्पादन, बीमा, फाइनान्स व माइक्रोफाइनान्स समूहया शेयर कुहावंगु दु। थौं २ सय २७ कम्पनीया ७४ लाख ४८ हजार कित्ता शेयर ४ अर्ब १६ करोड रुपैयाँया कारोबार जुगु दु।

दकलय् अप्वो नेपाल टेलिकमया ४१ करोड ५७ लाख रुपैयाँ शेयर किनबेच जुगु दु। आईसीएफसी फाइनान्स, नारायणी विकास बैंक व एनआईबीएल प्रगति फन्डया शेयर न्यागु प्रतिशतं घटे जुगु दु।

समग्र बजाः घटे जूसा मानुषी लघुवित्त कम्पनीया शेयर १० प्रतिशतं थहावंगु दु।

वंगु २४ घण्टाया दुने देयन्यक थप ३५१ म्हेसित कोरोना भाइरस संक्रमण पुष्टि जुगु दु।

८ हजार ७ सय २९ म्हेसिगु पीसीआर परीक्षण याउगुलि ३१३ म्ह व १ हजार ४ सय ४५ म्हेसिगु एन्टिजेन परीक्षण याउगुलि ३८ म्ह याना ३५१ म्हेसित कोरोना भाइरसया संक्रमण पुष्टि जुगु दु धका स्वास्थ्य तथा जनसंख्या मन्त्रालयं धाउगु दु।

थेहे २४ घण्टाय् कोरोना संक्रमणं गुम्ह सीउगु दु सा २७३ म्ह कोरोनामुक्त जुगु दु।

निर्वाचन आयोगं सार्वजनिक पदय् बहाल दुपि प्राध्यापक, शिक्षक व कर्मचारी राजनीतिक दलया पदाधिकारी दुपिन्त पदाधिकारी व सदस्यया सूचीइ हटे यायेगु चेतावनी बिउगु दु।

आयोगया प्रवक्ता शालिग्राम शर्मा पौडेलं थौं मंगलबाः छगु विज्ञप्ति जारी यासे आयोगय् दर्ता दुपि राजनीतिक दलपाखे दलया प्रदेश नाप जिल्ला समितिइ दुपि पदाधिकारी नाप सदस्यया विवरण प्रदेश वा जिल्ला निर्वाचन कार्यालयय् तयेमाःगुलि उगु विवरण दुगु बखतय् अज्याम्ह मनू समावेश दतकि सूचीपाखे हटे यायेत सम्बन्धित दलयात पौ च्वया आयोगयात जानकारी बिइत प्रदेश वा जिल्ला निर्वाचन कार्यालय निर्देशन बिउगु दु।

राजनीतिक दल सम्बन्धी ऐन, २०७३ या दफा १४ या उपदफा (२) कथं नेपाल सरकार, प्रदेश सरकार वा स्थानीय तहया स्वामित्व वा नियन्त्रणय् दुगु स्वशासित संस्थां बहालवाला प्राध्यापक, शिक्षक वा कर्मचारीपिनिगु पदय् वहाल दुपि मनूतयेगु राजनीतिक दलया सदस्य जुइ फइमखुगु स्पष्ट व्यवस्था दुगु धासे उपि राजनीतिक दलया सदस्यता वितरण मयाय्त मयाकेत राजनीतिक दलपिन्त आयोगं निर्देशन बिउगु दु।

शिक्षा, विज्ञान तथा प्रविधिमन्त्री देवेन्द्र पौडेलं मन्त्रालयया प्राथमिकता सार्वजनिक याउगु दु। पौडेलं मन्त्री जुइ धुका थ्व हे न्हापागु पटक पत्रकार सम्मेलन यासे ३१ बुँदे कार्ययोजना सार्वजनिक याउगु खः।

मन्त्रीं सार्वजनिक याउगुलिं मन्त्रालय प्राथमिकताया न्हापागु बुँदाय् हे दक्को विद्यार्थीपिन्त कोभिड १९ विरुद्धया खोप व्यवस्था यायेगु धका उल्लेख याउगु दु। अथेहे दक्को पालिका, जिल्ला व प्रदेशयात साक्षर घोषणा यायेगु, अनिवार्य व निःशुल्क शिक्षा ऐन व नियमयात प्रभावकारी रुपं कार्यन्वयन यायेगु  धका धाउगु दु।

अथेहे कक्षा १२ तकया पाठ्यक्रमया छपाई गुणस्तरीय नाप रङ्गिन दयकेगु, अधिकतम सामुदायिक विद्यालय प्राविधिक शिक्षाया पढाइ सञ्चालन यायेगु, स्थायी शिक्षकया पदपूर्ति यायेगु लागि विज्ञापन प्रक्रिया तत्काल न्ह्यने यकेगु लगायतया बुँदा तया तःगु दु। चीनय् ब्बना इन्टर्नसीप याये मखपि विद्यार्थीपिनिगु जिम्मा सरकारं कायेगु धका मन्त्री पौडेलं धाउगु दु।

मन्त्री पौडलं धाउगु दु, ‘चाइनाय् ब्बना इन्टर्नसीप याये मखपि विद्यार्थीपिनिगु जिम्मा जिपिसं काये। २०१४–०१५ ब्याचया समस्या हल जुइ धुकुगु दु। २०१६ ब्याचया समस्या खः उकिया समाधान जुइ। तयारी यानाच्वनागु दु।’

सिन्धुपाल्चोकया हेलम्बु गाउँपालिका–७ सुर्सिङ गांया झाक्रित्वालय् मिँन्वःया स्वम्ह मचा सीउगु दु।

स्थानीय सञ्च तामाङया गोठय् मिँ च्याना स्वम्ह मचा सीउगु खः। सञ्च तामाङया खुदँ दुम्ह काय् मनोज तामाङ, सुकमान तामाङया न्यादँ दुम्ह काय् मनिष तामाङ व साइला तामाङया काय् दिलबहादुर तामाङपि मिँ च्याना सीउगु दु धका प्रहरी नायब उपरीक्षक दक्षकुमार बस्नेतं जानकारी बिउगु दु।