मन्त्रिपरिषदया बैठक संसद भवन बानेश्वरय् च्वना च्वंगु दु।

बैठक संघीय संसद भवन ल्होत्से हलय् मन्त्रिपरिषदया बैठक च्वनेगु तयारी जुगु दु।

अमेरिकी सहयोग परियोजना एमसीसीबारे व्याख्यात्मक घोषणाया प्रस्ताव तयार यायेत मन्त्रिपरिषदया बैठक च्वःगु खः।

थ्व स्वया न्ह्यः हे थौं सुथय् प्रधानमन्त्री निवास वालुवाटारय् च्वंगु न्यागु दलीय सत्ता गठबन्धनं ब्याख्यात्मक घोषणा नाप थौं हे अमेरिकी सहयोग सम्बन्धी सम्झौता एमसीसी पारित यायेगु निर्णय याउगु दु।

येँ महानगरपालिका वडा १२ य् वन्दे फल्चा थौं छगु ज्याझ्वः दथुइ उलेज्या यानादीगु दु।

महानगरया मेयर विद्यासुन्दर शाक्यं थौं छगु ज्याझ्वः दथुइ उलेज्या यानादीगु खः। उगु ज्याझ्वलय् उपमेयर हरिप्रभा खड्गी श्रेष्ठ, वडाध्यक्ष विकास डंगोल नाप पदाधिकारी सहभागी दुगु खः।

भ्याट नाप १८ लाख ७५ हजार रुपैयाँय् फल्चा निर्माण जुगु खः। फल्चा २७ फिट ४ इञ्च लम्बाई, ६ फिट ४ इन्च चौडाई व १४ फिट तजाउगु खः। मेयर शाक्यं धयादीगु दु, ‘माग दुगु तर विवाद मदुगु सम्पदा पुननिर्माण व मर्मतया दक्को योजना जिमिसं कार्यान्वयनय् यकगु दु। पुननिर्माण सम्पन्न जुइ धुका संरक्षण, सञ्चालन व व्यवस्थापनया लागि समुदायपिन्त हस्तान्तरण यानागु दु।’ मेयर शाक्यं धयादीगु दु।

न्हापा समुदाय न बचे यानातःगु सम्पदायणत राज्यया पाखे सहभागिता क्यनागु खः। जिमिस धयाच्वनागु दु। सम्पदायात बचे यायेत छु यायेमाः योजना ज्वना झासँ। जिमिसं पुननिर्माण नाप मर्मत याना संरक्षण व उपभोगया लागि समुदायपिन्त हे जिम्मा बियाउगु दु। मेयर शाक्यं धयादीगु दु।

उगु ज्याझ्वलय् उपमेयर हरिप्रभा खड्गी श्रेष्ठं, येँया म्हसिका हे सम्पदा जुगुलि थुकिया लगानी यायेत मग्यानागु धका धयादीसे सांस्कृतिक संरचना सामाजिक सद्भावया केन्द्र जुगु उल्लेख यानादीगु खः।

नेकपा माओवादी केन्द्रया न्याम्ह नेतापिन्स अमेरिकी सहयोग परियोजना एमसीसी व्याख्यात्मक घोषणा नाप अनुमोदन यायेगु निर्णयया विरोध याउगु दु।

केन्द्रीय कार्यालय विस्तारित बैठकय् नेतापिन्स व्याख्यात्मक घोषणा नाप एमसीसी अनुमोदन यायेगु प्रस्ताव हःगु खः।

छलफलया झ्वलय् नारायणकाजी श्रेष्ठ, देव गुरुङ, कृष्णबहादुर महरा, लिलामणि पोखरेल व गिरिराजमणि पोखरेलपिन्स थुकिया विरोध याउगु खः। श्रेष्ठं व्याख्यात्मक घोषणा नाप एमसीसी अनुमोदन यायेगु महाधिवेशनया निर्णय विपरीत खः धका धाउगु दु।

केन्द्रीय समितिइ न छलफल मयासे महाधिवेशनया निर्णय विपरीत वनेगु अधिकार सुयात मदुगु धासे वयकलं धयादीगु दु, ‘थ्व संसदवादी, आत्मसुरक्षावाद आधारित राष्ट्रिय आत्मसमर्पणवादी निर्णय खः।’

देव गुरुङं संशोधन मयासे मूल सम्झौता पास याये मज्यू धका धाउगु खः। वयकलं धाउगु दु, ‘थुकिइ राष्ट्रिय आत्मसमपर्णवाद व गद्दारीया दिशापाखे वंगु दु। थुकिइ देशयात दुर्घटनापाखे बचे यायेत मखु, झन् दुर्घटनारपाखे यकिइ।’ मेम्ह नेता कृष्णबहादुर महरां व्याख्यात्मक घोषणा संशोधन मखु सम्झौताया व्याख्या जुइमाः धका धाउगु दु।

नेकपा माओवादी केन्द्रं अमेरिकी सहयोग परियोजना एमसीसी व्याख्यात्मक घोषणा नाप संसदं अनुमोदन यायेगु निर्णय याउगु दु।

थौं सुथय् प्रचण्ड निवास खुमलटारय् च्वंगु नेतापिनिगु बैठकं व्याख्यात्मक घोषणा नाप एमसीसी अनुमोदन यायेगु निर्णय याउगु दु धका नेता वर्षमान पुन (अनन्त) न जानकारी बिउगु दु।

प्रचण्डया निवास खुमलटारय् नेतापिनिगु बैठक च्वंगु दु। बैठकलिपा माओवादी अध्यक्ष प्रचण्ड प्रधानमन्त्री निवास बालुवाटारय् वंगु खः।

न्यागु दलीय सत्ता गठबन्धनं ब्याख्यात्मक घोषणासहित थौं हे अमेरिकी सहयोग सम्बन्धी सम्झौता एमसीसी पारित यायेगु निर्णय याउगु दु।

प्रधानमन्त्री निवास वालुवाटारय् थौं च्वंगु सत्ता गठबन्धनया बैठकं ब्याख्यात्मक घोषणा नाप एमसीसी संसदं अनुमोदान यायेगु निर्णय याउगु दु धका नेपाली कांग्रेसया बरिष्ठ नेता रामचन्द्र पौडेलं जानकारी बिउगु दु।

ब्याख्यात्मक टिप्पणी नाप संसदय् पेश यासे थौं हे एमसीसी पारित यायेत गठबन्धन सहमत जुगु दु,’ धका नेता पौडेलं धाउगु दु। नेकपा एकीकृत समाजवादीया अध्यक्ष माधव नेपालं पाटीया निर्णय याये ल्यदनि धका ई फ्वंगु खः।

तर, ई मदु धासे थौं हे पारित यायेगु निर्णय याउगु दु धका वयकलं धाउगु दु। नेता पौडेलं धाउगु दु, ‘एमसीसी थौं हे पारित जुइ।

नेता नेपाल सत्ता गठबन्धनया बैठकं पिहा वना आः एकीकृत समाजवादीया स्थायी कमिटी बैठक जारी जुयाच्वंगु दु। सत्ता गठबन्धनया बैठक न्ह्यः थौं सुथय् नेकपा माओवादी केन्द्रया कार्यालय विस्तारित बैठकं एमसीसीयात ब्याख्यात्मक घोषणा नाप अनुमोदन यायेगु निर्णय याउगु दु।