छत्रपाटी निःशुल्क चिकित्सालय अत्याधुनिक प्याथोलोजी ल्याबय् सुविधा थप याउगु दु।

बिरामीपिनिगु उच्चतम सुविधा व उचित स्वास्थ उपचारय् ग्वाहालि यायेगु उद्देश्यं ल्याबय् उगु सुविधा थप याउगु खः। थौं शनिबाः छगु औपचारिक ज्याझ्वलय् बागमती प्रदेश सभाया सांसद वसन्त मानन्धरं उगु ल्याबया उलेज्या याउगु खः।

थुगु प्याथोलोजी ल्याबय् आः बिरामीपिनिगु रिपोर्ट मोबाइलय् वइगु सुविधा थप जुगु दु। बागमती प्रदेश सभाया सांसद मानन्धर प्रदेश पूर्वाधार विकास कार्यक्रमया कोषपाखे प्राप्त ५० लाख ग्वाहालि अत्याधुनिक ल्याबय् सुविधा थप याउगु खः।

चिकित्सालयया अध्यक्ष डा. मनोजमान श्रेष्ठं धयादीगु दु, निम्न आय दुपि नागरिकपिनिगु लागि स्वास्थ्य क्षेत्रय् राज्यपाखे सञ्चालन जुगुलि मुख्यमन्त्री स्वास्थ्य कार्यक्रम चिकित्सालयपाखे न सञ्चालन यायेगु थःपि इच्छुक दु धका अध्यक्ष श्रेष्ठं धयादीगु खः।

नेपाल संवत न्हूदँ राष्ट्रिय समारोह समिति ११४२ या ग्वसालय् थौं शनिवाः सुथय् येँया नेपाः ब्यांक्वेटय् समारोह समितिया पुलाम्ह अध्यक्ष रमेश महर्जन लुमंका बिचाः मुज्या याःगु दु।

महर्जन मदुगु थौं १३ न्हूया पुण्य तिथिइ समारोह समितिपाखे बिचाः मुज्या याःगु खः।

उगु मुज्याय् समारोह समिति ११४२ या अध्यक्ष निरञ्जन शाक्यं मर्हजनया किपातय् स्वामा देछाना भावपूर्ण श्रदाजलि देछागु खः।

सरकारं सीमा नाकाय् थप कडाई यायेगु निर्णय याःगु दु ।

गृहमन्त्री बालकृष्ण खाँणया नायःसुइच्वंगु केन्द्रीय सुरक्षा समितिया मँुज्यां अवैधानिक रुपय् नेपाः दुहाँवइपिन्त सीमा नाकाय् थप कडाई यायेगु, सीसीटीभी जडान यायेगु, नाकाय् वये–वने याइबलय् अनिवार्य कथं परिचयपत्र क्यनेमाःगु व्यवस्था यायेगु अले अध्यागमन व सुरक्षा निकाय परिचालन झं प्रभावकारी यायेगु निर्णय याःगु दु ।

मुँज्याय् गृहमन्त्री खाणं अनाधिकृत रुपय् विदेशी नागरिक नेपाः दुमकायेत सीमा नाका व अन्तर्राष्ट्रिय विमानस्थलय् कडाई यायेत निर्देशन बियादीगु दु ।

लिपांगु ईलय् कोभिड–१९ या संक्रमण अप्वःगु हुनिं सिमानाकाय् हे स्वास्थ्य चकजाँच यायेगु न निर्णय याःगु दु । समसामयिक विषयलय् थप सहलह यायेत मेगु मुँज्या कन्हय् हाकन च्वनी ।

नेपालभाषाया सक्रिय कार्यकर्ता धनबहादुर महर्जन तिमिला व नेपाल संवत राष्ट्रिय न्हूदँ समारोह समिति ११४२ या मिसा समितिया कजि नानीहेरा महर्जनया माजु शुक्रवाः सुथय् मन्त।

८५ दँया सानुमाया महर्जनयात छुं दिं न्ह्यःनिसें म्हं मफयाः छेँय् हे वासः यानाच्वंगु खः।

मदुम्ह महर्जनया निम्ह काय् व निम्ह म्ह्याय् लिसें जहान दी।

सरकारं हाकनं इन्धनया भाः थकाउगु दु।

म्हिगः चान्ह्यः निसे लागू जुइगु कथं नेपाल आयल निगमं जा थुइगु ग्यास नाप पेट्रोल, डिजेल, मचिकं, हवाई इन्धनया भाः थकाउगु खः। निगमं पेट्रोलया १३३ रुपैयाँ, डिजेल÷मचिकंया प्रतिलिटर स्वतका थकया ११६ रुपैयाँ थ्यकूगु दु।

आन्तरिक तथा बाहृय हवाई ईन्धनया साबिक बिक्रि मूल्य प्रतिलिटर झीतक थकाया ९६ व अन्तर्राष्ट्रिय हवाई इन्धनया मूल्य प्रति किलो लिटर अमेरिकी डलर ८५३ प्रति किलो लिटर कायम याउगु दु।

एलपी ग्याँस येँ प्रति सिलिण्डर रु. ५० रुपैयाँ थकाया १ हजार ५०० रुपैयाँ प्रतिसिलिण्डर कायम याउगु दु धका निगमया सहप्रवक्ता पुष्कर कार्की न जानकारी बिउगु दु।

‘मूल्य समायोजनलिपा निगमयात पेट्रोलय् लिटरय् १२.५५, डिजेलय् प्रतिलिटर ११.६७ व एलपी ग्यास प्रतिसिलिण्डरय् ४६१.२२ घाटा दु धका निगमं दावी याउगु दु।