राष्ट्रपति रामचन्द्र पौडेलं नेपाल नागरिकता ऐन, २०६३यात संशोधन यायेत दयेकूगु विधेयक प्रमाणीकरण यानादीगु दु।

वय्कलं सङ्घीय संसदया निगूलिं सदनया बैठकपाखें पारित जुयाः प्रमाणीकरणया निंतिं न्ह्यब्वःगु उगु विधेयक नेपाःया संविधानकथं थौं प्रमाणीकरण यानादीग राष्ट्रपति ज्याकुथिया प्रवक्ता प्रदीपकुमार कोइरालां पितब्यूगु विज्ञप्तिइ धयातःगु दु।

नेपाल पञ्चाङ्ग निर्णायक विकास समितिं थौ जुइगु सूर्यग्रहण नेपाःपाखे खने मदइगु जुगुलि शास्त्रीय मान्यता कथं छु न सुतक लाइमखु धका धाःगु दु।

थुगु सूर्यग्रहण न्यूजिल्याण्ड, अष्ट्रेलिया, फिजी, टोङ्गा, अन्टार्टिका लगायतया देशपाखे जक खनेदइ धका धाःगु दु।

जेनजी आन्दोलनया झ्वलय् घाःपाः जूपिन्स थौ सिंहदरबार गेटय् धर्ना ब्यूगु दु। उमिसं प्रधानमन्त्रीयात ज्ञापन पौ लःल्हायेगु निति सिंहदरबार दुने दुहावनेत स्वंगू खः।

तर, सुरक्षाकःमि तयेस दुहावने मबिइवं गेटय् धर्ना ब्यूगु खः।

नेपाल वायुसेवा निगम (नेपाल एयरलाइन्सं) थ्वहे असोज ९ गतेनिसें चीनया ग्वाञ्जाओलय् तप्यंक उडान याइगु जूगु दु।

निगमं न्हापांगुखुसिइ येँ–ग्वाञ्जाओ–येँ उडान न्ह्याकेत्यंगु खः।निगमया कार्यकारी अध्यक्ष युवराज अधिकारीया कथं उकिया निंतिं निगमं फुक्क प्राविधिक तयारी पूवंके धुंकूगु दु। निगमं ग्वाञ्जाओ उडानया निंतिं उजं नं काये धुंकूगु दु। निगमं वाय् स्वंगू नियमित उडान यायेगु धलः क्वःछिनातःगु दु।

न्हापांगु उडान असोज ९ गते, निक्वःगु असोज १२ गते लिसें उकिया लिपा असोज ३०, कात्तिक २ व ६ गते उडान यायेगु क्वःछिनातःगु दु। उकिया लिपा नियमित कथं आइतबाः, मङ्गलबाः व शनिबाः ग्वाञ्जाओया निंतिं उडान जुइगु धाःगु दु। येँ निसें ग्वाञ्जाओ तकया छखेया भाः ३० द्वः तका व निखेंया ५० द्वः तका क्वःछिनातःगु निगमं धाःगु दु। अध्यक्ष अधिकारीं ताःईया कुतः लिपा चीनया थ्व महत्वपूर्ण सहरय् उडान सेवा तब्याकेत ताःलाःगु धयादिल। निगमं याकनं हे येँ नं दक्षिण कोरिया व अष्टे«लियाया निंतिं नं तप्यंक उडान न्ह्याकेगु तयारी जुयाच्वंगु धाःगु दु।

येँ–ग्वाञ्जाओ गन्तव्यय् आः चीनया वायुसेवा कम्पनी चाइना साउद नं नियमित उडान यानाच्वंगु दु। नेपालं धाःसा हिमालय एयरलाइन्सं थ्व रूटय् नियमित उडान याना वयाच्वंगु दु। नेपाःमित तःल्याखय् दूगु ग्वाञ्जाओ उडानं निगमयात आर्थिक कथं लबः जुइ फइगु अनुमान यानातःगु दु।

संविधान दिवसया लसताय् थौं सुथय् बृहत शान्ति ¥याली ग्वसाः ग्वःगु दु। येँया फिब्वःख्यलं न्ह्याःगु शान्ति ¥याली भद्रकाली, सहिदगेट, त्रिपुरेश्वर, थापाथली जुयाः हाकनं फिब्वःख्यः थ्यंकाः सभाः याःगु खः।

शान्ति व लोकतन्त्रया निंतिं पेशागत सञ्जाल (पापड)या ग्वसालय् जूगु उगु ज्याझ्वलय् संविधानविद्, पत्रकार, वकिल, मानवअधिकारकःमि, शिक्षक, बुद्धिजीवि नापनापं थीथी पेसा व व्यवसायलिसें स्वाःपिं नागरिकतय्सं ब्वतिकाःगु खः। ¥यालीइ ब्वतिकाःपिंसं ‘संविधानया रक्षा याये’, ‘सुशासन कायम याये’, ‘शान्ति न्यंका तये’ धइगु प्लेकार्ड ब्वःगु खः।

विसं २०७२ असोज ३ गते नेपाःया संविधान जारी जूगु दिंया लुमंतिइ थ्व दिवस न्यायेका वयाच्वंगु दु। ¥यालीइ ब्वतिकाःपिंसं ई कथं संविधानय् संशोधन व सुधार यानाः यंकेमाःगु खँय् बः ब्यूगु दु। थौं हे राष्ट्रपति रामचन्द्र पौडेलया मू पाहाँसुइ संविधान दिवस मूल समारोह समितिपाखें सैनिक मञ्च तिंख्यलय् संविधान दिवस हंगु दु।