स्थानीय होटल व लुम्बिनी विहार दथुइ कचवं ज्यंगु दु। थुकिया निंतिं लुम्बिनी होटल सङ्घ व विहार सञ्चालक दथुइ बुधबाः च्यागू बुँदाया सहमति जूगुलिसें कचवं ज्यंगु दु।

लुम्बिनी विकास कोषया कुतलं लुम्बिनी होटल संघ, लुम्बिनी सांस्कृतिक नगरपालिका व जिल्ला प्रशासनया संलग्नताय् होटल व विहारया विषयकय् खनेदूगु समस्या ज्यंकेत ‘लुम्बिनी विहार व तीर्थयात्री व्यवस्थापन कार्यविधि २०८१’ दयेकूगु खः।

सांसद वासुदेव घिमिरेया न्ह्यःने कोषया न्वकू डा ल्हारक्याल लामालिसें होटल बन्जात, विहारया प्रतिनिधितय्गु मुँज्यां कचवं ज्यंकाः उगु कार्यविधि छ्यलाबुलाय् हयेगु प्रतिबद्धता याःगु खः। लुम्बिनी गुरुयोजना लागा दुने च्वंगु विहार गुम्बाय् तीर्थयात्रीतय्त होटलय् थें सुबिधा ब्यूगु थेंजाःगु विषयकय् थुगु निगू निकायत दथुइ कचवं जुयावयाच्वंगु खः।

होटेल बन्जात व गुम्बा विहारया विषय अन्तर्राष्ट्रियस्तरय् तकं नकारात्मक प्रचार मजुकेत कोषया नेतृत्वय् लुम्बिनी विहार व तीर्थयात्री व्यवस्थापन कार्यविधि २०८१ तयार याःगु खः। कार्यविधिं गुम्बा विहारय् निश्चित ल्याखय् भिक्षु, लामा भन्ते, आर्थिक अवस्था बःमलाःपिं तीर्थयात्री व चन्दादाता तय्त जक तयेगु व होटल बन्जातय्सं तकं गुम्बा विहारय् वःपिं धार्मिक तीर्थयात्रीतय्त दुनुगलंनिसें लसकुस यायेगु कथं कार्यविधि क्वःछ्यूगु धाःगु दु।

राष्ट्रपति रामचन्द्र पौडेलं भारत व मलेसियाया निति नेपाःया आवासीय राजदूत नियुक्त याःगु दु। राष्ट्रपति पौडेलं भारतया निति नेपाःया राजदूतय् डा. शंकरप्रसाद शर्मा व मलेसियाया निति नेपाःया राजदूतय् डा. नेत्रप्रसाद तिम्सिनायात नियुक्त याःगु दु।

मन्त्रिपरिषदया सिफारिशय् नेपाःया संविधान धारा २८२ या उपधारा १ बमोजिम शर्मा व तिम्सिनायात राजदूत नियुक्त याःगु दु धका राष्ट्रपतिया कार्यालयं पिकाःगु विज्ञप्तिइ उल्लेख याःगु दु।

बझाङय् निन्हुया दुने स्वकःतक भुखाय् ब्बःगु दु। बुधवाः न्हिनय् ३ बजे बझाङया धमेना केन्द्रविन्दु जूया ४.१ म्याग्निच्यूडया भुखाय् ब्बःगु दु।

म्हिगः बहनि ५ बजे जुया ८ मिनेटय् धमेना केन्द्र बिन्दु जुया ४.३ म्याग्निच्यूडया भुखाय् ब्बःगु खः। म्हिगः हे १ बजे जुया २ मिनेटय् बझाङया हे रायल केन्द्र जुया ३.९ म्याग्निच्यूडया भुखाय् ब्बःगु खः।

अमेरिकाया छगू स्कूलय् गोली चलेजुयाः निम्ह मनू सीगु दु। प्रहरीया कथं विद्यालयया छम्ह विद्यार्थीं गोली क्ययेकाः निम्ह मनूत सीगु खः।

घटनाय् मेपिं खुम्ह विद्यार्थी घाःपाः जूगु दु। विस्कन्सिन राज्यया छगू निजी क्रिश्चियन स्कूलय् शिक्षक व किशोरी विद्यार्थीपिन्त गोली क्ययेकाः स्याःगु १७ दँया मिसामचाया समाचार बीबीसीं पिथंगु दु।

गोली चलेयाःगु कारण धाःसा सार्वजनिक याःगु मदुनि। घटनाय् घाःपाः जूपिं निम्हेसिगु अवस्था गम्भीर जूगु समाचारय् उल्लेख यानातःगु दु। प्रहरीं छेँजःया ग्वाहालिइ मिसामचाया अनुसन्धान यानाच्वंगु दु।

अनुसन्धानया नितिं विद्यालय लिक्कया लँपु नं बन्द याःगु दु। स्थानीय संचार माध्यमया कथं थुगुसी जक अमेरिकान्यंकं ३८ गू स्कूल सुटिङ जूगु दु।

प्रधानमन्त्री केपी शर्मा ओलीें नगर प्रहरी वनिइगु इलय् जनता आतंकित जुइगु अवस्था वये मज्यु धका धयादीगु दु।

मंगलवाः यल महानगरपालिकाया स्थापना दिवसय् जुगु ज्याझ्वलय् सम्बोधन यायेगु झ्वलय् वयकलं यलया नगर प्रहरी याःगु प्रशंसा तक यानादीगु खः। जनप्रतिनिधि व कर्मचारी तय्स घमण्ड व तनाव मकासे सेवाभावं ज्या यायेमाः धका प्रधानमन्त्री ओलीं धयादीगु खः। ‘नगर प्रहरी खनेगु इलय् जनतां रक्षक वःगु कथं कायेमाः।

नगर प्रहरी वइगु इलय् जनता थःगु सामान याकन याकन सूचका बिस्यू वने म्वालेमाः थज्या आतंक याःगु अवस्था जुइमज्यु,’ प्रधानमन्त्री ओलीं धयादीगु दु। वयकलं जनप्रतिनिधिं शासक व हाकिम खः धका धायेगु प्रवृत्ति ल्वमकेमाः धका धयादीगु खः।

अथेहे वयकलं व्यवस्था हिल, अवस्था मह्यू धइगु भ्रम फैलै यानाच्वपि पाखे सचेत जुइत इनाप यासे प्रधानमन्त्री ओलीं देशय् व्यवस्था हिले धुका पूर्वाधार विकास व रोजगारी अप्पोया यक्को हे त तधःगु उद्योग सञ्चालनय् वःगु न दाबी यानादीगु दु।