सेयर बजाःया न्हापागु दिं थौ आईतवाः निगुगु ल्याखं कुहावःगु दु। थौ आइतवाः २१.६३ ल्याखं घटे जुया सेयर बजाः २७१४.८५ बिन्दुइ कुहावःगु दु।

आइतवाः ०.७९ प्रतिशतं बजाः घटे जूगु दु। कुल ३ सय १६ गु धितोपत्रय् ७९ हजार ३१ कारोबार जूगु दु। कुल १ करोड ३९ लाख ७४ हजार ४ सय ५२ कित्ता सेयर किनबेच जुगुलि कारोबार रकम ६ अर्ब ८३ करोड ६६ लाख ४० हजार ४ सय ७ तका बराबर जुगु दु। आइतवाः व्यापार उपसूचक बाहेक दक्को उपसूचकया भाः कुहावःगु दु।

दकलय् अप्पो विकास बैंक समूहया लगानीकर्ता तयस घाटा नयेमाःगु दु। थुगु उपसूचकया भाः २.२५ प्रतिशत घटे जुगुलि व्यापार उपसूचक ४.९२ प्रतिशतं थहावःगु दु।थौ दकलय् अप्पो सामुदायिक लघुवित्त वित्तीय संस्थाया लगानीकर्ता तय्स कमे याःगु दु।थुगु संस्थाया भाः ८.१९ प्रतिशतं थहावना २ हजार ३ सय ९० तका थ्यःगु दु।

विशाल बजार कम्पनी, आरएसडीसी लघुवित्त वित्तीय संस्था, अपर हेवाखोला हाइड्रो नापं धितोपत्रया भाः थहावंगु दु। ग्रिन डेभलपमेन्ट बैंकया धितोपत्र याःगु भाः ७.९१ प्रतिशतं घटे जूया १ हजार २ सय ५८ तका थ्यःगु खः।

पिपुल्स हाइड्रो, विन नेपाल लघुवित्त वित्तीय संस्था, प्रभु इन्स्योरेन्स, महालक्ष्मी विकास बैंकसहित लगानीकर्ता तय्स यक्को गुमे याःगु दु सा हिमालयन रिइन्स्योरेन्सया शेयर यक्को कारोबार जूगु दु।

प्रधानमन्त्री केपी शर्मा ओलीं मिसा व मिजंया समान ब्वतिपाखें समाजया फुक्कं ख्यलय् सकारात्मक ह्यूपाः हयेत आवश्यक जूगु धयादीगु दु। उद्योग, वाणिज्य नापं आपूर्ति मन्त्रालय व नेपाल उद्योग परिसङ्घपाखें थौं थन ग्वसाः ग्वःगु मिसा नेतृत्व सम्मेलनया उलेज्या यासें प्रधानमन्त्री ओलीं नेपाली परम्परा व संस्कृतिं मिसातय्त देवीसरह मानेयासें परिवर्तनशील व गतिशील शक्तिया कथं चित्रण यानातःगुलिं मिसातय्गु समान ब्वतिया आवश्यक जूगुलिइ बः बियादिल।

“रथया छचाः घःचालं जक रथ न्ह्याइ मखु, उकिं झीसं मिसा व मिजंया समान ब्वति दयेकाः मुक्कं समाजयात न्ह्यःने यंकेमाःगु दु। सामाजिक न्याय व समानता स्थापित यानाः गरिबी उन्मूलन यायेत झीसं निजी क्षेत्रलिसे जानाः ज्या यानाः यंकेफयेमाः। सामाजिक न्याय व समानता स्थापित यानाः गरिबी म्हो यायेगुलि निजी ख्यःलिसे जानाः ज्या यायेमाः”, प्रधानमन्त्री ओलीं धयादिल, “राष्ट्रपति, प्रधान न्यायाधीशलिसें विशिष्ट पदय् झीसं मिसापिंत स्थापित यायेधुनाःगु दु।

राजनीतिइ मिसापिनिगु ब्वति अप्वोया वःगु दु। थ्व लय्ताया विषय खः तर झीसं थुकी जक सन्तुष्ट जुयाः च्वनेमज्यु। झीसं शिक्षा, उद्यम व रोजगारीया ख्यलय् मिसातय्त न्ह्यने छुवयेमाः।”सरकार व निजी ख्यःया सहकार्य तब्याःका उद्यम विकास नापं मिसा सशक्तीकरणयात प्रोत्साहन ब्यूगु धयादिसें वय्कलं अर्थतन्त्रया विकासया नापं सुशासन प्रवद्र्धन यायेत सरकार प्रतिबद्ध दु धयादिल।

प्रधानमन्त्री ओलीं धयादिल, “झी न्ह्याः वनेमाः। लिउने वनेमज्यू। ब्याक गियर ला गबलेगबलें चाःतूगु लँय् जक तयेगु खः। लोकमार्गय् ब्याक गियर तइमखु। लोकतन्त्र झीगु राजमार्ग खः।” प्रधानमन्त्रीं कानुनत ज्या तःक्यंकेत मखुसें विकासया निंतिं ग्वाहालिमि जुइगु कथं दयेकेमाःगु धयादिसें सम्मेलनपाखें वःगु सुझाव अध्ययन यानाः सरकारया नीति, व्यवहार व कानुनतयेत परिस्कृत यायेगु प्रतिबद्धता प्वंकादिल।

उद्योग, वाणिज्य नापं आपूर्तिमन्त्री दामोदर भण्डारीं निजी ख्यःया सहकार्यय् औद्योगिकीकरणया प्रवद्र्धनयात आःया सरकारं प्राथमिकता बियागु धयादिल । वय्कलं सरकारी निकायस स्वदेशी वस्तुया छ्यलाबुलाया सम्बन्धी कार्यविधि जारीनापं सुधारया माध्यमपाखें आर्थिक ख्यःया विकासया निंतिं ज्या जुयाच्वंगु धयादिल।

उगु ज्याझ्वलय् प्रधानमन्त्री ओलीपाखें राष्ट्रिय फुटबल कासामि प्रीति राई व सामाजिक अभियन्ता रुक्साना कपालीयात हना दिल।

येँया नागार्जुन नगरपालिका–७ स्यूचाटारय् म्हिगः बहनी छगू कच्ची छेँय् मिँ च्याःगु दु। स्थानीय कृष्णहरि श्रेष्ठया छतः जाःगु कच्ची छेँ (जस्ताया टहरा)य् बहनी ९ बजे जुया ४० मिनेतय् च्याःगु मिं १० बजे जुया ५० मिनेतय् मिँ स्यागु धकाः जिल्ला प्रहरी परिसर येँया प्रवक्ता, प्रहरी उपरीक्षक अपिल बोहरां धयादिल।

वय्कःया कथं चिब्यागु थाय् जूगुलिं तग्वःगु दमकल दुहां वने मफया मिं स्यायेत थाकूगु जुसां चन्द्रागिरि नगरपालिका व यल उपमहानगरपालिकाया चिग्वःगु दमकलया ग्वाहालिइ सुरक्षाकःमि व स्थानीयतय्सं मिँ स्यागु खः। मेमेगु थी थी थासं प्यंगः दमकल वःगु जुसां सतक चिब्या जुयाः अन थ्यंके मपूmगु खः।

मिँ च्यानाः थ्यंमथ्यं १५ लख  क्षति जूगु अनुमान याःगु दु। मिँ स्यायेत कालिमाटी प्रहरी वृत्तया प्रहरी प्रमुख रुपक खड्काया नेतृत्वय् छगू पूचः अन वंगु खः । स्वय्म्भू वृत्तया प्रहरी पूचः नापं छ्वःगु खः। मिँ च्यानाः अन्न, सिंया फर्निचर, वसः, छेँया बसजाः लिसेंया सामानत च्याःगु दु। विद्युत् चुहावत जुयाः मिँ च्यागु धकाः अनुमान यानाः प्रहरीं धाःगु दु।

नेपाल आयल निगमं इन्धनया भाः घटे याःगु दु। पेट्रोल लिटरं न्यातका नाप डिजेल व मचिकनय् लिटरं प्यतका घटे याःगु दु।

थौ शनिवाः चान्ह्यःनिसे लागू जुइगु कथं निगमं इन्धनया भाः समायोजन याःगु दु। आः स्वनिगः दुने पेट्रोल लिटरं १६३ तका नापं डिजेल व मचिकं लिटरं १५१ तका न बिक्रीवितरण जुइ।

नेपाल आदिवासी जनजाति पत्रकार महासंघ (फोनिज) बागमती प्रदेशया स्वक्वःगु महाधिवेशन क्वचाःगु दु। उगु महाधिवेशनपाखे अध्यक्षय् युवराज श्रेष्ठ सर्वसम्मत निर्वाचित जुगु दु।

अथेहे उपाध्यक्षय् दिल बहादुर लामा, मिसा उपाध्यक्षय् अनिता डंगोल व महासचिवय् राजु नापित जूगु दु। सचिव (संस्थागत) य् हिरालाल गुरुङ्गसचिव (मिसा) य्  निशा गुरुङ्ग, कोषाध्यक्षय् शंकर श्रेष्ठ व लेखा समिति संयोजकय् अशोक सुजन श्रेष्ठ निर्वाचित जुगु खः।

दुजलय् वावुकाजि श्रेष्ठ, उद्भव कुमार श्रेष्ठ, मानकाजी तामाङ्ग, रत्नकाजी प्रजापती, रवि महर्जन, जर्नेल घले, तेज नाहिरिङ्ग राई, श्यामलाल लामा, विशाल राज राई व लेखा समिति सदस्यय् निर बहादुर तामाङ्ग निर्वाचित जुगु दु। संघीय प्रतिनिधिइ सरस्वती श्रेष्ठ, राजेश रुम्बा लामा व श्याम राना मगर निर्वाचित जुगु खः।