मंगलवाः थौ सेयर बजाः २.२३ प्रतिशतं थहावःगु दु। ५८.६३ ल्याखं थहावना नेप्से २६८२ ल्याः कायम जूगु दु। बजाः थहावंसा कारोबार रकम छु भचा म्हो जुगु दु।

थौ २३८ गु कम्पनी भाः थहावंगु खःसा १४ गु कम्पनीया भाः कुहावःगु दु। थौ निर्जीवन बीमा समूह दकलय् अप्पो ३.४८ प्रतिशतं थहावःगु दु। बैंकिङ १.३८, विकास बैंक २.९५, फाइनान्स २.१२, होटल नाप पर्यटन २.७८, हाइड्रोपावर ३.३०, लगानी १.६६, जीवन बीमा २.३१, उत्पादन नाप प्रशोधन १.१२, माइक्रोफाइनान्स २.५४, मेमेगु २.५१ नाप व्यापार १.८३ प्रतिशतं थहावःगु खः।

च्याःगु कम्पनीया भाः १० प्रतिशतं थहावःगु दु। सप्तकोशी विकास बैंक, जोशी हाइड्रोपावर, ग्रिन डेभलपमेन्ट बैंक, नारायणी डेभलपमेन्ट बैंक, सिन्धु विकास बैंक, भूगोल इनर्जी, एसियन हाइड्रोपावर हिमस्टार ऊर्जाया भाः १० प्रतिशतं थहावःगु खः।

कालिका पावर ९.८४, सयपत्री हाइड्रोपावर ९.८३ प्रतिशतं थहावःगु दु।दकलय् अप्पो थौ नेपाल पुनर्बीमा, युनिभर्सल पावर, हिमालयन डिस्टिलरी, शिवम् सिमेन्ट व हिमालयन रिइन्स्योरेन्स कारोवार जुगु दु।

नक्कली भुटानी शरणार्थी प्रकरणया द्धपनय् कारागारय् च्वनाच्वम्ह टोपबहादुर रायमाझी हाकन कारागारय् हे लिहावःगु दु।

जेनजीको प्रदर्शनया झ्वलय् वंगु भदौ २४ गते सुन्धारास्थित कारागार पिहावंगु खः।रायमाझी नाप सुन्धारा कारागारपाखे ३३ सय कैदीबन्दी बिस्यू वंगु खः।

देय् न्यकं कारागारय् च्वपि १४ हजार स्वया अप्पो कैदीबन्दी बिस्यू वंगु खः।

सरकारं रामेश्वर दंगालयात गृहसचिवया जिम्मेवारी तोके याःगु दु।जेन–जी आन्दोलन दमनया भूमिका म्हितूगु धाःसे गृहसचिव गोकर्णमणि दुवाडीया चिइका रक्षासचिव जुयाच्वंम्ह दंगालयात जिम्मेवारी तोके याःगु दु।

प्रधानमन्त्री लिसे मन्त्रिपरिषद कार्यालय स्रोतं ब्यूगु जानकारी कथं छन्हु निन्हु लिपा थुगु निर्णय कार्यान्वयन जुइ धका धाःगु दु।

नेकपा एमालेया अध्यक्ष केपी शर्मा ओली सार्वजनिक जुगु दु।ख्वपया गुन्डुस्थित निवासय् नेता–कार्यकर्ता नाप ओली सार्वजनिक जूगु खः।

ओली सार्वजनिक जुइवं न्हुगु निवासय् नेता–कार्यकर्ता नापलायेगु ज्या न्ह्यागु दु।

वंगु भदौया २३ व २४ गते जेनजी विद्रोह लिपा प्रधानमन्त्री पदपाखे राजीनामा बिया ओली सार्वजनिक जुगु मदुनि।

सञ्चार नापं सूचना प्रविधिमन्त्री जगदीश खरेलं वइगु फागुन २१ गते निर्वाचन, भ्रष्टाचार नियन्त्रण व पुनःनिर्माणया ज्याय् सरकार केन्द्रीत जुइगु धयादीगु दु।थौं सिंहदबारया मन्त्रालयय् पदभार ग्रहणलिपा मन्त्रालयया उच्च कर्मचारी व मातहतया निकायया प्रमुख तय्त निर्देशनलिसेंया मन्तव्य बिसें वय्कलं जनतां महसुस याइ कथं अन्तरिम सरकारं ज्या याइ धयादिल।

आःया सरकार जेनजीया बलिदानया जगय् धस्वाःगु न्ह्यथनादिसें मन्त्री खरेलं न्हूगु पुस्ता नापं नागरिकतय् कार्यदेश कथं सुशासन कायम, भ्रष्टाचार नियन्त्रणया आधार निर्माण व जनतायात मौलिक अधिकारया महसुस याकेगु कथं ज्या यायेगु धयादिल। “जिमित जेनजी व नागरिकतपाखें तसकं तःधंगु कार्यदेश मदु, सरल जू, तर तसकं जटिल व चुनौतीपूर्ण ज्या दु”, वय्कलं धयादिल, “भौतिक पुनःनिर्माणं जक मगाः।

जनताया मनय् घाः जूगु, उकिया दाग अझ नं दनि। उकियात पुनःनिर्माण यायेत उलि अःपु मजू। उकिं कुंकुलाय् च्वनाच्वंपिं जनतातय् छेंतक सरकार व झीपिं सकसिगु नं उपस्थिति दयेमाः। उगु उपस्थितिं सुशासन, आर्थिक समृद्धि, रोजगारी, शिक्षा, स्वास्थ्यलिसें संविधानअन्तर्गतया मौलिक अधिकार कार्यान्वयनया महसुस जूसा जक घालय् वासः तःगु जुइ।” मन्त्री खरेलं मन्त्रालयया कर्मचारीतय् ज्याय् थःम्हं छुं नं हस्तक्षेप मयायेगु कनादिसें स्वतन्त्र जुइक प्रभावकारी कार्यसम्पादनया निंतिं इनाप यानादिल। राजनीतिक हस्तक्षेप व दलीयकरण मखुसे कर्मचारीतन्त्रया योग्यता, क्षमता कथं ज्या जूसा सार्वजनिक सेवा प्रभावकारी जुइगुलिइ वय्कलं भलसा प्वंकादिल।

मन्त्री खरेलं अन्तरिम सरकारं चीहाकःगु इलय् लिच्वः वइगु ज्या यायेत सकसिके नं ग्वाहालि व सहकार्यया अपेक्षा यानाच्वंगु धयादिल। “झीसं खरानी थाथा यानाः झीगु जीवन व धरोहर निर्माण यायेमाः। खुलाय् कायापलट जुइमखु। अथेसां, छुंछुं आशाया जग निर्माण यायेत वनेमाः। उकिइ मन्त्रालयया सचिवलिसें फुक्क कर्मचारीतय् अनुभव नापं मेपिं विज्ञपाखें ग्वाहालिया अपेक्षा यानाच्वनागु दु”, वय्कलं धयादिल। मन्त्री खरेलं मन्त्रालयं ‘आर्टिफिसियल इन्टेलिजेन्स’ (एआई) ‘पोलिसी’ व ‘डिजिटल फ्रेमवर्क’ य् केन्द्रीत जुयाः ज्या याइगु धयादिल।