उद्योग, वाणिज्य नापं आपूर्तिमन्त्री अनिलकुमार सिन्हां सिंहदरबारया मन्त्रालय पदबहाली यानादीगु दु।

पदबहाली याये धुंकाः वय्कलं जेनजी आन्दोलनया झ्वलय् क्षति जूगु भवन निर्माण यायेबलय् फयां फक्व स्वदेशी सामाग्री हे छ्यलेगुसम्बन्धी न्हापांगु निर्णयय् ल्हाःचिं तयादिल। उगु झ्वलय् वय्कलं पुननिर्माण याःबलय् छुं भतिचा थिके जूसां नं स्थानीय उत्पादन हे छ्यलेत हःपाः बिइगु नीति सरकारया दूगु धयादिल।

मन्त्री सिन्हां उद्योग व्यवसाययात सहजीकरण मयायेकं देशय् आर्थिक उन्नति याये फइमखु धासें थ्व पुलाखं छुं भतिचा उद्योग विकासय् ग्वाहालि जुइगु भलसा प्वंकादिल। वय्कलं धयादिल, “आःया मू तातुना धइगु घाःपा जूपिं व मदुपिनि छेँजःपिंत रोजगारीया ह्वःताः चूलाकेगु व युवातय् सीप व्यवस्थापनय् बः बिइगु खः।

युवातय्त देशय् हे च्वनेगु वातावरण दयेकेत सीप विकास व व्यवस्थापनया आवश्यकता दु। थुकिइ हे न्ह्यज्याये।” मन्त्री सिन्हां अन्तरिम सरकारया न्हापांगु आज्जु स्वच्छ, निष्पक्ष व शान्तिपूर्ण जुइक चुनाव याकेगु व राज्य सञ्चालनया भाला निर्वाचित सरकारयात लःल्हायेगु जूगु ध्वाथुइकादिल। वय्कलं वइगु चुनावय् न्हूपिंत सदनय् स्वयेदइगु आशा प्वंकादिल।

“खुलां हे यक्व उपलब्धि जुइकेगु आशा मयाये। कार्यविधिगत खँय् सहजीकरण यायेगु लिसें अनलाइन प्रविधियात छ्यलेगु बिचाः यानागु दु”, मन्त्री सिन्हां धयादिल, “जेनजीतय्सं ब्यूगु योगदान सितिं मवनीकथं ज्या याये।” मन्त्री सिन्हां सर्वोच्च अदालतया पूर्वन्यायाधीश खः।

कृषि नापं पशुपन्छी विकासमन्त्री डा मदनप्रसाद परियारं पदभार ग्रहण यागु दु।

सिंहदरबारया मन्त्रालय पदभार ग्रहण यानाः वय्कलं नेपाः व कोरिया दथुइ आलु व वा बालीइ अनुसन्धान यायेत थ्व स्वयां न्ह्यः जूगु सम्झौतायात कार्यान्वयन यायेत समन्वय समिति गठन यायेगु प्रस्ताव सदर यानादिल। मन्त्रालयया सचिवया नेतृत्वय् गठन जुइगु समितिं थुकिइ समन्वयया ज्या याइगु धाःगु दु।

पदभार ग्रहण यायेधुंकाः सञ्चारकःमि खँल्हाबल्हा यानादिसें मन्त्री डा परियारं निर्वाचनयात प्राथमिकताय् तयाः कृषि ख्यलय् छुंछुं बिस्कंगु ज्या यायेगु प्रतिबद्धता यानादिल। शासकीय सुधार व बेथिति मदयेकेगु ज्याय् सरकार न्ह्यचिलीगु वय्कःया धापू खः।

मन्त्री डा परियारं आःया सरकारयात शासकीय सुधार, बेथितिया अन्त्य नापं निर्वाचन याकेत वःगु ‘म्यान्डेट’ पूवंकेत थःगुपाखें मुक्कं योगदान दइगु प्रतिबद्धता प्वंकादिल।

सञ्चार नापं सूचना प्रविधिमन्त्री जगदिश खरेलं पदभार ग्रहण यानादीगु दु।

थौं राष्ट्रपतिया ज्याकुथिइ पद नापं गोपनीयताया शपथ ग्रहण यानाः सिंहदरबारय् च्वंगु ज्याकुथिइ वनाः वय्कलं पदभार ग्रहण यानादिल।

पदभार ग्रहण यानाः मन्त्री खरेलं येँलिसें देय्या प्रमुख १० गू सहरया सार्वजनिक थासय् न्यालाया दुने निःशुल्क वाइफाइ उपलब्ध याकेगु न्हाापांगु निर्णय यानादीगु मन्त्रालयं धाःगु खः।

शिक्षा, विज्ञान नापं प्रविधिमन्त्री महावीर पुनं पदभार ग्रहण यानादीगु दु।

थौं राष्ट्रपतिया ज्याकुथिइ पद नापं गोपनीयताया शपथ ग्रहण यानाः केशरमहलय् च्वंगु ज्याकुथिइ वनाः वय्कलं पदभार ग्रहण यानादिल। पदभार ग्रहण यानाः नवनियुक्त मन्त्री पुनं विज्ञान नापं प्रविधि ख्यःलिसे सम्बन्धित प्यंगू सल्लाहकार समिति गठन यायेगु निर्णयय् ल्हाःचिं तयादिल।

अन्तरिक्ष प्रविधि, न्यूक्लियर टेक्नोलोजी, बायोटेक्नोलोजी व सूचना प्रविधि नापं एआई सम्बन्धी सल्लाह बिइत सल्लाहकार समिति गठन यानादीगु मन्त्रालयं धाःगु खः। समितिया कार्यक्षेत्र प्रस्ताव यायेधुंकूगु दु धाःसा समितिइ दुजः तयेगु क्वःछीगु धाःगु खः।

राष्ट्रपति रामचन्द्र पौडेलयान्ह्यःने नेपाल सरकारया नवनियुक्त प्यम्ह मन्त्रीपिंसं थौं पद नापं गोपनीयताया शपथ काःगु दु।

राष्ट्रपति पौडेलं राष्ट्रपति ज्याकुथि शीतल निवासय् थौं ग्वसाः ग्वःगु विशेष समारोहय् नवनियुक्त मन्त्रीत अनिलकुमार सिन्हा, महाविर पुन, मदनकुमार परियार व जगदीश खरेलयात शपथ यागु खः।

नवनियुक्त मन्त्री सिन्हां उद्योग, वाणिज्य नापं आपूर्ति, कानुन न्याय नापं संसदीय मामिला व भूमिव्यवस्था, सहकारी नापं गरिबी निवारण मन्त्रालय, मन्त्री पुनं शिक्षा, विज्ञान नापं प्रविधि, मन्त्री परियारं कृषि नापं पशुपन्छी व मन्त्री खरेलं सञ्चार नापं सूचना प्रविधि मन्त्रालयया भाला कःघानादिल ।शपथ समारोहय् उपराष्ट्रपति रामसहायप्रसाद यादव, प्रधानमन्त्री सुशीला कार्की, प्रधानन्यायाधीश प्रकाशमानसिंह राउत, सभामुख देवराज घिमिरे, राष्ट्रियसभाया नायः नारायणप्रसाद दाहालया ब्वति दूगु खः।

लिसें समारोहय् संवैधानिक निकायया प्रमुख नापं पदाधिकारी, नेपाल सरकारया उच्चपदस्थ अधिकृत, सुरक्षा निकायतय् प्रमुख नापं अधिकारीलिसेंपिनिगु नं ब्वति दूगु खः। ‘जेनजी’ पुचःया आन्दोलन व अनंलिपा ब्वलंगु विषम परिस्थितिया दथुइ राष्ट्रपति पौडेलं पूर्वप्रधानन्यायाधीश कार्कीयात थ्व हे भदौ २७ गते अन्तरिम सरकारया प्रधानमन्त्री कथं नियुक्त यानादीगु खः।