प्रधानन्यायाधीश चोलेन्द्रशम्शेर जबराया राजीनामा माग याना आन्दोलन यानाच्वंपि वकिलपिन्स थौं स्वनिगःया दक्को अदालत व न्यायाधिकरणय् धर्ना बिइगु जुगु दु।

नेपाल बार एशोसिएसनं घोषणा याउगु निगुगु चरणया आन्दोलन कार्यक्रम अन्तर्गत थौं सुथय् १० बजेनिसे १२ बजे तक हाकूगु पट्टी चिना अदालत व न्यायाधिकरणय् धर्ना बिइ त्यंगु खः।

नेपाल बारं थ्व स्वया न्ह्यः सर्वोच्च अदालत परिसरय् प्रदर्शन व धर्ना बिया वयाच्वंगु खः। बारं प्रधानन्यायाधीशयागु राजीनामा बिइत अल्टिमेटम बिउगुसा राजीनामा मबिउगुलि आन्दोलन दिउगु मदुनि।

बारं स्वन्तिया बिदा सिधयेवं निगुगु चरण अन्तर्गत थप आन्दोलनया ज्याझ्वःया घोषणा याउगु खः। प्रधानन्यायाधीशयात सर्वोच्चया न्यायाधीशपिन्स हे असहयोग याना वयाच्वंगु खः।

तर प्रधानन्यायाधीशं न्हिन्हि पेसी तोके यानाच्वंगु दु।

आराध्यदेव सुद्र्यःया उपासना यानाः हनीगु नखः छठ थौं क्वचाःगु दु । लुयाच्वंम्ह सुद्र्यःयात अघ्र्य बियाः छठ नखः क्वचायेकूगु खः ।

छठ क्वचायेकेत व लुयाच्वंम्ह सुद्र्यःयात पूजा यायेत राजधानी येँलिसें तराईया थीथी जिल्लाय् भक्तजन खुसि, पुखू सिथय् चच्छि जाग्राम च्वंगु खः । छठया स्वन्हुगु अले मू दिं म्हिगः बिनाच्वंम्ह सुद्र्यः व षष्ठी मातायात अघ्र्य ब्यूपिं भक्तजनं थौं लुयाच्वंम्ह सुद्र्यःया पूजा आराधना याःगु खः ।

येँय् गुह्येश्वरी, तिसापुखू, पलेस्वांपुखू लिसेंया पुखू अले वाग्मती, नख्खु व विष्णुमतीलिसेंया खुसि सिथय् भक्तजनं पूजा याःगु खः । उखे, जनकपुरया ऐतिहासिक गंगा सागर, धनुष सागर, अरगजा पुखू, दशरथ तलाउलिसें निगू दर्जन स्वयां अप्वः पुखुलिइ अपसं च्वंपिं म्वःम्वः हे मुंगु खः ।

भमचा थें छायेप्यूगु पुखुलिइ द्वलंद्वः भक्तजन मुनाः पूजा आराधना याःगु खः । वीरगञ्जया घडीअर्वा पुखुलिइ नं छठ उत्तिकं झःझः धाःगु खः । झापाया मेची, विरीङ, मावा, रतुवालिसेंया खुसि सिथय् नं भक्तजन मुनाः पूजा आराधना याःगु खः ।

सप्तरीया कोशी व्यारेज, भारदह, छिन्नमस्ता, कञ्चनपुर सदरमुकाम राजविराजलिसेंया थासय् नं उत्तिकं उल्लासलिसें नखः हंगु खः । पारिवारिक सुख, शान्ति, कल्याण, ल्वचं मुक्ति अले थीथी मनंतुना पूवनेमा धकाः सुद्र्यःया उपासना यानाः थुगु नखः हनेगु याइ ।

थौंनिसे जनगणना सुरु जुइगु दु। हरेक झीदँय् छकः जनगणना जुइगुलि थुगु दँया थौं २५ कात्तिकनिसे सुरु जुया ९ मंसिरतक न्ह्याइगु खः।

राष्ट्रपतिको विवरण संकलन याना जनगणनाया शुरुआत याइगु धका केन्द्रीय तथ्यांक विभागया महानिर्देशक नेविनलाल श्रेष्ठं जानकारी बिउगु दु।

थुकिया लागि गणकपि थौं सुथय ९ः३० बजे राष्ट्रपति विद्यादेवी भण्डारीया निवासय् वनेत्यंगु खः। वया लिपा ११ बजे प्रधानमन्त्री शेरबहादुर देउवा व न्हिनय् १ बजे उपराष्ट्रपति नन्दबहादुर पुनया थाय् गणकपि वनेगु ज्याझ्वः दु।

विवरण संकलन यायेत देयन्यक ४० हजार गणक व साढे ८ हजार सुपरीवेक्षक परिचालित याउगु दु।

सरकारं हाकनं इन्धनया भाः थकागु दु । वंगु चान्हय् निसे लागू जुइकथं नेपाल आयल निगमं ग्याँसनापं पेट्रोल, डिजेल, मचिकं व हवाई इन्धनया भाः थकागु दु।

आः पेट्रोलया १३६ तका कायम याःगु दु। अथेहे डिजेल÷मचिकंया भाः लिटरं स्वतका थकयाः ११९ तका थ्यकूगु दु। आन्तरिक हवाई इन्धनया भाः लिटरं न्यातक थकयाः १०१ तका थ्यकूग दु।

अथेहे एलपी ग्यासय् साविक बिक्री मूल्यय् सिलिण्डरया ७५ तका थकयाः १,५७५ तका कायम याःगु दु। थ्वया न्ह्यः निगमं वंगु कात्तिक १२ गते डिजेल, पेट्रोल व मचिकंया भाः स्वतका लिसें ग्यास सिलिन्डरय् ५० तका थकागु खः।

वंगु २४ घण्टाया दुने देयन्यक थप ४४० म्हेसित कोरोना भाइरस संक्रमण पुष्टि जूगु दु।

५ हजार ४ सय ७ म्हेसिगु पीसीआर परीक्षण यागुलि ३८७ म्ह व १ हजार ४ सय ७ म्हेसित एन्टिजेन परीक्षण याउगुलि ५३ म्हेसित याना ४४० म्हेसित कोरोना भाइरस संक्रमण जुगु खनेदुगु दु धका स्वास्थ्य तथा जनसंख्या मन्त्रालयं धाउगु दु।

अथेहे २४ घण्टाय् कोरोना संक्रमणं खुम्ह सीउगु दु सा ४७४ म्ह कोरोनामुक्त जुगु दु।