नेप्सेय् लगातार कुहावया हाकन २६०० अंक विन्दुइ कुहावंगु दु। वंगु स्वन्हु कारोबारय् नेप्से करिब १६० अंकय् कुहावगु दु।

स्वन्ति न्ह्यः २८४८.८४ अंकय् बन्द जुया नेप्से स्वन्हुया दुने १५८.५५ अंकय् कुहावंगु दु। वंगु सोमबाः जक १९ अंक, मंगलबाः ७९.७९ अंकय् कुहावंगु। वाःया लिपागु दिं थौं हाकन नेप्से ५९.५७ अंक कुहावया २६९०.२९ अंकय् बन्द जुगु दु। बजाः परिसूचक नाप दक्को उपसूचकय् कुहावंगु दु।

वित्त कम्पनी उपसूचकय् अप्वो ४.२२ प्रतिशत व विकास बैंक उपसूचकय् ३.६१ प्रतिशत, लगानी उपसूचक ३.०५ प्रतिशतं घटे जुगु दु। अथेहे, बजारयात लिड याइगु बैंकिङ उपसूचकय् न १.५७ प्रतिशतं कुहावंगु दु। बजाः परिसूचक नाप कारोबार रकम न कुहावंगु दु। थौं नेप्से ९४ लाख ७५ हजार ९३६ कित्ता सेयर किनबेच जुगुलि ५ अर्ब ११ करोड ९६ लाख ३ हजारया कारोबार जुगु दु। थौं नेप्सेय् कारोबार रकमय् महालक्ष्मी विकास बैंक न्ह्यने लाउगु दु।

बैंकया दकलय् अप्वो ४७ करोडया कारोबार जुगुलि नबिल बैंकं ३१ करोड व आईसीएफसी फाइनान्सया २९ करोड सेयर कारोबार जुगु दु। नेप्सेय् कुल १८७ कम्पनीया सेयर कारोबारय् १७१ कम्पनीया सेयरया भाः कुहावंगु दु सा १६ गु कम्पनीया भाः थहावंगु दु। तेह्रथुम पावर कम्पनी, मानुषी लघुवित्तया सेयर भाः १० प्रतिशतं थहावना सर्किट भाः थ्यंगु दु।

अथेहे, साहस ऊर्जाया सेयर भाः ७.६४ प्रतिशत, गुडविल फाइनान्सया सेयर भाः ३.९३ प्रतिशत व  सामुदायिक लघुवित्तया सेयर भाः ३.४४ प्रतिशतं थहावंगु दु। आईसीएफसी फाइनान्स व महालक्ष्मी विकास बैंकया सेयर भाः करिब १० प्रतिशतं घटे जुया नकारात्मक सर्किट भाः जुया बन्द जुगु दु।

अथेहे, शिवश्री हाइड्रोपावर ७.३९ प्रतिशत, बरुण हाइड्रोपावर ६.२७ प्रतिशत व युनियन हाइड्रोपावर ६.१४ प्रतिशतं घटे जुगु दु।

वंगु २४ घण्टाया दुने देयन्यक थप ३१७ म्हेसित कोरोना भाइरस संक्रमण पुष्टि जुगु दु।

९ हजार ६ सय ९ म्हेसिगु पीसीआर परीक्षण याउगुलि ३०१ म्ह व ३ हजार ४४ म्हेसिगु एन्टिजेन परीक्षण याउगुलि १६ म्ह याना ३१७ म्हेसित कोरोना भाइरस संक्रमण खनेदुगु धका स्वास्थ्य तथा जनसंख्या मन्त्रालयं धाउगु दु।

अथेहे २४ घण्टाय् कोरोना संक्रमणं खुम्ह सीउगु दु सा २७९ म्ह कोरोनामुक्त जुगु दु।

थौं हाकनं लुँ वहःया भाः थहावंगु दु।

लुँया भाः थौं तोलां १३ सय रुपैयाँ थहावंगु दु। म्हिगः तोलाया ९२ हजार ७ सय रुपैयाँ जुगु लुँ थौं ९४ हजार रुपैयाँ थ्यंगु दु धका नेपाल सुन चाँदी व्यवसायी महासङ्घं धाउगु दु।

अथेहे वहः न नीतका थहांगु दु। वहः तोलां नीतका थहावना १२ सय ७० रुपैयाँ थ्यंगु दु।

सर्वोच्च अदालतया असन्तुष्ट न्यायाधीशपि इजलासय् लिहावसां कानून व्यवसायीपि बहस पैरवीइ मवनिइगु जुगु दु।

असन्तुष्ट न्यायाधीशपि मध्ये इजलासय् लिहावनिइगु संकेत क्यंगुसा नेपाल बार एसोसिएसनं थज्याउगु अवस्थाय् ‘बन्दी प्रत्यक्षीकरण’ बाहेकया छु न निवेदनया सुनुवाइ मयाइगु जुगु दु।

नेपाल बार एसोसिएसनया महासचिव लिलामणी पौड्यालं न्यायाधीशपि इजलासय् लिहावंगु अवस्थाय् न बारं थःगु अडानपाखे विचलित मजुइगु प्रतिक्रिया बिउगु दु।

नेवाः पत्रकार राष्ट्रिय दबू ख्वप कच्चाया च्याक्वःगु साधारण  क्वचाल।

दबूया केन्द्रिय अध्यक्ष सुरजबिर बज्राचर्यं नेवाः पत्रकारपिनिगु हकहितया लागि स्थापना जुगु धका धासे दबू न नेवा पत्रकारपिनिगु क्षमता अभिबृद्धिया तालिम आवश्यक दु धका धयादीगु खः। उगु ज्यााझ्वलय् नेपाल सम्वत ११४२ या क्यालेन्डर न बिमोचन याउगु दु।

राससया पत्रकार रत्न श्रेष्ठं थः मां अबुया नामं नगद १० हजार नाप मदुपि हरिलाल श्रीलक्ष्मी स्मृति नेवाः पत्रकारिता पुरस्कारया स्थापना यायेगु ब्यवस्था जुगुलि नेवाः पत्रकारपिन्त उत्साह जुइगु ज्या जुगु धका धाउगु दु। अथेहे दबूया केन्द्रिय सचिव केके मानन्धरं नेवाः पत्रकारपि यक्को दु सा अझ न मुख्य थासय् थ्यके मफुगु व संचार क्षेत्रय् न्ह्यन च्वना ज्याये मफुगु धका धाउगु दु।

ज्याझ्वःया सभाध्यक्षता दबू ख्वप कचा अध्यक्ष रामगोपाल तमखु न थःगु कार्यकालया न्हापांगु दँ छु भचा ज्या जूसा कोभिडया कारण गुलि यायेमाःगु उलि मजुगु धका धाउगु खः।

अथेहे केन्दया सहकोषाध्यक्ष बाबुकाजी साछें श्रेष्ठं न थःगु बिचाः तयादीगु खः।