मदन पुरस्कार गुठीं थौं बुधबाः २०७७ या ‘मदन पुरस्कार’ च्वमि भगिराज इङ्नाम व ‘जगदम्बा श्री’ सम्मान नृत्यशास्त्री भैरब बहादुर थापायात लल्हागु दु।

बुधबाः यलय् जुगु ज्याझ्वलय् गुठीया अध्यक्ष कुन्द दीक्षितं निम्हं स्रष्टा सिरपाः व सम्मान लल्हागु खः।

च्वमि इङ्नामं अनुसन्धानमुलक सफू ‘लिम्बुवानको ऐतिहासिक दस्तावेज संग्रह सम्वत् १७१९–२०२०’ यात मदन पुरस्कार बिउगु खः।

अथेहे नृत्यशास्त्री थापायात खुगु दशक स्वया अप्वो नेपाली नृत्यय् याउगु योगदानया लागी जगदम्बाश्री लल्हागु खः।

नेपाली सेनाया प्रधानसेनापति प्रभुराम शर्मां भारतीय स्थल सेनाया मानार्थ महारथीया सम्मान काउगु दु।

भारतया राष्ट्रपति रामनाथ कोविन्दं बुधबाः राष्ट्रपति भवनय् ग्वसाः ग्वंगु विशेष समारोहय् शर्मायात मानार्थ महारथीया दर्ज्यानी चिं लल्हाःगु दु। नेपाली सेनाया नेतृत्व सम्हालेयाये धुका शर्माया थ्व न्हापागु विदेश भ्रमण खः।

मंगलबाः दिल्ली वःम्ह शर्मां भारतया चिफ अफ डिफेन्स स्टाफ (सीडीएस) विपिन रावतयात नापलायेगु ज्याझ्वः दु। भ्रमणया झ्वलय् वयकलं भारतया राजनीतिज्ञपि नाप भेटवार्ता यायेगु ज्याझ्वः दु।

मंगलबाः बहनि वयकलं भारतीय समकक्षी मनोज मुकुन्द नरभणेनाप भेटवार्ता याइ। सन् १९५० निसे छगु देशं मेगु देशय् मानार्थ सेना प्रमुख सम्मान बिइगु चलन जुया वयाच्वंगु खः।

उगु कथं नरभणे न २१ कात्तिक २०७७ य् नेपाली सेनाया मानार्थ महारथीया सम्मान बिइ धुकुगु दु।

सत्तारुढ दल नेपाली कांग्रेसया नेता प्रकाशमान सिंहं गठबन्धनं दयेकूगु राजनीतिक समन्वयन समिति म्वाःगु धयादिगु दु । सरकारयात कजय् काइगु संयन्त्र दयेके म्वाःगु नेता सिंह धयादिगु खः ।

गणेशमान सिंहया १०७ क्वःगु बुँदिया लसताय् थौं सुथय् येँ ग्वसाग्वःगु ज्याझ्वलय् नेता सिंहं संविधानकथं नं संयन्त्रया छुं औचित्य मदूगु धयादिल ।

ज्याझ्वलय् नेता सिंह प्रजातन्त्र हयेत गणेशमान सिंहया यानादिगु योगदानयात लुमंकादिल । कांग्रेस स्थापना व देशय् प्रजातन्त्र निस्वनेया नितिं सर्वामान्य नेता गणेशमान सिंहया महत्वपूर्ण योगदान दूगु धासें नेता सिंहं गणेशमानं क्यंगु लँपुई कांग्रेस न्ह्यज्याय्माःगु धयादिल ।

वि.सं. २०४६ सालय् तत्कालिन राजापाखें प्रधानमन्त्री जुइगु प्रस्ताव वःसां अस्वीकार याना गणेशमान सिंहं जनतां ल्यम्ह हे प्रधानमन्त्री जुइमा धैगु हसना उबले हे प्रवाह यानादिगु धयादिल । नेता सिंह गणेशमान सिंह जन्मजयन्तीया झ्वलय् शोभाभगवतीइ च्वंगु झ्वाताय् माल्यार्पर्ण यानादिगु खः ।  

ज्याझ्वलय् नेता सिंह सरकारसिबें च्वये संयन्त्र धाःगु संविधान व प्रजातान्त्रिक विधि अःखः जूगु न न्ह्य्थनादिल । गठबन्धनया सरकार जूसां राज्यसत्ता सरकारं न्ह्याकेगु नेता सिंह धयादिल । उच्चस्तरीय राजनीतिक समिति वा समन्वय समिति न्ह्यागु नां तःसां नं सरकारयात नियन्त्रणय् तय्गु नियत जूगु व प्रजातान्त्रिक प्रणाली थुकिया आवश्यक मजूगु वय्कया धापू खः ।

नेता सिंह सर्वाेच्च अदालतय् जुयाच्वंगु गतिरोध अन्त्यया नितिं सरकारं पहल यायेमाःगु धयादिल । न्यायालयस खनेदुगु पंग अनं हे ज्यंनेमा धया नं मजू, सरकारं नं थुकिया विषयलय् मुकदर्शक जुया च्वने मजूगु वय्कल धयादिल ।

 

यलय् कन्ह्यःनिसे ३८० दँ पुलांगु ऐतिहासिक कात्ति प्याखं न्ह्याइगु जुगु दु। थुगुसिइ कातिं प्याखँं च्यान्हु तक क्यनेत्यगु दु।

मंसिर १ गतेतक बहनि ७ ताः लिपा मंगःया कात्तिक दबुलिइ क्यनेत तयारी जूगु कात्ति प्याखं संरक्षण समितिया नायः किरण चित्रकारं धयादिगु दु। जुजु सिद्धिनरसिंह मल्लया पालंनिसें न्ह्याना वयाच्वंगु प्याखंनय् सुदामा प्याखँ, भक्त सुरदास प्याखँ, बाथ प्याखँ, युद्ध कला, देवी नृत्य, जलशयण, वराह अवतार, नृसिंह अवतार, वस्त्रहरण, दधिलीला थज्याःगु प्याखं क्यनिगु खः।

छगू इलय् २७ न्हू तक न क्यंगु कात्ति प्याखं थगुने कोरोनाया कारणं दर्शक मतसें २ न्हू जक क्यंगु खः। थुगु प्याखं जुजु सिद्धिनरसिंह मल्लया पालय् ८ न्हू क्यंगु खःसा लिपा श्रीनिवास मल्लया पालय् १५ न्हु क्यंगु खः ।कात्ति प्याखनय् राजोपाध्याय, श्रेष्ठ, प्रधान, अमात्य, जोशी, मल्ल लिसें नेवाः दुनेया थी थी जातया प्रतिनिधित्व जुइ ।

कात्ति प्याखं नेपाल सम्वत ७६१ निसें मदिक्क क्यना वयाच्वंगु दु ।

 शेयर तइगु खाता डिम्याट खाताया ल्याः ४६ लाख स्वया अप्वोगु दु। शेयर बजारय् न्हुपि लगानी दुकायकेगु झ्वलय् लच्छिया दुने हे छगु लाख न्हुपि डिम्याट खाता थपे जुयाच्वंगु दु।

शेयर बजारया दक्को तथ्यांक तइगु कार्यालय सिडिएस एण्ड क्लियरिङ लिमिटेडया कथं सोमबाः तक डिम्याट खाता दुपिनिगु ल्याः ४६ लाख १८ हजार ६ सय थ्यंगु दु।

सिडिएससीया कथं मेरो शेयर प्रयोगकर्ताया ल्याः ३७ लाख ३४ हजार ३ सय १९ थ्यंगु दु। मेरो शेयरपाखे साधारण शेयर (आईपीओ) भरे यायेगु व निगुगु बजारय् बिक्री याइगु शेयर ट्रान्सफर याये फइ। मेरो शेयर खाता मदुपि आईपीओ भरे यायेत बैंकय् वनेमाः।

डिम्याट खाताय् आःतक ७ अर्ब ३९ करोड २४ लाख ८४ हजार ६०४ कित्ता शेयर दु।