त्रिभुवन विश्वविद्यालय अन्तर्गत स्नातकोत्तर तगिंमय् नेपालभाषा ब्वनीपिं विद्यार्थीतय्गु ल्या अप्वःगु दु ।

येँया रत्न राज्यलक्ष्मी क्याम्पसय् स्नातक तगिंमय् आखः ब्वनेत १५म्हेसिनं नां दुथ्याकेधुंकूगु धागु दु । अथेहे यलया पाटन संयुक्त क्याम्पसदुनेया नेपालभाषा केन्द्रिय विभागय् न न्हापाया दँस्वयां निदुगं विद्यार्थीत वयाःच्वंगु धागु दु ।

उखय् बागबजारय्च्वंगु पद्मकन्या कलेजय् न नेपालभाषा ब्वनीपिं विद्यार्थीत वयाच्वंगु दु । लिपांगु ईलय् येँ महानगर व किपू नगरपालिकां नेपालभाषा ब्वनाःतःपिन्त रोजगारी ब्यूगुलिं नेपालभाषाप्रतिया आकर्षण अप्वःगु खनेदु ।

अथेहे वाग्मती प्रदेशय् न नेपालभाषायात सरकारी कामकाजया भाषाया कथं छ्यलेफइगु कथं भाषा आयोगं सिफारिस यायेधुंकूगु दु । उखय् न्ह्यागु हे विषय कयाः स्नातक तगिं उत्तीर्ण यानातःपिं जूसां मानविकी संकाय अन्तर्गत स्नातकोत्तर अर्थात एमए ब्वनेफइगु जूगुलिं थुगुसिइ स्नातकोत्तर तगिंमय् नेपालभाषा ब्वनीपिं विद्यार्थी अप्वःगु खः ।

छगू ईलय् नेपालभाषाया विषय ब्वनेमदइगु कथं चिइकेधुंकूगु येँया रत्न राज्यलक्ष्मी क्याम्पसय् न नेवाः विद्यार्थी युनियनया पहलय् नेपालभाषा ब्वनेदइगु व्यवस्था याःगु दु । उकिइ येँ महानगरपालिकां तकं सहकार्य याःगु दु ।

रत्न राज्यलक्ष्मी क्याम्पसय् हाकन न्हूगु दुतिना पौया सुचं पितबियाः कात्तिक २६ गते तक न्हूगु भर्ना काइगु नेवाः विद्यार्थी युनियनया छ्यान्जे प्रशान्त डंगोलं जानकारी बियादीगु दु ।

नेकपा एमालें वइगु मंसिर १० निसे १२ गते तक चितवनय् जुइगु झीक्वःगु राष्ट्रिय महाधिवेशनया लागि पार्टी सदस्यपाखे सच्छि ल्हापं काइगु जुगु दु।

चन्दा उठे मयायेगु निर्णय यासे एमाले न हरेक पार्टी सदस्यपाखे सच्छि उठे यायेगु मूल व्यवस्थापन समितिया सहसंयोजक सुरेन्द्र पाण्डे न धाउगु दु ।

‘पार्टी सदस्यपाखे म्हति सच्छि उठे यायेगु इलय् ७ करोड उठे जुइ’, पाण्डें धाउगु दु। एमालेया पार्टी सदस्य ७ लाख थ्यंगु दावी याउगु दु।

अथेहे महाधिवेशन प्रतिनिधिपाखे २ हजार व केन्द्रीय कमिटी सदस्यपाखे ३ हजार उठे याइगु जुगु दु।

वंगु २४ घण्टाया दुने देयन्यक थप ३९० म्हेसित कोरोना भाइरस संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं २,६०६ म्हेसिगु पीसीआर परीक्षणय् ३७१ म्ह व २,४२० म्हेसिगु एन्टिजेन परीक्षणय् १९ म्ह याना ३९० म्हेसित संक्रमण पुष्टि जुगु दु।

अथेहे २४ घण्टाया दुने थप न्याम्ह कोरोना संक्रमणं मन्त। ४२५ म्ह कोरोनामुक्त जुगु दु।

स्वास्थ्य मन्त्रालयया कथं दकलय् अप्वो येँ ११७, रुपन्देहीइ ४४, मोरङय् ३०, कास्कीइ २६, यलय् २०, चितवन व ख्वपय् १५÷१५ म्ह व कैलालीइ १२ म्हेसित कोरोना संक्रमण पुष्टि जुगु खः।

सर्वोच्च अदालतया न्यायाधीशपिन्स कन्ह्यः मंगलबाः न बन्दी प्रत्यक्षीकरणया मुद्दाया जक सुनुवाइ याइगु जुगु दु।

असन्तुष्ट न्यायाधीशपिनिगु छलफलपाखे बन्दी प्रत्यक्षीकरणया निवेदनपिनिगु जक पेशी तोके यायेत प्रधानन्यायाधीश चोलेन्द्रशम्शेर जबरायात सन्देश छ्वंगु दु।

उमिसं बन्दी प्रत्यक्षीकरण बाहेकया निवेदनपिनिगु पेशी तोकेयासा इजलासय् ब्बति मकायेगु चेतावनी बिउगु खः। अथेहे थःपि प्रधानन्यायाधीश जबरायात न इजलासय् मच्वनेत सन्देश छ्वंगु दु।

थौं सोमबाः न न्यायाधीशपिन्स बन्दी प्रत्यक्षीकरण मुद्दाय् जक सुनुवाइ याउगु खः। प्रधानन्यायाधीश जबरा थः व न्यायाधीश कुमार चुडालया मंकाः इजलास तोके याउगु खः।

तर न्यायाधीश चुडाल प्रधानन्यायाधीश जबराया मंकाः इजलासय् मच्वंगु खः।

सत्तारुढ दलपिन्स सञ्चालनय् ग्वाहालि यायेगु निति ११ म्ह सदस्यीय समन्वय समिति दयकूगु दु।

नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी व राष्ट्रिय जनमोर्चाया शीर्ष नेतापि थौं च्वंगु बैठकं ११ म्हेसिगु सदस्यीय समन्वय समिति दयकूगु दु।

समन्वय समितिइ प्रधानमन्त्री शेरबहादुर देउवा सदस्य जुगु मदु। तर थः हरेक बैठकय् वयेगु धका धाउगु दु। समितिइ सत्तारुढ गठबन्धनय् दुपि दक्को दलपाखे निम्ह निम्ह सदस्य च्वंगु दु सा सरकारया पाखे सञ्चार तथा सूचना प्रविधिमन्त्री ज्ञानेन्द्रबहादुर कार्की च्वंगु दु।

माओवादी केन्द्रया नेता नारायणकाजी श्रेष्ठया कथं उगु समितिइ कांग्रेसपाखे वरिष्ठ नेता रामचन्द्र पौडेल व पूर्वमहामन्त्री कृष्ण सिटौला, माओवादी केन्द्रपाखे पुष्पकमल दाहाल प्रचण्ड, एकीकृत समाजवादीपाखे माधवकुमार नेपाल व जनता समाजवादी पार्टी (जसपा) पाखे उपेन्द्र यादवपिनिगु नां बिउगु दु।

स्वगु हे दलं लिपा छम्ह छम्हेसिगु नां बिइ धका धाउगु दु। अथेहे राष्ट्रिय जनमोर्चापाखे चित्रबहादुर केसी व दुर्गा पौडेल सदस्यय् च्वंगु दु।