लुँया भाः थौं प्यसः थहावंगु दु।

थौं प्यसः थहावना तोलाया ९२ हजार १ सय रुपैयाँ थ्यंगु दु धका नेपाल सुनचाँदी व्यवसायी महासङ्घं धाउगु दु।

अथेहे वहः तोलां झीतक थहावगु दु।

वहः झीतक थहावना तोलाया १२ सय ६० रुपैयाँ थ्यंगु दु धका महासङ्घं धाउगु दु।

शेयर बजाःया परिसूचक नेप्से थौं आइतवाः थहावंगु दु। नेप्से थौं २७ दशमलव ५१ अङ्कं थहावना २ हजार ५८४ दशमलव ५२ विन्दुइ थ्यंगु दु।

व्यापारबाहेक दक्को समूहया शेयर थहावंगु दु। बैंकिङ समूहया शेयर ६ अङ्क, विकास बैंक समूहय् ७२, होटलय् ४३, फाइनान्सय् ८९ व माइक्रोफाइनान्स समूहया शेयरय् ५३ अङ्क थहावंगु दु।

अथेहे जलविद्युत् समूहया शेयर ६५ अङ्क, जीवन बीमा समूहया ६७ अङ्क, निर्जीवन बीमा समूहया ३९, व मेमेगु समूहया शेयर ५५ अङ्कं थहावंगु दु। व्यापार समूहया शेयर धासा ३२ अङ्क घटे जुगु दु। २२५ गु कम्पनीया शेयर थौं कारोबार जुगु दु।

बेस्ट फाइनान्स व रिडी हाइड्रोपावर विकास कम्पनीया शेयर १० प्रतिशतं थहावंगु दु। मेरो फाइनान्स वित्तीय संस्थाया शेयर धासा १० प्रतिशतं घटे जुगु दु।

५८ लाख १८ हजार कित्ता शेयर २ अर्ब ७७ करोड रुपैयाँया कारोबार जुगु दु।

देय्न्यंकंया मस्तय्त थौं व कन्हय् भिटामिन ‘ए’ व किमीया वासः नकाच्वंगु दु ।

स्वास्थ्य तथा जनसंख्या मन्त्रालयं ‘राष्ट्रिय भिटामिन ‘ए’ ज्याझ्वः अन्तर्गत ६लानिसें ५दँ तकया २७गू लख मस्तय्त भिटामिन ए व किमीया वासः नकाच्वंगु दु ।

न्ह्याब्लें कात्तिक ३ व ४ गते भिटामिन ‘ए’ नकेगु यानावःगुलिइ थुगुसिइ मोहनि नखः लाःगुलिं कात्तिक ७ व ८ गते भिटामिन नकेगु ज्याझ्वः तःगु खः । स्वास्थ्य सेवा विभागया पोषण शाखां ब्यूगु जानकारीकथं भिटामिन ‘ए’ खुलानिसें ११लातकया मस्तय्त छगू लख युनिट अले दछिनिसें ५दँतकया मस्तय्त निगू लख युनिट नकी ।

थ्वहे झ्वलय् दछिनिसें ५दँतकया मस्तय्त किमीया वासः तकं नकी । सरकारं वि.सं २०५० सालंनिसें भिटामिन ‘ए’ ज्याझ्वः न्ह्याकावःगु दु । किमीया वासः वि.सं २०५६ सालंनिसें नकेगु यानावःगु दु ।

‘राष्ट्रिय भिटामिन ‘ए’ ज्याझ्वः न्ह्याकेत २५द्वम्ह स्वास्थ्यकःमि व ५२द्वम्ह मिसा स्वास्थ्य स्वयंसेविका परिचालित जूगु दु ।

नेकपा एमालेया अध्यक्ष केपी शर्मा ओलीं न्यागु दलीय गठबन्धनयात प्रतिगामीया संज्ञा बिउगु दु।

शनिबाः पार्टीया वडा अधिवेशन भर्चुअल विधिपाखे उलेज्या यासे अध्यक्ष ओलीं स्वलाया दुने न्यागु गठबन्धनया असली ख्वाः खनेदत धका धाउगु दु। ‘प्रतिगामी शक्तिपि आः गठबन्धनया नामय् वयाच्वंगु दु, थुकिइ छु न भ्रम मदु, दुविधाय् मदु, थ्व स्वलया दुने खने दुगु दु, देय् यात अस्थिरताय् यकेगु, देय् अग्रममनय् यके मबिइगु’ ओलीं धाउगु दु, ‘स्वेच्छाचारी, मनपरीतन्त्र देशय् लागू यायेत अनुशासनहीनता अराजकता राज्यस्तरपाखे याउगु थज्याउगु क्रियाकलाप झीसं खना हे च्वंगु दु, थ्व विपरीत लँ खः, प्रतिगामनपाखे याउगु लँ खः।’

आः प्रतिगामी गतिविधिया नेतृत्व न्यागु दलीय गठबन्धनं याउगु ओलीं द्धपः बिउगु दु। ‘कम्युनिस्ट आन्दोलन ध्वस्त यायेत, कम्युनिस्ट सरकार क्वथःगु, दक्षिणपन्थी जनविरोधी, दिशाहीन सरकार स्थापना यायेगु ज्या जुगु दु’ वयकलं धयादीगु दु। अध्यक्ष ओलीं वंगु असोज १५ व १६ गते जुगु विधान महाधिवेशन सर्वसम्मत रुपं जुगुलि विरोधीपि अज्जू चाःगु दु धका धाउगु दु।

सिन्धुपाल्चोक जिल्लाया इन्द्रावती गाउँपालिकाया उपाध्यक्ष मिरा लामा अधिकारी शनिबाः सुथय् उपचारया झ्वलय् मन्त।

उपाध्यक्ष अधिकारी ताः ईनिस क्यान्सर जुयाच्वम्ह खः। इन्द्रावती गाउँपालिकाया अध्यक्षया कथं उपचारया झ्वलय् थौं शनिबाः सुथय् ७ बजे येँया त्रिवि शिक्षण अस्पताल महाराजगन्जय् मदुगु खः।

वयकः ५१ दँया म्ह खः। वयकःया स्वम्ह म्ह्याय्पि दी।