नेपाल पत्रकार महासंघ, प्रदेश–२ या उपाध्यक्ष रमानन्द गुप्ता थौं शुक्रबाः मन्त।

मस्तिष्कघात जुया विराटनगरय् उपचार यायेगु झ्वलय् वयकः मदुगु धका प्रदेश अध्यक्ष राजेश कुमार कर्ण न जानकारी बिउगु दु।

६० दँ दुम्ह गुप्ता सिरहा निवासी खः।

राष्ट्रपति विद्यादेवी भण्डारीया समक्ष नेपालया लागि ब्राजिल, इटाली, माल्टा व दक्षिण अफ्रिकाया नवनियुक्त राजदूतपिन्स थःथःगु ओहोदाया प्रमाणपत्र पेश याउगु दु।

राष्ट्रपति भवन, शीतल निवासय् थौं ग्वसाः ग्वंगु विशेष समारोहय् नेपालया लागि ब्राजिलया आवासीय राजदूत कार्लोस अल्वेर्टो माइकल्सेन डेन हार्टोगसहित इटाली, माल्टा व दक्षिण अफ्रिकाया गैरआवासीय राजदूतपिन्स भिन्चेञ्जो डि लुक्का, रुबिन गाउची व जोएल सिबुसिसो एन्डेबेलेपिन्स थःथःगु ओहोदाया प्रमाणपत्र प्रस्तुत याउगु खः।

उगु ज्याझ्वलय् परराष्ट्रमन्त्री डा नारायण खड्का, प्रधानसेनापति प्रभुराम शर्मा, राष्ट्रपतिया कार्यालय व परराष्ट्र मन्त्रालयया उच्च अधिकारीपिनिगु उपस्थिति दुगु खः।

स्वास्थ्य तथा जनसंख्या मन्त्रालयया कथं थौं दकलय् अप्वो येँ १७१ म्हेसित कोरोना सक्रमण पुष्टि जुगु दु।

झापाय् ५९म्ह, रुपन्देहीइ ४१म्ह, मोरङय् ३४म्ह, यलय् ३३ म्ह, कास्कीइ २३ म्ह, चितवनय् २२ म्ह, ख्वपय् १८ म्ह, नुवाकोटय् १३ नाप मकवानपुर व कैलालीइ १०÷१० म्हेसित कोरोना संक्रमण पुष्टि जुगु दु।

वंगु २४ घण्टाया दुने देयन्यक ७०८ म्हेसित कोरोना भाइरस संक्रमण पुष्टि जुगु दु।

७ हजार २५३ म्हेसिगु पीसीआर परीक्षण याउगुलि ५७४ म्ह व २ हजार १२३ म्हेसिगु एन्टिजेन परीक्षण याउगुलि १३४ म्ह याना ७०८ म्हेसित कोरोना भाइरसया संक्रमण खनेदुगु दु धका स्वास्थ्य तथा जनसंख्या मन्त्रालयं धाउगु दु।

अथेहे वंगु २४ घण्टाय् कोरोना संक्रमणं ११ म्ह सी धुकुगु दु सा ९३२ म्ह कोरोनामुक्त जुगु दु। थौं शुक्रबाः थपे जुगु नाप नेपालय् कोरोना संक्रमित जूपि ८ लाख ८ हजार ९६ म्ह थ्यःगु दु।

हथेहे आःतक नेपालय् सीपि ११ हजार ३३७ म्ह थ्यःगु दु सा ७ लाख ८५ हजार ८१३ म्ह संक्रमणमुक्त जुइ धुकुगु दु।

पूर्वन्यायाधीश फोरमं न्यायपालिकाया गरिमा ल्यकेत प्रधानन्यायाधीश चोलेन्द्रशम्शेर जबरां निकास बिइमाः धका धाउगु दु।

अध्यक्ष टोपबहादुर सिंहं शुक्रबाः येँ जुगु छगु ज्याझ्वलय् पेश याउगु न्यायपालिकाया वर्तमान स्थितिया विश्लेषण विषयक अवधारणा पत्रय् न्यायालयया गरिमा, विश्वसनीयता, जनआस्था व स्वतन्त्रता ल्यंकेत प्रधानन्यायाधीश जबरां निकास बिइगु बालाइ व अनिवार्य जुइ धका उल्लेख याउगु दु।

तर प्रधानन्यायाधीं न्यायपालिकाया पक्षय् उदारता मक्यनकि प्रतिनिधिसभां थःगु संवैधानिक कर्तव्य पूरा यायेमालि धका पूर्वन्यायाधीश फोरमं धाउगु दु। ‘‘न्यायपालिकाया गरिमा, विश्वसनीयता, जनआस्था व स्वतन्त्रता ल्यकेगु लागि प्रधानन्यायाधीश थम्हेसिया हे निकास बिइगु बालाइ।

थ्व बालागु व अनिवार्य न खनेदु’ उगु अवधारणापत्रय् धाउगु दु, ‘तर प्रधानन्यायाधीशपाखे न्यायपालिकाया पक्षय् उदारता मक्यन धासा प्रधानन्यायाधीशया सम्बन्धय् वःगु न्ह्यसलं दक्को विवादया निष्पक्ष छानबिनया लागि प्रतिनिधिसभां थःगु संवैधानिक संवैधानिक कर्तव्य पूरा याना न्ह्यावनेत जिमिसं इनाप याये।’ प्रधानन्यायाधीशं संवैधानिक परिषद अध्यादेशसम्बन्धी विवादया सुनुवाइ न्ह्याके मफुगु, पेशी व्यवस्थापन गोलाप्रथा लागू मयाउगु, मन्त्रालय बाँडफाँटय् भाग खोजे याउगु घटनां न्यायालयया गरिमा घटे जुगु धका पूर्वन्यायाधीश फोरमं धाउगु दु।