नेपालय् कोभिड १९ या सक्रिय संक्रमितपि ११ हजार ६९० म्ह थ्यःगु दु।

संक्रमितपि मध्ये ६ हजार ६३२ म्ह स्वनिगः दुनेयापि जक दु। स्वनिगः दुने थौं १ हजार ५३८ म्ह संक्रमितपि थपे जूगु दु।

स्वास्थ्य तथा जनसंख्या मन्त्रालयया तथ्यांक कथं आःतक कोभिडया जम्मा संक्रमितपि ९ लाख ३६ हजार ९६९ म्ह थ्यंगु दु सा संक्रमणया कारण ११ हजार ६०९ म्ह सी धुकुगु दु।

वंगु २४ घण्टाया दुने देयन्यक ३०७५ म्हेसित कोरोना भाइरस संक्रमण पुष्टि जूगु दु।

स्वास्थ्य तथा जनसंख्या मन्त्रालयया कथं वंगु २४ घण्टाय् पीसीआर व एन्टिजेन याना १३ हजार ३६ गु नमुना परीक्षणय् ३०७५ म्हेसित संक्रमण पुष्टि जूगु दु।

कोरोना संक्रमणया कारण वंगु २४ घण्टाय् निम्ह सीउगु दु । अथेहे २७८ म्ह संक्रमणमुक्त जुगु दु।

शेयर बजाः थौं नेप्से ३० दशमलव ५१ अङ्कं घटे जुया २ हजार ८ सय ३ दशमलव ६३ विन्दुइ कुहावंगु दु।

थौं व्यापार, उत्पादन व लगानीबाहेक मेगु दक्को समूहया शेयर घटे जुगु दु। निर्जीवन बीमा समूहया शेयर दकलय् अप्पो २ सय ६६ अङ्कं घटे जुगु दु।

अथेहे जीवन बीमाया शेयर १०९, विकास बैंकया शेयर १२२, होटल व पर्यटनया शेयर ७८ व मेमेगु समूहया शेयर ७६ अङ्कं घटे जुगु दु। थौं शेयर बजाः घटे जूसा कारोबार रकम धासा तहावंगु दु।

२२९ गु कम्पनीया १ करोड ६१ लाख कित्ता शेयर ८ अर्ब ३ करोड रुपैयाँया कारोबार जूगु दु। दकलय् अप्पो नेपाल बङ्गलादेश बैंकया २८ करोड रुपैयाँ बराबरया शेयर किनबेच जुगु खः।

हिमालय ऊर्जा विकास कम्पनीया शेयर दकलय् अप्पो ६ दशमलव २१ प्रतिशतं घटे जुगु दु। समग्र बजार घटे जूसा कर्पाेरेट डेभलपमेन्छ बैंक व निफ्राया शेयर सकारात्मक सर्किटय् वःगु दु।

दुरुया भाः छगु लितरय् छक्वलं झीतका थकायेत्यःगु दु। आः छगु लितरउा ७६ रुपैयाँ जुयाच्वंगुलि आः झीतका थकाया ८६ रुपैयाँ थ्यनिइगु जुगु दु।

राष्ट्रिय दुग्ध विकास बोर्डं दुरुया भाः छगु लिटरय् झीतका थकायेगु निति कृषि तथा पशुपन्छी विकास मन्त्रालययात सिफारिस याउगु खः।

राष्ट्रिय दुग्ध विकास बोर्डया प्रवक्ता डा. बालक चौधरीं छगु लिटरय् झीतका थकायेगु लागि कृषि तथा पशुपन्छी विकास मन्त्रालययात सिफारिस याउगु दु धका धाउगु दु।

थ्व स्वया न्ह्यः २०७३ सालय् लिटरं खुतका थकाउगु खः।

प्रेस चौतारी नेपाल काठमाडौं जिल्ला समितिया अध्यक्षय् मुकुन्द भुसाल सर्वसम्मत जूगु दु।

मंगलबाः कुन्हु जुगु न्यक्वःगु अधिवेशनं भुसालया नेतृत्वय् ३९ म्ह सदस्यीय न्हुगु कार्यसमिति सर्वसम्मत जूगु खः। उगु कार्यसमितिइ उपाध्यक्षय् श्रीराम तिवारी, समावेशी उपाध्यक्षय् सुभद्रा धिताल व सचिवय् लक्ष्मण शर्मा ल्यउगु खः।

अथेहे सह–सचिवय् पुष्पा अपधकारी व जीपी पौडेल व कोषाध्यक्षय् रामचन्द्र कार्की ल्यउगु दु।

अथेतु, सदस्यय् रामेश्वर ढकाल, श्रीकृष्ण ढकाल, केशव घिमिरे, सुजित पुडासैनी, आशीष केसी, शर्मिला सुवेदी, सावित्री बस्नेत, सावित्री लुईंटेल, विकल सापकोटा, चिलराम भण्डारी व चेतनारायण पण्डित, राजाराम न्यौपाने, राजेन्द्र तामाङ, सुशील पुरी, जनक पोखरेल, प्रवेश पाण्डे, मेनुका कार्की, मिना अर्याल, रूपचन्द्र महर्जन, रुपा निरौला र विनोद ढकाल, कमल पन्थी, भरत बुढाथोकी, उत्सव बजगाईं, रुपा घिमिरे, सुव्रत मनु, विपिन पोखरेल, मेनुका श्रेष्ठ, सुवास थापा, विनोद दंगाल व राजकुमार सिलवालपिन्त ल्यउगु खः।