जलवायु परिवर्तनसम्बन्धी राष्ट्रसंघीय सम्मेलन कोप– २६ य् ब्वति कायेत प्रधानमन्त्री शेरबहादुर देउवा थौं बेलायत झायादिगु दु ।

प्रधानमन्त्रीया उच्चस्तरिय भ्रमण टोली २०म्ह दुजःया जुइ । उकिइ ६म्ह सचिवत दु । स्कटल्याण्डया ग्लास्गोय् जुइगु कोप– २६ या सम्मेलन सोमवाःनिसें न्ह्याइ । अनलिं प्रधानमन्त्री देउवा लण्डनय् नेपाली समुदायया ज्याझ्वलय् ब्वति कयाः कुटनीतिक नापलाये ज्याय् न जुइगु ज्याझ्वः क्वःज्यूगु दु ।

भ्रमणया झ्वलय् देउवां कन्हय् नेपाःया नितिं सर्वदलीय संसदीय पुचः, बेलायत–नेपाल व्यापार व लगानी मञ्चं लण्डनय् ग्वसाःग्वइगु लसकुस ज्याझ्वलय् ब्वति काइ । आइतवाः न प्रधानमन्त्री देउवाया सम्मानय् लण्डनस्थित नेपाली दूतावासं लसकुस ज्याझ्वः याइ ।

वय्कलं भूतपूर्व गोर्खा संगठनया प्रतिनिधि, बेलायती संसद्या दुजः अले नेपाली प्रवासीत नापलाइगु ज्याझ्वः दु । प्रधानमन्त्री देउवां कात्तिक १५ गते सोमवाः कोप–२६ या औपचारिक उलेज्याय् ब्वति काइ ।

सरकारं भारत, अमेरिका व बेलायतया नितिं खाली पदय् राजदुत नियुक्तिया सिफारिस याःगु दु ।

मन्त्रिपरिषदया बुधबाः च्वंगु मुँज्यां भारतया नितिं डा.शंकर शर्मा, अमेरिकाया नितिं श्रीधर खत्री व बेलायतया नितिं ज्ञानचन्द्र आचार्ययात राजदुत सिफारिस याःगु खः । भारतया नितिं राजदुतय् सिफारिस डा.शर्मा थ्वयान्ह्यः अमेरिकाया नितिं राजदुत जुयादीगु खः ।

अमेरिकाया नितिं राजदुतय् सिफारिस खत्री परराष्ट्र मामिलाया विज्ञ लिसें राजनीतिक शास्त्रया प्राध्यापक जुयादी । अथेहे , बेलायतया राजदुतय् सिफारिस आचार्य थ्वयान्ह्यः संयुक्त राष्ट्रसंघया स्थायी प्रतिनिधि लिसें उपमहासचिव पदय् च्वना ज्या यायेधुंकुम्ह जुयादी । थ्वयान्ह्यःया सरकारं नियुक्त याःम्ह राजदुतयात वंगु असोजय् सरकारं लितसतेगु निर्णय याःगुलिसें थी थी देशय् राजदूत पद खाली जूगु खः ।

अथेहे , सरकारं बेमौसमी वाःया हुनिं वाःबालीइ जूगु क्षतिया विषयलय् जग्गाया क्षेत्रफलयात लिधंसा दयेका अधिकतम् ६२गु प्रतिशत राहत बिइगु निर्णय याःगु दु । सरकारया प्रवक्ता ज्ञानेन्द्रवहादुर कार्कीया कथं चिधंपिं किसान अर्थात अप्वःलय् १०गु कठ्ठा जग्गाय् वाः बाली दूपिन्त क्षतिया अधिकतम् ६२ गू प्रतिशत राहत बिइगु जूगु दु ।

१० गू निसें ३गू बिगाहा तक्कया वाः बाली क्षति जूपिं क्षतिया ३०गू प्रतिशत व तःधंपिं किसानयात क्षतिया अधिकतम् २०गू प्रतिशत तक्क राहत चूलाकेगु सरकारं निर्णय याःगु दु ।

राहत वितरणया कार्यविधि दयेकेत प्रधानमन्त्री लिसें मन्त्रिपरिषद् ज्याकु सचिवया कजिसुइ कार्यदल दयेकुगु व कार्यदलं ५न्हू दुने कार्यविधि दयेका मन्त्रिपरिषद्य् पेश जुइगु प्रवक्ता कार्कीं जानकारी बियादील ।

सरकारं थ्वयान्ह्यः वाः बालीइ जूगु क्षतिया धलः यकिन यायेत गृहसचिवया कजिसुइ कार्यदल गठन याःगु खः । अथेहे मुँज्यां खुसिबाः चलःखय् लाना बेपत्ता जूम्ह मनूया छेँजःयात छेँजः पतिकं २गू लख तका राहत बिइगु निर्णय याःगु दु ।

आइतबाः निसे थौं मंगलबाः तक थ्यःगु इलय् नेप्से परिसूचक करिब २ सय अंकं थहावंगु दु।

वःगु वाः दुुने २ हजार ५ सय ५७ अंकय् थ्यंगु परिसूचक स्वन्हुया दुने १ सय ९३ दशमलव ९२ अंकं थहावना २ हजार ७ सय ५१ अंकय् थ्यःगु दु।

मंगलबाः नेप्से परिसूचक ७८ दशमलव ८२ अंकं थहावंगु खः। ‘क’ वर्गया कम्पनी याउगु कारोबार मापन याइगु सेन्सेटिभ इन्डेक्स न ११ दशमलव ५० अंकं थहावंगु दु। नेप्से परिसूचक नाप कारोबार रकम न सुधार जुगु दु।

न्हिच्छि यकं ७२ हजार ९ सय ७३ कारोबारपाखे २२७ कम्पनीया १ करोड १४ लाख ८६ हजार १२३ कित्ता शेयर किनबेच जुगु दु।

उकि मध्ये कारोबार रकम ६ अर्ब ३१ करोड ८३ लाख ४० हजार ९३२ रुपैयाँ थ्यःगु दु। थ्व स्वया न्ह्यः सोमबाः ५३ हजार ७९२ कारोबारपाखे २२९ कम्पनीया ८३ लाख ९५ हजार ८ सय ६४ कित्ता शेयर किनबेच जुगुलि कारोबार रकम ४ अर्ब ३० करोड ८८ लाख ९५ हजार ५७५ रुपैयाँ थ्यःगु खः।

स्वास्थ्य तथा जनसंख्या मन्त्रालयया कथं थौं दकलय् अप्वो येँ १७७ म्हेसित कोरोना सक्रमण जुगु दु।

अथेहे रुपन्देहीइ ५२म्ह, यलय् ३३ म्ह, चितवनय् ३१ म्हेसित कोरोना संक्रमण पुष्टि जुगु दु।

अथेतु ख्वपय् २५ म्ह, कास्कीइ २३ म्ह, मोरङय् १८ म्ह, नुवाकोटय् १६ म्ह, बाँकेय् १५ म्ह, स्याङ्जाय् १३ म्ह, सुनसरीइ १२ म्ह, बागलुङ व अर्घाखाँचीइ १०÷१० म्हेसित कोरोना संक्रमण पुष्टि जुगु दु धका मन्त्रालयं धाउगु दु।x

वंगु २४ घण्टाया दुने देयन्यक ६६६ म्हेसित कोरोना भाइरस संक्रमण पुष्टि जुगु दु।

देयन्यक ९ हजार ७७१ म्हेसिगु पीसीआर परीक्षण यागुलि ५६९ म्ह व २ हजार २४९ म्हेसिगु एन्टिजेन परीक्षण यागुलि ९७ म्ह याना ६६६ म्हेसित कोरोना भाइरस संक्रमण खनेदुगु धका स्वास्थ्य तथा जनसंख्या मन्त्रालयं धाउगु दु।

अथेहे २४ घण्टाया दुने कोरोना संक्रमणं ११ म्ह सीउगु दु सा ६२२ म्ह कोरोनामुक्त जुगु दु। मंगलबाः थपे जुगु नाप आःतक नेपालय् कोरोना संक्रमित जूपि ८ लाख १० हजार २९८ म्ह थ्यःगु दु।

अथेहे ११ हजार ३७२ म्ह सी धुकुगु दु सा ७ लाख ८८ हजार ६३० म्ह संक्रमणमुक्त जुइ धुकुगु दु।