वाःया लिपागु दिं थौं बिहीवाः कारोबार मापक नेप्से परिसूचक भचा कुहावःगु दु।

बुधवाः ५२ अंक घटे जुगुलि नेप्से परिसूचक थौं बिहीवाः १ दशमलव ३ अंक घटे जुया २ हजार ९ सय ६८ दशमल ४२ अंकय् कुहावःगु दु। नेपाल धितोपत्र बोर्डं जोखिमयुक्त धासे वःगु मंगलवाः ५१ कम्पनीया नां हे तोके याना सूची सार्वजनिक यागु खः।

बोर्डया उगु पला लिप बुधवाः सेयर बजारय् प्रभाव खनेदुगु खः। तर बिहीवाः धासा तधःगु प्रभाव खने मदुगु दु। नेप्सेय् कारोबार जुगु समूहगत सवइन्डेक्स मध्ये खुगु थहावःगु दु। नेप्से परिसूचकय् खासै प्रभाव मदुगु सा कारोबार रकम धासा थहावःगु मदु।

बिहीवाः १० अर्ब ९० करोड ४९ लाख ५८ हजार ९३५ रुपैयाँया सेयर कारोबार जुगु दु।

येँ महानगरपालिकां ज्येष्ठ नागरिकपिनिगु उपचार यायेत विशिष्टिकृत सेवानाप सुविधा सम्पन्न १ सय बेडया ‘काठमाडौँ महानगर विशेष अस्पताल’ निर्माण याइगु जुगु दु।

येँ महानगरपालिकाया मेयर विद्यासुन्दर शाक्यं आर्थिक बर्ष २०७८÷२०७९ या नीति तथा कार्यक्रम सार्वजनिक यासे अथे धयादीगु खः। नीति तथा कार्यक्रमय् कोभिड–१९ पाखे प्रभावित महानगरपिनिगु लागि माःगु आधारय् प्रतिकार्य, स्वास्थ्य उपचार व मानवीय ग्वाहालि लागि यायेगु धका उल्लेख यागु दु।

‘कोभिड–१९ पाखे संक्रमित जूपि विरामीपिनिगु स्वास्थ्य अवस्थायात निरन्तर निगरानी, परामर्श व उपचारया लागि कल सेन्टर सञ्चालन, मनोसामाजिक परामर्श, टेलिमेडिसिन सेवा, कोभिड परीक्षण, एम्बुलेन्स सेवा, आइसोलेसन सेवा, कोभिड विशेष अस्पताल सेवा व अक्सिजन सपोर्ट लगायतया सेवा निःशुल्क उपलब्ध यायेगु,’ नीति तथा कार्यक्रमय धयातःगु दु, ‘ज्येष्ठ नागरिकया उपचार यायेत विशिष्टीकृत सेवा सहितया सुविधा सम्पन्न १०० बेडया येँं महानगर विशेष अस्पताल निर्माण यायेगु, अस्पताल सञ्चालन व व्यवस्थापन छगु स्वायत्त संरचना वा सहकार्यपाखे यायेगु।’

महानगरं दक्को वडा कार्यालयय् सञ्चालित शहरी स्वास्थ्य क्लिनिकयात स्तरोन्नति यासे महानगरवासीपिन्त आधारभूत स्वास्थ्य सेवाया प्रत्याभूत यायेगु व विशेषज्ञ चिकित्सकपाखे महानगरय् च्वपिन्त निःशुल्क स्वास्थ्य परीक्षण यायेगु प्रबन्ध मिले यायेगु नीति व कार्यक्रमय् उल्लेख दु।

महानगर दुने सुलभ फार्मेसी सञ्चालन यायेत प्रोत्साहन यायेगु, अज्यागु फार्मेसी सञ्चालकपिन्त महानगरपालिकाय् बुझे यायेगु  कर, शुल्क, दस्तुरय् सहुलियत प्रदान यायेगु, नेपाल सरकारया स्वास्थ्य बिमा कार्यक्रम अन्तर्गत महानगरपिनिगु स्वास्थ्य बिमा यायेगु, महानगर च्वपिनिगु लागि बिमा शुल्कय् ५० प्रतिशत अनुदान उपलब्ध यायेगु महानगपालिकाया नीति काःगु दु।

‘महानगर दुने होटल, रेष्टुरेन्ट, खाजाघर, अनलाइन खाद्य वितरकया उत्पादन थाय्, खाद्य उत्पादन गुणस्तर, पद्दति, प्रक्रिया, संलग्न जनशक्तिया सरसफाई व सेवाग्राहीपिन्स नयेगु त्वनेगु उपभोग यायेत थाय् तक समग्र मुल्यांकन याना अज्यागु सेवा प्रदायकपिनिगु सेवाया गुणस्तर सुनिश्चित यायेत सूचिकृत नाप वर्गिकरण याना महानगरपालिकां प्रमाणपत्र जारी याय,’ नीति–कार्यक्रमय् धयातःगु दु,’ ‘नेपाल एम्बुलेन्स सेवां प्रदान याना वयाच्वंगु सेवाया प्रभावकारिता अध्ययन याना एम्बुलेन्स सेवायात निशुल्क, सरल व पहुँचयोग्य दयकेगु।’

येँ महानगरपालिकां सिन्धुपाल्चोकया मेलम्ची व हेलम्बुया बाढी प्रभावितपिन्त २ करोड रुपैयाँ ग्वाहालि याइगु जुगु दु।

येँ महानगरया मेयर विद्यासुन्दर शाक्यं थौं बिहीवाः वइगु आर्थिक वर्षया नीति तथा कार्यक्रम सार्वजनिक यासे मेलम्ची व हेलम्बुया बाढी प्रभावित क्षेत्रपिन्स ग्वाहालि कथं २ करोड रुपैयाँ बिइगु घोषणा यागु दु।

उगु रकम बाढी प्रभावितपिन्त राहत व उद्धारया लागि खर्च यायेगु लागि बिइगु मेयर शाक्यं धागु दु। हेलम्बु व मेलम्चीं येँ लः बिगुलिं महानगरं ग्वाहालि याये त्यंगु खः।

लुँ तोला थौं १ हजार १ सय रुपैयाँ क्वहावंगु दु।

म्हिगः तोलां थौं ९३ हजार १ सय रुपैयाँ खःसा थौं ११०० क्वहावया  ९२ हजार रुपैयाँ थ्यःगु दु धका नेपाल सुनचाँदी व्यवसायी महासङ्घं धागु दु।

अथेहे वहः तोलां २० रुपैयाँ क्वहावंगु दु। थौं नीतका क्वहावया तोलां १३ सय ४० रुपैयाँ कायमा जुगु दु धका महासङ्घं धागु दु।

प्रधानमन्त्री केपी शर्मा ओलीं खुसिबालं लिच्वः लाःथाय् थथें खाद्यन्न, लत्ता कपडा, वासः व त्वनेगु लः व्यवस्था यायेत सम्बद्ध निकायपिन्त उजं बिउगु दु।

बर्षाया कारण ब्वलंगु खुसिबा, चलखं अझ जनधनया क्षति मजुइकेत स्वापू दय्का ज्याः यायेत नं वय्कलं उजं बियादिल । प्रधानमन्त्री ओलीं सरकारं विवपद् न्हः हे सम्भावित जोखिमया आँकलन याना तयारी यानाच्वंगु व वय्कथं ज्या जुयाचवंगु धयादिल ।

प्रधानमन्त्री निवास बालुवाटारय् क्वचाःगु मुँज्याय् प्रधानमन्त्रीं उद्धार व राहत ज्याय् अपांगता जूपिं, ज्याथजिथिपिं, मस्त व मिस्तय्त विशेष कथं ध्यान बिइत नं निर्देशक बियादिल ।

ओलीं तःधंगु ल्यखाय् जनतापिन्त सुरक्षित थासय् यंकेबले उमित कोभिड १९ संक्रमणया जोखिमयात तकं ध्यान बिइमाःगु धयादिल । अथेहे वय्कलं तराइलय् डुबानया सम्भावना जूगु थासय् संयुक्त सिमावर्ती टोलीलिसें खँ ल्हाना थथें माःगु ज्या यायेत व पहाडय् न्हूगु थासय् लँ म्हूइगु डोजर लगेयायेगु ज्या थथें दिकेत नं निर्देशन बियादिल ।