थौं सिथि नखः ।नेवाःपिनिगु छगू तःधंगु नखः मध्ये छगू नखः खः । सिनाज्यात उर्जा बिइगु नखः कथ काइगु थ्व नखः नेवाः समुदायपिन्सं झःझः धायेक हनाच्वंगु दु।

जेष्ठ शुक्ल पक्ष षष्ठी अर्थात् कुमार षष्ठीया दिं हनिगु थ्व नखःयात नेवाः समुदायं वर्षा न्ह्यःया लिपांगु नखःया कथं हनेगु याः । भगवान कुमारया जन्म दिं तकं जूगुलिं थ्व दिंया कुमार द्यःया त पूज्याना माय् वः मू वः नयाँ हनिगु याई । अथेहे छेँ दुथ्यंगु न्हूगु छ्वया म्हुछ्या मरी नं नयेगु चलन दु । नेवाः समुदायय् ऋतुकथं नखःचखः हनिगु व थीथी परिकार नं नयेगु चलन दयावयाच्वंगु दु।

गुकिइं याना नेवाः समुदाय नखःचखः नयेगु परिकारपाखें नं म्हसिका दु । अथेहे नखःया दिं नेवाःपिन्सं मुहान, तुं, कुवाः पुखू, हिति आदि लःया स्रोत तकं सुचुकुचु यायेगु याई । वर्षात्या ईलय् बाः वइगु फोहर लखं त्वनेगु लःया मुहानय् लाना लः दुषित मजुइमा धकाः लःया मुहान व स्रोत जःखः तकं सुचुकुचु याना निकास चाकेकेगु थुकिया मू विशेषता खः । अथेहे हिउँदया ईलय् बन्द जूगु, गनावंगु मूलयात बर्षाया लःखं तछ्याय् फइगु जूगुलिं सिथि नखःया दिं लःया मूलयात सफा यायेगु खः।

धार्मिक कथं नं थ्व नखःया विशेषता दु । महादेव व पार्वतिया तःधिकम्ह काय् कुमारया बुँदि जूगुलिं नं धार्मिक महत्व दु । गणेश द्यःपिनिया गणनायक खः धाःसा कुमार देवगणया सेनापति खः । द्यः पुज्याय् बलय् दकले न्हापां कुमारयात पुज्यात धाःसा बर्षाया ईलय् सिनाज्या यायेत बल व शक्ति दइगु जनविश्वास दु । थौं हे दिं न्हू घःलय् च्वंगु सिथि द्यःयात पुज्याना नखः हनिगु चलन नं दु।

प्यन्हू न्ह्यः न्हवं याम्ह द्यःयात थौं सुथय्निसें दर्शन व पूजआजाया नितिं द्यःगलय् विराजमान याई । नेवाः समुदाय कला संस्कृति व सांस्कृतिक मनोरन्जनया पारखी नं खः । उपिं दँयंक थीथी कला, सांस्कृतिक झाँकी व नखःचखः हनिगु याई तर वर्षालिसें दक्वः तजिलजियात थाँती तया सिनाज्याय् लिमलाइगु जुई ।

उकिं नेवाः तय्गु छगू धापू नं दु, “मनु स्यूसां लप्ते कुसां कुयासां न्हापां सिना ज्या सिद्यके माः” धैगु धापू नं सिनाज्याया महत्व व प्राथमिकतायात न्ह्यब्वः । थुजागु अवस्थाय बुँज्यामिपिन्त ज्या यायेत तागत व शक्ति बिइकथंया नसाः ज्वलं नयेगु दिं जूगुलिं सिथि नखःया महत्व यक्वः हे दूगु खनेदु ।

नेकपा एमालेया नेता लिसें पुलाँम्ह प्रधानमन्त्री झलनाथ खनालयात वासः यायेत भारतया नयाँदिल्ली यंकुगु दु । ज्वरो व हिइ हेमोग्लोबिन म्हो जूगु समस्या खनेदसें येँया नर्भिक अस्पतालय् भर्ना जुयादिम्ह खनाल थप वासःया नितिं थौं जहाज पाखें डिल्ल यंकेगु वय्कया सचिवालयं जानकारी बिउगु दु । खनाललिसे वय्कया तिरिमय्जु, काय् व छम्ह चिकित्सक नं दिल्ली झाःगु दु । दिल्ली यंका अनया एपोलो अस्पालय् वय्कया वासः यायेगु तयारी खः । खनालयात गुन्हू तक ज्वरो वसेंलि नर्भिक अस्पतालय् भर्ना याःगु खः । खनाल थ्वयांन्ह्यः नं कोरोना संक्रमित जुइधुंकूगु खः ।

मदिक्क वयाच्वंगु वा व खुसिबालं देशय् थीथी थासय् तःधंगु क्षति जूगु दु । मनसुन न्ह्याःगु छवाः दुने हे देय्या थीथी १५गू थासय् चल वंगु दू धाःसा दर्जनौं गामय् खुसिबा वःगु दु ।

मदिक्क वःगु वा लिसें खुसिबाया कारण नारयाणी व कोसीया सहाकक खुसी बलेफइ लः या सतह अप्वःया खतराया सूचं पार यायेधुंकूगु दु । नारायणी खुसीइ लः या सतह ८गू मिटर थ्यन कि खतराया संकेत कथं कयावयाच्वंगु दु । बाढी पूर्वानुमान महाशाया कथं म्हिगः बहनि ११ ताः ईलय् नारायणी खुसीया देवघाट मापन केन्द्रय् लः या सतह १०.२४ मिटर सिबें च्वये थहाँवंगु धाःगु दु । नारायण खुसीया सतह अझ थहाँवनाच्वंगु महाशाखां न्ह्यथंगु दु।

म्हिगः हे नारायणी खुसीया देवघाट क्षेत्रय जल सतहलं खतराया चीं पार यायेवं त्रिवणीया गण्क ब्यारेजया ३६गू लुखा चायेकूगु दु । खुसिबालं मनाङ व लमजुङय् नं भौतिक क्षति जूगु विवरण वःगु दु । विपद् जोखिम न्यूनीकरण तथा व्यवस्थापन प्राधिरकणया प्रमुख कार्यकारी अधिकृत अनिल पोखरेलया कथं मनाङया चामेय् खुसिबालं प्यखा छेँ चुइकायंकूगु व न्यखा सिबें अप्वः छेँ क्षति जूगु धाःगु दु।

घट्टेखोला व च्याटुखोलाय् वःगु खुसिबालं चामे बजाः हे तुंगु दु । चामे बजःया निसः स्थानीयपिन्त कारागारया छेँ सारे याःगु दु । खुसिबाःया हुनिं विस्थापितपिनिगु व्यवस्थापनया लागि नेपाली सेना, नेपाल प्रहरी व सशस्त्र प्रहरीया टोलीपिन्सं ज्या यानाच्वंगु दु । अथेहे मनाङया दोर्दी खुसिइ वःगु बालं निखा छेँ चुइकूगु दु । उगु खुसिइ वःगु खुसिवालं दोर्दी गाँपालिका८ हिलेबजारय् च्वम्ह चतुरे विक व कन्या तामाङया छेँ चुइकायंकूगु खः।

अथेहे कृष्ण घलेया कृषि फार्म तर्क चुइकायंकूगु जिल्ला प्रहरी ज्याकू लमजुङं जानकारी बिल । मौसम पूर्वानुमान महाशाखाया कथं लिपांगु ईलय् गण्डाकी व लुम्बिनी प्रदेशया पूर्वी लिसें बागमतीया पश्चिम भूभागय् तच्वय्क वा वःगु खः । थौं बागमती, लुबिनी व गणकी प्रदेशय् तसकं वा वइगु अनुमान मौसम पूर्वानुमान मशाखां याःगु दु।

नेपाली मनसुन सक्रिय जुया रसुवा, पर्वत, स्याङजा, पाल्पा, गुल्मी, अर्घाखाँची, रोल्पा, प्यूठान, सल्यान, कालिकोट, बाजुरा, अछाम, बैतडी व दार्चुलाय् चलं वंगु दु । अथेहे बाग्लुङ, बाजुरा, दैलेख, मनाङ, मुस्ताङ, गोरखा, लमजुङ व सिन्धुपाल्चोकय् खुसिबाः वःगु दु ।

वंगु २४ घण्टाय् थौं स्वनिगः दुने ५४५ म्ह संक्रमितपि थपे जुगु दु। थौं येँ जक ४५५ म्हेसित कोरोना सक्रमित जुगु दु।

अथेहे ख्वपय् १६ म्ह व यलय् ७४ म्ह संक्रमितपि थपे जसुगु दु।

स्वनिगलय् आःतक सक्रिय संक्रमितपि १३ हजार ३०३ म्ह थ्यंगु दु धका स्वास्थ्य तथा जनसंख्या मन्त्रालयं धागु दु।

थौं तक देयन्यक ९६७ म्ह आईसीयू व २८५ म्ह भेन्टिलेटरय् तया उपचार याना च्वंगु दु।

वंगु २४ घण्टाया दुने ४ हजार १८७ म्ह कोरोनामुक्त जुगु दु। थौं सङ्क्रमणमुक्त जूपि नाप आःतक नेपालय् ५लाख ४० हजार ४३९ म्ह कोरोनामुक्त जुगु दु।

नेपालय् आःतक सङ्क्रमणमुक्त जुपिनिगु दर ८८ दशमलव ३ प्रतिशत थ्यःगु दु।

अथेहे वंगु २४ घण्टाय् २ हजार ७४५ म्हेसित कोरोना सङ्क्रमण पुष्टि जुगु दु। ७ हजार ४४९ म्हेसिगु पीसीआर परीक्षण यागुलि १ हजार ६८१ म्हेसित व ५ हजार ८४१ म्हेसित एन्टिजेन विधिपाखे परीक्षण यागुलि १ हजार ६४ म्ह याना २ हजार ७४५ म्हेसित सङ्क्रमण पुष्टि जुगु दु धका मन्त्रालयं धागु दु।

अथेहे २४ घण्टाय् थप ४१ म्ह कोरोना भाइरसया सङ्क्रमणपाखे ज्यान वगु दु। थ्व नाप कोरोनापाखे ज्यान वःपि आःतक ८ हजार ५०६ म्ह थ्यंगु दु।