Display Style:
Column Style
डा. गोविन्द केसींया न्यागु बुँदे माग
लहानान्युज | दिल्लाथ्व दशमी ११४१,साउन ४ सोमवाः
चिकित्सा शिक्षा सुधारया अभियन्ता डा. गोविन्द केसीं न्हुम्ह सरकारया न्ह्यने न्यागु बुँदे माग तःगु दु।
न्हुगु सरकार गठन जुइवं स्वास्थ्य व मेडिकल शिक्षा क्षेत्रय् थीथी समस्या नाप उकिया समाधानया लागि याये माःगु धासे केसीं न्यागु बुँदा सार्वजनिक यागु दु।
केसीं धरानया विपी कोइराला स्वास्थ्य विज्ञान प्रतिष्ठानया पदाधिकारी पदमुक्त यायेमाःगु, चिकित्सा शिक्षा आयोगया पदाधिकारीपिन्त ख्याच्वं बिइपिन्त व नाजायज फाइदा कायेगु स्वइपिन्त कारबाही यायेमाःगु माग तःगु दु।
अथेहे केसीं इलाम वा पाँचथर, उदयपुर व डडेल्धुरा वा डोटी न सरकारी मेडिकल कलेज चायकेमाःगु, चिकित्सा शिक्षा ऐनया प्रावधान सार्वजनिक शिक्षण संस्थाय् ७५ प्रतिशत छात्रवृत्ति बिइमाःगु माग न्ह्यने हःगु खः।
प्रम देउवां जोन्सन एण्ड जोन्सन खोपया उलेज्या
लहानान्युज | दिल्लाथ्व दशमी ११४१,साउन ४ सोमवाः
प्रधानमन्त्री शेरबहादुर देउवां अमेरिकापाखे अनुदान वंगु कोरोनाविरुद्धया खोप ज्याझ्वः जोरपाटी छगु ज्याझ्वः दथुइ उलेज्या यानादीगु खः।
जोरपाटीया खगेन्द्र नवजीवन केन्द्रय् स्वास्थ्यकर्मीपिन्त खोप हस्तान्तरण यासे उलेज्या यानादीगु खः। उगु ज्याझ्वलय् नेपालया लागि अमेरिकी राजदूत ¥याण्डी बेरी न सहभागी जुगु खः।
अमेरिकां जोन्सन एण्ड जोन्सन कम्पनीया १५ लाख ३४ हजार ८५० डोज खोप नेपाःयात उपहार स्वरुप बिगु खः ।थुगु खोप छगु डोज जक काःसा गाः।
येँया ४४ गु खोप केन्द्रपाखे साउन ४ गतेनिसे ६ गते तक जोन्सन एण्ड जोन्सन कम्पनीया कोरोना खोप बिइगु थ्व स्वया न्ह्ययागु सरकारं निर्णय यागु खः।
मेची अस्पतालया चिकित्सकपि आन्दोलित
लहानान्युज | दिल्लाथ्व दशमी ११४१,साउन ४ सोमवाः
चिकित्सकपिन्त कुटपिटयागु विरोधय् झापाया भद्रपुर मेची अस्पतालया चिकित्सकपि आन्दोलित जुगु दु।
आइतबाः बहनि इमर्जेन्सी वार्डय् कार्यरत डाक्टर केवल कपुरीयात झापा हल्दीबारीया पुष्पराज निरौलां हातपात यायेवं चिकित्सक नाप स्वास्थ्यकर्मीपिन्स धागु दु।
निरौलां छम्ह मिसाया उपचारया लागि अस्पतालय् हःग खः। इमरजेन्सीइ बिरामीयात स्वयेत ढिला यागु धासे चिकित्सक कपुरीयात हातपात यागु खः।
सहकर्मीयात कुटपिट यागु विरोधय् सोमबाः चिकित्सकपिन्स अस्पतालया ओपीडी सेवा बन्द यागु खः। हातपात याम्हेसित कारबाही व सुरक्षाया माग यासे मेची अस्पतालय् कार्यरत डाक्टर आयुस गुरागाई न धागु।
प्रहरीं कुटपिटय् संलग्नपिन्त ज्वना कारबाही मयातले ज्याय् लिहावये मखु धका धागु दु।
जोनसन एण्ड जोनसनया खोप अभियान न्ह्यात
लहानान्युज | दिल्लाथ्व दशमी ११४१,साउन ४ सोमवाः
स्वनिगः लिसें देय्यंकया अप्वः धैथें जिल्लाय् थौं निसें जोनसन एण्ड जोनसनया खोप अभियान न्ह्याःगु दु ।
खोप अभियानया न्हापांग व निन्हूगु दिं ५०दँ निसें ५४दँ वैंश पुचः दुनेया मनुत, पूवंक व अति अशक्त अर्थात् अपांगताया क व ख वर्गय् लाःपिं मनूत, आः नेपालय् बसोवास यानाच्वंपिं शरणार्थी, सफाइकर्मी व स्वास्थ्यकर्मी दुथ्याइ ।
थ्वयान्ह्यः त्वःफिउपिं क्वजिनातःगु पुचःया मनूयात नं थुगु खोप बिइगु जुइ । खोप अभियानया नितिनं येँ, यलः व ख्वपःया खोप केन्द्र क्वजिइधुंकुगु दु ।
थ्वया न्ह्यः भेरोसेल खोप बिउगु केन्द्रपाखें हे जोनसनया खोप कायेगु व्यवस्था याःगु दु । खोप कायेत ल्यं दूगु गुलिखय् दुर्गम थाय् बाहेक अप्वः धैथें जिल्लाय् सोमबाः निसें हे खोप अभियान न्ह्याइगु स्वास्थ्य तथा ं जनसंख्या मन्त्रालयं न्ह्यथंगु दु ।
अमेरिकां अनुदानय् बिउगु खोप अभियानया न्हापांगु दिं प्रधानमन्त्री शेरबहादुर देउवा व नेपाःया नितिं अमेरिकी राजदूत रेण्डी बेरी खोप केन्द्रय् स्थलगत अध्ययन भ्रमण यानादीगु धाःगु दु । जोनसनया थुगु खोप छगू डोज जक काःसा गाइगु खोप खः । वंगु वालय् अमेरिकां बिउगु कोभ्याक्स ज्याझ्व अन्तर्गत १६ गू लख ३४द्वः डोज खोप नेपाः थ्यंकावःगु खः ।
अप्वः धैथें जिल्लाय् खोप थ्यनेधुंकुगु मन्त्रालयं न्ह्यथंगु दु । थुगु लाय् दुने चीनपाखें थप ३०गू लख डोज भेरोसेलया खोप वइगु झवलय् दु । थुगु खोप नेपालं चीनपाखें खरिद प्रक्रिया अन्तर्गत हयेत्यंगु खः ।
प्रधानमन्त्री शेरबहादुर देउवाया पक्षय् १६५ मत
लहानान्युज | दिल्लाथ्व दशमी ११४१,साउन ४ सोमवाः
प्रधानमन्त्री शेरबहादुर देउवां विश्वासया मत कायेत ताःलागु दु।
२९ असारय् प्रधानमन्त्री नियुक्त जुम्ह देउवां पुनस्र्थापित संसदया न्हापागु बैठकय् विश्वास काःगु खः। देउवाया पक्षय् १६५ मत कागु खः।
नेपाली कांग्रेसया सभापति तक जुयादीम्ह देउवायात थःगु हे दल नेपाली कांग्रेस नाप माओवादी केन्द्र, जनता समाजवादी पार्टी व राष्ट्रिय जनमोर्चा न मत बिगु खः।
प्रमुख विपक्षी एमालेया २२ म्ह सांसदपिन्स न मत बिगु खः। उगु मतदानय् २४९ म्ह सांसद सहभागी जुगु खः। देउवाया विपक्षय् ८३ मत क्वहावंगु खः।
राप्रपा तटस्थ च्वंगु खःसा नेपाल मजदुर किसान पार्टी मतदानय् सहभागी मजुगु खः।
