विद्यालय थौंनिसे न्हुगु शैक्षिक सत्र सुरु जुइगु दु।

न्हुगु शैक्षिक सत्र अन्तर्गत थौं देयन्यक विद्यार्थी भर्ना अभियान शुरु यायेगु व साउन १ गतेनिसे पढाइ सुरु यायेगु तयारी दु।

कोभिड–१९ या कारण नियमित न्हुगु शैक्षिक सत्र निला लिपा असार १ गते निसे शुरु जुगु खः। न्हुगु भर्नाया लागि जेठ २५ निसे प्रचार प्रसार याना असार १ निसे भर्ना अभियान शुरु यायेगु संघीय सरकारया कार्यतालिका दयका तःगु दु।

न्ह्यगू हे प्रदेशय् थौं आर्थिक वर्ष २०७८÷८९ या बजेट सार्वजनिक याइगु जुगु दु।

असार १ गते बजेट हयेमाःगु संवैधानिक बाध्यताया कारण थौं प्रदेशसभाय् बजेट प्रस्तुत यायेत्यंगु दु। प्रदेश १ व बागमती प्रदेशय् न्हिनय् ३ बजे बजेट प्रस्तुत याइ जुगु दु।

प्रदेश २, लुम्बिनी व सुदूरपश्चिम प्रदेशय् न्हिनय् ४ बजे व कर्णाली प्रदेशय् न्हिनय १ बजे बजेट प्रस्तुत यायेगु तयारी दु।

मध्यपुर थिमि नगरपालिकाया मेयर मदन सुन्दर श्रेष्ठयात ध्यानाकर्षण पौ लल्हाःगु दु ।

विद्यालयस्तरया  स्थानिय मातृभाषा (नेपालभाषा) या विषय अनिवार्य ब्वकेमाःगु माग यासें भाषाप्रेमी व शिक्षासेवीपिन्सं सोमवाः ध्यानाकर्षण पौं लल्हाःगु खः। वंगु निदँ न्ह्यः निसें थीथी निकायलय् वनाः ध्यानाकर्षण यासां सुनुवाइ मजुगुलिं शिक्षा समितिया पदेन नायः लिसें नगर प्रमुख श्रेष्ठयात लिखित ध्यानाकर्षण पौं लल्हाःगु खः।

उगु ध्यानाकर्षण पौं लल्हाना कयादीसे मेयर श्रेष्ठं वइगु असार ७ गते न्ह्याइगु  मध्यपुर थिमिया नगर परिषदय् स्थानिय मातृभाषा (नेपालभाषा) या विषय अनिवार्य ब्वकेगु नितिं प्रस्ताव तय्गु प्रतिबद्धता प्वंकादिगु खः। उगु प्रस्ताव लिपा बजेट विनियोजन यायेगु लिसें थथिी अभियान न्ह्याकेगु बिचाः प्वंकदिगु खः ।

उगु ध्यानाकर्षण पौं लल्हाय्त नेपालभाषा संरक्षण अभियानया संयोजक कृष्णकाजी मानन्धर, दुजःपिं नविन प्रकाश श्रेष्ठ, ईश्वरलाल श्रेष्ठ, सुरेन्द्र किलंनः श्रेष्ठ, ओम कृष्ण श्रेष्ठ, जीवन पति श्रेष्ठपिं लल्हाःगु खः ।

येँ महानगरपालिकाय् दकलय् न्हापां येँया फुक्क स्कुलय् लागू जुइगु कथं छगू कक्षा निसें च्यागू कक्षा तक स्थानिय बिषय कथं थ्व दँया शैक्षिकसत्र बैशाख निसें ब्वके धुकुुगु दु। 

फिनल्याण्डया हेलसिन्की नगरपालिकाया चुनावय् नेपाली ब्योमा ताम्राकार डेपुटी काउन्सिलर पदय् निर्वाचित जुगु दु।

येँया बसन्तपुलिइ जन्म जुयादिम्ह ताम्राकारया उगु पदय् निक्वःगु कार्यकालया लागि निर्वाचित जुगु खः। म्हिगः सोमबाः जूगु चुनावय् हेलसिन्की नगरबासीपिन्स स्थानीयलय् बालाक्क ज्या यागु आधारय् ताम्राकारयात भोट त्याकूगु खः।

ताम्राकार फिनल्याण्डय् दुपिं न्हापांगु पुस्ताया नेपालीतय्सं आप्रवासी प्रणाली, शिक्षा, स्वास्थ्य लगायत छुं नं समस्या फ्यम्वालेमाः धकाः नीतिगत तहलय् अपुइकेत थःम्ह ज्या यायेगु धकाः वयकलं धयादिगु दु।

ताम्राकार अध्ययनया झ्वलय् फिनल्याण्ड झागु खः ।

सेयर बजारय् न्हुगु रेकर्ड कायम जुगु दु।

सेयर कारोबार मापक नेप्से परिसूचक ३ हजार स्वया अप्वो विन्दुइ थ्यकां न्हुगु रेकर्ड कायम जुगु दु।

थ्व स्वया न्ह्यः म्हिगः आइतवाः जक २ हजार ९ सय ८३ य् थ्यका न्हुगु रेकर्ड थौं सोमवाः हे तोडे जुगु दु। कारोबार खुले जुगु छु मिनेटय् हे नेप्से परिसूचक उच्च अंकं वृद्धि जुगु खः।

आइतवाः कारोबार रकम न १९ अर्ब ५५ करोड रुपैयाँ स्वया अप्वो थ्यका न्हुगु रेकर्ड कायम जुगु दु।