नेकपा एमाले नेता माधव नेपाल समूह न प्रधानमन्त्रीयात विश्वासया मत बिइगु सन्दर्भय् सांसदपिन्स स्वविवेक प्रयोग यायेत छलफल यागु दु।

माधव समूह हे निगु थरी बिचाः वंगु नेता नेपाल नाप अधिकांस सांसदपिन्स् मत बिइगु धागु दु। कार्यदलय् च्वंपि नेतापिन्स निर्णय याना शेरबहादुर देउवायात विश्वासया मत बिइगु इलय् एकताया लुँखा बन्द जुगु सन्देश वनेगु जुगुलि अथे मयायेत इामप यागु दु।

उमिसं १० बुँदे बमोजिम संस्थागत निर्णयया पक्ष न्ववागु दु। कार्यदलय् दुपि व मदुपि स्थायी कमिटी सदस्यपि नाप वरिष्ठ नेता नेपालं छलफल यागु खः। भीम आचार्य, गोकर्ण विष्ट लगायतया नेतापिन्स एमाले मिले जुइगु जुगुलि हथाय् चाना विश्वासया मत कायेत्यंगु धका धासे देउवा–प्रचण्डया नियत एमाले टछ्यागु प्रष्ट खनेदुगु धका धागु दु।

माधव नेपाल पक्षपाखे कार्यदल संयोजक तक जुयादीम्ह उपाध्यक्ष भीम रावल व सुरेन्द्र पाण्डे लगायतया नेतापि संस्थागत निर्णय याना १० बुँदे सहमतिया अःखः जुइ धका लिचिगु दु। तर, माधव नेपाल नाप मेटमणी चौधरी, झपट रावल, कृष्णलाल महर्जन, जीवनराम श्रेष्ठ, रामकुमारी झाँक्री, विरोध खतिवडा, यज्ञराज सुनुवार, निरा जैरु, सरला यादव, पुष्पा कर्ण कायस्थ, दीपकप्रकाश भट्ट, मुकुन्द न्यौपाने, कलिला खान, कल्याणी खड्का लगायतपिन्स विश्वासया मत बिइगु जुगु दु।

डा. चन्द्रमोहन यादव नाप नेपाली कांग्रेसया स्वम्ह नेतापि पार्टी कार्यालय, सानेपाय् आमरण अनसन च्वंगु दु।

डा. चन्द्रमोहन यादव, रामपल्टन साह व दिनेश नायकपि थौं आइतबाः सुथसिया ११ः३० बजे निसे अनसन च्वंगु दु।

धनुषा जिल्ला क्षेत्र नम्बर १ व ४ य् क्रियाशील सदस्यता वितरणय् धाँदली जुगु धका उमिसं दाबी यागु दु।

उकिया बारे जिल्ला छानविन समितिं सर्वसम्म प्रतिवेदन लागू यायेमाःगु धका माग यासे अनसन च्वंगु खः।

भाषासेवी समाजसेवी चक्रमान डंगोल मदुगु खुदँ दूगुया वार्षिक तिथी लाका वयकःयात लुमंकेगु ज्या जूगु दु।

वयकः रेडियो उपत्यका एफ एमया संंस्थापक अध्यक्ष खःसा वन्दे नारायण परिवार क्लबया नं छम्ह संस्थापक खः। उगु ज्याझ्वलय् समाजसेवाः व भाषासेवाय् थःगु जीवन पानादीम्ह चक्रमान डंगोलयात लुमन्ती युगवाणी नेटवर्कया कजि पुपराज पराजुलीया सभाध्यक्षताय् जूगु खः।

ज्याझ्वलय् सन्तकुमार महर्जनं लसकुस न्वचु तयेगु झ्वलय् मदुम्ह डंगोलया गुण लुमंकूसे मदुम्ह डंगोलया किपाय् पाहाँपिन्सं श्रदान्जली कथं स्वाँमा व खादागा देछागु खः। मदुम्ह चक्रमान डंगोलयात लुमंकेगु झ्वलय् नेपाल पत्रकार संघया नायः विपुल पोखरेल,युगवाणी नेटवर्कया कार्यकारी सल्लाहकार कृष्ण केसि व कार्यकारी निर्देशक सुरेश आचार्यया नापनापं मदुम्ह डंगोल जहान मयजु लक्ष्मी डंगोल पिन्सं नं चक्रमान डंगोलयात लुमंकुसे श्रद्धान्जली देछानादीगु खःसा लुमन्ति ज्याझ्वः सन्चारकःमि प्रज्वल शाक्यं न्ह्याकादीगु खः।

चःमती ध्यान पार्कया शिलान्यास येँ महानगरया मेयर विद्यासुन्दर शाक्यं थौं छगु ज्याझ्वःया दथुइ ध्यान पार्कया शिलान्यास जुगु दु।

येँ महानगर वडा १५ या चःमती जग्गा विकास आयोजनाय् जनमार्ग उपभोक्ता समितिं यागु छगु ज्याझ्वः दुथुइ शिलान्यास यागु दु। शिलान्यास लिपा थःगु खँ त्ययेगु झ्वलय् मेयर शाक्यं, चःमति आयोजनाया ज्या ०७८ असार मसान्त दुने उपभोक्तायात हस्तान्तरण यायेगु ज्याझ्वः दुगु खःसा योजना कोविडया कारण छु महिना लिपा वंगु दु धका धयादीगु खः।

‘निर्वाचित लिपा जिमिसं निदँया दुने आयोजनाया ज्या क्वचाकेगु धका धयागु खः। लक्ष्य कथं ज्याना जुगु खः। उकिया दथुइ विश्वव्यापी महामारीया रुपं फैलै जुगु कोविडया कारण छु ई ढिला जुगु खः।’ मेयर शाक्यं धयादीगु दु, ‘ल्यः दनिगु आयोजनाय् यक्को ज्या क्वचाये धुकुगु दु। उपभोक्ताया जागरुकता जुगुलि उपलब्धीयात उपभोक्तापिनिगु ल्हातय् बिइत जिपि तयारी यानाच्वंनागु दु।’

पार्क ५५ लाख २२ हजार ४२० रुपैयाँ लागतय् निर्माण जुइत्यंगु खः । ०५८ सालय् सुरु जुगु योजना ०७४ साल लिपा जक गति मकागु खः।