बाँकेया भेरी अस्पतालय् बिहीवाः चान्ह्यः चिकित्सकयात आक्रमण यागु दु।

उपचारया झ्वलय् छम्ह संक्रमित सीगुलि वया थःथितिइ चिकित्सकयात आक्रमण यागु धका अस्पतालया मेडिकल सुपरिटेन्डेन्टं धागु दु। बिहीवाः चान्ह्यः ८ बजे सिप्याप भेन्टिलेटरय् दाङया ५४ दँ दुम्ह संक्रमित उपचारया झ्वलय् मदुगु खः।

वयागु अवस्था गम्भीर दुम्ह खः । स्वास्थ्यय् सुधार मवःगु खः। चिकित्सकपिन्स यक्को कुतः यागु खःसा लिपा मदुगु खः। उम्ह मनू मदेयवं वया थःथितिं अस्पतालय् तोडफोड यासे चिकित्सकयात आक्रमण यायेवं प्यम्ह चिकित्सकसपि झ्यालं तिन्हुया ज्यान बचे याये मागु खः ।

गुम्ह चिकित्सक व नर्सपि लितू लिया आक्रमण यागु खः। उपचारय् संलग्न डाक्टर, नर्सपि नाप खुम्ह स्वास्थ्यकर्मीपिन्त आक्रमण यागु खः। चिकित्सकपिन्त प्यम्हेसिया आक्रमण यागुलि निम्हेसित प्रहरीें नियन्त्रणय् काये धुकुगु दु। सुरक्षाया प्रत्याभूति जुइ मागु, आक्रमण यापिन्त कडा स्वया कडा कारबाही जुइ मागु माग चिकित्सकपिन्स यागु दु।

चिकित्सकयात आक्रमण जुइवं आः अस्पताल प्रशासन, नेपाल मेडिकल एसोसिएसन लगायतपि सहभागिताय् आकस्मिक बैठक च्वना च्वंगु दु।

बेलायत सरकारं नेपालयात ग्वाहालि यागु स्वास्थ्य सामग्री थौं येँ थ्यंगु दु।

उगु स्वास्थ्य सामग्री २६० भेन्टिलेटर, १९ हजार २ सय फेससिल्ड थौं सुथय् चार्टर्ड उडानपाखे येँ हःगु खः।

उगु सामग्री थौ सुथय् त्रिभुवन अन्तर्राष्ट्रिय विमानस्थलय् नेपालया लागि बेलायती राजदूतत निकोला पोलिटं स्वास्थ्यमन्त्री हृदेयश त्रिपाठीयात हस्तान्तरण यागु धका परराष्ट्र मन्त्रालयं जारी यागु प्रेस विज्ञप्तिइ उल्लेख यागु दु।

उगु उडानपाखे च्यारिटी संस्था नेपाल मेड युके न प्रदान यागु अक्सिजन कन्सन्ट्रेटर न हःगु दु धका विज्ञप्तिइ उल्लेख दु।

प्रतिनिधिसभा विघटन विरुद्धया रिटय् संवैधानिक इजलास सुनुवाइ यायेगु प्रक्रिया सुरु जुगु दु।

उगु रिट सुनुवाइया लागि थौं शुक्रवाः सर्वाेच्च अदालतय् संवैधानिक इजलास गठन जुइत्यंगु दु।

सर्वाेच्चया प्रवक्ता भद्रकाली पोखरेलया कथं संवैधानिक इजलास च्वनिइपि न्यायाधीश ल्यये धुका थौ हे इजलासया रिटय् सुनुवाइ यायेगु तयारी दु।

सरकारया सिफारिसय् वंगु शुक्रवाः राष्ट्रपति विद्यादेवी भण्डारीं यागु संसद विघटन विरुद्धया दक्को मुद्दा संवैधानिक इजलासं स्वयेगु निर्णय बिहीवाः सर्वोच्च अदालतं यागु दु।

संवैधानिक इजलासय् च्वनिइपि न्यायाधीशया छनोट प्रधानन्यायाधीश चोलेन्द्र शमशेर जबरां याइ।

बंगालया खाडीइ विकसित यास चक्रवातया प्रभाव कारण थौं शुक्रवाः सुदूरपश्चिम बाहेकया प्रदेशय् यक्को थासय् नँन्याना वाः वइगु धका मौसम पूर्वानुमान महाशाखां धागु दु।

आः नेपालय् यास चक्रवात पश्चिमउत्तर–पश्चिम न्ह्यावनेगु झ्वलय् कमजोर जुया न्यून चापीय क्षेत्रया प्रभाव दु । उकि देयन्यन सामान्य निसे तसकं वाः वइगु अवस्था दु धका धागु दु । मौसमविद् कथं कन्ह्यनिसे शनिवाः बहनि तक सुधार जुइ धका धागु दु ।

महाशाखां जारी यागु नियमित बुलेटिनय् उल्लेख जुगु कथं शुक्रवाः न्हिनय् व चान्ह्यः प्रदेश १, प्रदेश २, बाग्मती, गण्डकी व लुम्बिनी प्रदेशया गन गन थासय् तसक वाः वइगु व उच्च वेगय् वाः फँय् वइगु सम्भावना दु।

अथेहे उच्च हिमाली न पहाडी भूभागया यक्को थासय् वाः वया हिमपात तक जुइगु सम्भावना दु ।

गन धासा तसक हिमपातया सम्भावना दु धका बुलेटिनय् उल्लेख यागु दु। शनिवाः प्रदेश १, गण्डकी व लुम्बिनी प्रदेशय् भारी वर्षा जुइफु धका पूर्वानुमान महाशाखां धागु दु।

अस्पतालया बजेट पहुँचवाला नेता व मन्त्रीया गृहजिल्लाय् जक केन्द्रित जुगु ओलोचना जुया वयाच्वगुलि सरकारं उपचारया विशेष उपकरणया लागि मेमेगु अस्पतालय् न बजेट छ्वंगु दु

कोभिड–१९ कारण गम्भीर बिरामी जूपिन्त व मस्तय्त उपचारया लागि पिडियाट्रिक आइसीयू व आइसीयु भेन्टिलेटरय् थप व्यवस्था यायेत अर्थ मन्त्रालयं ४१ गु अस्पतालयात १ अर्ब ४१ करोड रुपैयाँ बजेट सुनिश्चित यागु दु।

उकिइ पिडियाट्रिक आइसीयूपाखे ताप्लेजुङ अस्पताल, संखुवासभा अस्पताल, तेह्रथुम अस्पताल, भोजपुर अस्पताल, खोटाङ अस्पताल, सोलुखुम्बु अस्पताल, ओखलढुङ्गा अस्पताल, रंगेली अस्पताल, सुनसरी अस्पताल, सर्लाही अस्पतालयात स्वंगु, स्वंगु करोड रुपैयाँ छुटे यागु दु । बारा अस्पताल, रामेछाप अस्पताल, दोलखा अस्पताल, रत्ननगर अस्पताल, भक्तपुर नगर अस्पताल, रसुवा अस्पताल, पर्वत अस्पताल, स्याङ्जा अस्पताल, म्यादी अस्पतालयात न स्वंगु, स्वंगु करोड रुपैयाँ खः।

पाल्पा अस्पताल, रोल्पा अस्पताल, पृथ्वीचन्द्र अस्पताल, मुसीकोट अस्पताल, मुगु अस्पताल व मेहलकुना अस्पतालयात न स्वंगु, स्वंगु करोड रुपैयाँ सहमति बिगु दु। सेती प्रादेशिक अस्पतालयात ६ करोड, गजेन्द्रनारायण अस्पतालयात ९ करोड,  तुल्सीपुर अस्पतालयात ९ करोड व भक्तपुर अस्पतालयात १२ करोड रुपैयाँ सुनिश्चित यागु दु धका मन्त्रालयं धागु दु।

आईसीयू भेन्टिलेटरपाखे धुलिखेल अस्पताल, पोखरा स्वास्थ्य विज्ञान प्रतिष्ठानयात, बिपी कोइराला स्वास्थ्य विज्ञान प्रतिष्ठान व लुम्बनी प्रादेशिक अस्पताल नाप भीम अस्पतालयात १ करोड ८० लाख रुपैयाँया दरं सहमति बिगु दु । गजेन्द्रनारायण अस्पताल, भेरी अस्पतालयात, डडेलधुरा अस्पताल, नारायणी अस्पताल, कोशी अस्पताल, राप्ति स्वास्थ्य विज्ञान प्रतिष्ठान, कर्णाली स्वास्थ्य विज्ञान प्रतिष्ठान, जनकपुर प्रादेशिक अस्पताल व सुर्खत प्रदेश अस्पतालयात १ करोड २० लाख रुपैयाँ दरं स्रोत सुनिश्चित यागु दु।

कान्ति बाल अस्पताल, पाटन स्वास्थ्य विज्ञान प्रतिष्ठान व त्रिवि शिक्षण अस्पतालयात स्वंगु, स्वंगु करोड रुपैयाँ सुनिश्चित यागु दु। अर्थ मन्त्रालयं मेची अस्पताल व धौलागिरी अस्पतालयात ६० लाख रुपैयाँया दरं व सेती प्रादेशिक अस्पताल नाप महाकाली अस्पताल व भरतपुर अस्पतालयात २ करोड ४० लाख दरं स्रोत सुनिश्चित यागु दु ।

स्वास्थ्य तथा जनसंख्या मन्त्रालयं माग यागु कथं अर्थ मन्त्रालयं कोभिड–१९ या रोकथाम, उपचार नाप नियन्त्रणया लागि बजेट सुनिश्चित याना वयाच्वंगु दु ।