अफगानिस्तानपाखे कतार जुया ११८ म्ह नेपाःमि येँ हःगु दु। उमित जजिरा एयरं विमानपाखे थौं सुथय् येँया त्रिभुवन अन्तर्राष्ट्रिय विमानस्थलय् अवतरण यागु खः।

अफगानिस्तानया काबुलपाखे अमेरिकी एयरफोर्सं उमित उद्धार यासे कतारया दोहा हःगु दु।परराष्ट्र मन्त्रालयं ११८ म्ह नेपाःमिपिन्त येँ थ्यःगु धका ट्वीटरपाखे जानकारी बिगु दु।

नेपाल नागरिक उड्डयन प्राधिकरणया छम्ह अधिकारीं अफगानिस्तानपाखे कुबेत जुया १२७ म्ह थौं सुथय् येँ हःगु जानकारी बिगु खः। अमेरिकी दूतावासया सुरक्षागार्डया रूपय् नेपाःमि छ्वयागु धका कम्पनी एफएसआई वर्ल्डवाइड नेपालया सञ्चालक बुद्धिबहादुर गुरुङं न ३८५ म्ह नेपालीयात अमेरिकां उद्धार याना थ्यकागु व उकि मध्ये १२७ म्ह थौं सुथय् नेपाल वःगु धका धागु दु। अय्न नेपाल अवतरण यापि १२७ म्ह मध्ये भचा भारतीय नागरिक न दुगु धका धागु दु।

मन्त्रिपरिषद् बैठक आः बालुवाटारय् जुयाच्वंगु दु।

प्रधानमन्त्रीे सरकारी निवास बालुवाटारय् आकस्मिक मन्त्रिपरिषद् बैठक च्वंगु खः।

थुगु बैठकं राजनीतिक दल विभाजन सम्बन्धी अध्यादेश हइगु निर्णय याइगु अनुमान यागु दु।

येँ महानगरपालिकाया मेयर विद्यासुन्दर शाक्यं जनप्रतिनिधिं नगर सभां पारित याःगु नीति तथा कार्यक्रमया प्रभावकारी कार्यान्वयनय् कर्मचारीं भूमिका अप्वयेके माःगुलिइ बः बियादीगु दु ।

बार्षिक कार्ययोजना तर्जुमा यायेगु झ्वलय् विभागीय प्रमुखतलिसे सहलह यासें प्रमुख शाक्यं जनप्रतिनिधिं तयार याःगु ज्याझ्वःया कार्यान्वयनय् न्ह्याःवनेत विभागीय प्रमुख व कर्मचारीतयत इनाप यानादिगु खः।

अथेहे उपमेयर हरिप्रभा खड्गी श्रेष्ठं जनप्रतिनिधि व कर्मचारीया सुमधुर स्वापुतिं बालागु लिच्वः वइगु धका धयादिगु खः। प्रमुख प्रशासकिय अधिकृत राजेश्वर ज्ञवालीं प्रशासनिक नेतृत्वं राजनीतिक नेतृत्वया नीति कार्यान्वयनय् ग्वाहालि याइगु धासें आ. व. ०७८÷०७९ या लागिं स्वीकृत कार्यक्रम कार्यान्वयन यायेत आव्हान यानादिगु खः।

बार्षिक कार्ययोजना तर्जुमा सहजीकरणया लागिं निर्देशक बसन्त आचार्यया संयोनकत्वय् छगु टोली गठन याःगु खः । उगु टोलीइ दुजलय् उपनिर्देशक प्रहलाद घिमिरे, प्रवीण प्याकुरेल व शाखा अधिकृत संन्जिव श्रेष्ठ दु । उथु टोलीं साउन १८ गते सहलह ज्याझ्वः यानाः ज्या न्ह्याकूगु खः । व धुंकाः विभागतयत छ्वःगु ढाँचाय् कार्ययोजना तयार जूगु दु। थुकथं तर्जुमा याःगु सम्झौताय् कन्हय् प्रमुख प्रशासकीय अधिकृत व सम्बन्धित विभागीय प्रमुखपिन्स ल्हाःचिं तइ ।

महानगरपालिकाया आर्थिक दँ २०७८÷०७९ या कार्ययोजनाया मुख्य मुख्य ब्यवस्था नियमित दक्वं ज्या चौमासिकय् जुइ ।

मापदण्ड, कार्यविधि तयारी अले अवधारणा तयार यायेगु ज्यायात न्हापांगु चौमासिकय् तःगु दु । स्वास्थ्य बीमा यायेगु, बक्यौता भुक्तानी, योजनाया स्पेसिफिकेसन, लगत तयार व सुचं प्रकाशनया ज्या न्हापांगु चौमासिकय् जुइ । बोलपत्र मूल्याङ्कन व सम्झौतामध्ये आन्तरिक रुपं याइगु न्हापांगु चौमासिकय् व परामर्श सेवां याइगु निगूगु चौमासिकय् तःगु दु । पूर्वाधार निर्माणपाखेया योजना स्वंगूगु चौमासिकय् याइ । थीथी संस्थायात बीगु ज्याझ्वः ग्वहालि निगूगु चौमासिकय् क्वचायेकी । संघसस्था ल्यज्या निगूगु चौमासिकय् जुइ । विद्यालयस माग मुनेज्या, आन्तरिक आय मदुगु विद्यालय ल्यज्या, नमूना विद्यालय ल्यज्या न्हापांगु चौमासिकय् व रकम निकासा निगूगु चौमासिकय् जुइ।

शिक्षा विभागया नियमित ज्या दक्वं चौमासिकय् जुइ । सामाजिक विकास विभागअन्तर्गत सुचं प्रकाशन, संस्था ल्ययेगु, अवधारणा तयार यायेगु, सहलह न्हापांगु चौमासिकय् याइ। खेलकुदय ज्याझ्वः वडाय् छ्वयेगु निकासा, पौरखी मेला, स्वयमसेवक परिचालन निगूगु चौमासिकय् जुइ ।जनप्रतिनिधितय् क्षमता विकास व तालिम न्हापांगु व निगूगु चौमासिकय् अले कर्मचारीतय् क्षमता विकास व तालिम निगूगु व स्वंगूगु चौमासिकय् जुइ ।ककनी व धुनीबेँसी पालिकायात बीगु विकास अनुदानया लागिं न्हापांगु चौमासिकय् सम्झौता जुइसा निगूगु चौमासिकय् निकासा छ्वइ ।

न्हापांगु चौमासिकय् गुणस्तरया लिधंसाय् होटल अले रेष्टुरेन्टया बर्गीकरण याइ ।स्वास्थ्यपाखे वासः खरिद न्हापांगु चौमासिकय् व स्वास्थ्य सेवाया नियमित ज्या दक्वं चौमासिकय् जुइ । थ्व लिसें नियमित जुइगु विभागया ज्यायात दक्वं चौमासिकय् तःगु दु ।

क्षत्रपाटी निःशुल्क चिकित्सालय अस्पतालया अध्यक्ष डा. मनोजमान श्रेष्ठ न कोरोना सक्रमित जुगु दु।

दोस्रो कोरोना लहर सुरु जुगु इलय् कोरोना सक्रमित जूपिन्त येँ महानगरपालिका नाप सहकार्य याना क्षत्रपाटी निःशुल्क चिकित्सालयं कोराना सक्रमित जुपिन्त निःशुल्क उपचार यायेगु ज्याय् तसक सक्रिय भुमिका म्हितूगु खः।

अस्पतालय कोरोना बिरुद्धया खोप बिइगु ज्याय् तसक सक्रिय भुमिका म्हितादीगु खः। अथेहे निःशुल्क चिकित्सालय न्हुगु भवन दयकेगु ज्या न उलि हे सक्रिया कथं ज्या यानाच्वंगु खः।

स्वन्हु न्ह्यःनिसे सक्रमित जुयादीगु खःसा वयकःयात डा. शिशिषलाल श्रेष्ठं उपचार यानाच्वंगु खः। आः डा. मनोजमान छेँ च्वना हे उपचार यानाच्वनादीगु दु।

डा. मनोजमान नेपाल मेडिकल काउन्सिलया केद्रिय सदस्य नाप अरनिको समाजया न बरिष्ठ उपाध्यक्ष न खः।

लुँया भाः थौं तोलां सच्छि क्वहावंगु दु।

थौं लुँ तोला सच्छि क्वहावया ९० हजार ६ सय रुपैयाँ निर्धारण यागु दु धका नेपाल सुनचाँदी व्यवसायी महासङ्घं धागु दु।

म्हिगः द्धःच्छि थहावना लुँ तोला ९० हजार ७ सय रुपैयाँ थ्यंगु खः।

अथेहे वहः तोलां न्यातका क्वहावंगु दु। थौं न्यातका कुहावया तोलाया  १२ सय रुपैयाँ तोके यागु दु।