थौं शेयर बजाःया परिसूचक नेप्से सामान्य थहावंगु दु।

नेप्से थौं शून्य दशमलव २३ अङ्कं थहावना ३ हजार १६० दशमलव ३२ विन्दुइ थ्यंगु दु। थौं जलविद्युत्, विकास बैंक व फाइनान्स समूहया शेयर थहावंगु दु।

विकास बैंक समूहया शेयर २३२ अङ्क, जलविद्युत ११७, फाइनान्स १४१, उत्पादनय् ९० व माइक्रोफाइनान्स समूहया शेयर साढे ५ अङ्क थहावंगु दु। बैंक, व्यापार, होटल, बीमा व मेमेगु समूहया शेयर भाः क्वहावंगु दु।

थौं जोशी, हाइड्रो, रुरु जलविद्युत्, अरुण काबेली हाइड्रो, गुराँस फाइनान्स नाप १५ कम्पनीया शेयर १० प्रतिशतं थहावंगु दु। थौं २२१ कम्पनीया ३ करोड ६ लाख कित्ता शेयर १८ अर्ब २० करोड रुपैयाँ कारोबार जुगु खः।

दकलय् अप्वो अपी पावर कम्पनीया ८६ करोड ३८ लाख रुपैयाँ बराबरया शेयर किनबेच जुगु खः।

प्रधानमन्त्री शेरबहादुर देउवां राजनीतिक अस्थिरता हयेगु कथं राजनीतिक दलसम्बन्धी अध्यादेश हःगु दु। थ्व नाप प्रमुख विपक्षी नेकपा एमाले व सत्तारुढ जनता समाजवादी पार्टी (जसपा) तछ्यात अपूइगु जुगु दु। मन्त्रिपरिषद थौं मंगलबाः च्वंगु बैठकं पास याना राजनीतिक दल सम्बन्धी अध्यादेशं संसदीय दल वा केन्द्रीय समितिइ २० प्रतिशत थ्यकल धासा दल विभाजन याये फइ धका उल्लेख यागु दु।

आः दुगु राजनीतिक दलसम्बन्धी ऐनय् संसदीय दल व केन्द्रीय समितिइ २० प्रतिशत थ्यकल धासा दल विभाजन याये फइगु प्रावधान दु। वंगु ८ वैशाख २०७७ य् तत्कालीन प्रधानमन्त्री केपी शर्मा ओलीं न दल विभाजनयात अपूकेगु कथं अध्यादेश हःगु खः। उगु इलय् संसदीय दल वा केन्द्रीय समितिइ ४० प्रतिशत थ्यकल धासा दल विभाजन याये फइगु प्रावधान तःगु खः।

तर उकिया तत्कालीन सत्तारुढ दल नेपाल कम्युनिस्ट पार्टी (नेकपा) दुने तधःगु विरोध जुगु खः। नेकपा विभाजन यायेगु कथं अध्यादेश हःगु धासे पुष्पकमल दाहाल प्रचण्ड, माधवकुमार नेपाल पक्षया नेतापिन्स विरोध यागु खः।

एमाले व जसपा तज्याइगु सम्भावना

प्रधानमन्त्री शेरबहादुर देउवां हगु दल विभाजन यायेत अझ अपूकेगु कथं राजनीतिक दलसम्बन्धी अध्यादेश हःगु खः।

प्रमुख विपक्षी नेकपा एमाले विभाजन योगु व सरकारयात संसद यागु पूरा कार्यकाल न्ह्याकेगु वयागु रणनीति दु। प्रधानमन्त्री देउवां हगु दल विभाजन यायेत अपूकेगु निति अध्यादेश हगु खः।

एमालेया निर्वाचन आयोगय् दर्ता जुगु केन्द्रीय कमिटीइ २०३ म्ह दु। उकि मध्ये छु भचा राजनीतिक नियुक्ति काये धुकुगुलि न्हुगु अध्यादेश कथं दल विभाजन यायेत नेपाल समूहयात ४० म्ह स्वया अप्वो केन्द्रीय सदस्यपि माः। एमालेया संघीय संसदीय दलय् १५१ म्ह सांसदपि दु। उकिइ २० प्रतिशतय् ३१ म्ह सांसदपि माः। नेपाल समूहयाके उलि ल्याः खने मदु। न्हुगु अध्यादेशं एमाले जक मखु, सत्तारुढ गठबन्धनय् दुगु जसपा न तज्याइगु खनेदु।

दलया वैधानिकता उपेन्द्र यादव समूहं काये धुकुगु दु सा महन्थ ठाकुर पक्षय् आः ३२ म्ह सदस्यी दलय् २० प्रतिशत अथे धइगु ७ म्ह सांसदपि दःसा न्हुगु दल दर्ता याये फइ। थुगु ल्याः ठाकुर पक्षयाके दु।

प्रदेश २ या प्रदेश प्रमुखय् हरिशंकर मिश्र नियुक्त यागु दु। सरकारया सिफारिसय् राष्ट्रपति विद्यादेवी भण्डारीं मिश्रयात मंगलबाः प्रदेश प्रमुखय् नियुक्त यागु खः।

वयकः महोत्तरीया मिश्र नेपाली कांग्रेसया पुलाम्ह नेता खः। राष्ट्रपति विद्यादेवी भण्डारीं प्रदेश प्रमुख राजेश झायात पदमुक्त याना मिश्रयात प्रदेश प्रमुख नियुक्त यानागु धका राष्ट्रपति कार्यालयया प्रवक्ता जगन्नाथ पन्तं जानकारी बिगु दु।

मन्त्रिपरिषदं सोमबाः च्वंगु बैठकं झायात पदमुक्त यासे महोत्तरीया मिश्रयात नियुक्त यायेगु सिफारिस यागु खः।

 न्यादी हाइड्रोपावर कम्पनी लिमिटेडं प्राथमिक सार्वजनिक निष्काशन (आइपीओ) बिक्री खुला यागु दु। कम्पनीं आयोजना प्रभावित क्षेत्र लमजुङया स्थानीय बासिन्दा नाप संस्थापक शेयर धनीया लागि थौं बिक्री खुला यागु दु।

थुगु आइपीओ याकन भदौ १५ गते तक व लिबाक्क भदौ ३० गते तक बिक्री खुला जुइ धका धागु दु। कम्पनीं प्रतिशेयर १०० अङ्कित मूल्यया कुल १८ लाख कित्ता साधारण शेयर निष्काशन यायेत्यंगु खः। उकि मध्ये आयोजना प्रभावित स्थानीयवासीया लागि ५ लाख, जिल्लावासीया लागि १० लाख व बाँकी ३ लाख कित्ता शेयर कम्पनीया थःपिनिगु संस्थापक शेयरधनी बुटवल पावर कम्पनी व लमजुङ विद्युत् विकास कम्पनीया कर्मचारीपिनिगु लागि निष्काशन यायेत्यंगु खः।

आइपीआ एनएमबी बैंकया बेँसीसहर शाखा, सिभिल बैंकया भुलभुले शाखा व ग्लोबल आइएमई बैंकया बेँसीसहर, उदिपुर, दोर्दी, भोर्लेटार, सुन्दरबजार व भोटेओडार शाखा कार्यालयपाखे आवेदन बिइ फइ।

लुँया भाः थौं तोलां प्यसः थहावंगु दु।

म्हिगः तोलां ९० हजार ६ सय रुपैयाँ कारोबार जुगुलि थौं तोलाया ९१ हजार रुपैयाँ थ्यःगु दु धका नेपाल सुनचाँदी व्यवसायी महासङ्घ धागु दु।

अथेहे, थौं वहः न तोलां झीतका थहावंगु खः। थौं तोलां झीतका थहावना १२ सय १० रुपैयाँ कारोबार जुगु दु धका महासङ्घं धागु दु।