स्वास्थ्य तथा जनसंख्या मन्त्रालयया कथं वंगु २४ घण्टाय् थप १८७ म्हेसिगु ज्यान वंगु दु ।

थ्व नाप सीपिनिगु ल्याः ४८५६ म्ह थ्यंगु दु । १८ हजार ५४८ म्हेसित परीक्षण यागुलि ८१६७ म्हेसित संक्रमण पुष्टि जुगु खः।

थ्व नाप आःतक संक्रमितपिनिगु ल्याः १ लाख ९ हजार ७४० म्ह थ्यंगु दु। आःतक ३ लाख ३३ हजार १०८ म्ह संक्रमणमुक्त जूगु दु।

अथेहे वंगु २४ घण्टाय् जक ५४५५ म्ह संक्रमणमुक्त जूगु दु ।

येँ महानगरपालिकाया लगानी २०० वेडया आइसोलेसन, ४२ भेन्टिलेटर, ३५ वेडया कोविड अस्पताल, ५० मोनिटर, कन्टिन्युअस पोजेटिभ एअर प्रेसर थेरापी मेसिन (सी प्याप) १० व वाइलेवल पोजेटिभ एअरवे प्रेसर मेसिन (वी—प्याप) १० नाप मेमेगु सेवा व उपकरण ग्वाहालि बिगु दु।

कोविड संक्रमण जुया विरामी जूपि नागरिकपिन्त सहज उपचार सेवाया लागि येँ महानगरं स्वंगू अस्पतालनाप सहयोग सम्झौता यागु दु। थौं सहिद गंगालाल राष्ट्रिय हृदय केन्द्र, शुक्रराज ट्रपिकल तथा सरुवा रोग अस्पताल व नेपाल कोरिया मैत्री नगरपालिका अस्पतालनाप सम्झौता यागु दु । अथेहे म्हिगः बैशाख ३१ गते न्ह्यगू, बैशाख २४ गते छगु व २७ गते छगु याना १२ गु सरकारी व सामुदायिक अस्पतालनाप सम्झौता याये धुकुगु दु ।

थथे सम्झौता जुगु महानगरया लगानीइ सामाखुशी च्वंगु राधा स्वामी सत्संग ब्यासया भवनय् महानगरपालिकां अक्सिजन नाप २ सय वेडया आईसोलेसन केन्द्र व छत्रपाटी निःशुल्क चिकित्सालय ३५ वेडया कोविड अस्पताल सञ्चालन जुइ । थौंं सम्झौता जूगु अस्पताल मध्ये सहिद गंगालाल ५ भेन्टिलेटर, शुक्रराज ट्रपिक अस्पतालय् १० वेडया स्टाफ अव्जर्वेसन कक्ष स्थापनाया लागि करीब ११ लाख रुपैयाँ नगद व १० हजार अट्राक्टस किट न्यायेते बिल बमोजिम भुक्तानी यायेमागु रकम बराबर अनुदान ग्वाहालि यागु दु।‘कोविडया उपचारय् प्रभावकारी दयकेगु व संक्रमण म्हो यायेगु निति प्राथमिकता बिया ज्या याय् मागु अवस्था दु ।

जिमिगु चाहना भेन्टिलेटर खरिद यायेगु स्वया संक्रमण घटे याना स्वच्छ समाज निर्माण यायेगु खः । तर, महामारी फैलै जुगु । आःया आवश्यकता धइगु अस्पतालया भार घटे यायेगु हे खः।’ सम्झौता याये धुका येँ महानगरया प्रमुख विद्यासुन्दर शाक्यं धयादीगु दु, ‘महामारीया जोखिम घटे यायेत सरकार, अस्पताल व नागरिकपि सकसिगु समान दायित्व खः। सकसिया थःथःगु दायित्व पूरा याना खतरायात याकन हे नियन्त्रणय् हयेफइ।’ वयकलं स्वास्थ्यकर्मीपिनिगु ज्या तसक च्वछाय् बहजू धका धयादीगु दु।

स्वास्थ्यकर्मीपिनिगु हौसला थकायेगु मेगु मुख्य जिम्मेवारी खः। प्रमुख शाक्यं धयादीगु खः। उगु ज्याझ्वलय् मध्यपुर थिमी नगरया प्रमुख मदनसुन्दर श्रेष्ठं, महानगरं थथे अस्पतालयात ग्वाहालि यागु तसक च्वछायेबहजु धका धयादीगु खः। वयकलं मध्यपुर थिमी नगरं सञ्चालन यागु नेपाल कोरिया मैत्री नगरपालिका अस्पतालया क्षमता थकायेगुलि महानगरया ग्वाहालिं अन्तरनगर सम्बन्ध अझ बालाइ धका धयादीगु खः।

महानगरया प्रमुख शाक्यया रोहबरय् महानगरपाखे जनस्वास्थ्य विभागया प्रमुख हरिबहादुर कुँवरले व अस्पतालपाखे सम्बन्धित अस्पतालया अधिकारीपिन्स हस्ताक्षर यानादीगु खः। उगु ज्याझ्वलय् उपप्रमुख हरिप्रभा खड्गी श्रेष्ठ, प्रमुख प्रशासकीय अधिकृत राजेश्वर ज्ञवाली, वडाध्यक्षपिनिगु न सहभागी दुगु खः।

वीरगञ्जया थीथी अस्पतालय् कोरोना संक्रमणं थप ११ म्ह मन्त ।

नारायणी अस्पतालय् च्याम्ह, नेशनल मेडिकल बाबा होटलय् सञ्चालन जुयाच्वंगु कोरोना अस्पताल, प्रभु अस्पताल व स्पर्श मल्टी स्पेस्यालीटी हस्पिटलय् छम्ह छम्हेसिगु ज्यान वंगु दु । सीपि पर्साय् न्ह्यम्ह, बाराय् स्वम्ह व रौतहटय् १ छम्ह मदुगु खः।

नारायणी अस्पतालरौतहटया गढीमाई नगरपालिका–५ या ४८ दँ दुम्ह मिजंम्ह, वीरगञ्ज–१६ नगवाया ८५ दँ दुम्ह मिसाम्ह, बाराया जीतपुर सिमरा उपमहानगरपालिका–७  या ५० दँ दुम्ह मिसा, पर्साया बहुदरमाई नगरपालिका–४ डकैला बहुअरीया ५० दँ दुम्ह मिसाम्ह मदुगु खः ।

अथेहे ६५ दँ दुम्ह, वीरगञ्ज– १५ या ५९ दँ दुम्ह मिजंम्ह, पर्साया सखुवाप्रसौनी गाउँपालिकाया– २ या ३८ दँ दुम्ह मिजम्ह व बारा कलैया उपमहानगरपालिका– १७ ब्रम्हपुरीया ३४ दँ दुम्ह मिसाम्ह नारायणी अस्पतालय मदुगु खः। अथेहे नेशनल मेडिकल कलेजं बाबा होटलय् सञ्चालन याना तःगु कोरोना अस्पतालय् जीतपुर सिमरा–४ च्वम्ह ५५ दँ दुम्ह मिजंम्ह मदुगु खः। वीरगञ्ज–१० च्वम्ह ४६ दँ दुम्ह प्रभु अस्पतालय् उपचार यायेगु झ्वलय् मदुगु खः ।

स्पर्श मल्टी स्पेस्यालिटी हस्पिटलय् वीरगञ्ज–१३ या ६८ दँ दुम्ह मिजंम्ह मदुगु खः।