नेकपा माओवादी केन्द्रया केन्द्रीय सदस्य नाप सांसद सुदन किराँतीं पार्टीया संरचना संघीय स्वरूपय् मवंगु धका असन्तुष्टी यागु दु।

जारी केन्द्रीय कमिटी बैठक समूहगत धारणा तयेगु झ्वलय् भोजपुर इन्चार्ज तक जुयादीम्ह किराती प्रदेश व स्थानीय तहयात स्वायत्त अले जिल्लायात समन्वय भूमिकाया व्यवस्था यायेमाःगु धका सुझाव बिगु दु। च्यागु पाना राजनीतिक प्रतिवेदनय् टिप्पणी यासे किरातीं धागु दु, ‘देय् संघीय स्वरूप वने धुकुगु दु। तर, देय् न्ह्याकिइगु पार्टी केन्द्रिकृत मानसिकताय् न्ह्याकेगु खःसा पार्टी बलाइ मखु।’ स्थानीय तहयात गौण दयकेत अझ न जिल्ला हे निर्णायक जुइगु, प्रदेश स्वया केन्द्रय् हे सर्वाधिकार जुइगु संगठनात्मक स्वरूपयात हिलेमागुलि बःबिगु दु।

बलागु संगठन जक आन्दोलन न्ह्याके फइ धका धयादीसे वयकल धयादीगु दु, ‘संगठन बलाकेगु खःसा प्रणाली बलाकेमाः। जनताया पक्षय् संगठनयात परिचालन याये। आन्दोलन जनजीविकानाप स्वायेनु।’ संविधानय् उल्लेखित शिक्षा, स्वास्थ्य थे जागु मौलिक अधिकार जनतां प्रत्याभूत याये मखगु धासे पार्टीं थुकिइ बिचाः यायेमाः धका किरातीं धागु दु।

जनयुद्धया जनमुक्ति सेना, सांस्कृतिक मोर्चाय् दनाच्वंगु अवस्था आः दयनीय पाखे वनाच्वंगुलि पार्टीयात ध्यानाकर्षण यागु खः।‘थौं जनमुक्ति सेनाया बहादुर कम्पनी कमाण्डरपि सामान्य प्राइभेट कम्पनीया सेक्युरिटी गार्ड यानाच्वंगु दु। सामना सांस्कृतिक परिवारया कलाकारपि दोहोरी हालेत बाध्य जुयाच्वंगु दु। घाइते जूपि उपचारया लागि चन्दा फ्वना च्वंगु दु’, किरातीं धागु दु’ ‘थुकिया पिने बालागु मनोविज्ञान निर्माण जुगु मदु। थुकियात पार्टी न सम्बोधन यायेमाः।’

नेकपा माओवादी केन्द्रं स्थायी समितिया बैठकं केन्द्रीय समिति बैठक आइतबाः सम्पन्न यायेगु कथं निर्णय यागु दु।

आइतबाः सुथय निसे पार्टी कार्यालय पेरिसडाँडाय् स्थायी समिति बैठकं केन्द्रीय समितिया बैठक सम्पन्न याना न्ह्यावनेगु धका निर्णय यागु खः। बैठकय् नेतापिनिगु कार्यविभाजन लगायतया विषय छलफल जुगु दु धका पार्टी प्रवक्ता नारायणकाजी श्रेष्ठं धागु दु।

केन्द्रीय समिति बैठकय् समूहगत छलफलय् वंगु रिपोर्ट कन्ह्य च्वनिइगु स्थायी समितिया बैठकं व्याख्या व निष्कर्ष पिकाइ धका धागु दु। आइतबाः केन्द्रीय समितिया बैठक पार्टी अध्यक्ष पुष्पकमल दाहाल प्रचण्डं पेश यागु राजनीतिक व सांगठनिक प्रतिवेदनय् समूहगत रुपं छलफल जुइ।

समूहगत छलफल लिपा वंगु सुझावया आधारय् प्रतिवेदन पास जुइ। 

लुँ तोलां थौं द्धःछि थहावंगु दु।

थौं लुँ तोलां द्धःछि थहावना तोलाया ९० हजार ७ सय रुपैयाँ थ्यंगु दु धका नेपाल सुनचाँदी व्यवसायी महासङ्घं धागु दु। वंगु शुक्रवाः लुँ तोलां ८९ हजार ७ सय रुपैयाँ तोके यागु खः।

अथेहे वहः तोला थौं नीतका थहावंगु दु । वहः तोलां नीतका थहावना १२ सय १० रुपैयाँ तोके यागु दु धका महासंघ धागु दु।

राजेन्द्र महतो ‘बहुल राष्ट्रिय राज्य’ स्थापनाया लागि संघर्ष यायेगु चेतावनी जनता समाजवादी पाटीे आधिकारिकता गुमेयाम्ह महन्थ ठाकुर पक्षया नेता राजेन्द्र महतो न ‘बहुल राष्ट्रिय राज्य’ स्थापनाया लागि संघर्ष यायेगु चेतावनी बिगु दु।

म्हिगः शनिबाः येँ जुगु छगु ज्याझ्वलय् थःगु पक्षीय बागमती प्रदेशया अगुवा कार्यकर्तापिनिगु भेलाय् न्ववासे नेता महतो न उकिया लागि तयार जुइत पहाड व हिमालया पार्टी नेता, कार्यकर्तापिन्त आह्वान यागु खः।

‘बहुल राष्ट्रिय राज्य स्थापनाया लागि लडाई ल्वायगु खः। थुगु देशय् छगु हे जक ज्या ल्यदनिइ बहुल राष्ट्रिय राज्य स्थापना यायेगु। उकिया लागि जिमिगु पार्टीया जन्म जुगु खः। उकिया लागि तराई व मधेश तयार दु।

पहाड व हिमालया जनता न तयार जुइमाल’ वयकलं धागु दु। केपी शर्मा ओली नेतृत्वया सरकारय् उपप्रधानमन्त्री जुइ धुका महतो न बहुल राष्ट्रिय राज्य स्थापना यायेगु अभिव्यक्ति बिइवं संविधान विपरीत जुगु धासे आलोचना जुगु खः। महतो माफी फ्वंगु खः।