पर्साया वीरगञ्ज महानगरपालिका दुने असार १ गतेनिसे विद्यालय खुले याइगु जुगु दु।

असार १ गतेनिसे कक्षा ८ स्वया च्वयागु कक्षा सञ्चालन यायेगु निर्णय जुगु दु धका महानगरपालिकाया प्रमुख प्रशासकीय अधिकृत प्रदिपकुमार निरौलां धागु दु।

विद्यार्थीपिनिगु शैक्षिक भविष्य अन्यौल मजुइकेगु रणनीति कथं असार १ गतेनिसे कक्षा सञ्चालन यायेगु निर्णय जुगु धका धागु दु। विद्यालय भौतिक उपस्थिति याना ब्बकेत विद्यार्थीयया अभिभावकपिनिगु लिखित सहमति कायेगु व स्वास्थ्य सुरक्षाया मापदण्डयात अनिवार्य पालना याये मागु धका महानगरपालिकाया शैक्षिक प्रशासन महाशाखाया प्रमुख अरविन्दलाल कर्णं विज्ञप्ती पिकया जानकारी बिगु खः।

अथेहे वीरगञ्ज महानगरपालिका दुने विद्यालय असार १ निसे ७ गते तक विद्यार्थी भर्ना लगायत व्यवस्थापकीय ज्या जुइ धका धागु दु। थ्व हे असार ८ निसे १५ गते तक भर्ना सप्ताह अन्तर्गत छेँ छेँ वना ज्याझ्वः सञ्चालन यायेगु महानगरपालिकां निर्णय यागु दु। असार १५ गते लिपा नियमित रुपं दक्को विद्यालय खोले यायेगु तयारी दु धका महानगरपालिकां विज्ञप्ति पिकया धागु दु।

विश्व स्वास्थ्य सङ्गठन (डब्ल्यूएचओ) ब्ल्याक फङ्गसय् उपचार यायेत प्रयोग जुइगु वासः एम्फोटेरिसिन ’बी’ ग्वाहालि यागु दु।

नेपाः न यागु इनाप डब्ल्यूएचओ न द्धःछि भाइल एम्फोटेरिसिन ’बी’ नेपालय् छ्वया हःगु दु। डब्ल्यूएचओ न छ्वया हःगु द्धःछि भाइल नेपालय् थ्यंगु दु।

नेपालय् न ब्ल्याक फङ्गस बिरामी खने दुगुलिं सरकारं विश्व स्वास्थ्य सङ्गठन नाप याकनहे ग्वाहालि यायेत इनाप यागु दु।

बाँकेय् वंगु २४ घण्टाया दुने थप न्याम्ह कोरोना संक्रमितपि उपचारया झ्वलय् मदुगु खः।

रुकुमया ६५ दँ दुम्ह मिसा शुक्रवाः न्हिनय् ३ः१५ बजे व नेपालगञ्ज उपमहानगरपालिका–११ या ५५ दँ दुम्ह मिसाम्ह शुक्रवाः ४ बजे नेपालगञ्ज मेडिकलय् मदुगु खः।

अथेहे बर्दियाया गुलरिया नगरपालिका–४ य् ५७ दँ दुम्ह मिजम्ह शुक्रवाः बहनि ६ बजे, कोहलपुर–१४ या ७० दँ दुम्ह मिसाम्ह शुक्रवाः बहनि ७ बजे व दाङ तुलसीपुर उपमहानगरपालिका–१८ या ७२ दँ दुम्ह मिसाम्ह शनिवाः सुथय् ५ बजे उपचारया झ्वलय् भेरी अस्पतालय् मदुगु खः।

थ्व नाप बाँकेय् कोरोना संक्रमणं सीपि २९९ म्ह थ्यके धुकुगु दु सा पिने जिल्लापाखे उपचारया लागि वःपि सीपि ३१० म्ह थ्यंगु दु।

६०निसे ६४ दँ दुपिन्त जेठ २५ गते निसे कोविड विरुद्ध खोप सञ्चालन यायेत केन्दं नां तोके याना येँ महानगर सहरी स्वास्थ्य तथा खाद्य पदार्थ नियमन विभागं वडा खोप समन्वय समितियात पौ छ्वःगु दु।

स्वास्थ्य तथा जनसंख्या मन्त्रालयं जेठ १८ गते निर्णयया आधारय् जिल्ला स्वास्थ्य कार्यालय व विभाग िदथुइ बैठक च्वना हरेक वडाय् छगु छगु खोप केन्द्र सञ्चालन यायेगु निर्णय यागु दु। उगु निर्णयया आधारय् वडां खोप केन्द्र वडापाखे तोके यायेत पौं छ्वंगु दु। थुगु दँया समूहपि मनू तयेगु लागि भेरो सेल (चाइनीज खोप) या न्हापागु मात्रा बिइ त्यंगु दु।

सरकारं खोप कार्यक्रम अन्तर्गत न्हापागु पटक महामारी नियन्त्रणया लागि न्ह्यने च्वना खटे जुगुपि व ६५ दँ बर्षदेखि च्वययापि मनूत व स्वंगु पटक कथं १८ दँ निसे ५९ दँ दुपि मनू तयेत खोप बिइ त्यंगु खः। उपि मनू तयेत उपलब्धताया आधारय् सुयात कोभिसिल्ड –भारतीय खोप) व सुयात भेरोसेल (चाइनीज) खोप बिइत्यंगु दु।

थथे खोप काइपि मध्ये सु नां निगु हे डोज लगे याये धुकुगु दु सा कोभिसिल्डया न्हापागु मात्रा लगे याय खंगु मदुनि। थ्व स्वया न्ह्यः स्वास्थ्य तथा जनसंख्या मन्त्रालयं बैशाख २२ गते व जिल्ला विपद् व्यवस्थापन केन्द्रं बैशाख २५ गतेया निर्णय कथं महानगरपालिका नाप जेठ २ गतेनिसे येँँ जिल्लाय् कोविड १९ विरुद्धया चिनियाँ खोप भेरो सेलया निगुगु मात्रा लगे याये धुकुगु खः।

जेठ ११ गते तक वडास्तरय् केन्द्र स्थापनाें खोप करीब १ लाख मनूपिन्स कायेधुकुगु दु। 

येँय् आः संक्रमितया ल्याः म्हो जुया वनेवं थीथी केन्द्रया आइसोलेशन सेन्टर खाली जुया वनाच्वंगु दु।

आःतकया येँ दुनेया फुक्कं आइसोलेसन सेन्टर मध्ये मुक्कं २६ प्रतिशत बेड ओकुपाई जुयाच्वंगु दु । येँ महानगर दुने थौंकन्हय् १४ गू आइसोलेसन सेन्टरय् ५७४ गू बेड दु।

थ्व बेड मध्ये थौंकन्हय् १५० गू बेडय् जक विरामी भर्ना जुयाच्वंगु दु । थौंकन्हय् कोभिड पोजिटिभ जूपि अस्पताल वने माःसा बाहेक मेगु इलय् छेँय् हे च्वनेगु क्रम अप्वया वःगुलिं चायेकेधुंकूगु आइसोलेसन सेन्टरत धमाधम खाली जुया वःगु खः।

आः येँय् दुगु आइसोलेसन सेन्टरत मध्ये दकलय् अप्वः १२६ बेड क्षमताया सेन्टर कमलपोखरीया अग्रवाल भवन खः । उगु भवनय् थौंकन्हय् १४ म्ह विरामी जक दु । राधास्वामी भवनया ८८ गू बेडय् २४ बेडय् जक विरामी दु। पीसीआर टेष्टय् ३० निसें ४० प्रतिशत तक पोजिटिभ पिहां वःगु खःसा एन्टिजेन परीक्षणय् धाःसा १० प्रतिशत जक पोजिटिभ खने दयाच्वंगु दु।