वंगु २४ घण्टाया दुने देयन्यक थप २,६२४ म्हेसित कोरोना संक्रमण पुष्टि जुगु दु।

स्वास्थ्य तथा जनसंख्या मन्त्रालयया कथं ८,६६७ म्हेसित एन्टिजेन परीक्षण यागुलि १,९४७ म्ह व ४,९०६ म्हेसिगु एन्टिजेन परीक्षणय् ६७७ म्ह याना २,६२४ म्हेसित कोरोना संक्रमण पुष्टि जुगु खः।

मन्त्रालयया कथं कोरोना संक्रमणया कारण वंगु २४ घण्टाया दुने थप २० म्ह सीगु दु सा १,३२० म्ह संक्रमणमुक्त जुगु दु। थ्व नाप आःतक नेपालय् कोरोना भाइरस संक्रमितपि ७ लाख ३० हजार ४७९ म्ह थ्यंगु दु।

उकि मध्ये ६ लाख ८० हजार ८१५ म्ह संक्रमणमुक्त जुइ धुकुगु दु सा १० हजार २५९ म्ह सी धुकुगु दु।

 येँ महानगरपालिकाया मेयर विद्यासुन्दर शाक्यं थौं ५१ क्वःगु हिदान यानादीगु दु।

श्री गणेश युवा २१ वडाया ग्वसालय् जुगु थौं हिदान ज्याझ्वलय् मेयर शाक्यं ५१ क्वःगु हिंदान यानादीगु खः । ‘क्लवया स्थापनानिसे मेयर शाक्य हिंदान यानावया च्वंगु खः। मेयर शाक्य थ्व जिगु ५१ क्वःगु हिंदान यानागु खः’ थुगु वडाया स्थानीय वासिन्दा तक जुयादीइम्ह शाक्यं धयादीगु दु, ‘मेपिन्त बचे यायेत हिदान बालागु दान हे हिंदान खः धका धयादीगु खः। अथे जुगुनि जि नियमित रुपं हिंदान याना वयाच्वनागु दु। क्लवं वंगु ०४४ साल निसे हिंदान याना वयाच्वंगु दु।’

कोभिडया इलया इलय् फयाफतले सुरक्षाया दक्को उपाय छ्यला हिंदान यायेत मेयर शाक्यं मेपिन्त न सुझाव बियादीगु दु। ‘सामाजिक दूरी कायम याना सुरक्षित जुया स्वस्थ मनू न हिदान याना मेपिनिगु न ज्यान बचे याये फइ,’ शाक्यं धयादीगु द। उगु हिदान ज्याझ्वलय् छु दिं न्ह्यः जक महानगरपालिका नाप भगिनी सम्वन्ध स्थापित यागु डडेलधुरा अमरगढी नगरपालिकाया मेयर विश्वेश्वरप्रसाद ओझां न मेयर शाक्य नाप हे हिंदान यानादीगु खः।

वयकलं भगिनी सम्वन्ध स्थापित महानगरपालिकाय् वया मेयर शाक्य नाप हे हिदान याये दयक तसकं लयतागु दु धका धयादीगु खः।

वाडमय शब्दातीपुरुष नाप बरिष्ठ संस्कृतिबिद्ध सत्यमोहन जोशीयात थौं छगु ज्याझ्वःया दथुइ अक्सिजन कन्सेन्टर लल्हागु दु।

हलि नेवाः दबू नेपाः कवःया ग्वसालय् शब्दातीपुरुष जोशीया छेँय् दबूया पदाधिकारीपिन्स लल्हागु खः। उगु अक्सिजन कन्सेन्टर नेपाः आयरल्याण्ड समाजया दिपेश शाक्यया ग्वाहालि यागु खः।

दबूया कोषाध्यक्ष सुरेन्द्रभक्त श्रेष्ठ न्ह्याकूगु ज्याझ्वलय् दबूया अध्यक्ष शाक्य सुरेन, पुर्व मन्त्री कल्पना धमलाया न उपस्थिति दुगु खः।

सानिमा लाइफ इन्स्योरेन्स लिमिटेडं प्राथमिक शेयर बाँडाफाँड सम्पन्न यागु दु। शनिबाः कम्पनीया शेयर निष्काशन व बिक्री प्रवन्धक प्रभु क्यापिटलं आईपीओ बाँडफाँट यागु खः।

सानिमा लाइफ इन्स्योरेन्स प्राथमिक शेयरया निष्काशन आवेदन बिउपि २४ लाख १९ हजार ८४८ गु आवेदन मध्ये दोहोरो आवेदनया कारण रद्द जूपि ५ हजार ४३४ व मेमेगु कारणपाखे आवेदन रद्द जूपि १ लाख ०६ हजार २९२ बाहेक ल्यदपि योग्य आवेदनपि २३ लाख ०८ हजार १२२ गु मध्येपाखे ५ लाख ४० हजार म्हेसित न्यूनतम १० इकाई बाँडफाँड यागु खः।

प्रभु क्यापिट लिमिटेडं निष्काशन व बिक्री प्रबन्धक याना श्रावण २० गते निसे २४ गते तक सार्वजनिक निष्काशन खुला यागु सानिमा लाइफ इन्स्योरेन्स लिमिटेडया प्राथमिक निष्काशनय् निष्काशन याना कूल शेयर ६० लाख कित्ता मध्ये सामुहिक लगानी कोषपाखे ५ प्रतिशत बराबर ३ लाख कित्ता व कर्मचारीपिन्त ५ प्रतिशत बराबर ३ लाख कित्ता छुटे याना बाँकी दुगु ५४ लाख कित्ता शेयर सर्वसाधारणया लागि निष्काशन यागुलि निष्काशनया करिब ४.४८ गुणा तक आवेदन वंगुलि धितोपत्र निष्काशन व बाँडफाँड निर्देशिका, २०७४ या निर्देशन ३० या ४ कथं बाँडफाँड सम्पन्न यागु दु।