भूमि व्यवस्था, सहकारी व गरिबी निवारणमन्त्री बलराम अधिकारीं भूमिसम्बन्धी समस्या ज्यंकेत आः दयेकेगु आयोग अन्तिम जुइकथं सरकारं ज्या न्ह्याकाच्वंगु धयादीगु दु। चाबहिलय् च्वंगु मालपोत व नापी ज्याकू भवन उलेज्या यानादिसें वय्कलं भूमि समस्या ज्यंकेत आः दयेकूगु आयोगयात अधिकार नं बियाःगु दु धयादिल।

न्हापा आयोग दयेकेगु अले अधिकार धाःसा मबिइगु समस्या दूगुलि ऐन संशोधन यानाः अधिकार बियाःगु मन्त्री अधिकारीं धयादिल। “नागरिकता नम्बरपाखें देय् न्यंकं सुयागु नामय् गन जग्गा दु धकाः सिइके फइ, मेथाय् सुनां जग्गा काःगु खनेदत धासा कारबाही जुइ”, मन्त्री अधिकारीं धयादिल। नियम व विधि अःखः ज्या मयायेत मालपोत व नापी ज्याकूया कर्मचारी तय्त निर्देशन बियादिसें वय्कलं जनताया हित अखः ज्या याःसा कारबाही जुइगु ख्याच्वः बियादिल।

विसं २०२१ सं भूमि सुधार छ्यलाबुलाय् वयाः हदबन्दीइ लाउगु जग्गा आः दर्ता यानाःगु थःपिनिगु कमजोरी जूगु धयादिसें मन्त्री अधिकारीं अजाःगु खँत भिंकेमाःगु दु धयादिल। सार्वजनिक जग्गा गुलि दु, उकिया नं धलः दयेकाः तयेत वय्कलं निर्देशन बियादिल। सरकारी संरचना दयेकेया निंतिं जग्गा माःगु खःसा प्रक्रिया पूवंका न्ह्यःनेवसा थःपिंसं मपनेगु नं मन्त्री अधिकारीं धयादिल।

मालपोत व नापी ज्याकूया ज्या छगू हे थासं यायेगु कथं ज्याकू दयेकाःगु मन्त्री अधिकारीं धयादिल। थी थी समस्याया हुनिं तराईया अप्वः धइथें जग्गाया आःतक नं नापी जुइ मपूmगुया हुनिं समस्या वःगु वय्कः धापू दु। भूमि व्यवस्था, सहकारी व गरिबी निवारण मन्त्रालयया सचिव अर्जुनप्रसाद पोखरेलं मालपोत व नापी ज्याकूत तापानां समस्या जुयाच्वंगुलिं छथाय् हे निगूलिं ज्याकुथि तया ज्या न्ह्याकेत अःपुकाःगु धकाः धयादिल। भवन न्हूगु जूथें न्हूगु बिचाः तया कर्मचारीं नं ज्या यायेमाःगु खँय् सचिव पोखरेलं बः बियादिल।

सलंसः दँ पुलांगु अभिलेखयात च्वय्या तल्लाय् सुरक्षित कथं तयेत वय्कलं निर्देशन नं बियादिल।

प्रधानमन्त्री केपी शर्मा ओलीं सहकारी सञ्चालकं बचत रकम अपचलन, दुरुपयोग व अनियमिता यानाच्वन्ति माःगु कारबाही याना बचतकर्ता तयेगु ध्यवा लित बिइगु बचं ब्यूगु दु।

नेपाल कम्युनिस्ट पार्टी (एमाले) या केन्द्रीय सहकारी लिसे गरिबी निवारण विभाग व राष्ट्रिय सहकारी महासङ्घ लिमिटेडं लःल्हागु सहकारी सम्बन्धी अध्यादेशय् परिमार्जनया निति सुझाव पौ लःल्हाना कयादीसे वयकलं सहकारीया समस्यायात याकन हे सम्बोधन यायेगु खँ कनादीगु खः।

वयकलं प्रतिस्थापन विधेयक हयेगु इलय् सुझाव कायेगु निति सहलह यायेगु व मंकाः सरकार जुगुलि राजनीतिक दलनाप न सहलह यायेमाःगु दु धका धयादीगु खः। एमाले नेता नाप विभागया प्रमुख खगराज अधिकारीया कथं प्रधानमन्त्री ओलीं अध्यादेशं सहकारी ख्यलय् न्हापानिसे खने दयावयाच्वंगु समस्या समाधान जुइ धका धयादीगु खः।

नेपालभाषा एकेडेमीया २४ क्वःगु दँ मुंज्या व न्ह्यय् क्वःगु तःमुंज्या किपूलिइ जुगु दु । उगु तःमुंज्यां चान्सलरय् मल्ल के सुन्दरयात सर्वसम्मत कथं ल्यःगु दु।

अथेहे भाइस चान्सलरय् डा.पुष्पराज राजकर्णिकार, सदस्य सचिवय् महेन्द्रगोपाल कर्माचार्य, दांभरी बीरप्रसाद भंसालीयात ल्यःगु खः। अथेतु, दुजलय् प्रा.प्रेमशान्ति तुलाधर, विजयरत्न असंबरे, शशीकला मानन्धर, राजितबहादुर श्रेष्ठ, विद्या चित्रकार व राजेन्द्रकुमार पुतायात ल्यःगु खः।

ज्यासना पुचः मुंज्यां निर्मल बज्राचार्य, रजनी मिला, शाक्य सुरेन, तुल्सी सायमी व कृष्णभक्त महर्जनयात दुजः व निवर्तमान चान्सलर यज्ञरत्न धाख्वाःयात संरक्षक कथं ल्यःगु दु।

नेवाः पत्रकार राष्ट्रिय दबूया केन्द्रीय उपाध्यक्ष सन्दीप श्रेष्ठयात नेपाल आदिवासी जनजाति पत्रकार महासंघ फोनिज चितवन शाखां छगु ज्याझ्वः दथुइ हंगु दु।

फोनिजया झीक्वःगु साधारण सभा व न्याक्वःगु अधिवेशनया ज्याझ्वलय् श्रेष्ठयात आदिवासी तयेगु गतिबिधिइ पत्रकारितापाखे ग्वहालि यानाच्वंगुलि वयकःयात हंगु खः।

सक्वया शाली नदिइ माधवनारायणया व्रत च्वनाच्वंपिं व्रतालु तय्सं थनिंनिसें हाकनं निगूगु परदेश यात्राय् वनेत्यंगु दु। माधवनारायणया व्रतालु तय्सं दँय् दसं माघ शुक्ल तृतीयानिसें हाकनं साँखुपाखें पन्ति वनाः चच्छि च्वनाः त्रिवेणीघाटय् म्वः ल्हुयाः माधवनारायणया पुजा यानाः सांस्कृतिक शहर पन्ति चाःहिलीगु व्रत विधि दु।

शनिबाः सुथसिया नित्यकर्म सिधयेकाः व्रतालु साँखुपाखें ख्वप, भ्वँतं पन्ति वनेगु तयारी याःगु श्री माधवनारायण स्वस्थानी व्रत नापं शालिनदी सुधार समितिया नायः विकासमान सिंहं धयादिगु दु। थौं बहनी पन्तिइ थ्यनीपिं माधवनारायणया व्रतालु तय्सं आइतबाः सुथय् पन्तिया त्रिवेणीघाटय् म्वः ल्हुइ धुंकाः अन माधवनारायणयात विशेष पुजा याइ।

म्वः ल्हुयाः पुजा सिधये धुंकाः माधवनारायण भगवानयात ज्वनाः व्रतालुतय्सं आइतबाः सांस्कृतिक शहर पन्ति चाः हिलीइ। माघ शुक्ल चौथीया न्हुकुन्हु आइतबाः पन्ति चाःहिले धुंकाः व्रतालुतय्सं न्हिनय् भ्वत व नालाया दथुइ लाःगु भोखुसिइ भोजन याइ। आइतबाः न्हिनय् भोखुसिइ भोजन याये धुंकाः व्रतालुत साँखु लिहाँवइ। माधवनारायणया व्रतालुतय्सं साँखुइ श्रीपञ्चमी व लगला सप्तमी नखः न्यायेकिइ।