प्रेस चौतारी नेपाल यल जिल्लाया खुक्वःगु अधिवेशनं नवीन लुईटेलयात सर्वसम्मतं अध्यक्ष ल्यःगु दु।

अथेहे उपाध्यक्षपि अशोक दुलाल व शान्ति घिमिरेयात ल्यःगु खः।अधिवेसनं सचिवय् सन्तोष दहाल, सहसचिवय् लक्ष्मण दुलाल, सहसचिवय् रवि महर्जन, कोषाध्यक्षय् समिर थापा व सदस्यय् सुभानु आचार्य, नरेन्द्र चालिसे, विकास माली, टीका रसाइली, सुस्मिता अधिकारी व ज्ञानु दुलालपि निर्वाचित जुगु खः।

प्रेस चौतारी नेपाल यल जिल्लां क्रियाशील पत्रकारिता सिरपा नेपाल प्रेसया प्रधान सम्पादक मात्रिका पौडेलयात हंगु दु।म्हिगः चौतारीया खुक्वःगु जिल्ला अधिवेशनय् प्रधान सम्पादक पौडेल व पत्रकार विष्णु कल्पित घिमिरेयात क्रियाशील पत्रकारिता सिरपा लःल्हागु खः।

कल्पित अल जजिरालगायत अन्तर्राष्ट्रिय टेलिभिजनय् नाप मेमेगुलि स्वतन्त्र पत्रकार कथं ज्या यानाच्वम्ह खः। नेकपा एमालेया कार्यवाहक महासचिव नाप पूर्व परराष्ट्रमन्त्री प्रदिप ज्ञवालीं पौडेल व कल्पितयात हनापौ लःल्हानादीगु खः।

प्रेस चौतारी यलया अध्यक्ष बालमुकुन्द आचार्यं व्यवसायिक पत्रकारितापाखे योगदान याना वयाच्वपि बरिष्ठ पत्रकारपिन्त हने दया तसक लयतागु दु धका धयादीगु खः।

आदिवासी जनजाति पत्रकार महासङ्घ (फोनिज) कञ्चनपुर जिल्लाया अधिवेशन क्वचाःगु दु।

झलारीइ जुगु फोनिज कञ्चनपुरया खुक्वःगु जिल्ला अधिवेशनं डिवी कुश्मीया अध्यक्षताय् न्हुगु कार्यसमिति ल्यःगु दु। कुश्मी अध्यक्षय् हाकन निर्विरोध निर्वाचित जूगु खः।

उगु कार्यसमितिइ उपाध्यक्षय् नरेश राना, सचिवय् सुरत थारू, कोषाध्यक्षय् पूजा कुश्मी व सह–सचिवय् अरुण डगौंरा निर्वाचित जूगु खः। अथेहे दुजलय् सरिता चौधरी, अशोक चौधरी, खुशीराम चौधरी, भुवनेश्वरी राना व सिमा गुरुङ्गयात ल्यःगु दु।

प्रधानमन्त्री केपी शर्मा ओलीन्ह्यःने स्वास्थ्य नापं जनसङ्ख्यामन्त्री प्रदीप पौडेलं स्वास्थ्य बीमा सुधारसम्बन्धी कार्ययोजना न्ह्यब्वयादीगु दु।

मन्त्रालयया अतिरिक्त सचिव डा दीपेन्द्ररमण सिंहया नेतृत्वय् दयेकूगु कार्ययोजना लिसेंया प्रतिवेदन स्वास्थ्य मन्त्री पौडेलं थौं प्रधानमन्त्री न्ह्यःने लःल्हानादीगु खः।कार्ययोजनाया आधारय् मन्त्रिपरिषद् मुँज्यापाखें स्वास्थ्य बीमाय् सुधार सम्बन्धय् निर्णय जुइगु मन्त्री पौडेलया सचिवालयं धाःगु दु।

स्वास्थ्य मन्त्री पौडेलं स्वास्थ्य बीमाय् सुधार यानाः न्यागु लख थ्यंकेगु तयारी जुयाच्वंगु धयावया च्वनादीगु खः। प्रधानमन्त्री न्ह्यःने पेस जूगु प्रतिवेदनय् नं स्वास्थ्य बीमा ध्यबा न्यागु लख तक थ्यंके फइगु आधार दुथ्याका तःगु दु। मन्त्रिपरिषदं निर्णय याःसा संसदया वइगु अधिवेशनपाखें स्वास्थ्य बीमा ऐन संशोधनया प्रक्रिया न्ह्याकेगु मन्त्रालयया तयारी दु।

प्रधानमन्त्री केपी शर्मा ओलीं सहिदतय्गु बलिदानया प्रेरणां ह्यूपाःया निंतिं ज्या यायेगु शक्ति बिइ धकाः धयादीगु दु।

राष्ट्रिय सहिद दिवस, २०८१ या झ्वलय् थौं नेपाल सरकारं सिंहदरबार लागाय् ग्वसाः ग्वःगु मूल समारोहया ज्याझ्वलय् प्रधानमन्त्री ओलीं राणाशासन अन्त्य यायेत व थी थी कालखण्डय् लोकतन्त्रया निंतिं सङ्घर्ष यानाः बलिदान बियादीपिं महान् सहिदतय्सं देय्या निंतिं ब्यूगु योगदान महत्वपूर्ण जूगु धयादीगु खः।

प्रधानमन्त्री ओलीं सहिदतय्गु हे बलिदान व प्रेरणां मुलुकय् सङ्घीय लोकतान्त्रिक गणतन्त्र वःगु व थुगु प्रणालीइ फुक्क शक्तिया स्रोत सार्वभौम जनता हे जूगु न्ह्यथनादिल। वय्कलं थुगु प्रणालीयात क्वातुकेत व दिगो यायेत थःपिं जुयाच्वनागु धयादिसें धात्थेंया व पूवंगु लोकतन्त्रया निंतिं जनताया प्रतिनिधितय्सं उगु भावना तयाः ज्या यायेमाःगुलिइ बः बियादिल।

वय्कलं राजनीतिक प्रणालीइ ह्यूपाः वय् धुंकूगुलिं आः तानाशाही शासनसत्ता बचे यायेत शान्तिपूर्ण आन्दोलन याःपिंत स्यायेगु अजाःगु शृङ्खला अन्त्य जुइधुंकूगु धयादिल। वय्कलं आः लोकतान्त्रिक प्रणाली व प्रक्रियायात रक्षा यायेत न्यायोचित कानुन कथं समृद्ध नेपाः व सुखी नेपाःमिया आज्जुइ आःया सरकार खुले जुयाः न्ह्याः वना च्वंगु दु धकाः नं धयादिल।

“झीसं तःधंगु सङ्घर्ष यानाः लोकतन्त्र स्थापना यानागु खः। लोकतन्त्र धइगु अराजकता मखु। थ्व विकसित, सभ्य व सुशासनं जाःगु प्रणाली खः। यदि व्यवस्थाय् वा शासकतय्के छुं नं ह्यूपाः वयेकेगु खः धाःसा लोकतान्त्रिक लँपु व विधिं यायेफइ तर लोकतन्त्रया नामय् देय्यात ब्वथलेगु व विकासया ज्याय् पंगः सृजना यायेगु स्वीकार्य जुइफइमखु”, प्रधानमन्त्री ओलीं धयादिल, “देय्या रक्षा, विकास व सुशासनया निंतिं थ्व सरकार न्ह्यचिलेत तत्पर दु। झीपिं सहिदं क्यनावंगु लँपुइ न्ह्याबलें अविचलित जुयाच्वने।”

ज्याझ्वलय् प्रतिनिधिसभाया उपप्रधानमन्त्रीत, मन्त्रीगण, प्रतिनिधिसभाया उपसभामुख, प्रधानमन्त्रीया मुख्य सल्लाहकार, सरकारया मुख्यसचिव, प्रधानसेनापति, सचिवत व विशष्ट मनूतय्सं नं ब्वति कयादीगु खः।थ्व स्वयां न्ह्यः प्रधानमन्त्री ओलीं लैनचौरय् च्वंगु सहिद स्मारक व सहिदगेटय् वनाः सहिदतय्त हनादीगु खः। नेपाल सरकार (मन्त्रिपरिषद्)या मङ्गलबाःया मुँज्यां थुगु दिवसयात राष्ट्रियस्तरय् न्यायेकेगु निर्णय याःगु खः।