चन्द्रागिरि नगरपालिकां सार्वजानिक थासय् सूर्तिजन्य पदार्थया बिक्री वितरण निषेध याःगु दु। नगरपालिकां शुक्रबाः सुचं पिथनां सार्वजानिक थासय् प्लाष्टिकय् प्याकेजिङ्ग यानातःगु, खैनी, गुट्खा, पानपराग, थेंजाःगु म्हुतुइ तयाः रस कायेगु, नयेगु सूर्तिजन्य पदार्थया बिक्री बितरण निषेध याःगु खः।

नगरपालिकाया शाखा अधिकृत दामोदर रिजालं पिकाःगु विज्ञप्तिइ सूर्ति सेवन यायेत दयेकातःगु, उत्पादन यानातःगु चुरोट, बिंडि, सिगार, तमाखु, सुल्फा, प्लाष्टिकय् प्याक यानातःगु कच्चा सूर्ति, खैनि, गुट्खा, पानपराग वा थजाःगु म्हुतुइ तयाः रस कायेगु सूर्तिजन्य पदार्थया सेवनं मानब स्वास्थ्ययात तसकं हानिकारक जूगु न्ह्यथनातःगु दु।

विज्ञप्तिइ धयातःगु दु, “चन्द्रागिरि नगरपालिकाय् च्वंगु शिक्षण संस्था, बालकल्याण गृह, क्लब, सार्वजनिक शौचालय, होटेल, रेष्टुरेण्ट, छात्राबास, ब्यायाम शाला, डिपार्टमेन्ट स्टोर, धर्मशाला, सार्वजनिक प्रतिक्षालय लिसेंया सार्वजनिक थासय् धुम्रपान, चुरोट, बिडी, सिंगार, तमाखु, सुल्फा, कक्कड, कच्चा सूर्ति, खैनि, गुट्खा, सूर्ति वा थजाःगु सूर्तिजन्य पदार्थयात निषेध यायेत सूर्तिजन्य पदार्थ नियन्त्रण व नियमन यायेगु ऐन २०६८ या दफा ४ पाखें चकंक ब्यवस्था यानातःगु दु।

उगु कानूनी व्यवस्था दःसां नं आःतक चन्द्रागिरि नगरपालिका लागा दुने अय्लाः, सूर्तिजन्य पदार्थत बिक्री बितरण नापं उपयोग नियमन व नियन्त्रण प्रभाबकारी जुइमफूगुलिं जनस्वास्थ्यय् बांमलाःगु लिच्वः लानाच्वंगु नापं प्लाष्टिक वा बट्टाय् प्याकेजिङ्ग यानातःगु सूर्तिजन्य पदार्थया सेवनं यानाः भूमि प्रदुषित जुइगु, धः जाम जुइगु, फोहरमैला अप्वयाः शहरया सुन्दरताय् तकं बांमलाक प्रभाव लानाच्वंगु दु ।” विज्ञप्तिइ सूर्तिजन्य पदार्थया सेवनं राज्यया क्वतिक्वति ध्यबा खर्च जुयाच्वंगु अवस्थायात स्वयाः न्हापांगु चरणय् प्लाष्टिकया थलय् प्याकेजिङ्ग यानातःगु गथेकि खैनि, गुट्खा, पानपराग वा थजाःगु हे सूर्तिजन्य पदार्थत नापं सार्वजनिक थासय् धुम्रपान यायेगुयात थुगु सुचं पिहाँवःगु मितिनिसें लागु जुइ कथं चन्द्रागिरि नगरपालिका लागा दुने बिक्री वितरण पूवंक प्रतिबन्ध जूगु न्ह्यथनातःगु दु।

विज्ञप्तिइ धयातःगु दु, “सुनां नं थुगु सुचंयात अबज्ञा यानाः बिक्री बितरण यानाच्वंगु लुयावल धाःसा नगर प्रहरीपाखें जफत याकाः बिक्रि बितरण याःम्ह व्यापारीयात कानून कथं तच्वकं सजाय बिइगु ब्यहोरा तकं स्वापू दुपिं सकसितं जानकारी बिइगु निंतिं थुगु सुचं पिकानागु दु।”

ओली प्रधानमन्त्री केपी शर्मा ओलीं पार्टी कुचा थलेगु व स्यकेगु थुगु सरकारया मेन्यु खँय् मदु धका स्पष्ट यानादीगु दु।

सङ्घीय संसद्, प्रतिनिधिसभाया न्याक्वःगु अधिवेशन थौनिसे न्ह्यागु खःसा उगु बैठकयात सम्बोधन यानादीसे प्रधानमन्त्री ओलीें ढुक्क जुया च्वनेत इनापयासे काँग्रेस एमालेनाप बल्लागु सरकारया प्राथमिकताय् अज्यागु ज्या जुइ मखु धका धयादीगु खः।

बैठकय् प्रधानमन्त्री ओलीं संयुक्त राष्ट्रसङ्घया ७९ क्वःगु महासभाय् ब्बति कयादीगु व नकतिनि हे चीनया औपचारिक भ्रमणबारे जानकारी बियादीगु खः।

राष्ट्रियसभाय् थी थी अध्यादेश पेस जूगु दु। सभाया थनिंनिसें न्ह्याःगु १७ क्वःगु अधिवेशनय् प्रधानमन्त्री केपी शर्मा ओलीया पक्ष कयाः सञ्चार लिसे सूचना प्रविधिमन्त्री पृथ्वीसुब्बा गुरुङं ‘सुशासन प्रवद्र्धन नापं सार्वजनिक सेवा प्रवाहसम्बन्धी छुं छुं नेपाल ऐनयात संशोधन यायेगु अध्यादेश, २०८१’ सभान्ह्यःने पेस यानादिल।

वय्कलं सेवाग्राही तय्त बांलाःगु सेवा बिइगु, राज्यया प्रशासनिक प्रणालीयात चुस्त दयेकेगु कथं सुशासन प्रवद्र्धन नापं सार्वजनिक सेवा बिइगु सम्बन्धी छुं छुं नेपाल ऐनयात संशोधन यायेगु अध्यादेश हयागु धयादिल। उपप्रधानमन्त्री नापं अर्थमन्त्री विष्णुप्रसाद पौडेलं ‘आर्थिक कार्यविधि नापं वित्तीय उत्तरदायित्व (न्हापांगु संशोधन) अध्यादेश, २०८१’ निजीकरण (न्हापांगु संशोधन) अध्यादेश, २०८१’ व ‘आर्थिक नापं व्यावसायिक वातावरण सुधार व लगानी अभिवृद्धि सम्बन्धी छुं छुं नेपाल ऐनयात संशोधन यायेगु अध्यादेश, २०८१’ सभा न्ह्यःने पेस यानादिल।

उगु झ्वलय् वय्कलं धयादिल, “बजेट नापं ज्याझ्वः तर्जुमायात व्यवस्थित यायेत दयेकूगु आर्थिक नापं वित्तीय उत्तरदायित्व हयागु दु।”अथे हे, भूमि व्यवस्था, सहकारी नापं गरिबी निवारण मन्त्री बलराम अधिकारीं ‘सहकारी सम्बन्धी छुं छुं नेपाल ऐनयात संशोधन यायेगु अध्यादेश, २०८१ व भूमि सम्बन्धी छुं छुं नेपाल ऐनयात संशोधन यायेगु अध्यादेश, २०८१’ सभान्ह्यःने पेस यानादिल।

मुँज्याय् सभाध्यक्ष नारायणप्रसाद दाहालं पूर्वसभामुख दमननाथ ढुङ्गाना, संविधानसभा दुजः रामजीप्रसाद शर्मा, संविधानसभा दुजः अब्दुलहमिद सिद्धिकी व प्रतिनिधिसभाया पूर्व दुजः नापं पूर्वमन्त्री प्रेमलाल (पिएल) सिंह मदुगुलिं शोक प्रस्ताव न्ह्यब्वयादीगु दु। शोक प्रस्तावयात सर्वसम्मतं पारित यानाः छगू मिनेट मौनधारण नं याःगु खः।राष्ट्रियसभाया मेगु मुँज्या थ्व हे माघ २० गते आइतबाः न्हिनेसिया १ः १५ ता इलय् च्वनी।

प्रतिनिधिसभाया न्याक्वःगु अधिवेशन न्ह्याःगु झ्वलय् प्रधानमन्त्री केपी शर्मा ओलीं मुँज्यायात संबोधन यानादिसें विकास निर्माणय् न्ह्यानाच्वंगु ज्याय् प्रगति जुयाच्वंगु दु धकाः धयादीगु दु।

वय्कलं मुलुकयात समृद्ध यायेत न्ह्याकूगु विकास निर्माणया ज्या पूवंकेगु ताःतयाः सरकार न्ह्यानाच्वंगु धयादिसें महत्वपूर्ण आयोजना तय्गु प्रगति न्ह्यब्वयादिल। प्रधानमन्त्री ओलीं नकतिनि हे सिद्धबाबा सुुरुङमार्गया ‘ब्रेक थ्रुु’ छगू उपलब्धि जूगु न्ह्यथनादिसें सतक यात्राया असुरक्षा म्ह्वः यायेत व पूर्वाधारयात क्वातुकाः यंकेत सुरुङ मार्गया योजना न्ह्यानाच्वंगु धयादिल।

वय्कलं येँ–तराई मधेश द्रुतमार्ग दुने मकवानपुरया धेद्रे सुरुङ व चीन व भारतयात स्वाइगु राष्ट्रिय गौरवया आयोजना जोगवनी–किमाथाङ्का सतकमार्गलिसें छन्हुनिन्हु न्ह्यः जक ‘ब्रेक थ्रु’ जूगु खँ कनादिल। प्रधानमन्त्री ओलीं ठेक्का काःगु कम्पनीं ज्या त्वःते धुंकाः बुटवल–नारायणगढ ब्वया सतक निर्माणया ज्या द्रुतगतिइ न्ह्यानाच्वंगु धयादिल।

वय्कलं मन्त्रिपरिषद्या न्हापांगु मुँज्यां किपूया क्रिकेट ख्यःयात रङ्गशाला दयेकेगु व उकिइ फ्लडलाइट तयेगु निर्णयकथं बोलपत्र आह्वान जुयाः क्वछिनातःगु इलय् हे उकियात क्वचायेकेगु कथं ज्या न्ह्यानाच्वंगु धयादिल। “अथे हे, सुर्खेतय् आधुनिक कर्णाली रङ्गशाला तयार जुइ धुंकूगु दु।

विकास निर्माणया ज्याय् ‘ब्रेक–थ्रु’ जक मखु ‘ब्रेक’ यानातःगु गुलिखे ज्यात नं जिपिं वयेधुंकाः न्ह्याकागु दु”, प्रधानमन्त्री ओलीं संबोधन यायेगु झ्वलय् धयादिल।

सक्वय् च्वंगु शाली खुसिइ माधवनारयणया लच्छि यंकंया व्रत च्वनाच्वंपिं ब्रर्तालुत प्यन्हुया परदेश यात्रा क्वचायेकाः सक्व लिहांवःगु दु।

ब्रर्तालुतयसं माघ कृष्ण त्रयोदशीनिसें परदेश यात्रा न्ह्याकूगु खः। न्हापांगू न्हुकुन्हु शाली खुसिया बज्रयोगिनी ध्वाखाः तक भागि यायां वनेमाः। माघकृष्ण चतुर्दशीया न्हुकुन्हु सक्वं बज्रयोगिनी व पशुपति वनी। उकिया कन्हय्कुन्हु पशुपतिं फम्पि बाय् च्वंवनी।

कन्हय् कुन्हु फम्पिं सक्वय् बाय् च्वं वइ। माघ शुक्ल पारुकुन्हु थ्व यात्रा क्वचाइगु नियम कथं वंगु बहनि ब्रर्तालुत सक्वय् लिहाँवःगु खः।माघ शुक्ल तृतीयानिसें हाकनं सक्वं पन्ति थ्यंका छ चाः बाय् च्वनी। कन्हय् कुन्हु पन्तिं सक्वय् लिहाँ वयेगु परम्परा दु। सक्वय् श्रीपञ्चमी व लगला सप्तमी पर्व न्यायेकी  माघ शुक्ल नवमी (द्रोण नवमी)या न्हुकुन्हु बर्तालुतय्त खीर (तस्मी) नकेगु चलन नं दु।

माघ शुक्ल एकादशीया न्हुकुन्हु सक्वं चाँगुनारायणय् यात्रा वनी। उकिया कन्हय ्कुन्हु चाँगुं सक्वय् लिहाँ वयेगु परदेश यात्राया नियम दु।