सोमवाः थौ सेयर बजाः परिसूचक नेप्से २२.१४ ल्याखं थहावंना २७६० थ्यःगु दु। परिसूचक थहावना कारोबार रकम न अप्पोगु दु।म्हिगः ९ अर्ब ७७ करोड तका कारोबार जूगुलि थौ सोमवाः ११ अर्ब ३१ करोड थ्यःगु दु।

कुल १४३ गु कम्पनीया भाः थहावंगु दु सा ९२ गु कम्पनीया भाः कुहावंगुलि गुंगू कम्पनीया भाः स्थिर जूगु दु। माइक्रोफाइनान्स सूचक दकलय् अप्पो ३.२ प्रतिशतं थहावःगु दु। अथेहे बैंकिङ १.०४, लगानी १.२८, जीवन बीमा १.६६, उत्पादन ०.०१, मेमेगु ०.२१ व व्यापार समूह ०.७३ प्रतिशतं थहावःगु दु।

निर्जीवन बीमा ०.२२, विकास बैंक ०.१०, फाइनान्स ०.३०, हाइड्रोपावर ०.०५ प्रतिशतं कुहावःगु दु। च्यागू कम्पनीया भाः १० प्रतिशतं थहावंगु दु। सपोर्ट माइक्रोफाइनान्स, सामुदायिक लघुवित्त, गुराँस लघुवित्त, मानुषी लघुवित्त, सिर्जनशील लघुवित्त, माछापुच्छ्रे बैंक, कुथेली बुकरी स्मल हाइड्रोपावर व सीवाईसी लघुवित्तया भाः १० प्रतिशतं थहावःगु दु सा गुडविल फाइनान्स ९.८ व नारायणी विकास बैंकया ९.६ प्रतिशतं भाः थहावःगु दु।

इस्टर्न हाइड्रोपावरया भाः १० प्रतिशत कुहावःगु दु सा समृद्धि फाइनान्सया ९.७, सानिमा जीआईसी इन्स्योरेन्सया ४.१ प्रतिशतं कुहावंगु दु। कारोबार रकमया आधारय् साहस ऊर्जा, हिमालयन रिइन्स्योरेन्स, अरुणभ्याली हाइड्रोपावर, सानिमा माइ हाइड्रोपावर व समृद्धि फाइनान्स न्ह्यने खनेदुगु दु।

नेपाल संवतया प्रवर्तक राष्ट्रिय विभूति शंखधर साख्वाःयात नेपाल सरकारं राष्ट्रिय विभूति घोषणा याःगु दिंयात लुमका थौ शंखधर दिवस हःगु दु।

थौं सोमवाः तःजिक शंखधरया झ्वाताः दूगु लागाय् हंगु दु। थ्वहे झ्वलय् थौं सोमवाः सुथय् पद्मरत्न लुमन्ति गुथिं येँया भोताहितिइ च्वंगु शंखधर उद्यानय् पलिस्था यानातःगु शंखधरया झ्वाता क्वय् शंखधर दिवस हंगु दु।उगु ज्याझ्वलय् मूपाहाँ कथं सूचना तथा प्रविधि संचारमन्त्री पृथ्वीसुब्बा गुरुङ झायादीगु खः।

ज्याझ्वलय् पद्मरत्न लुमन्ति गुथिया दुजःपिं, राजनीतिक पार्टीया नेता कार्यकर्तापिं, भाषिक ख्यःयापिं थीथी व्यक्तिपिं उपस्थित जूगु खः । नीन्याक्वःगु शंखधर दिवसया लसताय् थौं सोमवाः न्हूदँ राष्ट्रिय समारोह समिति ११४५ या इनापय् थीथी संघसंस्थापाखें शंखधर दिवस हनाच्वंगु दुसा थौं हे सुथय् येँया लखुतीर्थ चागलय् शंखधर दिवस हंगु दुसा असनय् शंखधरया झ्वाता ब्वज्या व न्हिनय् शंखधर उद्यानय् शंखधरयात कयाः विशेष ज्याझ्वः यायेत्यंगु दु।

नेपाल संवतया प्रवर्तक राष्ट्रिय विभूति शंखधर साख्वाःया झ्वाताः थौं सोमवाः सुथय् झिताः ईनिसें बहनी खुताः ईतकया नितिं ब्वज्या जुयाच्वंगु दु।

असन सेवा समितिया ग्वसालय् असनय् शंखधरया झ्वाताः ब्वज्या यानातःगु खः। समितिं ब्यूगु जानकारी कथं थौं शंखधर दिवस जूगुलिं शंखधरया प्रचारप्रसार यायेगु कथं थथे झ्वाता ब्वज्याः यायेगु ज्याझ्वः जूगु खँ धाःगु दु।

शंखधरया झ्वाताय् येँ महानगर २७ वडाया दुजः सृष्टि ताम्राकारं माल्यापर्णयानादीगु खःसा अथेहे, नेपालभाषा मंकाः खलःया दांभरी गणेश सायमि, न्हूदँ समारोह समितिया दुजः ज्योति शाक्य, असन सेवा समितिया यज्ञरत्न तुलाधरं नं माल्यार्पण यानादीगु खः।

सेयर बजाः चाःगु न्हापागु दिं थौ आईतवाः २७०० स्वया ल्याखं थहावःगु दु। म्हिगः नेप्से परिसूचक ६२.५४ ल्याखं थहावना २७३८ ल्याः कायम जूगु दु।

थौ २२८ गु कम्पनीया भाः थहावःगु दु सा १३ गु कम्पनीया भाः कुहावःगु दु सा स्वंगू कम्पनीया भाः स्थिर जूगु दु।म्हिगः ५ अर्ब २२ करोडया कारोवार जुगुलि थौ ९ अर्ब ७७ करोडया कारोवार जुगु दु। दक्को क्षेत्रया सूचक थहावंगु दु। हाइड्रोपावर सेक्टर दकलय् अप्पो ४.२६ प्रतिशतं थहावःगु दु।

बैंकिङ १.६२, विकास बैंक २.७१, फाइनान्स २.४८, होटल लिसे पर्यटन ०.९६, लगानी २.५६, जीवन बीमा २.१६, उत्पादन २.३२, माइक्रोफाइनान्स १.५१, निर्जीवन बीमा १.९५, मेमेगु २.५२ व व्यापार समूह १.१५ प्रतिशतं थहावःगु दु।थौ खुगु कम्पनीया भाः १० प्रतिशत स्वया अप्पो थहावःगु दु।

गुराँस लघुवित्त, सिर्जनशील लघुवित्त, सुपरमादी हाइड्रोपावर, बलेफी हाइड्रोपावर, नारायणी डेभलपमेन्ट बैंक व समृद्धि फाइनान्सया १० प्रतिशतं थहावःगु दु। समाज लघुवित्तया ४.८, मिथिला लघुवित्तया ४.१ व कुथेली बुकरी स्मल हाइड्रोपावरया ३ प्रतिशत भाः कुहावःगु दु। कारोबार रकमया आधारय् सानिमा जीआईसी इन्स्योरेन्स, समृद्धि फाइनान्स, ङादी ग्रुप, एचआईडीसीएल प्रमोटर व साहस ऊर्जा न्ह्यने दु।

राष्ट्रिय फोटो पत्रकार समूह नेपाल एनएफपिजेया अध्यक्षय् प्रदीपराज वन्त निर्विरोध निर्वाचित जूगु दु।

समूहया २७ क्वःगु साधारणसभा नाप १३ गु अधिवेशनं राष्ट्रिय समाचार समिति (रासस) या फोटो पत्रकार वन्तया अध्यक्षताय् १५ म्ह सदस्यीय न्हुगु कार्यसमिति ल्यःगु खः। समूहया वरिष्ठ उपाध्यक्षय् लेखबहादुर श्रेष्ठ, मिसा उपाध्यक्षय् चन्द्रकला क्षेत्री, न्हापाम्ह उपाध्यक्षय् सुनील शर्मा, उपाध्यक्षय् नारायण सिलवाल, महासचिवय् घनश्याम श्रेष्ठ, सचिवय् प्रविन कुलुङ राई व कोषाध्यक्षय् प्रदीप श्रेष्ठयात ल्यःगु खः।

अथेहे केन्द्रीय सदस्यय् सुशीलकुमार श्रेष्ठ, मुकुन्द कालीकोटे, रमिता छुँजु, हरिश सिंह नगाल, दिपेन्द्र महर्जन, अनुप प्रधान व सागर बस्नेतयात ल्यःगु खः।समूह न फोटो पत्रकारया व्यावसायिक हकहित, पेसागत सुरक्षा, क्षमता विकास व फोटो पत्रकारिताया विकासया निति थी थी ज्या याना वच्वनागु दु धका अध्यक्ष वन्तं धाःगु दु।

उगु ज्याझ्वलय् ‘हरिगोपाल प्रधान फोटो पत्रकारिता सम्मान’ फोटो पत्रकार गणेश बिष्ट, ‘साहसिक फोटो पत्रकारिता सम्मान’ सुजन बज्राचार्य, ‘पर्या–पर्यटन फोटोपत्रकारिता सम्मान’ प्रविन श्रेष्ठ, ‘मनोरञ्जन फोटोपत्रकारिता सम्मान’ लेखबहादुर श्रेष्ठ व ‘खेलकुद फोटो पत्रकारिता सम्मान’ सरोज नेपालयात लःल्हागु खः।

‘माधव थापा जोखिमपूर्ण फोटो पत्रकारिता पुरस्कार  २०८१’ पाखे सिविन नेपालया फोटोपत्रकार रमिता छुँजु, ‘संस्थागत एनएफपिजे प्रेसिडेण्ट अवार्ड २०८१’ बाट कार्यवहाक महासचिव घनश्याम श्रेष्ठ व ‘उत्कृष्ट जिल्ला शाखा पुरस्कार’ रामेछाप शाखायात लःल्हागु खः।