प्रधानमन्त्री केपी शर्मा ओलीं राजनीतिलिसें समाजया दक्व ख्यलय् सुधार यायेमाःगु आवश्यकताय् बः बियादिसें ‘स्टन्ट’बाजीं देय् न्ह्याइमखु धकाः धयादीगु दु।

नेपाल बार एसोसिएसन व युवा कानुन व्यवसायी सरोकार समाजं ग्वसाः ग्वःगु न्हापांगु युवा कानुन व्यवसायी सम्मेलन उलेज्या यानादिसें प्रधानमन्त्री ओलीं यथार्थय् जनताप्रति इमानदार व बफादार जुयाः सकसिनं थःगु कर्तव्य पूवंकाः देय्यात भद्रगोल व विपन्नपाखें मु्क्त यायेमाः धकाः धयादीगु खः।

वय्कलं राजनीतिक दलतय्गु नेतृत्व व जनतायागु मंकाः कुतलं जक लोकतन्त्र हयेफूगुलिं आः शान्तिसुरक्षा, सुशासन व समृद्धि दयेकातयेत सकलें कटिबद्ध जुइमाःगुलिइ बः बियादिल। प्रधानमन्त्री ओलीं सांसद तय्सं कानुन दयेकीबलय् सार्वभौमसत्तां जाःपिं जनतापाखें कानुन दयेकेत्यना धइगु खँ हेक्का तयाः ज्या यायेमाःगु व सरकारं जि हे सर्बेसर्बा खः धइगु भ्रम जुइके मज्यूगु ध्वाथुइकादिल। “संसदं न्यायपूर्ण कानुन दयेकेमाः। सम्बन्धित निकायत उकथं हे न्ह्यायेमाः। सन्तुलत व नियन्त्रणया सिद्धान्त नाप नापं लोकतन्त्रय् थःम्हेसिनं हे कानुनया पालना यायेगु अभ्यास अझ आवश्यक जुइ”, प्रधानमन्त्री ओलीं धयादिल, “देय्प्रति धात्थें इमानदार जुयाः सुशासनयुक्त, भ्रष्टाचारमुक्त, समृद्ध व सुखी नेपाःमि दयेकेत सरकार जुयाच्वंगु दु, थुकिइ कानुन बन्जातपाखें सक्रिय ग्वाहालि दइगु नं भसला कयाच्वना ।”

प्रधानमन्त्री ओलीं सम्मेलनपाखें वःगु लिच्वःनापंया रायसुझाः छ्यलाबुला यायेगु प्रतिबद्धता यानादिसें युवा कानुन बन्जातय्त म्ह्वः पारिश्रमिक बियाच्वंगु अवस्था अन्त्य जुइमाः धकाः धयादिल । वय्कलं आःया सरकार कानुन बन्जात व युवात नापं दूगु ध्वाथुइकादिसें थुगु ख्यःया भिं जुइगु व उन्नतिया पक्षय् कानुन निर्माणलिसेंया ज्याय् पाय्छि ध्यान बिइगु भलसा नं बियादिल। अन्तर्राष्ट्रिय ख्यःया प्रतिनिधिपाखें नं संबोधन जूगु ज्याझ्वलय् युवा कानुन व्यवसायी सर्वेक्षण प्रतिवेदन सार्वजनिक याःगु खः।

नेकपा माओवादी केन्द्रया विद्यार्थी संगठन अखिल क्रान्तिकारीया मतगणना सुरु जुइत्यःगु दु।

पार्टी केन्द्रीय कार्यालय पेरिसडाँडाय् छु ई लिपा मतगणना सुरु जुइत्यःगु दु। ह्यागू व हाकू मसीया कारण विवाद जुगुलि दिनाच्वंगु मतगणना आः सुरु जुइत्यःगु खः।

निर्वाचन आयोगया प्रस्ताव कथं मतपेटिका पार्टी केन्द्रीय कार्यालय पेरिसडाँडाय् यकूगु दु। आः पेरिसडाँडाय् तारबार तया मतगणना जुइगु थासय् सुरक्षित तःगु दु।

आः ५ सय २२ मत ल्याखाय्गु ल्यः दनिइ। पदाधिकारी, आयोग, सचिवालय सदस्य, व केन्द्रीय सदस्यया मत न ल्याखायेगु ल्यः दनिइ। प्यंगु थासय् मतगणना यायेगु तयारी दु। न्हुगु कार्यसमिति ल्ययेगु निति माघ ११ गते वालमीकि विद्यापीठय् मतदान जुगु खः।

यल, यंगुबहालया जनहित महिला समूहं ललितपुर महानगरपालिका ८ वडाया ग्वाहालिइ ७ न्हुया उद्घोषण तालिम ब्यूगु दु । बाराही भवनय् जूगु थुगु तालिमय् २२ म्हसिन ब्वति कयादीगु खःसा तालिम प्रशिक्षक सुरजवीर बज्राचार्यं बियादीगु खः ।

तालिमया समापन समारोहया मूपाहां वडा ८ या नायः बाबुरत्न महर्जनं ब्वति कयादीपिन्त दसिपौ लःल्हासें “थुगु तालिम अति हे आवश्यक जूगु व थुकथंया तालिमया नितिं वडां मन ह्वयेकाः ग्वाहालि याइगु”खँ कनादिल । “७ न्हुया तालिमं ब्वति कयादीपिनिगु न्वचु कला, ज्याझ्वः न्ह्याकेगु कलानापं ब्यवस्थापनय् खनेदुगु ह्यूपालं थः अतिकं प्रभावित जूगु” खँ नं वय्कलं कनादिल ।

ज्याझ्वलय् वडा ८ या महिला सदस्य लक्ष्मी महर्जन, सदस्य विमला महर्जनया नं विशेष पाहांकथं ब्वति दुगु खःसा पाहांकथं बाराही समाजया नायः चन्द्रमान बाराही, प्रशिक्षक सुरजवीर बज्राचार्य, यंगुबहाल युवा क्लबया ल्यूदांभरी अनिल बाराही, समूहया निवर्तमान नायः रमिता महर्जनया ब्वति दुगु खः ।  

ज्याझ्वलय् न्वंवासें प्रशिक्षक सुरजवीर बज्राचार्यं “थुगु प्रशिक्षण ७ न्हुयागु खःसां जीवनय् गुबले नं मालीबलय् थः प्रतिवद्ध जुयाः ग्वाहालि यायेत तयार जुइगु प्रतिवद्धता प्वंकूसें थुकिया नितिं सकलें दुथ्याःगु भाइबर ग्रुप दयेकागु” खँ कनादिल ।

ज्याझ्वलय् वडा अध्यक्ष बाबुरत्न महर्जन, प्रशिक्षक सुरजवीर बज्राचार्य व बाराही समाजयात मतिनाया चिं नं लःल्हाःगु खः ।

समूहया न्वकु पूर्णशोभा महर्जनया नायःसुइ न्ह्याःगु समापन समारोहय् तालिमय् ब्वति कयादीपिं काजीबाबु महर्जन, रुपक बाराही, विणा चित्रकारपिन्सं थःगु अनुभव न्वचु तयादीगु खःसा लसकुस न्वचु अमिता श्रेष्ठ व सुभाय् न्वचु सुमित्रा महर्जनं बियादीगु खः ।

ज्याझ्वः रजनी बाराही व श्रृजना बाराहीं न्ह्याकादीगु खः ।



 

नेपाली प्रेस चौतारी नेपाल तेह्रथुम जिल्ला अध्यक्षय् उमेश नेपालीया नेतृत्वय् न्हुगु कार्य समिति ल्यःगु दु।

उपाध्यक्षय् विकास गुरुङ व मिसा उपाध्यक्षय् बालिका लिम्बु निर्वाचित जूगु खः। अथेहे सचिवय् विनोद भट्टराई, सहसचिवय् सरस्वती राई व डिबी लिम्बु, कोषाध्यक्षय् बुद्धिमान तामाङ निर्वाचित जुगु खः।

ताप्लेजुङया पाथीभराय् केबलकार निमार्ण यायेगु विषय ल्वापू जुया घाःपाः जूपिन्त सरकारं खर्च ब्यहोरय् याइगु जुगु दु।

मंगलवाः थौ सिंहदरबारय् गृहमन्त्री, जनप्रतिनिधि, सुरक्षा निकायया प्रमुखनाप च्वगु बैठकं घाःपाः जुगु उपचार खर्च ब्यहोर यायेगु निर्णय याःगु दु। अथेहे, घटनाया बारे मेगु खँ थुइका समाधानया निति वार्ता समिति गठन यायेगु निर्णय जुगु दु।

घटनाया बारे कन्ह्य संस्कृति, पर्यटन लिसे उड्डययनमन्त्री बद्रीप्रसाद पाण्डेनाप सहलह याइगु जुगु दु।

मंगलवाः थौ गृहमन्त्री रमेश लेखकं ताप्लेजुङया सांसद योगेश भट्टराई व उर्मिला थेवे, इलाम क्षेत्र नम्बर २ या सांसद सुहाङ नेम्वाङ, नेपाल प्रहरीया महानिरीक्षक बसन्त कुँवर, सशस्त्र प्रहरी बलया महानिरीक्षक राजु अर्याल, वन लिसे वातावरणमन्त्री ऐनबहादुर शाहीपि नाप सहलह याःगु खः।