थ्व हे माघ १८ गतेनिसें न्ह्याइगु सङ्घीय संसद्या चिकुला अधिवेशनया ज्याया धलः तयार जूगु दु। सभामुख देवराज घिमिरेया अध्यक्षताय् थौं सिंहदरबारय् च्वंगु प्रमुख राजनीतिक दलया प्रमुख सचेतक व सचेतक लिसेया मुँज्या जुइगु धलः दयेकूगु खः। मुँज्यालिपा सञ्चारकःमिलिसे खँ ल्हानादिसें सत्तारूढ दल नेकपा (एमाले) या मुख्य सचेतक महेश बर्तौलां संसदया चिकुला अधिवेशन अन्तर्गत ज्याया धलः दयेकूगु धकाः धयादिल।

वय्कःया कथं संसदया न्हापांगु दिं दकसिबे न्ह्यःने प्रधानमन्त्री व दलया शीर्ष नेतातय्सं संबोधन याइगु ज्याया धलः दयेकूगु दु। व हे दिं सरकारं हःगु थी थी अध्यादेश संसदय् पेस याइ। “संसदया न्हापांगु न्हुया मुँज्याय् प्रधानमन्त्रीं संबोधन याइ। अनंलिपा विपक्षी दलया नेतालिसें दक्व राजनीतिक दलया शीर्ष नेतातय्सं संबोधन याइगु न्हापांगु ज्याया धलः दयेकूगु खः”, मुख्य सचेतक बर्तौलां कनादिल।

माघय् संसदया मुँज्याया ज्याया धलः तयार जूगु नापं व हे कथं न्ह्यावनेगु सहमति जूगु नेपाली कांग्रेसया प्रमुख सचेतक श्यामकुमार घिमिरें धयादिल। वया लिपाया मुँज्याय् संसदय् पेश जूगु अध्यादेश निर्णय यायेत न्ह्यब्वइ। थौंया मुँज्यां तयार याःगु ज्याया धलःयात मङ्गलबाः च्वनीगु कार्यव्यवस्था परामर्श समितिया मुँज्यां अनुमोदन याइ।

मुख्य सचेतक बर्तौलां आः जुइगु अधिवेशनयात प्रभावकारी जुइकेत महत्त्वपूर्ण विधेयक नापं अत्थें जुयाच्वंगु कानुन पारित यायेगु कथं सत्तारूढ व प्रमुख प्रतिपक्षी दलदथुइ समझदारी जूगु खँ नं कनादिल। वय्कलं संसदया प्रभावकारिता अप्वयेकाः रचनात्मक व क्रियाशील दयेकाः वनेगु प्रतिबद्धता यानादिल। मुँज्याय् नेकपा (माओवादी केन्द्र)या प्रमुख सचेतक हितराज पाण्डे व राष्ट्रिय स्वतन्त्र पार्टी (रास्वपा)या सचेतक निशा डाँगीं नं ब्वति कयादीगु खः।

स्वास्थ्य व जनसंख्या मन्त्री प्रदीप पौडेलं छगू लखया स्वास्थ्य बीमायात न्यागू लख यायेत्यनाःगु धयादीगु दु।

म्हिगः ख्वपय् जूगु छगू ज्याझ्वलय् मन्त्री पौडेलं धयादिल, “स्वास्थ्य बीमाय् न्यागू लख दांया व्यवस्था यायेत्यना, थुकिं ल्वगितय्त ग्वाहालि जुवनि।”

वय्कलं एकीकृत व एकद्वार प्रणालीपाखें जक बीमा सेवा न्ह्याकेमाःगु खँय् बः बियादिल। बीमा ध्यबा न्यागू लख थ्यंकेगु व थुकियात व्यवस्थित यायेगु तातुनाः थः न्ह्याः वना च्वनाःगु दु धकाः नं वय्कलं धयादिल।

सञ्चार नापं सूचना प्रविधिमन्त्री पृथ्वीसुब्बा गुरूङं राष्ट्रिय परिचयपत्र सुशासन दयेकातयेत महत्त्वपूर्ण आधार जुइगु धयादीगु दु।

जिल्ला प्रशासन कार्यालय कास्कीइ थौं प्रमुख जिल्ला अधिकारी भरतमणि पाण्डेपाखें राष्ट्रिय परिचयपत्र कयादिसें वय्कलं आधुनिक व वैज्ञानिक प्रविधि जूगुलिं थुकियात ‘सुपर सिटिजनसीप’ या कथं तकं कायेमाःगु धयादिल। सरकारया प्रवक्तातकं जुयादीम्ह सञ्चारमन्त्री गुरूङं आः नकतिनि धइथें अध्यादेशपाखें सामाजिक सुरक्षा भत्ताया निंतिं राष्ट्रिय परिचयपत्रयात अनिवार्य याःगु दु धकाः धयादिल।

वय्कलं धयादिल, “नागरिकताया माध्यमं यक्व अनियमितता जुल, अथे मजुइकेत राष्ट्रिय परिचयपत्रयात आधार दयेकेगु धकाः प्रबन्ध याःगु खः। सुशासनया निंतिं तकं महत्त्वपूर्ण ब्वः खः।” सरकारं बैँकिङ कारोबार, राहदानी नापं मालपोतया निंतिंतकं राष्ट्रिय परिचयपत्रयात मुख्य आधार याइगु मन्त्री गुरूङया धापू दु। “राष्ट्रिय परिचयपत्र उच्च प्रविधियुक्त जुगुलिं आधुनिक व भलसा काये बहःजू ।

थुकिं यक्व ज्या जुइ। बायोेमेट्रिक प्रणालीइ चले जुइगु जूगुलिं च्वय् क्वय् जुइगु वा खुयाः काये मफइगु कथं या दु। नागरिक एपय् छ्यलीगु इलय् तकं थुकियात आधार दयेकी,” सञ्चारमन्त्री गुरूङं धयादिल। प्रमुख जिल्ला अधिकारी पाण्डें जिल्लाय् आःतक २ लख ७ सः व १६ गू राष्ट्रिय परिचयपत्र थ्यंगुलिइ स्थानीय तहया वडा ज्याकुथिपाखें ७५ द्वः ७ सः व १८ म्हसित बिइधुंकूगु कनादिल।

वय्कलं प्रशासन ज्याकुथिइ राष्ट्रिय परिचयपत्रया निंतिं आवेदन सङ्कलन यायेगु ज्यातकं न्ह्यानाच्वंगु दु धकाः धयादिल।

गृहमन्त्री रमेश लेखकं पत्रकारिता लोकतन्त्रया संरक्षक खः धकाः धयादीगु दु। सिंहदरबारय् गृह मन्त्रालय दुने थौं नेपाल पत्रकार महासङ्घया नवनिर्वाचित पदाधिकारी तय्त भिंतुना बिइगु झ्वलय् गृहमन्त्री लेखकं निष्पक्ष पत्रकारिता लोकतन्त्रया थां जूगु धयादिल।

“झीगु संविधानं मुक्कं प्रेस स्वतन्त्रताया ‘ग्यारेन्टी’ यानातःगु दु”, वय्कलं धयादिल, “स्वतन्त्र, व्यावसायिक नापं निष्पक्ष पत्रकारिताया लकस सरकारं सुनिश्चित याइ।” गृहमन्त्री लेखकं छुं नं कथं पत्रकारिताया स्वतन्त्रता व व्यावसायिकताया सुनिश्चितता जुइगु भलसा बियादिल। पत्रकारिता मर्यादित, व्यवस्थित व सत्यय् आधारित जुइमाःगुलिइ वय्कलं बः बियादिल।

“कपोलकल्पित बुखँ सम्प्रेषण यायेगु, समाजय् अनावश्यक कथंया भ्रम सिर्जना यायेगु, व्यक्ति, समाज व समुदायया चरित्रहत्या यायेगुलिसेंया ज्या खँ पाखें थः व सञ्चार गृहयात तापाकेत नं इनाप यानाच्वना,” मन्त्री लेखकं धयादिल, “अजाःगु ज्याखँ अप्वोया वन धाःसा मुक्कं सञ्चार जगतप्रतिया भलसा मदइ।”

नेपाल पत्रकार महासङ्घया केन्द्रीय नायः निर्मला शर्मां पत्रकार महासङ्घया निर्वाचन शान्तिपूर्ण लकसय् क्वचायेकेत सरकारं म्हितूगु भूमिकायात च्वछानादिल। नापं वय्कलं प्रेस स्वतन्त्रता हननय् स्वानाःच्वंपिंत कारबाहीया माग यानादिसें गृहमन्त्री लेखकयात ध्यानाकर्षण पौ लःल्हानादिल।

नेपाली सेनापाखें कन्हय् मंगलबाःनिसें किपा व बृहद् ब्वज्या जुइत्यंगु दु। सेनाया जनसम्पर्क व सुचं निर्देशनालयया कथं ब्वज्या थ्व हे माघ १८ गते तक जङ्गी अड्डाय् न्ह्याइ।

नेपाली सेनाया न्हापांनिसें आःतकया गतिविधि पिब्वइगु किपा, ल्वाभः व ज्याभःत ब्वइ। उकिया नापनापं सैनिक वसः, सैनिक ब्यान्ड, सैनिक हवाई सेवा, घोडचढी, राष्ट्रिय निकुञ्ज व वन्यजन्तु आरक्ष, शान्ति सेना, विकास निर्माण, विपद् व्यवस्थापन, कासा, राष्ट्रिय सेवा दल नापं सैनिक ब्वनेकुथिया थी थी पक्षयात न्ह्यब्वइ धाःगु दु।

आम नागरिकं नेपाली सेनाया थी थी गतिविधियात सतिकं स्वयेगु ह्वःताः चुलाका बियेगु तातुनां ग्वसाः ग्वयेत्यंगु उगु ब्वज्या निःशुल्क स्वयेफइ। प्रदर्शनीपाखें आम नागरिकया नापनापं थी थी तगिंमय् ब्वनाच्वंपिं ब्वनामितय्त नं नेपाली सेनाया थी थी गतिविधिया बारे सिइका कायेत अःपुइगु विश्वास यानाःगु सुचं निर्देशनालय नं पितब्यूगु प्रेस विज्ञप्तिइ धयातःगु दु।