राष्ट्रिय सूचना आयोगया प्रमुख आयुक्तय् डा. सुरेश आचार्य नियुक्ति यायेगु निति सिफारिस जूगु दु।अथेहे, आयोगया आयुक्तय् गगन विष्ट व दुर्गा भण्डारीया नां नियुक्ति यायेगु निति सिफारिस जूगु दु।

डा.आचार्य नेपाल पत्रकार महासंघया पूर्व अध्यक्ष खः सा विष्ट प्रेस चौतारी नेपालया पूर्वअध्यक्ष खः। मेम्ह सदस्य भण्डारी थ्व स्वया न्ह्यः प्रेस काउन्सिल नेपालया सदस्य खः।राष्ट्रिय सूचना आयोगया प्रमुख आयुक्त व आयुक्तया सिफारिस यायेत सभामुखया अध्यक्षताय् सञ्चार लिसे सूचना प्रविधिमन्त्री व नेपाल पत्रकार महासंघया अध्यक्ष सदस्य जुइगु कथं कानुनी व्यवस्था दु।

उगु व्यवस्था कथं सिफारिस समितिं उमिगु नां प्रस्ताव याःगुलि मन्त्रिपरिषद् न निर्णय यायेमाः। मन्त्रिपरिषदया निर्णय लिपा प्रधानमन्त्रीं पद व गोपनीयताया सपथ नकेगु कानुनी व्यवस्था दु।

संयुक्त अधिराज्यया ग्लास्गोय् जुइगु अन्तर्राष्ट्रिय प्रहरी सङ्गठन (इन्टरपोल) या ९२ गू महासभाय् ब्वति कायेत प्रहरी महानिरीक्षक वसन्तबहादुर कुँवर स्वम्ह दुजःया प्रतिनिधिमण्डलया नेतृत्व यानाःं प्रस्थान यागु दु।

इन्टरपोलया सच्छि व ९६ दुजः देय्या प्रतिनिधितय्सं ब्वति काइगु महासभाया झ्वलय् इन्टरपोल व विश्व स्वास्थ्य सङ्गठन दथुइया ग्वाहालि, आतंकवादविरुद्धया रणनीति, प्रहरीया विश्लेषणात्मक क्षमता अभिवृद्धि, अतिवादविरुद्ध एकीकृत रणनीति, इन्टरपोलया संविधान संशोधन थेज्याःगु विषयलय् खँल्हाबल्हा जुइगु केन्द्रीय प्रहरी समाचारकक्षं धाःगु दु।

प्रधानमन्त्री केपी शर्मा ओलीं देय्या विकासयात केन्द्रय् तयाः शुरु जूगु पूर्वाधार निर्माणया परियोजनातय्त छसिंकथं क्वचायेगु प्रतिबद्धता प्वकादीगु दु।

गौतमबुद्ध अन्तर्राष्ट्रिय विमानस्थलपाखें थाइ एयर एसियां थौंनिसें ब्याङ्कक–भैरहवा उडान जूगु सन्दर्भय् प्रधानमन्त्रीं उगु मनसुवाः सामाजिक सञ्जालय् तयादीगु खः। सामाजिक सञ्जाल फेसबुकय् एयर एसियाया विमानयात लःया फोहरां लसकुस याःगु ३७ सेकेण्डया भिडियो मंकाः यानाः वय्कलं धयादीगु दु, “भैरहवा विमानस्थलपाखें अन्तर्राष्ट्रिय उडान शुरु जूगु दु।

यानागु ज्यायात छसिंलाक क्वचायेकेगुपाखें जिमिसं ध्यान बियाच्वनागु दु।” नेपाः नागरिक उड्डयन प्राधिकरणया कथं आः वइगु शनिवाःनिसें उगु वायुसेवां हरेक वालय् सोमवाः व बिहीवाः गौतमबुद्ध अन्तर्राष्ट्रिय विमानस्थलपाखें नियमित उडान याइ।

नेपाल संबत ११४५ न्हु दँ व स्वन्तीया लसाताय् अमेरिकाया बोस्तन शहरय् नेवाःअर्गनाजेशन अफ न्यु ईगंल्याडया ग्वसालय् नेवाः तय्गु तधःगु नखः म्हः पुजा जुगु दु धका संस्थाया सल्हाकार दीपक डंगोल कनादिगु दु।

समन्त श्री ब्रजाचार्य पुजा पाठ याना न्हाकादिगु खाः।उगु ज्याझ्वलय् मुक्क ८७ ब्वति दुगुलि नायः संजीव तुलाधर लसुकुस यानादिगु खः।

अथेहे नेपालय् करूणामय द्यःया बारे अनुसन्धान याना ब्रस म्याकोय ओवेन्स न्हु दँया लसताय भिन्तुना बियादीसे वयकल बोस्तने  करुणामयबारे चित्रकला ब्बजा यायेत्यनागु दु धका धयादीगु खः।

थाई एसिया एयरलाइन्स बैङ्कक–भैरहवा–बैङ्कक उडान थौंनिसें सुरु जूगु दु। थौं सुथसिया ६ः५५ ताः इलय् थाई एसियाया विमान चालक पुचःया न्हय्म्ह दुजःनापं गौतमबुद्ध अन्तर्राष्ट्रिय विमानस्थलय् अवतरण जूगु खः।

“सुरुइ परीक्षण उडानया कथं चालक दलया दुजतनापं थाइ एसियाया एयरबस ए–३२० गौतमबुद्ध अन्तर्राष्ट्रिय विमानस्थलय् अवतरण याःगु खः”, विमानस्थलया सूचना अधिकारी विनोदसिंह राउतं थथे धयादिल, “आः २३ कात्र्तिकनिसें छवाःलय् निन्हु नियमित उडानया धलः तयार जूगु दु।”

थाई एसियाया विमान भैरहवाया विमानस्थलया कर्मचारीनापं सुरक्षाकर्मी, अध्यागमनया कर्मचारी व थनया पर्यटन बन्जातय्सं थुकियात लसकुस याःगु दु। थाई एयर एसियां छुं न्हि न्ह्यः जक भैरहवा व हाकन उडान येँ सुरु यायेगु उजं दयेसातकि हे उडान सुरु जूगुलिं टिकट मिइगु नापं बजाः प्रवर्द्धनया ज्या तकं जूगु मदुनि।

भैरहवापाखें बैङ्ककपाखें छखेया न्हापांगु भाडादर १२ द्वः जूगु न्ह्यब्वःगु दु। एयर एसियाया थ्व विमान सुथय् ७ः४० ताःईलय् बैङ्कक ब्वयेधुंकूगु दु।