प्रधानमन्त्री केपी शर्मा ओलीं आःया सरकार देश विकास यायेत प्रतिबद्ध जूगु धयादीगु दु।

कैलालीया पूर्वी लागाय् निर्माणाधीन राष्ट्रिय गौरवया रानीजमरा कुलरिया सिँचाइ आयोजनाया निगूगु चरणय् निर्माण पूवंगु सिँचाइ प्रणाली व विद्युतगृहया थौं उलेज्या यानादिसें प्रधानमन्त्री ओलीं देसय् ह्यूपाः हयेत योगदान ब्यूगु निगू तःधंगु दलया आःया सरकार स्थिरता, स्थायित्व कायम यायेगु कथं ज्या यानाच्वंगु धयादिल।

प्रधानमन्त्री ओलीं धयादिल, “देसय् स्थिरता, स्थायित्व, विकास, सुशासन हयेत व भ्रष्टाचार नियन्त्रण यायेत सरकार प्रतिबद्ध दु, वइगु चुनावतक थ्व सरकार जुइ।” रानीजमरा कुलरिया सिँचाइ आयोजनाया निर्माणपाखें सरकारया विकासप्रति चाहाना नापं तःगति बिइगु खँयात क्यंगु न्ह्यथनादिसें वय्कलं थ्व आयोजनाया स्वगूगु चरणया ज्या नं पूवंकेगु प्रतिबद्धता प्वंकादिल। प्रधानमन्त्री ओलीं १२० दँनिसें न्ह्यानाच्वंगु परम्परागत सीपपाखें सुरू जूगु थ्व सिँचाइ प्रणालीयात आधुनिक स्वरूपय् तब्याकूगु न्ह्यथनादिसें स्थानीयतय् ब्वति व सरकारया समन्वयपाखें थौंया थ्व सफलता चूलाःगु धयादिल।

देय् विकास यायेत प्रतिबद्ध जुयादीम्ह वय्कलं थ्व सिँचाइ आयोजना निर्माणपाखें नेपाःया जलस्रोत नापं ग्रामीण कृषि ख्यःया विकासय् ऐतिहासिक उपलब्धि जूगु धयादिल। थ्व आयोजनां ग्रामीण जीवनशैली ह्यूपाः कृषि उत्पादनय् वृद्धि ऊर्जाय् आत्मनिर्भर खाद्य सुरक्षाय् तिबः बिइत ग्वाहालि याइगु भलसा प्वंकादिल। प्रधानमन्त्री ओलीं धयादिल, “सोमबाः च्वंगु मन्त्रिपरिषदया बैठकं थ्व सिँचाइ आयोजनाया स्वंगूगु चरणया ज्या न्ह्याकेत विश्व बैंकयाके ऋण कायेगु निर्णय याःगु खः।” वय्कलं मधेसय् खनेदूगु सुक्खाग्रस्त समस्याया लिसें त्वनेगु लःया अभाव ज्यंकेत ५०० गू डिप बोडिङ जडान यायेत्यंगु जानकारी बियादिल।

चुरे संरक्षणया निंतिं चुरे लागाय् मत्स्यपालन व पुखू निर्माण यानाः लः रिचार्ज जुइफइगु जूगुलिं सरकारया ध्यान उखेपाखे वंगु वय्कलं धयादिल। सुनकोशी मरिन डाइभर्सन, भेरी बबै सिँचाइ आयोजना, तम्मोर डाइभर्सनलिसें महत्त्वपूर्ण आयोजनाया निर्माण पूवंकेत सरकारं ध्यान ब्यूगु वय्कलं धयादिल । सामाजिक संस्कृति, सभ्यता मूल्यमान्यताअःखः छथ्वलं यःयत्थें ब्वः बिइगु, सामाजिक सञ्जालय् च्वयेगु, फुक्क विकासया ज्याय् विरोध यायेगु याःगुलिं वय्कलं असन्तुष्टी प्वंकादिल। विश्व बैंक व नेपाल सरकारया मंकाः लगानीइ निर्माण जूगु थ्व सिँचाइ आयोजनाअन्तर्गत न्हापांगु व निगूगु चरणय् यानाः १४ द्वः व ३०० हेक्टरय् सिँचाइ सुविधा थ्यंगु दु।

लिसें सिँचाइ प्रणालीअन्तर्गत हे जानकी गाउँपालिका–९ कटाँसेय् निर्माण पूवंगु विद्युतगृहपाखें ४.७१ मेगावाटया विद्युत् उत्पादन जूगु खः। उत्पादित विद्युत् राष्ट्रिय प्रसारण लाइनय् स्वाकूगु दु। सिँचाइ आयोजनाया लम्की शाखापाखे १४ किलोमिटर ६५० मिटर मूल नहर दयेकेधुंकूगु दु । थुकिया शाखा व उपशाखा नहर दयेकेधुंकाः थप खुद्वः हेक्टर जमिनय् सिँचाइ थ्यनीगु व आयोजनाया सिञ्चित लागा २० द्वः ३०० हेक्टर जुइ ।

स्वगूगु चरणया ज्या पूवंसा थ्व सिँचाइ आयोजनापाखें मुक्कं ३८ द्वः व ३०० हेक्टर क्षेत्रफलया जग्गाय् झिंनिला हे सिँचाइ सुविधा थ्यनीगु आयोजना ज्याकुथिया प्रमुख प्रेम घिमिरें जानकारी बियादिल।

बागमती प्रदेशया खानेपानी, ऊर्जा नापं सिँचाइमन्त्री श्यामबहादुर खड्कां थौं मन्त्री पदं राजीनामा बियादीगु दु। मुख्यमन्त्री बहादुरसिंह लामा तामाङयात थौं वय्कलं राजीनामा लःल्हानादिल।

कांग्रेस संसदीय दलया ज्याकुथिइ दलया नेता नापं मुख्यमन्त्री लामाविरुद्ध दर्ता जूगु अविश्वासया प्रस्तावय् सहलह जुयाच्वंगु इलय् मन्त्री खड्कां पदपाखें राजीनामा बियादीगु खः।

थ्व स्वयां न्ह्यः वंगु शुक्रबाः कांग्रेसपाखें प्रदेश सरकारय् ब्वति कयादीम्ह आन्तरिक मामिला नापं कानुनमन्त्री सुरजचन्द्र लामिछाने, संस्कृति नापं पर्यटनमन्त्री विमल ठकुरी, सहकारी नापं गरिबी निवारणमन्त्री मदुकुमार श्रेष्ठ, युवा नापं खेलकुदमन्त्री मीनकृष्ण महर्जनं राजीनामा बियादीगु खः।

उकुन्हु हे मुख्यमन्त्री लामां प्यम्हं मन्त्रीतय्त पदमुक्त यानादीगु खः।

सङ्घीय संसद् अन्तर्गतया थी थी न्यागू संसदीय समितिया बैठक थौं च्वनेत्यंगु दु।

सार्वजनिक जूगु ज्या धलः कथं अन्तरराष्ट्रिय सम्बन्ध व पर्यटन समिति, कृषि सहकारी लिसें प्राकृतिक स्रोत समिति, शिक्षा, स्वास्थ्य लिसें सुचं प्रविधि समिति, सार्वजनिक लेखा समिति, विधायन व्यवस्थापन समिति व सार्वजनिक नीति लिसें प्रत्यायोजन विधायन समितिया बैठक च्वनेत्यंगु दु।

अन्तरराष्ट्रिय सम्बन्ध व पर्यटन समितिइ ‘नेपाल हवाई सेवा प्राधिकरण विधेयक, २०८१’ य् संशोधन दर्ता यानादीपिं सांसद नापं सहलह याइगु ज्या धलः दु। कृषि सहकारी लिसें प्राकृतिक स्रोत समितिइ ‘भूमि सम्बन्धी छुं नेपाल ऐनयात संशोधन यायेत दयेकूगु विधेयक, २०८२’ य् लाःगु संशोधनया सम्बन्धय् संशोधनकर्ता सांसदपिंनाप सहलह याइगु ज्या धलः दु।

शिक्षा, स्वास्थ्य लिसें सुचं प्रविधि समितिइ मिडिया काउन्सिल विधेयक, २०८० या सम्बन्धय् सरोकारवाला नाप सहलह याइगु ज्या धलः दु। लिसें लेखासमितिं उपप्रधानमन्त्री लिसें अर्थमन्त्रीया उपस्थितिइ सरकारया फुक्कं सचिवत नाप सहलह याइगु ज्या धलः दु। विधायन व्यवस्थापन समितिइ ‘राष्ट्रिय विधि विज्ञान प्रयोगशाला (पलिस्था व सञ्चालन) विधेयक, २०८१’ य् दफावार सहलह याइगु ज्या धलः दु।

सार्वजनिक नीति लिसें प्रत्यायोजन विधायन समितिइ कानुन, न्याय लिसें संसदीय मामिलामन्त्री नाप सहलह याइगु ज्या धलः क्वःछिनातःगु दु।

थौं नागयात पुजा यानाः छेँया मूलुखाय् टिकिइगु याइ। छेँया मूलुखाय् नाग टिकां नागपञ्चमी न्याकिइगु याइ। थुगु नखः दँय् दसं श्रावणया शुक्ल पञ्चमीया दिं हनीग याइ।

छेँया मूलुखाय् नागया किपा टिकां दच्छियंकं नाग, नाग, बिच्छी थेंज्याःपिं प्राणीतय्सं छेँयात नोक्सान याइमखु, अले थुकिं मि, सुपाँय् व चकंगु ग्याःचिकुपाखें नं रक्षा याइ धइगु भलासा दु।

वैदिक मान्यता कथं नागयात नागया ‘जुजु’ माने याइ। नाग तंचाल धाःसा लःया अभाव जुइगु जूगुलिं नागयात लय्तायेकेत पुजा यायेगु परम्परा दु।

देय्न्यंकंया नागदह, कुण्ड व नगां थासय् येँ नागपोखरी व टौडाह, ख्वपया सिद्ध पोखरी लगायत विशेष पुजा यायायेगु याइ।

अमेरिकाया ग्वाहालि संस्था मिलेनियम च्यालेञ्ज कर्पाेरेशन (एमसिसी)या अनुदायय् नेपालय् सञ्चालन जुइगु ज्याझ्वःत न्ह्यानाच्वनीगु जूगु दु।

अर्थ मन्त्रालयया कथं एमसिसीया थ्व हे साउन ८ गतेया पौ कथं नेपालय् सञ्चालन जुयाच्वंगु एमसिसीया ज्याझ्वःत मदिक्कं न्ह्यानाःतुं च्वनीगु जूगु खः।

“नेपाल सरकार व उगु निकाय दथुइ २०७४ साल भदौ २९ गते क्वचाःगु कम्प्याक्ट सम्झौता वंगु माघ ७ गतेया अमेरिकाया राष्ट्रपतिया आदेश कथं पुनरावलोकनया निंतिं स्थगित जूगु खः”, अर्थ मन्त्रालयं पितब्यूगु विज्ञप्तिइ धयातःगु दु, “थ्व सम्बन्धय् थ्व हे साउन ८ गते ज्याझ्वः पुनरावलोकन जूगु व नेपाल कम्प्याक्ट न्ह्यानाः च्वनीगु सिफारिस जूगु पौ वःगु खः।”