निर्वाचन आयोगं नेकपा एमाले व नेकपा माओवादी केन्द्रयात एकीकरण यायेगु खःसा १५ दिं दुने निवेदन बिइत इनाप याःगु दु ।

मंगलवाः च्वंगु आयोगया बैठकं थ्व स्वया न्ह्यः एकता जुगु पार्टी बदर जुगुलि हाकनं एकीकरण यायेगु खःसा दलया न्हुगु नां व चिंया प्रस्ताव यासे १५ दिं दुने निवेदन बिइत एमाले व माओवादी केन्द्रयात जानकारी यायेत निर्णय याःगु दु । थ्व स्वया न्ह्यः नेकपा एमाले व नेकपा माओवादी केन्द्र दथुइ एकता जुया बने जुगु न्हुगु पार्टीयात निर्वाचन आयोगं २०७५ जेठ २३ गते नेपाल कम्युनिस्ट पार्टी (ने क पा) नामय् दर्ता याःगु खः ।

तर सर्वोच्च अदालतं वःगु आइतवाः ने क पाया नामय् निर्वाचन आयोगय् न्हापा हे दर्ता दुगु पार्टी नाप मिले जुगुलि खारेज याना बिःगु खः। सर्वोच्चया फैसलाबारे सहलह यायेत च्वंगु आयोगया बैठकं आः एकीकरण यायेगु खःसा राजनीतिक दल सम्बन्धी ऐन, २०७३ व राजनीतिक दल सम्बन्धी नियमावली, २०७४ विपरीत मजुइगुलि निगु हे दलया थःथःगु केन्द्रीय समितिपाखे दल एकीकरण यायेगु निर्णय याना उगु निर्णय नाप न्हुगु दलया नां व चिंया प्रस्ताव याना १५ (झीन्यान्हु) दिं दुने आयोगय् निवेदन नाप उपस्थित जुइत  एमाले व माओवादी केन्द्रयात जानकारी बिइगु निर्णय याःगु दु।

मस्तिष्कघात जुया नर्भिक अस्पतालय् उपचार याना वयाच्वम्ह नेपाली कांग्रेसया नेता नविन्द्रराज जोशीयात शनिवाः निसे हाकनं भेन्टिलेटरय् तःगु दु ।

वःगु फागुन १३ गते निसे अस्पताल भर्ना जुयाच्वम्ह जोशी स्वास्थ्यय् क्रमिक सुधार जुया वःगुलि भेन्टिलेटरं लिकाःगु खः ।

तर शनिबार सुथय् हाकनं छक्वल सासः ल्ह्यायेगु समस्या वयेवं भेन्टिलेटरय् तया उपचार याना च्वनागु दु धका डा. राजीव झा न धाःगु दु ।

‘भेन्टिलेटर लिकाःगु २४ घण्टा लिपा हे छक्वल समास्या वःगु हाकन शनिवाः सुथय् हे समस्या वल,’ वयकलं धयादीगु दु, ‘आः ब्लड प्रेसर, हर्ट विट लगायत नर्मल हे खनेदु ।’ जोशी आःतक कोमाय् हे दु धका डा. झा न धाःगु दु ।

कक्षा १२ या परीक्षा जेठ २६ गतेनिसे जुइ त्यःगु दु । थौं मंगलवाः च्वंगु राष्ट्रिय परीक्षा बोर्डया बैठकं कक्षा १२ या परीक्षा जेठ २६ गतेनिसे यायेगु निर्णय जुगु दु धका बोर्डया अध्यक्ष प्रा.डा.चन्द्रमणि पौडेलं धाःगु दु ।

परीक्षा जेठ २६ निसे असार ४ गते तक जुइ । कोभिड–१९ महामारीया कारण सरकारं थुगु वर्षया शैक्षिक सत्र निला लिपा यकूगु खः।

जेठ मसान्त तक व न्हुगु शैक्षिक सत्र असारनिसे सुरु यायेगु निर्णय याये धुकुगु दु । थ्व स्वया न्ह्य वैशाखनिसे चैत तक शैक्षिक सत्र सञ्चालन जुयाच्वंगु खः ।

मन्त्रिपरिषदया बैठकं शिक्षा नियमावली संशोधन यासे निला शैक्षिक सत्र थप यायेगु अधिकार मन्त्रालययात बिःगु खः ।

राष्ट्रियसभा सदस्य कोमल वलीं नेकपा एमालेया नेता रघुजी पन्तविरुद्ध काठमाडौं जिल्ला अदालतय् मुद्दा दायर याःगु दु।

सार्वजनिक ज्याझ्वलय् थःगु इज्जतय् धक्का वनिइगु नियतं जानी जानी ब्बबिउगु व बेइज्जती जुइगु कथं व उकिया प्रचार प्रसार याःगु धाःसे ओली पन्तविरुद्ध प्यदँ कैद व ४० हजार रुपैयाँ जरिवानाया सजाय माग यासे मुद्दा दायर याःगु दु ।

ओलीं ब्बबिःगु बापत दच्छिया कैद व १० हजार जरिवाना नाप बेइज्जती याःगु बापत निदँया कैद व २० हजार रुपैयाँ जरिवाना व उकिया विद्युतीय माध्यमपाखे प्रचार प्रसार याःगु बापत थप दँच्छि कैद व १० हजार रुपैयाँ जरिवाना माग दावी याःगु खः। ओलीं पन्तया अभिव्यक्तिपाखे थःगु प्रतिष्ठाय् जुगु असर व विद्युतीय व मेमेगु माध्यमपाखे प्रचार प्रसार याना बेइज्जती यागुलि मनासिव क्षतिपूर्ति व मुद्दाय् लगे जुगु खर्च भरे यायेत माग याःगु खः ।

वःगु फागुन १५ गते नेता पन्तं पार्टीइ नीदँनिसे योगदान याना वयाच्वपि मिसापि दु सा कोमल वलीं राष्ट्रियसभाया टिकट बिःगु धाःसे लैंगिक हिंसाजन्य टिप्पणी याःगु खः ।

लुँया भाः थौं न क्वहावःगु दु । लुँ तोलां थौं खुसः क्वहावःगु दु।

लुँ तोलां खुसः क्वहावया ८५ हजार ६ सय रुपैयाँ थ्यःगु दु धका नेपाल सुनचाँदी व्यवसायी महासङ्घं धाःगु दु ।

म्हिगः लुँ तोलाया ८६ हजार २ सय रुपैयाँ कायम जुगु खः । महासङ्घया कथं अन्तर्राष्ट्रिय बजारय् लुँया भाः अस्थिरता वयेवं नेपाली बजारय् न प्रभाव लागु धका धाःगु दु।

अथेहे, थौं वहः न भाः क्वहावःगु दु । वहः तोलां थौं झीतका क्वहावःगु दु ।

वहः तोलां झीतका क्वहावया १२५५ रुपैयाँ थ्यःगु दु धका धाःगु दु ।