प्रधानमन्त्री केपी शर्मा ओलीं न्हापागु डोज खोप लगे याये धुकुपि नागरिकयात निक्वःगु डोज न्ह्याथय् यानासा बिइगु व्यवस्था यायेगु धका धयादीगु दु।

थौं शुक्रवाः देशवासीया नामय् सम्बोधन यानादीसे न्हापागु मात्रा खोप लगे याये धुकुपि ज्येष्ठ नागरिकयात न्ह्याथय् यानासा न खोप व्यवस्था याये धका धयादीगु दु।

वयकलं दक्को ल्याय्म्हपि नागरिकपिन्त खोप व्यवस्था यायेगु धका धयादीगु खः। नेपालय् अनुदान बिगु ३२ लाख २८ हजार डोज व न्यानगु याना १० लाख डोज खोप हयेगु धका धयादीगु खः।

चीन सरकारया अनुदानं बिइगु घोषणा यागु १० लाख डोज खोप वगु जुनया न्हापागु वाः दुने नेपाः थ्यनिइगु जुगु दु।

परराष्ट्रमन्त्री प्रदीपकुमार ज्ञवालीं थौं स्वास्थ्य पत्रकार मञ्चया भर्चुअल पे्रस मिटय् न्ववायेगु झ्वलय् जुनया न्हापागु  वाः दुने खोप नेपालय् वइगु जानकारी बिगु खः।

तिब्बत नाका जुया मे महिनाया लिपागु तक निगु लाख व जुन ३ तारिखय् च्यागु लाख डोज खोप हयेगु धका मन्त्री ज्ञवालं धागु दु।

चीन सरकारं कोभिड–१९ विरुद्धया १० लाख डोज भेरोसोल खोप नेपालयात उपलब्ध याये त्यंगु खः।

सरकारं नेपालपाखे प्यंगु देय् लागि नियमित उडान खुला यागु दु।

निगु छिमेकी देय् भारत व चीन नाप कतार व टर्कीइ आ सेड्युल उडान जुइ । उकि मध्ये आः भारतय् वाःया दुने निगु उडान जुइ।

चीन, कतार व टर्की धासा जेठ १८ निसे नियमित उडान खुले जुइगु संस्कृति, पर्यटन नाप नागरिक उड्डयन मन्त्री भानुभक्त ढकालं जानकारी बिगु खः।

खोपया मात्रा पुरा यापि यात्रु होम आइसोलेसन च्वने फइ। मेपि यात्रुपिनिगु हकय् धासा अनिवार्य होटेल क्वारेन्टिन व्यवस्था यागु दु।

कोरोना भाइरसया महामारी नियन्त्रण यायेत घोषित निषेधाज्ञाया दथुइ लिपागु लच्छि निसे नेपालय् आन्तरिक नाप बाहृय निगुलि हे हवाई उडान बन्द जुगु खः।

तर, चार्टर्ड उडान धासा जुयाच्वंगु दु । नेपालय् पर्वतारोहणय् वःपि युरोप व अमेरिकी देशय् नागरिकपिन्त छेँ लिहावनिइपिन्त इस्तानबुल सहज गन्तब्य जुगु खः।

लुँया भाः तोलां थौं प्यसः क्वहावंगु दु धका नेपाल सुनचाँदी व्यवसायी महासंघं धागु दु।

बिहीवाः ९४ हजार दुई सय रुपैयाँ तोलां कारोबार जूगु छापावाल लुँया भाः थौं शुक्रवाः ९३ हजार ८ सय रुपैयाँ कायम जुगु दु धका महासंघं धागु दु।

थौंया लागि तेजावी लुँ तोलां ९३ हजार तीन सय रुपैयाँ तोके यागु दु। बिहीवाः ९३ हजार सात सय रुपैयाँ खरिद बिक्री जुगु खः।

वंगु स्वन्हु निसे वहःया भाः धासा स्थिर जुया तोलाया १३५० रुपैयाँ जुयाच्वंगु दु।

वंगु बिहीवाः चान्ह्यः भेरी अस्पतालय् चिकित्सकपिन्त कुटपिट यागु घटनायात छानबिन यायेत बाँकेया सहायक प्रमुख जिल्ला अधिकारीया नेतृत्वय् समिति गठन यागु खः।

शुक्रवाः च्वंगु सरोकारवाला निकायया बैठकं सहायक प्रजिअ शंकर बहादुर विष्टया अध्यक्षताय् न्ह्यम्ह सदस्यीय समिति गठन यानागु दु धका प्रमुख जिल्ला अधिकारी शिवराम गेलालं जानकारी बिगु दु।

उगु समितिइ चिकित्सक संघ, नर्सिङ संघ, अस्पताल प्रशासन व जिल्ला सरकारी वकिलया कार्यालयया प्रतिनिधि तक तःगु दु।

समितिं थौनिसे हे ज्यायाना व स्वन्हुया दुने घटनाया सत्यतथ्य पत्ता लगे याना प्रतिवेदन बुझे यायेत सहायक प्रजिअ विष्टं जानकारी बिगु दु।

अथेहे समितिइ मेडिकल एसोसिएसनपाखे विनोद कर्ण, अस्पताल व्यवस्थापन समितिइ पाखे कृष्णप्रसाद श्रेष्ठ, नर्सिङ एसोसिएसनपाखे लक्ष्मी ओली नाप जिल्ला सरकारी वकिलया कार्यालयया प्रतिनिधि व अस्पतालया छम्ह चिकित्सक दु।