प्रतिनिधिसभा विघटन विरुद्धया रिट सुनुवाइया लागि प्रधानन्यायाधीश चोलेन्द्र शमसेर जबराया नेतृत्वय संवैधानिक इजलास गठन जुगु दु।

उगु संवैधानिक इजलासय् न्यायाधीशपि दीपककुमार कार्की, आनन्दमोहन भट्टराई, तेजबहादुर केसी व बमकुमार श्रेष्ठपि खः।

सर्वाेच्च अदालतया प्रवक्ता भद्रकाली पोखरेलया कथं शुक्रवाः निसे हे इजलासय् रिटबारे सुनुवाइ यायेगु तयारी दु।

सरकारया सिफारिसय् वंगु शुक्रवाः राष्ट्रपति विद्यादेवी भण्डारीं यागु संसद विघटन विरुद्धया दक्को मुद्दा संवैधानिक इजलासं स्वयेगु निर्णय बिहीवाः सर्वोच्च अदालतं यागु खः ।

येँ महानगरपालिकां थौनिसे समुदायस्तरय एन्टिजिन टेस्ट याइगु जुगु दु।

कोरोना भाइरस महामारी अप्वोया वंगुलि संक्रमणया अवस्था सिइकेगु निति महानगरपालिकां नगर दुने थीथी थासय् एन्टिजिन परीक्षण यायेत्यंगु खः।

११ जेठनिसे थीथी थासय् परीक्षण केन्द्रय् सार्वजनिक थासय् महानगरं थौनिसे बृहद् रुपं कोरोना परीक्षण यायेत्यंगु खः।

थुगु परिक्षण जेठ १८ गते तक एन्टिजिन परीक्षणं कोभिड बिरामीया प्रत्यक्ष सम्पर्कय् दुपि, फतलाइनय् च्वना ज्या याइपि, कोभिडया लक्षण खनेदुपि तर परीक्षण मयापिन्त उगु जाँच यायेत्यंगु खः।

थौंनिसे न्यान्हुतक थीथी थासय् एन्टिजिन परीक्षण सञ्चालन याइगु जुगु दु।

परिक्षण याइगु थाय् थुकंथ दु

बाँकेया भेरी अस्पतालय् बिहीवाः चान्ह्यः चिकित्सकयात आक्रमण यागु दु।

उपचारया झ्वलय् छम्ह संक्रमित सीगुलि वया थःथितिइ चिकित्सकयात आक्रमण यागु धका अस्पतालया मेडिकल सुपरिटेन्डेन्टं धागु दु। बिहीवाः चान्ह्यः ८ बजे सिप्याप भेन्टिलेटरय् दाङया ५४ दँ दुम्ह संक्रमित उपचारया झ्वलय् मदुगु खः।

वयागु अवस्था गम्भीर दुम्ह खः । स्वास्थ्यय् सुधार मवःगु खः। चिकित्सकपिन्स यक्को कुतः यागु खःसा लिपा मदुगु खः। उम्ह मनू मदेयवं वया थःथितिं अस्पतालय् तोडफोड यासे चिकित्सकयात आक्रमण यायेवं प्यम्ह चिकित्सकसपि झ्यालं तिन्हुया ज्यान बचे याये मागु खः ।

गुम्ह चिकित्सक व नर्सपि लितू लिया आक्रमण यागु खः। उपचारय् संलग्न डाक्टर, नर्सपि नाप खुम्ह स्वास्थ्यकर्मीपिन्त आक्रमण यागु खः। चिकित्सकपिन्त प्यम्हेसिया आक्रमण यागुलि निम्हेसित प्रहरीें नियन्त्रणय् काये धुकुगु दु। सुरक्षाया प्रत्याभूति जुइ मागु, आक्रमण यापिन्त कडा स्वया कडा कारबाही जुइ मागु माग चिकित्सकपिन्स यागु दु।

चिकित्सकयात आक्रमण जुइवं आः अस्पताल प्रशासन, नेपाल मेडिकल एसोसिएसन लगायतपि सहभागिताय् आकस्मिक बैठक च्वना च्वंगु दु।

बेलायत सरकारं नेपालयात ग्वाहालि यागु स्वास्थ्य सामग्री थौं येँ थ्यंगु दु।

उगु स्वास्थ्य सामग्री २६० भेन्टिलेटर, १९ हजार २ सय फेससिल्ड थौं सुथय् चार्टर्ड उडानपाखे येँ हःगु खः।

उगु सामग्री थौ सुथय् त्रिभुवन अन्तर्राष्ट्रिय विमानस्थलय् नेपालया लागि बेलायती राजदूतत निकोला पोलिटं स्वास्थ्यमन्त्री हृदेयश त्रिपाठीयात हस्तान्तरण यागु धका परराष्ट्र मन्त्रालयं जारी यागु प्रेस विज्ञप्तिइ उल्लेख यागु दु।

उगु उडानपाखे च्यारिटी संस्था नेपाल मेड युके न प्रदान यागु अक्सिजन कन्सन्ट्रेटर न हःगु दु धका विज्ञप्तिइ उल्लेख दु।

प्रतिनिधिसभा विघटन विरुद्धया रिटय् संवैधानिक इजलास सुनुवाइ यायेगु प्रक्रिया सुरु जुगु दु।

उगु रिट सुनुवाइया लागि थौं शुक्रवाः सर्वाेच्च अदालतय् संवैधानिक इजलास गठन जुइत्यंगु दु।

सर्वाेच्चया प्रवक्ता भद्रकाली पोखरेलया कथं संवैधानिक इजलास च्वनिइपि न्यायाधीश ल्यये धुका थौ हे इजलासया रिटय् सुनुवाइ यायेगु तयारी दु।

सरकारया सिफारिसय् वंगु शुक्रवाः राष्ट्रपति विद्यादेवी भण्डारीं यागु संसद विघटन विरुद्धया दक्को मुद्दा संवैधानिक इजलासं स्वयेगु निर्णय बिहीवाः सर्वोच्च अदालतं यागु दु।

संवैधानिक इजलासय् च्वनिइपि न्यायाधीशया छनोट प्रधानन्यायाधीश चोलेन्द्र शमशेर जबरां याइ।