Display Style:
Column Style
यास चक्रवातया प्रभाव कारण थौं वाः वइगु सम्भावना
लहानान्युज | कछलागा द्धितीया ११४१,जेष्ठ १४ शुक्रवाः
बंगालया खाडीइ विकसित यास चक्रवातया प्रभाव कारण थौं शुक्रवाः सुदूरपश्चिम बाहेकया प्रदेशय् यक्को थासय् नँन्याना वाः वइगु धका मौसम पूर्वानुमान महाशाखां धागु दु।
आः नेपालय् यास चक्रवात पश्चिमउत्तर–पश्चिम न्ह्यावनेगु झ्वलय् कमजोर जुया न्यून चापीय क्षेत्रया प्रभाव दु । उकि देयन्यन सामान्य निसे तसकं वाः वइगु अवस्था दु धका धागु दु । मौसमविद् कथं कन्ह्यनिसे शनिवाः बहनि तक सुधार जुइ धका धागु दु ।
महाशाखां जारी यागु नियमित बुलेटिनय् उल्लेख जुगु कथं शुक्रवाः न्हिनय् व चान्ह्यः प्रदेश १, प्रदेश २, बाग्मती, गण्डकी व लुम्बिनी प्रदेशया गन गन थासय् तसक वाः वइगु व उच्च वेगय् वाः फँय् वइगु सम्भावना दु।
अथेहे उच्च हिमाली न पहाडी भूभागया यक्को थासय् वाः वया हिमपात तक जुइगु सम्भावना दु ।
गन धासा तसक हिमपातया सम्भावना दु धका बुलेटिनय् उल्लेख यागु दु। शनिवाः प्रदेश १, गण्डकी व लुम्बिनी प्रदेशय् भारी वर्षा जुइफु धका पूर्वानुमान महाशाखां धागु दु।
आइसीयू व भेन्टिलेटर थपेयायेत ४१ गु अस्पतालयात थप १ अर्ब ४१ करोड बजेट
लहानान्युज | कछलागा पारु ११४१,जेष्ठ १३ बिहीवाः
अस्पतालया बजेट पहुँचवाला नेता व मन्त्रीया गृहजिल्लाय् जक केन्द्रित जुगु ओलोचना जुया वयाच्वगुलि सरकारं उपचारया विशेष उपकरणया लागि मेमेगु अस्पतालय् न बजेट छ्वंगु दु
कोभिड–१९ कारण गम्भीर बिरामी जूपिन्त व मस्तय्त उपचारया लागि पिडियाट्रिक आइसीयू व आइसीयु भेन्टिलेटरय् थप व्यवस्था यायेत अर्थ मन्त्रालयं ४१ गु अस्पतालयात १ अर्ब ४१ करोड रुपैयाँ बजेट सुनिश्चित यागु दु।
उकिइ पिडियाट्रिक आइसीयूपाखे ताप्लेजुङ अस्पताल, संखुवासभा अस्पताल, तेह्रथुम अस्पताल, भोजपुर अस्पताल, खोटाङ अस्पताल, सोलुखुम्बु अस्पताल, ओखलढुङ्गा अस्पताल, रंगेली अस्पताल, सुनसरी अस्पताल, सर्लाही अस्पतालयात स्वंगु, स्वंगु करोड रुपैयाँ छुटे यागु दु । बारा अस्पताल, रामेछाप अस्पताल, दोलखा अस्पताल, रत्ननगर अस्पताल, भक्तपुर नगर अस्पताल, रसुवा अस्पताल, पर्वत अस्पताल, स्याङ्जा अस्पताल, म्यादी अस्पतालयात न स्वंगु, स्वंगु करोड रुपैयाँ खः।
पाल्पा अस्पताल, रोल्पा अस्पताल, पृथ्वीचन्द्र अस्पताल, मुसीकोट अस्पताल, मुगु अस्पताल व मेहलकुना अस्पतालयात न स्वंगु, स्वंगु करोड रुपैयाँ सहमति बिगु दु। सेती प्रादेशिक अस्पतालयात ६ करोड, गजेन्द्रनारायण अस्पतालयात ९ करोड, तुल्सीपुर अस्पतालयात ९ करोड व भक्तपुर अस्पतालयात १२ करोड रुपैयाँ सुनिश्चित यागु दु धका मन्त्रालयं धागु दु।
आईसीयू भेन्टिलेटरपाखे धुलिखेल अस्पताल, पोखरा स्वास्थ्य विज्ञान प्रतिष्ठानयात, बिपी कोइराला स्वास्थ्य विज्ञान प्रतिष्ठान व लुम्बनी प्रादेशिक अस्पताल नाप भीम अस्पतालयात १ करोड ८० लाख रुपैयाँया दरं सहमति बिगु दु । गजेन्द्रनारायण अस्पताल, भेरी अस्पतालयात, डडेलधुरा अस्पताल, नारायणी अस्पताल, कोशी अस्पताल, राप्ति स्वास्थ्य विज्ञान प्रतिष्ठान, कर्णाली स्वास्थ्य विज्ञान प्रतिष्ठान, जनकपुर प्रादेशिक अस्पताल व सुर्खत प्रदेश अस्पतालयात १ करोड २० लाख रुपैयाँ दरं स्रोत सुनिश्चित यागु दु।
कान्ति बाल अस्पताल, पाटन स्वास्थ्य विज्ञान प्रतिष्ठान व त्रिवि शिक्षण अस्पतालयात स्वंगु, स्वंगु करोड रुपैयाँ सुनिश्चित यागु दु। अर्थ मन्त्रालयं मेची अस्पताल व धौलागिरी अस्पतालयात ६० लाख रुपैयाँया दरं व सेती प्रादेशिक अस्पताल नाप महाकाली अस्पताल व भरतपुर अस्पतालयात २ करोड ४० लाख दरं स्रोत सुनिश्चित यागु दु ।
स्वास्थ्य तथा जनसंख्या मन्त्रालयं माग यागु कथं अर्थ मन्त्रालयं कोभिड–१९ या रोकथाम, उपचार नाप नियन्त्रणया लागि बजेट सुनिश्चित याना वयाच्वंगु दु ।
स्वनिगः दुने थप २३६७म्हेसित कोरोना सक्रमित पुष्टि
लहानान्युज | कछलागा पारु ११४१,जेष्ठ १३ बिहीवाः
स्वनिगः दुने वंगु २४ घण्टाया दुने थप २ हजार ३६७ म्हेसित कोरोना संक्रमण पुष्टि जुगु दु।
स्वास्थ्य मन्त्रालयया कथं येँ १,७३८ म्हेसित कोरोना सक्रमण पुष्टि जुगु खः । अथेहे, यलय् ३६४ व ख्वपय् २६५ म्हेसित कोरोना सक्रमण जुगु दु।
अथेहे येँ १६ हजार ३६१ संक्रिय संक्रमितपि दु। थ्व नाप आःतक सक्रिय संक्रमितपि १ लाख ८३ हजार ८७१ म्ह थ्यंगु दु ।
अथेहे ख्वपय् ४ हजार ७८९ संक्रिय संक्रमित दु। अथेहे आःतक ख्वपय् सक्रिय संक्रमितपि १९ हजार ३५७ म्ह थ्यंगु दु।
अथेहे यलय् ६ हजार ८५५ म्ह सक्रिय संक्रमितपि दु। थ्व नाप आःतक यलय् सक्रिय संक्रमितपि ३२ हजार २९० म्ह थ्यंगु दु ।
ह्वाइटहाउसय् न्हापांखुसी हन बुद्ध जयन्ती
राम डंगोल | कछलागा पारु ११४१,जेष्ठ १३ बिहीवाः
अमेरिकाया इतिहासय् न्हापांखुसी राष्ट्रपति ज्याकू ह्वाइट हाउसे बुद्ध जयन्ती हंगु दु ।
२५६५ क्वःगु बुद्ध जयन्ती अर्थात् वैशाख डे कथं ह्वाइट हाउसय् हंगु खः । अमेरिकी उपराष्ट्रपति कमला हेरिसया भाःत एवं सेकेण्ड जेन्टलम्यान डगलस एम्हफ, थेरवाद, महायान व वज्रयान बौद्ध भिक्षु व गुरुपिन्सं दीप प्रज्वलन याना बुद्ध जयन्ती हंगु खः ।
इन्टरनेशनल बुद्धिष्ट एसोसिएसन अफ अमेरिकाया नायः वागमो डिक्सें संयोजन यानादिगु उगु ज्याझ्वलय् थेरवादया पाखें भिक्षु उपराटन महास्थवीर, महायानया पाखें भिक्षु मारविन हराड व वज्रयानपाखें टारथगं टुल्कु रिम्पोछें बुद्ध पूजा व प्रार्थना यानादिगु खः ।
नायः डिक्सें अमेरिकी लोकतन्त्रय् स्वंगू हे बौद्ध परम्पराय् ह्वाइट हाउसय् बुद्ध जयन्ती हंगु अमेरिकी इतिहास हे न्हापांखुसी जूगु धयादिल । थ्वः ऐतिहासिक क्षणयात लुमंकुसें १०गू लखः दीप प्रज्वलन नं याःगु दु ।
थ्वहे दथुई अमेरिकी राष्ट्रपति जो वाईडेनं बुद्ध जयन्तीया लसताय् भिन्तुना देछासें अमेरिकाय् बौद्धपिन्सं याःगु योगदान च्वछाय्बःगु धयादिल । देय्यात समृद्ध यायेत बौद्ध शिक्षा माःगु नं वय्कलं धयादिल ।
६,९३९ संक्रमित, ७२२६ म्ह संक्रमणमुक्त, १०६म्ह मन्त
लहानान्युज | कछलागा पारु ११४१,जेष्ठ १३ बिहीवाः
वंगु २४ घण्टाया दुने कोरोना भाइरस संक्रमणमुक्त जूपि ७,२२६ म्ह थ्यंगु दु।
स्वास्थ्य तथा जनसंख्या मन्त्रालयया कथं ६,९३९ म्ह न्हुपि संक्रमित जुगु दुसा ७,२२६ म्ह संक्रमणमुक्त जूगु दु।
२० हजार ४१४ पीसीआर परीक्षणय् ६७३१ म्ह व ५७८ एन्टिजेन परीक्षणय् २०८ म्ह लिपागु २४ घण्टाय् ६,९३९ न्हुपि संक्रमित पुष्टि जुगु खः।
अथेहे नेपालय् कोरोना भाइरस संक्रमितपि ५ लाख ४२ हजार २५६ म्ह थ्यंगु दु। उकि मध्ये १ लाख १६ हजार ४७६ म्ह सक्रिय संक्रमित दु।
अथेहे लिपागु २४ घण्टाय् कोरोना भाइरस संक्रमणया कारण १०६ म्ह सीगु दु धका मन्त्रालयं धागु दु।
थ्व नाप आःतक नेपालय् कोरोना भाइरस संक्रमणं सीपि ६,९५१ म्ह थ्यंगु दु।
