कोरोना भाइरस (कोभिड १९) विरुद्ध खोप अभियानया न्हापागु दिं थौं बुधवाः देयन्यक ९ हजार ८४ म्हेसिया खोप काःगु दु।

६४ जिल्लाया ९३ खोप केन्द्रपाखे ९०८४ म्ह स्वास्थ्यकर्मी व फ्रन्टलाइन कर्मचारीपिन्स कोरोना खोप काःगु दु धका स्वास्थ्य तथा जनसंख्या मन्त्रालयं धाःगु दु । स्वास्थ्य मन्त्रालयया कथं प्रदेश १ य् १ हजार २५५म्ह, प्रदेश २ य् ७२६म्ह, बागमतीइ २ हजार ६९४म्ह, गण्डकीइ १ हजार ८४३म्ह, लुम्बिनइ ७३३म्ह, कर्णालीइ ७५१म्ह व सुदूरपश्चिमय् १ हजार ८२ म्हेसिया खोप काःगु दु।

खोप काःपिपाखे आःतक छु न समस्या खनेमदुगु धका स्वास्थ्य मन्त्रालयं धाःगु दु। प्रधानमन्त्री केपी शर्मा ओलीं थौें बुधवाः सुथय् भर्चुअल विधिपाखे खोप अभियानया उलेज्या यानादीगु खः। भारतया अनुदानपाखे नेपालयातल १० लाख डोज कोरोना खोप उपलब्ध याःगु खः।

माधवनारायण मेला यायेगु वा मयायेगु धइगु अन्योलया दथुइ सक्वया नारि खुसि थुगुसीया स्वस्थानी व्रत कन्हयसिने न्ह्यायेत्यंगु दु । श्री माधवनारायण स्वस्थानी व्रत  शालि नदी सुधार समितिं सक्वय् पत्रकार सम्मेलन यासें वइगु माघ १५ निसें लच्छि यंकया श्री माधवनारायण स्वस्थानी व्रत न्ह्याइगु जानकारी ब्यूगु दु ।

थुगुसी कोभिड महामारीया हुनिं भक्तजन तय्त धाःसा दर्शनया लागिं नारि खुसिइ फत्तले व ज्यु तल्ले मवयेत नं समितिं इनाप याःगु दु । पत्रकार सम्मेलनय् नवासें शंखरापुर नगरपालिकाया प्रमुख सुवर्ण श्रेष्ठं व्रतालुया स्वास्थ्य सुरक्षायात ध्यानय् तयाः दर्शनयालागिं सक्वय् मवय्त इनाप यानादिल । अवस्थाया ल्याखं मेला न्ह्याके मज्यूगु तर सरकारं दक्व खुल्ला याना बीधुंकुगु अवस्थाय् मेलादिके नं मछ्युंगु अवस्था दुगु मेयर श्रेष्ठं धयादिगु खः। ‘आःया अवस्थाय् पशुपतिनाथ लिसेंया दक्वं देगः अले स्कूल, सिनेमा हल दक्व हे न्ह्याय् धुंकूगु अवस्थाय् जिमिसं माधवनारायण मेला जक याय् मखु नं धाय्मछिं,’ मेयर श्रेष्ठया धापू खः ।

‘स्वास्थ्य सुरक्षायात नं ध्यानय् तयाः परम्परा नं ल्यंकेमाःगु दु, ज्युत्तल्ले मेलायानितिं सक्वय् झाय्मते, जिमिसं थुलि जक धाय्फु ।’ दर्शनया लागिं सक्वय् छुं भक्तजनत सक्व थ्यनेफुगु सम्भावनायात ध्यानय् तयाः सिन्हः व प्रसाद स्वयम् सेवकपाखें वितरण याय्गु यानाःतापाकं हे दर्शनया व्यवस्था ताःलाकेगु समितिया नायः मिजेन्द्रकाजी श्रेष्ठं धयादिल। अथे हे, पिनं वइपिनिगु नितिं मास्क अनिवार्य याय्गुलिसें स्यानिटाइजर, ल्हाःसिलेगु थाय्या व्यवस्था नं याय्गु नायः श्रेष्ठं जानकारी याकादिल । ‘जिमिस ंव्रतालुया स्वास्थ्यया उसाँय् यात अप्वः च्यूताः तयागु दु, व्रतालुपिन्त फत्तले पिनेया सम्पर्कं तापाकेगु जुइ’ नायः श्रेष्ठया धापू खः ।

कोभिड संक्रमणया जोखिम दथुइ न्ह्याय् त्यंगु स्वस्थानी व्रतया व्रतालुया स्वास्थ्य सुरक्षायात ध्यानय् तयाः समितिं थुगुसी थीथी नियम व मापदण्ड क्वःछ्यूगु दु । थुगुसी व्रतय् च्वनेत माघ १० गतेनिसें १२ गतेतक्कया स्वन्हु जकया मिति क्वःछ्यूगु दु । सिमित संख्याय् जक व्रतालु दुथ्याकेगु खँय् नं स्थानीययात प्राथमिकताय् तय्गु धाःगु दु । अथे हे, नां दर्ता याकूपिन्सं माघ १३ गते समितिं क्वःछ्यूगु थासय् पिसिआर वा एन्टिजेन परिक्षण याकेमाः । निमोनियाया लक्षण मदुगु प्रमाणित याइगु एक्सरे रिपोर्ट अनिवार्य याःगु दु । अथे हे, व्रतालुयात दर्शनार्थीतपाखें तापाकेत स्कर्टिङया व्यवस्था याय्गु नं समितिं धाःगु दु 

व्रतालुया च्वनेगु नितिं बाय्या व्यवस्थानं समितिं हे याइसा व्रतालुयात ग्वाहालि याय्त परिवार तक नं वय् मदइगु यानाः माःगु दक्वं ग्वाहालि व व्यवस्था समितिं हे याय्गु समितिया नायः श्रेष्ठं धयादिल। माःकथं समितिं हे परिवारलिसे सम्पर्क यानाःमाःगु समन्वय याय्गु नं समितिं न्ह्यथंगु दु । कोभिड संक्रमण सम्वन्धि सचेतना मूलक सुचं लिसेंया होर्डिङ बोर्डत थाय् थासय् तय्गु योजना समितिया दु । स्वस्थानी व्रतया बाखनय् उल्लेख यानातःगु नवराज ब्राम्हणया राज्य लावण्य देय्या रुपं सक्वयात नाला वःगु दु । लिसें चन्द्रावति कुतुं वनाः धीचिना च्वनीगु खुसि कथं सक्वया हे नारि खुसि अर्थात शालिनदि यात कयातःगु दु । परापूर्व कालय् पार्वतीं थ्व हे स्वस्थानी व्रतच्वनाः महाःद्यः वर चूलाकूगु धार्मिक विश्वास समाजय् दयाच्वंगु दु ।

कोरोनाविरुद्धया खोप अभियान थौंनिसे सुरु जुइत्यःगु दु। स्वनिगः दुने १७ गु नाप देयन्यक १२० केन्द्रपाखे खोप बिइगु धका स्वास्थ्य तथा जनसंख्या मन्त्रालयं धाःगु दु।

प्रधानमन्त्री केपी शर्मा ओलीं थौं सुथय् १० बजे खोपया भर्चुअल उलेज्या यानादिइ । न्हापागु चरणय् फोहरमैला व्यवस्थापनय् खटे जुया फोहर सङ्कलक व चालक, एम्बुलेन्स नाप शववाहन चालक व सहचालक, प्रत्यक्ष उपचारय् सेवा बिइपि वा खोप व्यवस्थापनय् खटे जुइपि स्वास्थ्यकर्मी, खोप केन्द्रय् खटे जुइपि सुरक्षाकर्मी नाप स्वयंसेवक, शव व्यवस्थापनय् खटे जुइपि मनूत, स्वास्थ्य स्वयंसेविका, अन्तर्राष्ट्रिय प्रवेशविन्दुय् ज्यायाइपि स्वास्थ्यकर्मी व मेमेपि कर्मचारी, वृद्धाश्रमया मनूत व हेरचाहय् खटे जुइपि कर्मचारी नापं कारागारया कैदी व सुरक्षाकर्मीपिन्त खोप बिइत्यःगु खः।

न्हापागु खोप शुक्रराज ट्रपिकल तथा सरुवा रोग अस्पताल टेकु अस्पतालया निर्देशक डाक्टर सागर राजभण्डारीं लगे याइ । भारत सरकारया अनुदान नं माघ ८ गते १० लाख मात्रा खोप नेपाल हःगु खः । स्वास्थ्य तथा जनसङ्ख्या मन्त्रालय नं न्हापागु चरणया खोप अभियान सुरु याःगु झीन्हुया दुने अभियान सम्पन्न जुइ। न्हापागु चरणय् चार लाख ३० हजारपिन्त खोप बिइगु धका मन्त्रालयं धाःगु दु ।