प्रतिनिधिसभाया सभामुख अग्निप्रसाद सापकोटां संसद विघटन धुकाया अवस्था लिपायागु बारेय् छलफल यायेत पूर्व सभामुखपि नाप परामर्श यागु दु।

मंगलवाः न्हिनय् १ बजे संसद भवन नयाँबानेश्वरय् उगु बैठक पूर्वसभामुखपि नाप लिपागु  राजनीतिक घटनाक्रमबारे सहलह जुइ धुकुगु दु धका सभामुखया प्रेस सल्लाहकार श्रीधर न्यौपाने न जानकारी बिगु दु ।

वंगु शुक्रवाः च्यान्ह्यः राष्ट्रपति विद्यादेवी भण्डारीं सरकारं सिफारिशय् प्रतिनिधिसभा भंग याना मध्यावधि चुनावया तिथि घोषणा जुगुलि सभामुख सापकोटां शीर्ष नेता नाप संविधानविदपि नाप परामर्श याना थुगु कदमया विरोध यागु खः ।

कोभिड–१९ संकट व्यवस्थापन केन्द्र (सीसीएमसी)या प्रमुखय् नेपाली सेनाया पूर्वरथी बालानन्द शर्मा नियुक्त यागु दु।

म्हिगः बहनि च्वंगु मन्त्रिपरिषद बैठकं शर्मायात सीसीएमसीया प्रमुखय् नियुक्त यागु खः। पूर्वरथी शर्मां नेपाली सेना व माओवादी सेनाया समायोजन यायेगु विशेष समितिया संयोजक जुया न ज्याये धुकुम्ह खः।

आः वयकः न कोरोना संक्रमण नियन्त्रणया योजना दयका व सरकारपाखे अनुमोदन जुगु योजनायात कार्यान्वयन यायेगु जिम्मेवारी ज्या यानादिइ । थ्व स्वया न्ह्यः निर्देशक समितिया प्रमुखय् उपप्रधानमन्त्री ईश्वर पोखरेल खः ।

छु न्ह्यः जक पोखरेलयात उगु जिम्मेवारीपाखे अलग तया प्रधानमन्त्री केपी शर्मा ओलीं थम्हेसिया हे निर्देशक समितिया नेतृत्व यानादीगु खः।

उगु निर्देशक समितिइ उपप्रधानमन्त्री तथा रक्षामन्त्री, गृह, सामान्य प्रशासन तथा संघीय मामिला, उद्योग वाणिज्य तथा आपूर्ति, स्वास्थ्य तथा जनसंख्या, अर्थ, कृषि, परराष्ट्र, ऊर्जा व पर्यटन मन्त्री सदस्य कथं दु।

थौं मंगलवाः स्वनिगःया जिल्ला प्रमुख जिल्ला अधिकारीपिनिगु बैठक च्वनेत्यंगु दु ।

पूर्वनिर्धारित निषेधाज्ञाया निन्हु न्ह्यः हे निषेधाज्ञा थप यायेगु विषय सहलह यायेगु नितिं उगु बैठक च्वनिइगु तयारी दु धका काठमाडौया प्रमुख जिल्ला अधिकारी कालीप्रसाद पराजुलीं धागु दु ।

आः थप याइगु निषेधाज्ञाय् सरकारं जारी यागुु कोभिड १९ संकट व्यवस्थापन अध्यादेशय् यागु व्यवस्थायात प्रभावकारी रुपं कार्यान्वयन यायेगु विषयय् थौंया बैठक निर्णय जुइफु धका धागु दु । न्हुगु अध्यादेशय्  उल्लेख दुगु व्यवस्थायात प्रभावकारी कार्यान्वयन यायेगु निति छवाः महामारीया चेनब्रेक जुइफु धका धागु दु।

न्हुगु अध्यादेशं निषेधाज्ञा पालना मयातकि नगद जरिवाना व कैद तकया व्यवस्था यागु दु । न्हुगु अध्यादेशया उल्लंघन याइपिन्त खुला तक कैद व स्वंगु लाख तक जरिवानाया व्यवस्था दु। अथेहे उगु अध्यादेश कथं मास्क मतस्ये सार्वजनिक थासय् जुइपिन्त सच्छि जरिवाना, अनुमति विना सवारी चले याइपि निगु पांगे्रया हक छकःया लागिु निसः व प्यंगु पांग्रया हक न्यासः जरिवाना यायेगु व्यवस्था उल्लेख दु धका जानकारी बिगु दु।

थ्व स्वया न्ह्यः पास मकासे सञ्चालन यागु सवारीयात होल्डिङ सेन्टरय् तया कारबाही यागु खः। 

स्वनिगः दुने लिपागु २४ घण्टाय् कोरोना सक्रमितपि म्हो जुगु दु ।

थौं स्वनिगः दुने २ हजार ७८५ म्हेसित कोरोना संक्रमित पुष्टि जुगु दु ।

थौं येँ जक १ हजार ८०६ म्हेसित कोरोना सक्रमण जुगु दु ।

अथेहे यलय् ६८१ म्हेसित व ख्वपय् २९८ म्हेसित संक्रमण जुगु दु ।