थौं आमहड्ताल सफल यायेगु लागि क्वहा वःपि नेकपा प्रचण्ड–माधव समुहया नेता पूर्व मन्त्री कार्यकर्ता व प्रहरी दथुइ जनकपुरय् ल्वापू जुगु दु ।

उगु ल्वापूइ प्रहरीया कथिइं पूर्व मन्त्री नाप नेकपाया केन्द्रीय समिति सदस्य रामचन्द्र झाया छ्यं तज्याःगु दु। बन्द यायेत गाडीइ तोडफोड यायेवं प्रहरीं बल छ्यःगु खः ।

छ्यं तज्याना हिं वयेवं झायात कार्यकर्तापिन्स अन यकूगु खः। बन्द चायेकेगु झ्वलय् प्रहरी व आन्दोलनकारीपि दथुइ ल्वापू जुइवं नेकपाया स्थायी समिति सदस्य मातृका यादव व केन्द्रीय सदस्य रामचन्द्र झा नाप दर्जन स्वया अप्वो कार्यकर्तापि घाइते जूगु दु ।

यादवयात टुटिइ घाः लागु दु सा प्रहरीया कठ्ठीं झायात छ्यनय् घाः लाःगु दु ।

किपा मिर्मिसेपाखे

आमहड्तालय् क्वहावःपि नेकपा दाहाल–नेपाल समूह मोरङ संघर्ष समिति सह–संयोजक पारुल क्षेत्रीनाप खुम्हेसित प्रहरीं नियन्त्रणय् काःगु दु।

सरकारी गाडी तोडफोड व बन्द याकवःपि क्षेत्री नाप संगम चौधरी, शारदा मैनाली, मिरा दाहाल पोखरेल लगायतपिन्त विराटनगर तीनपैनी चोकय् प्रहरीं ज्वःगु खः ।

बा १ झ ९११८ नम्बरया सरकारी गाडीइ अप्पा कय्का तोडफोड याःगु आरोपय् उमित ज्वनागु खः धका मोरङ प्रहरीया डीएसपी धाःगु दु।

नेपाल कम्युनिस्ट पार्टी (नेकपा) प्रचण्ड–नेपाल समूहया ग्वसालय् थौं बन्दया झ्वलय् सञ्चालन याःगु धासे बन्दकर्तापिन्स प्यगः ट्रक तोडफोड यानाबिःगु दु ।

जिल्ला प्रहरी कार्यालयया कथं येँपाखे नारायणगढपाखे वना च्वंगु निगः व वीरगञ्जं पोखरा वनाच्वंगु छगः ट्रक तोडफोड यानाबिःगु दु।

बन्दकर्तापिन्स ना३ख ३९३, ना१क १४३५ व ना८ख ४४८० नम्बरया ट्रक तोडफोड याःगु धका प्रहरीं धाःगु दु । मोटरसाइकलय् वःपि बन्दकर्तापिन्स भरतपुर महानगरपालिका–१ भतेरीइ ट्रक तोडफोड यानाबिःगु खः।

अथेहे, टाँडीपाखे नारायणगढ वयाच्वंगु ना४ख ८८५५ नम्बरया मालबाहक ट्रकयात भरतपुर महानगरपालिका–१२ मिलनचोकय् तोडफोड याःगु धका प्रहरीं धाःगु दु ।

लुँया भाः थौं तोलां गुसः क्वहावःगु दु ।

म्हिगः तोलाया ९२ हजार रुपैयाय् कारोबार जुगु लुँ थौं गुसः क्वहा वया तोलाया ९१ हजार एक सय रुपैयाँ तोके याःगु दु धका नेपाल सुन चाँदी व्यवसायी महासंघं धाःगु दु।

महासंघं थौ.ंया लागि तेजावी लुँ तोलाया ९० हजार ६ सय रुपैयाँ कायम याःगु दु धका धाःगु दु ।

अथेहे वहः न थौं नीतका क्वहावःगु दु। थौं वहाः तोला नीतका क्वहावया १३०० सय रुपैयाँ कायम जूगु दु धका महासंघं धाःगु दु ।