Display Style:
Column Style
सुथय् ९ डिग्री सेल्सियस मापन जुगु दु
शोभा श्रेष्ठ | थिंंलागा सप्तमी ११४१, मंगलवाः २१ गते
थौं येँ न्यूनतम तापक्रम ९ डिग्री सेल्सियस मापन जुगु दु ।अथेहे अधिकतम तापक्रम १७ निसे १९ डिग्री सेल्सियस तक जुइगु अनुमान दु ।
थौं देयँयकं मौसम बद्ली जुइ। हिमाली व उच्च पहाडी जिल्लाय् थौं न हिमपात व मेमेगु थासय् वाः वइ धका मौसमविदं धाःगु दु। सुदूरपश्चिम, कर्णाली, लुम्बिनी व गण्डकी प्रदेशया छु थासय् वाः वइगु सम्भावना दु धका रहेको मौसमविदं जानकारी बियादीगु दु । वयकःया कथं वाग्मती प्रदेशया छगु निगु थासय् हल्का वाः वइगु अनुमान दु धका धयादीगु दु।
पश्चिमी वायु प्रभावया कारण वःगु आइतवाः निसे देयन्यक मौसमय् ह्युपाः वःगु दु। थ्व प्रणालीया प्रभावं कन्ह्यनिसे कम जुया वनिइ धका धाःगु दु । कन्ह्यनिसे वाग्मती, गण्डकी, लुम्बिनी, प्रदेश निगुलय् व प्रदेश १ य् निभाः त्वइ धका धाःगु दु।
छायाँ कम्प्लेक्सपाखे अभियन्ता भागवत प्रधानयात ज्यानया धमकी
लहनान्युज | थिंंलागा सप्तमी ११४१, मंगलवाः २१ गते
छायाँ कम्प्लेक्सपाखे अभियन्ता भागवत प्रधानयात ज्यानया धमकीयेँया थँबहिस्थित पलेस्वां पुखू थौंकन्हय् मदय्धुंकल । विक्रमशी महाविहार भगवानबहाःया श्री गरुड भगवानया नित्य पूजा याय्त नीलः काय्माःगु अले द्यःयात छाय्त पलेस्वां थ्वय्माःगु पलेस्वां पुखूया थासय् आः छायाँ कम्प्लेक्स नांया विशाल भवन जुइधुंकल ।
आःया छायाँ कम्प्लेक्स ध्वाखाया पिनेया थासय् होलिपुन्हिया कन्हय्कुन्हु चकंद्यःया जात्रा याइबलय् आः नं अन द्यः तय्माःगु परम्परा कायम दनि । तर थुगु थाय् अथवा धाय् जग्गा नं व्यक्तिया नामय् कायम जुइधुंकल । यद्यपि उगु जग्गा सुया नामय् कायम जूगु दु, उम्ह मनुखं जग्गा लित बी धकाः पत्र हे च्वयाबियातःगु दु । तर आःतक्क लितब्यूगु मदुनि । थज्याःगु विषयवस्तु अझं यक्व दनि, न्ह्यसःत यक्व दनि । न्ह्यसःया लिसः स्यूपिं खंपिं झीगु दथुइ हे दनि । तर नं अन विवादया दथुइ, मुद्दाया दथुइ विशाल भवन दनेधुंकल, पुखू न्हनेधुंकल ।अन पलेस्वां पुखूया नामय् लः छफुति तकं मदय्धुंकल । दुसा मात्र विशाल क्रंक्रिटया भवन ।
थुगु थासय् ऐतिहासिक व धार्मिक महत्वया पलेस्वां पुखू हे कायम याय्माःगु माग यासें अभियन्तातय्सं विरोधया सः नं थ्वय्काच्वंगु दुसा छपुचः मनूतय्सं थुकिं अर्थतन्त्र बल्लाकीगु, स्थानीययात लजगाः बीगु आदि धयाः प्रलोभन बीगु कुतः नं यानाच्वंगु दु । सम्पदा अभियन्ता भागवत नरसिंह प्रधान थुगु विषय ज्वनाः सर्वोच्च अदालत हे थ्यंगु दु । आः थ्व मुद्दा अदालतय् विचाराधीन अवस्थाय् दनि । न्हापा जिल्ला अदालत व पुनरावेदनय् जूगु मुद्दाय् अदालतं छायाया पक्षय् फैसला यानाब्यूगु खःसा आः सर्वोच्च अदालतं जिल्ला व पुनरावेदनया फैसलाय् त्रुटी खनेदुगु धासें मुद्दायात न्ह्यःने यंकूगु दु ।
२०७३ चैत्र १० गते न्यायधिसपिं जगदिश शर्मा पौडेल व केदारप्रसाद चालिसेया संयुक्त इजलासं उगु जग्गा श्री सिंहसार्थवाहु गरुड भगवान गुथिया जूगु खँय् विवाद खनेमदु व ‘मुद्दा दोहो¥याई हेर्ने निस्सा प्रदान गरिएको छ’ धासें मुद्दायात न्ह्याकूगु खः ।छायाँ कम्प्लेक्सया खँय् लिपांगु प्रकरणया खँ ल्हाय्बलय् लिपांगु इलय् छायाँ कम्प्लेक्सया मजदुरतय्सं समपदा अभियन्ता भागवत नरसिं प्रधानयात ज्यानया हे धमकी ब्यूगु खँ वःगु दु । मजदुर विरोधी ज्याखँ स्वन्हु दुने दिकेत धकाः धासें नेपाल स्वतन्त्र होटल, क्यासिनो तथा रेस्टुरेन्ट मजदुर युनियन, केन्द्रीय कमिटीया अध्यक्ष सुर्य बहादुर कुवँर व युनिट्राभ केन्द्रीय कमिटीया अध्यक्ष सुमन पराजुलीया नामं प्रधानयात पौ हे बियाहःगु दु । थुकिया लिसें छम्ह मनुखं थःत फोन हे यानाः ज्यानया धमकी ब्यूगु प्रधानं कनादीगु दु ।
थ्व हे सन्दर्भय् थःत मानसिक तनाव ब्यूगु व शान्तिपुर्वक म्वाय्दइगु अधिकार हनन् जूगु धासें प्रधानं राष्ट्रिय मानवअधिकार आयोगय् उजुरी ब्यूगु दु । लिसें वय्कलं शान्ति सुरक्षाया माग यासें जिल्ला प्रशासन ज्याकुथिइ नं निवेदन बियादीधुंकल ।थ्वयां न्ह्यः नं न्हियान्हिथं छायाँ कम्प्लेक्स परिसरय् विरोध प्रदर्शन याय्गु यानाच्वंगु, रिपोर्टर्स क्लबय् अले व धुंकाः छायाँ कम्प्लेक्स पिने हे पत्रकार सम्मलेन यानाः अदालयत् विचाराधीन मुद्दाय् टिप्पणी यासें अदालतया हे अपहेलाना याःगु द्वपं बियाः छायाँ पक्षं अभियन्ता प्रधानया विरुद्ध रिट दायर याःगु खः । थत डरत्रास क्यनाः, दवाव बियाः मुद्दां लिचीकेबीत स्वःगु धासें अभियन्ता प्रधानं थः गुगु नं हालतय् लिमचिलेगु व अदालतपाखें न्याय चूलाइगु खँय् विश्वस्त दुगु धयादिल । थुगु मुद्दाया खँ ल्हाय्बलय्, विगतया खँत दुवाला वनेबलय् यक्व हे खँत पिहांवइ तिनि ।
पुखुलिइ मोही अथवा म्हय्या हक कायम यानाः व्यक्तिया नामय् गुकथं नामसारी जुल धइगु न्ह्यसः नं दनि । पुखुलिइ म्हय्या हक कायम जुइमखूगु कानून हे दु । जोते याय्गु बुँ खःसा जक म्हय्या हक कायम जुइ । आः पुखुलिइ नं जोते याय्ज्यूगु ला ? छायाँ पक्षं पुखू नां बियातःगु जग्गा धकाः धयावःगु दु । थुकिं अन पुखू दु धइगु खँ ला स्वीकार याःगु हे खत । उकिया नापं राणातय् नौका विहार याय्त दय्कातःगु नीजि पुखू धकाः नं धयाच्वंगु दु । थुकिं नं अन पुखू दुगु खँ छायाँ पक्षं नकारे याय्मफूगु सीदत । सलंसः दँ न्ह्यःनिसें भगवान बहाललिसे थुगु पुखूया परम्परा, संस्कृति स्वानाच्वंगु दु ।
आः थ्व पुखू राणातय्सं दय्कूगु खः ला कि वयां न्ह्यः हे दुगु खः धइगु प्रष्ट याः । पुरातत्व विभागय् थुगु पुखू व जग्गाया बारे च्वयातःगु १९६६ सालया भ्वं आःतकं सुरक्षित हे दनि । तर पुरातत्व विभागया तत्कालीन महानिर्देशक भेषनारायण दाहालं सर्वोच्च अदालतय् उगु पुखू व्यक्तिं भोगलचन यानाच्वंगु खः व पुरातत्व विभागया सरोकारया विषय मखु धकाः नवानाब्यूगुलिं दाहालया नियतय् नं न्ह्यसः दंगु दु ।आः सकसिगु आशा, विश्वास सर्वोच्च अदालतय् हे दिनाच्वंगु दु ।
५९४ म्ह कोरोनामुक्त
शोभा श्रेष्ठ | थिंंलागा षष्ठी ११४१, सोमवाः २० गते
वःगु २४ घण्टाय् ५९४ म्ह कोरोनामुक्तपि डिस्चार्ज जुगु दु। थ्व नाप कोरोनामुक्त जुपि २ लाख ५५ हजार ८८ म्ह थ्यःगु दु । २४ घण्टाय् कोरोना न्ह्यम्ह सीगु दु।
थ्व नाप आःतक कोरोनां सीपि १८८५ म्ह थ्यःगु दु। अथेहे स्वनिगः दुने १८५ म्हेसित कोरोना संक्रमित थपे जुगु दु।
वःगु २४ घण्टाय् संक्रमित जूपि ८२ म्ह मिसा व १०३ म्ह मिजंपि खः। सक्रमित जूपि येँ १४०म्ह, यलय् २१ म्ह व ख्वपय् २४ म्ह खः।
देयन्यक ४०३म्ह कोरोना सक्रमित
शोभा श्रेष्ठ | थिंंलागा षष्ठी ११४१, सोमवाः २० गते
वःगु २४ घण्टाया दुने देयन्यकं ४०३ म्ह कोरोना संक्रमण पुष्टि जुगु दु धका स्वास्थ्य तथा जनसंख्या मन्त्रालयं धाःगु दु।
संक्रमित जुपि मिसापि १५९ म्ह व मिजंपि २४४ म्ह खः। २४ घण्टाय् ४४०१म्हेसिगु पीसीआर परीक्षण याःगु खः। थ्व नाप आःतक १९ लाख ५२ हजार ९०३ म्हेसिगु पीसीआर परीक्षण याये धुकुगु दु।
थ्व नाप आःतक देयन्यक संक्रमित जूपि २ लाख ६२ हजार २६२ म्ह थ्यःगु दु। सक्रिय संक्रमितपि ५ हजार २८९ म्ह दु ।आःतक क्वारेन्टाइनय् च्वना च्वपि ३४२ म्ह दु।
कर्मचारी भर्ना मयायेत यल महानगरपालिकाया नामय् अदालतया आदेश
लहनान्युज | थिंंलागा षष्ठी ११४१, सोमवाः २० गते
उच्च अदालत पाटनं करारय् प्राविधिक कर्मचारी भर्ना कायेगु यल महानगरपालिकाया निर्णय कार्यान्वयनय् रोके याःगु दु। अदालतं महानगरपालिकाया नामय् अन्तरिम आदेश बिउसे कर्मचारी भर्ना मयायेत धाःगु दु। महानगरपालिकां कार्यपालिकाया बहुमत सदस्यपिनिगु निर्णयया भावनायात वान्छ्वया विहीवाः प्रयोगात्मक परीक्षा व अन्र्तवार्ता तय याःगु खः।
अदालतया दक्को प्रक्रिया स्थगित यायेत बुधवाः अन्तरिम आदेश बिःगु दु। उच्च अदालत नियमावली २०७३ या दफा ४२ बमोजिम उगु आदेश बिःगु खः। उगु रिट निवेदनय् स्थानीय सरकार सञ्चालन ऐन २०७४ या दफा ८३ य् उपदफा (८) व (१०) दुगु कानूनी प्रावधान तक आधार माने याना उगु निर्णय रोके यायेत अन्तरिम आदेशया माग याःगु खः। उगु ऐनया उपदफा (८) य् गाउँपालिका व नगरपालिकां नगर प्रहरी, सवारी चालक, कार्यालय सहयोगी, प्लम्बर, इलेक्ट्रिसियन, चौकीदार ,माली, बगैचा व सरसफाई सम्बन्धी पदय् स्थायी पदपूति मयासे प्रतिस्पर्धाया आधारय् सेवा करारय् काये माःग् धका धयातःगु दु।
उगु बाहेक मेगु पद व सेवाय् करार कर्मचारी करारपाखे पदपूर्ति याये मदइग न ऐनय् उल्लेख याना तःगु दु। अथेहे उपदफा १० य् संगठन व व्यवस्थापन सर्र्वेक्षणया प्रतिवेदन नगरसभापाखे पारित याये माः धका धयातःगु दु।कार्यपालिकाया बहुमत सदस्यपिन्सि ध्यानाकर्षण याक याकू न महानगरपालिकाया मेयर चिरिबाबु महर्जन व प्रमुख प्रशासकीय अधिकृत विष्णुप्रसाद कोइरालां कर्मचारी भर्ना यायेगु निर्णय यायेवं उगु निर्णय कानुनसम्मत मजुगु धाःसे गोपाल डंगोलं उच्च अदालतय् मुद्दा दर्ता याःगु खः ।अदालतया आदेश वयेवं महानगरपालिकाया पदपूर्ति समितिं विहीवाः छगु सूचं प्रकाशित यासे पूर्व निर्धारित परीक्षाया दक्को ज्या स्थगित याःगु दु।
वःगु असार ३१ गते छगु विज्ञापन पाखे सिभिल इन्जिनियर खुगु तह, आर्किटेक्ट खगु तह, इलेक्ट्रिकल इन्जिनियर खुगु तह, कम्प्युटर इन्जिनियर खुगु तह, जुनियर इन्जिनिर आर्किटेक्ट न्यागु तह, सिभिल मेकानिक्स न्यागु तह, कम्युटर अपरेटर न्यागु तहया विज्ञापन याःगु खः।अदालत बिःगु अन्तरिम आदेशयात निरन्तरता बिइगु वा मबिइगु सम्बन्धय् सहलह यायेत वइगु पुस २२ गते निगु पक्षयात सतूगु दु । नाप निवेदकया माग दाबी बमोजिम आदेश छाय् जारी जुइम्वाः धका न्ह्यन्हुया दुने लिखित जवाफ पेश यायेत विपक्षीया नामय् अदालतं आदेश बिःगु दु।
