सामाखुशीइ थौं सुथय् छगः ट्याक्सी अज्ञात समूह नं च्याकूगु दु ।

येँया–२६ आत्मज्ञानय् चलेयाना च्वंगु सतकय् थौं सुथय् ६ः३० बजे उगु ट्याक्सीइ मिँ तयेगु ज्या जुगु दु ।

मिँच्याना च्याःगु उगु प्रदेश ३–०१–००२ ज ५८८१ नम्बरया ट्याक्सी खः ।

महानगरीय प्रहरी वृत्त महाराजगञ्जया प्रमुख प्रहरी नायब उपरीक्षकं सुथय् मोटरसाइकलय् वःपि अज्ञात समूह नंं ट्याक्सीइ मिँ तःगु धका धाःगु दु । 

किपा सामाजिक संजालपाखे

नेकपा प्रचण्ड–माधव समूहया संघर्ष समितिया संयोजक नारायणकाजी श्रेष्ठं शान्तिपूर्ण आन्दोलनया झ्वलय् धरपकड याःगुलि सरकारं द्वन्द्व यायेत स्वःगु दु धका धयादीगु दु ।

संवैधानिक निकायय् याःगु नियुक्तिया विरोध यासे प्रचण्ड–माधव समूह नं आम हड्ताल आहृवान याःगु खः। उगु झ्वलय् सामाखुसीइ थौं छगः ट्याक्सी तक च्याकूगु दु धका प्रहरीं धाःगु दु ।

बन्द याकेत सतकय् वःपि प्रचण्ड–माधव समूहया नेता कार्यकर्तापिन्त प्रहरी ज्वःगु दु । आम हड्तालया झ्वलय् रत्नपार्कय् थ्यम्ह संघर्ष समितिया संयोजक श्रेष्ठ धयादीगु दु, ‘शान्तिपूर्ण ज्याझ्वलय् सहभागी जुइत वःपि यक्को पासापिन्त गिरफरतारी याःगु दु, अथे मयाये माःगु खः ।

सरकारं द्वन्द्व यायेत स्वगूगु व थुकिया लिच्वः न सरकार हे कायेमाः धका धयादीगु दु।

नेकपा प्रचण्ड–माधव समूहया अध्यक्ष पुष्पकमल दाहाल प्रचण्डं सम्भवतः फागुन न्हापागु संयुक्त आन्दोलन जुइ धका धयादीगु दु।

संवैधानिक निकायय् जुगु नियुक्तिया विरोध यासे थःगु समूहया आहृवानय् याःगु आमहड्तालया झ्वलय् प्रचण्ड सातदोबाटो चोकय् वना नाराबाजी याःगु दु। उगु झ्वलय् सञ्चारकर्मीपि नाप खँ ल्हानादीसे प्रचण्डं हड्ताल थःपिनिगु बाध्यता खः धका धयादीगु खः ।

सरकारं बलमिचे याना संवैधानिक निकायय् नियुक्ति यागुलि उकियात जनतायात जानकारी बिइगु कथं सतकय् वयागु धका धयादीगु दु। थ्व लोकतन्त्र व लोकतन्त्र विरोधीया लडाइँ खः धका धयादीगु दु ।

संसद विघटन व संवैधानिक निकायय् जूगु नियुक्तिइ सकसिया विरोध यानावया च्वंगु दु धका धयादीसे प्रचण्डं आः अझ सशक्त आन्दोलन जुइ धका धयादीगु खः।

आम हड्ताल सफल यायेत पुष्पकमल दाहाल (प्रचण्ड) न सतकय् कुहावःगु दु ।

प्रचण्ड सातदोबाटो चोकय् पिहावःगु दु। प्रचण्ड–नेपाल समूह न थौं असंवैधानिक संसद विघटन व अवैधानिक रुपं संवैधानिक आयोगय् नियुक्ति याःगु धाःसे आम हड्तालया म्हिगः छगु पत्रकार सम्मेलन याना घोषण याःगु खः ।

हड्ताल यायेत दक्को शीर्ष नेतापि सतकय् हे क्वहा वःगु खः। नेता नारायणकाजी रत्नपार्कया जुलुसय् नेतृत्व याना च्वःगु दु ।

थौं घोषणा याना तःगु आमहड्ताल सफल यायेत प्रचण्ड–नेपाल समूहया नेता व कार्यकर्ता सतकय् क्वहा वःगु दु।

थौं सुथय् सतकय् पिहावःपि नेता–कार्यकर्तापिन्त सुरक्षाकर्मीपिन्स नियन्त्रण कया च्वःगु दु । आःतक यक्को नेता व कार्यकर्ता प्रदर्शन याये कथं सतकय् क्वहा वःगु दु।

बन्द यायेत रत्नपार्कपाखे नेता व कार्यकर्तापि जुलुस हे पिहा वयाच्वंगु दु । अथेहे चोक व सतकय् कार्यकर्तापि क्वहा वयाच्वंगु दु।

अथेहे थौं सुथय् हे कलंकीपाखे नेतृ अष्टलक्ष्मी शाक्यनाप नेता व कार्यकर्ता पिन्त ज्वना यके धुकुगु दु।