कोरोना खोप अभियान अन्तर्गत नेपालय् आःतक छगु लाख २८ हजार स्वया अप्वोसिया खोप काये धुकुगु दु ।

थौं मङ्गलवाः बहनि तक छगु लाख २८ हजार ६५० म्हेसिया कोरोना भाइरस विरुद्धया खोप काये धुकुगु दु धका स्वास्थ्य तथा जनसङ्ख्या मन्त्रालयं धाःगु दु।

आःतक प्रदेश नम्बर १ य् १७ हजार २८७, प्रदेश नम्बर २ य् १६ हजार १७३, वाग्मतीइ ४५ हजार ३४५ म्हेसिया खोप काये धुकुगु दु धका मन्त्रालयया प्रवक्ता डा. जागेश्वर गौतमं जानकारी बियादीगु दु।

अथेहे गण्डकीइ १६ हजार २७०, लुम्बिनीइ १७ हजार ९७९, कर्णालीइ ६ हजार ६६० व सुदूरपश्चिमय् ८९३६ म्हेसिया खोप काये धुकुगु दु।

लुँया भाः थौं स्थिर जुगु दु ।

म्हिगः थे थौं न लुँ तोलाय् ९२ हजार ६ सय रुपैयाँय् कारोबार जुगु दु धका नेपाल सुनचाँदी व्यवसायी महासङ्घ धाःगु दु।

म्हिगः लुँ तोलां न्यासः थहावःगु खः । अथेहे वहः धाःसा थौं भाः क्वहावःगु दु ।

महासङ्घया कथं वहः तोलाय् नीतका क्वहा वया  १३८० रुपैयाँ थ्यःगु दु ।

दैलेखया डुङ्गेश्वर गाउँपालिकाय् याक मिजं न भत्ता दइगु जुगु दु।

गाउँपालिकाय् याक मिजंयात न पटक पटक भत्ता दयेमाः धइगु माग वःगुलि आर्थिक वर्ष २०७६ व ७७ या कार्यविधि निर्माण यासे बजेट विनियोजन याःगु दु । गाउँपालिकां ५५ दँ स्वया च्वयेयापि याक मिजंयात न भत्ता बिइगु निर्णय याःगु दु ।

उमित लय् पतिक न्यासः भत्ता बिइगु निर्णय जुगु दु धका गाउँपालिकां धाःगु दु ।

गाउँपालिकां ऐन निर्माण यासे गाउँपालिका क्षेत्र दुने च्वनाच्वपि ५५ दँ स्वया अप्वोपि याक मिजंपिन्स माघनिसे भत्ता बिइगु निर्णय याःगु दु धका जानकारी बिःगु खः।

येँ थौं सुथय् न्यूनतम तापक्रम २.७ डिग्री सेल्सियस जूगु दु। सुथसिया ५ः४५ बजे याःगु मापनय् येँया तापक्रम २.७ डिग्री सेल्सियस जुगु दु धको मौसमविद् धाःगु दु ।

मौसमविद्धाःगु कथं न्हिनया तापक्रम १८–२० डिग्री सेल्सियस थ्यःना मौसम सफा जुइ धका धाःगु दु । अथेहे तराईपाखे धाःसा ख्वातुक्क खसुउ भुनिइ धका धाःगु दु ।

थौं न्हिनय्े देय् या थीथी पहाडी भू–भागय् आंशिक बदली जुया बाँकी भू–भागय् मौसम सामान्यतया सफा जुइ धका धाःगु दु ।

अथेतु, थौं व कन्ह्य मौसमी प्रणालीइ तधःगु ह्यूपा वइगु  सम्भावना मदुसा विहीवाः धाःसा वा वइगु सम्भावना दु धका धाःगु दु ।