देय्न्यकं ४२१ म्ह कोरोना संक्रमित थपे जुगु दु। वःगु २४ घण्टाया दुने थौं आइतवाः ४२१ म्हेसित कोरोना संक्रमण पुष्टि जुगु दु धका स्वास्थ्य तथा जनसंख्या मन्त्रालयं धाःगु दु ।

थ्व नाप आःतक नेपालय् २ लाख ६१ हजार ८५९ म्ह संक्रमितपि थ्यःगु दु। 

नेपालभाषाया अनलाइन शव्दकोश नेपालभाषा डट ओआरजी छगु ज्याझ्वः दथुइ सार्वजनिक जुगु दु।

थुगु शव्दकोश निर्माण पुचलं म्हिगः शनिवाः फेसबुक लाइभपाखे शव्दकोशबारे जानकारी बिया वेबसाइट सार्वजनिक याःगु खः। उगु ज्याझ्वलय् निर्माण पुचःया दुजः ज्ञान महर्जनं लसकुस नापं शव्दकोषया बारे जानकारी बियादीगु खः। पुचया मेम्ह दुजः राजेश तण्डुकारं निर्माण प्रक्रिया व पुचःया जानकारी व अस्मित मल्लं वेबसाइटय् बारेय् जानकारी बियादिगु खः।

अथेहे सफ्टवेयर डेभेलपरत चेतना शाक्य व सुजन जोशीइ वेबसाइटया प्राविधिक पक्ष व वेबसाइट गुकथं प्रयोग यायेगु धकाः जानकारी बियादिगु खः। ज्याझ्वलय् अनुसन्धानकर्ता काशीनाथ तमोटं नेपालभाषा शव्दकोशया विगत व वर्तमान नापं न्हूगु अनलाइन शव्दकोषया विश्लेषण यानादिगु खः। अथेहे ज्याझ्वलय् परियोजनाया निर्देशक डा. सुभाषराम प्रजापतिं शव्दकोषलिसें नेपालभाषाया डिजिटलीकरणबारे भावी योजनाया खँ कनादीगु खः।

शव्दकोष नेपालभाषाया डिजिटलीकरणया न्हापांगु माइलस्टोन खः व थ्व पुचलं डिजिटलीकरणया थीथी ज्याझ्वःत छसि कथं यायेगु धका जानकारी बियादीगु खः। थुगु शव्दकोष नेपालभाषाय् प्रकाशित थीथी शव्दकोश मुंकाः दयेका तःगु थुःगु २९ द्वः मल्याक खँग्वः दुथ्याका तःगु दु। वेबसाइटय् आःतक झीगु सफू डिजिटलीकरण याना तःगु दु। थुगु शव्दकोशया निर्माण दबुलि नांया संस्थां याःगु खः।

येँ महानगरपालिका १७ वडाया सदस्य बाबुराजा महर्जनया मां मोहनमाया महर्जन थौं सुथय् ३ः५५ बजे मन्त ।

८१ दँ दुम्ह वयकः थौं छेँय् मदुगु खः। वयकःया स्वम्ह काय् व निम्ह म्ह्याय् दिइ। वडा सदस्य बाबुराजा महर्जन तःधिम्ह काय् खः।

वयकःयाःगु अत्येस्थि थौं लुँतिइ याये त्यःगु खः ।

ललितपुर उद्योग वाणिज्य संघया अध्यक्ष पदय् मनोज बहादुर न्याछ्यों त्याःगु दु ।

निगु प्यानल दथुइ जुगु चुनावी मैदानय् मेम्ह प्रत्यासी भरतलाल जोशीयात पराजितयासे न्याछ्यों अध्यक्षय् निर्वाचित जुयादिगु खः।

म्हिगः शनिबाः लिबाक्क बहनी सार्वजनिक जुगु लिच्व कथं वरिष्ठ उपाध्यक्षय् विश्वराज बज्राचार्य, उद्योग उपाध्यक्ष सुसन महर्जन, वाणिज्य उपाध्यक्ष उसन बज्राचार्य, संस्थागत उपाध्यक्ष विरेन्द्र लाल श्रेष्ठ, महासचिव रूपकमान महर्जन व कोषाध्यक्षय् भूमिनन्दन कमाचार्य निर्वाचित जुयादिगु दु।

अथेहे दुजलय् रूपेन्द्र राज शाक्य, राजेश राज बज्राचार्य, मिलन शाकय, आपुलाल महर्जन, मुकुन्द महर्जन, सुजन बज्राचार्य, राजु महर्जन, महेश श्रेष्ट, गुनकेशरी ताम्राकार, रमेश महर्जन, शर्मिला श्रेष्ठ, सजना श्रेष्ठ व विमला शाक्य निर्वाचित जुयादिगु दु। २२ गू पदया लागि जुगु चुनावय् ४२ म्ह सिगु उम्मेद्वारी लागु खः । 

मुस्ताङया नांजाःगु धार्मिकस्थल मुक्तिनाथ द्यः पुस २१ गतेनिसे सर्वसाधारणया लागि खुला जुइगु दु।

मुक्तिनाथ विकास समितिया कुतलय् जिल्ला समन्वय समिति, वारागुङ मुक्तिक्षेत्र गाउँपालिका, जिल्ला स्वास्थ्य कार्यालय, प्रदेश सभासद, सुरक्षा निकाय, वारागुङ मुक्तिक्षेत्र १ अन्तर्गतया रानीपौवा, झारकोट व खिङ्गा गाउँया स्थानीयपि, गाउँ मुखिया नाप अन ज्यायाइपि आनीझुमा व पूजारीपिनिगु मंकाः बैठकं मुक्तिनाथ द्यःया थाय् वइगु मंगलवाःनिसे सर्वसाधारणया लागि खुला यायेगु निर्णय याःगु दु।

मुक्तिनाथ विकास समितिया अध्यक्ष नाप प्रजिअ हिरादेवी पौडेलया अध्यक्षताय् सरोकारवाला निकाय सम्मिलित बैठकं पुस २१ गतेनिसे द्यः दर्शनया लागि खुला यायेगु घोषणा याःगु खः। कोरोनाया कारण वःगु झीलानिसे बन्द जुयाच्वंगु खः। द्यःया दर्शनया लागि छ घौ जक च्वने दइ कथं खुल्ला जुइ त्यःगु खः।

अथेहे, द्यःया थाय् दुहावनिपिन्स १०८ हिति व कुण्डय् म्वल्हुइगु लागि रोक लगे याःगु दु सा भक्तजनपिन्स समितिं तोके याःगु नियमय् च्वना भौतिक दुरी कायम यासे दर्शन याये माःगु धका धाःगु दु।