नेकपा प्रचण्ड–नेपाल समूहया नेता अष्टलक्ष्मी शाक्य ज्वःगु दु ।

आमहड्तालया आह्वान यासे वना च्वम्ह शाक्य नाप मेपि नेता–कार्यकर्ता न प्रहरी ज्वःगु दु । शाक्ययात येँया कलङ्कीपाखे ज्वःगु खः । वयकःयात कलङ्की क्षेत्रय् कमान्डर तोके याना तःगु खः ।

थुगु समूह नं थौं आमहड्तालया आह्वान यागुलि देयन्यकया सुरक्षा व्यवस्था कडा यानातःगु दु। थाय् थासय् प्रहरीपिन्त खटे याना तःगु दु । सरकारं ढुक्क जुया थःगु नियमित ज्या यायेत इनाप याःगु दु ।

अख्तियार दुरुपयोग अनुसन्धान आयोगया आयुक्त गणेशराज जोशीं राजीनामा बिःगु दु ।

विवादया दथुइ प्रमुख आयुक्त व निम्ह आयुक्त नियुक्त जुगु दिं हे जोशीं राजीनामा बिःगु दु । नविनकुमार घिमिरें अवकाश काये वं कार्यबाहक प्रमुख आयुक्तया जिम्मेवारीइ दु जोशीं थः राजीनामा बिया थः आयोगपाखे विदा जुइ धुन धका धयादीगु दु । तर वयकलं राजीनामा बियागु कारण खुले याये चाहे धाःसा मजु ।

थ्व स्वया न्ह्य बुधवाः सुथय् जक राष्ट्रपति विद्यादेवी भण्डारीं किशोरकुमार सिलवाल व जयबहादुर चन्दयात आयुक्त नियुक्त याःगु खः । प्रमुख आयुक्त राई न थौं बुधवाः हे पदभार कायेधुुकुगु दु ।

वाङमय शताब्दी पुरुष सत्यमोहन जोशीया किपा दुगु हुलाक टिकट स्वयेखंम्ह न्हापांम्ह व्यक्ति जुयादीगु दु ।

फिलाटेलिक तथा हुलाक टिकट व्यवस्थापन कार्यालयं म्हिगः वय्कःया किपाः दुगु टिकट प्रकाशन याःगु खः ।

गुलि नं विशिष्ट व्यक्तित्वतय् किपाः तयाः टिकट पिहां वल, व फुक्कं वय्कःपिं मदयेधुंकाः जक पिदनाच्वंगु खः । तर भाजु जोशी किपाः दुगु हुलाक टिकट धाःसा वय्कःया जीवनकालय् हे पिहां वःगु खः । म्हिगः राष्ट्रपति विद्यादेवी भण्डारीं जोशीया किपाः दुगु हुलाक टिकटय् न्हापांगु टाँचा तयाः टिकटया प्रकाशन सुरु यानादीगु खः ।

हुलाक टिकट व्यवस्थापन कार्यालयया कथं झितका वं झिगू लाख पाः जोशीया किपा दुगु हुलाक टिकट पिहां वःगु दु । थ्व इतिहासया दस्तावेजया रुपय् दयाच्वनी ।

नेपाल कम्युनिस्ट पार्टी (नेकपा) प्रचण्ड–नेपाल समूह नं बिहीवाःनिसे देयन्यक आमहड्तालया घोषणा याःगु दु ।

नेकपा केन्द्रीय संघर्ष समितिं थौं छगु पत्रकार सम्मेलन यासे कन्ह्यःनिसे आमहड्ताल यायेगु घोषणा याःगु दु । संवैधानिक आयोगय् सिफारिस जुपि पदाधिकारीपिन्स संसदीय सुनुवाइ बिना हे थौं सुथय् पद व गोपनीयताया शपथग्रहण याःगु खः।

उकिया विरोधय् आमहड्ताल घोषणा याःगु खः। सरकारं वःगु मंसिर ३० गते अध्यादेश हया संवैधानिक आयोगय् खाली जूगु पदय् सिफारिस याःगु खः ।

असंवैधानिक तरिकां अध्यादेश हया नियुक्त याःगु संवैधानिक निकायया पदाधिकारीपिन्त शपथ नका जबर्जस्ती नाटक यागु धका संघर्ष समितिया सह–संयोजक पम्फा भुसालं धाःगु खः।

उगु समूह न बुधवाः हे मसाल जुलुस यायेगु धका थौं जुगु पत्रकार सम्मेलनय् जानकारी बिःगु दु ।

नेपाल कम्युनिस्ट पार्टी (नेकपा) या ओली पक्षं अखिल नेपाल महिला सङ्घ (अनेमसङ्घ) नं नेकपा प्रचण्ड–माधव पक्षया नेतृ नाप विघटित प्रतिनिधि सभा सदस्य रामकुमारी झाँक्रीयात ज्वना कारबाही याये माःगु माग याःगु दु ।

थौं बुधवाः गृहमन्त्री रामबहादुर थापायात ज्ञापन पत्र बुझे यासे अखिल नेपाल महिला सङ्घं माघ १६ गते गोरखाया सिरानचोक गाउँपालिकाय् छगू ज्याझ्वलय् नेकपा प्रचण्ड–माधव पक्षया नेतृ रामकुमारी झाँक्रीं राष्ट्रपति विद्यादेवी भण्डारीया चारित्रिक हत्या याःगु धाःसे ज्वना कारबाही याये माःगु माग याःगु दु ।

उगु ज्ञापन पत्रय् नेतृ झाँक्रीं राष्ट्रपति भण्डारीया चारित्रिक हत्या यासे थीथी द्धपः बिया बेइज्जती यागु नाप व्यक्तिगत, पारिवारिक व राष्ट्रपतिया हे इज्जतय् तक धक्का जुइ नियतपाखे हे आपत्तिजनक व अपमानजनक शब्द छ्यगुलि ज्वना कानुनबमोजिम कारबाही याये माःगु माग याःगु खः।

अनेमसङ्घया नेतृ सुजिता शाक्यं झाँक्री नं राष्ट्रपति संस्थाय् हे अपमानजनक व्यवहार याःगुलि तत्काल कारबाही यायेत माग याःगु दु।