वःगु चौबीस घण्टाया दुने नेपालय् कोरोना संक्रमण १५९ म्ह पुष्टि जूगु दु ।

थ्व नाप आःतक नेपालय् कोरोना संक्रमितपि निगु लाख ७१ हजार ११८ म्ह थ्यःगु दु। थौं ४१४५ म्हेसिगु पीसीआर परिक्षण याःगु खः।

अथेहे, वःगु चौबीस घण्टाय् २६४म्ह संक्रमणमुक्त जूगु दु। थ्व नाप कोरोनामुक्त जूपि निगु लाख ६६ हजार ६०० म्ह थ्यःगु दु।

आःतक क्वारेन्टिनय् ९७ म्ह व आइसोलेसनय् निद्धः व ४८९ च्वनाच्वंगु दु धका स्वास्थ्य तथा जनसंख्या मन्त्रालयं धाःगु दु ।

कोरोना भाइरस (कोभिड १९) विरुद्धया खोप अभियान थौं खुन्हया दिं सोमवाः तक देयन्यक १ लाख १३ हजार स्वया अप्वोसिया खोप लगे याये धुकुगु दु ।

स्वास्थ्य तथा जनसंख्या मन्त्रालयया प्रवक्ता डा. जागेश्वर गौतमं थौं सोमवाःछगु प्रेस विज्ञप्ति जारी यासे ७७ जिल्लाय् १९१ खोप केन्द्रपाखे आःतक १ लाख १३ हजार १७५ म्हेसित लक्षित वर्गपिन्त खोप लगे याये धुकुगु जानकारी बिःगु दु।

प्रदेश १ य् १५ हजार ३२९म्ह, प्रदेश २ य् १५ हजार २४म्ह, बागमती प्रदेशय् ४० हजार २७२म्ह, गण्डकी प्रदेशय् १३ हजार ९२२म्ह, लुम्बिनी प्रदेशय् १४ हजार ६४०म्ह, कर्णाली प्रदेशय् ६ हजार १३१ म्ह व सुदूरपश्चिम प्रदेशय् ७ हजार ८५७ म्हेसिया खोप लगे याःगु दु धका मन्त्रालयं धाःगु दु ।

महान्यायाधिवक्ता अग्निप्रसाद खरेलं न्यादँया कार्यकाल पूरा याये दइगु वर्तमान सरकारया अधिकार खःसा तर पूरा याके मबिकूगुलि चुनावय् वनेत्यःगु खः धका स्पष्ट यानादीगु दु ।

प्रतिनिधि सभा विघटन विरुद्धया रिटया निवेदनय् थौं सोमवाःया बहसय् वयकलं संविधानय् थुगु विषय स्वयेत इजलासयात इनाप याःगु दु। प्रतिनिधि सभा विघटन विरुद्धया रिट निवेदनय् थौंया सुनुवाइलय् सरकारं प्रतिरक्षा यासे सरकारया प्रमुख कानुनी सल्लाहकार खरेलं प्रधानमन्त्री नाप बहुमत दु सा न्यादँया कार्यकाल जुगुलि चुनावय् वने फइ धका थःगु तर्क तयादीगु खः।

विघटनविरुद्ध गुगु न राजनीतिक दलपाखे निवेदन मवःगुलि वयकलं थुगु  सम्बन्धय् संविधानया दक्को धारा स्वया अदालतं व्याख्या याये माःगु माग तयादीगु खः। वर्तमान प्रधानमन्त्री सकसिया स्वीकारया प्रधानमन्त्री खः धासे वयकलं तधःगु पार्टीया हैसियतं सरकार प्रमुखं प्रतिनिधि सभा विघटन याये दइगु धका धयादिगु खः ।

रिट निवेदकया पाखे म्हिगः आइतवाः बहस क्वचाःगुलि थौं सोमवाःनिसे सरकारी पक्षपाखे बहस सुरु जुगु खः । आः न बहस जुया च्वंगु दु ।

नेकपा प्रचण्ड–माधव समूह न निर्वाचन आयोगय् पार्टीया आधिकारिकताय् दाबी यायेगु निर्णय याःगु दु ।

थौं सोमवाः च्वंगु केन्द्रीय कमिटीया बैठकं अथे निर्णय याःगु खः ।