घ्यःचाकू संल्हू सतिना वःलिसे तोखाया चाकु व्यवसायीतय् लिमलाःगु दु ।

घ्यःचाकु संल्हूया दिनय् चाकु, हाम्वः ग्वारा, तरुल आदि नयेगु चलन दु । थुगु दिनय् जा नयेबलय् नं घ्यःचाकु तयाः नयेगु याइ ।

माघया संल्हू चाकुलिसे हे सम्वन्धित जूगु व थुगु दिनया परम्परा हे चाकुलिसे स्वानाच्वंगु  हुनिं माघ महिनाय् चाकुया माग यक्व जुइ ।

थुगुसी कोभिड १९ या हुनिं चाकुया माग म्ह्वः जूसां तबी तोखाय् धाःसा चाकु दयेकीपिनि तसकं लिमलाःगु खनेदु । तोखाय् आः १५गू सिबें अप्वः धइथें चाकु उद्योग न्ह्यानाच्वंगु दु ।

साखःयात ग्वाराग्वारा दायेकाः दयेकीगु चाकु माघ महिनाय् नयेगु शरीरया नितिं तसकं बांलाइगु पोषणविद्तय् तकं धापू दु ।

माघ महिनाय् यक्व ख्वाउँसे च्वनीगु व च्वापु तकं गाइगु ई जूइगुलिं थुगु इलय् चाकु नयेगु शरीरयात निनीगु धापू दु ।

चाकु नयेबलय् थुकिं झीगू शरीरयात क्वाकीगु व उर्जा बीगु जूगुलिं ख्वाउँयाः जुइगु ल्वचं काचाक्क मथीगु धयावःगु दु ।

तोखा चाकुया नेपालय् हे नां जाःगु थाय् खः । थन चाकु न्यायेत स्वनिगः लिसें विदेशं तकं माग जुइगु याः ।

नेपाल सुनचाँदी व्यवसायी महासंघया अध्यक्षय् माणिकरत्न शाक्य निर्विरोध निर्वाचित जूगु दु ।

महासंघया थौं क्वचाःगु च्याक्वःगु दँ मुँज्या अले स्वक्वःगु तःमुँज्यां शाक्य वरिष्ठ उपाध्यक्षय् अर्जुन रसाइलीयात ल्यःगु दुसा मेपिं उपाध्यक्षय् मोहनकाजी शाक्य, दियेशरत्न शाक्य व विपिन रामुदामु च्वनादीगु दु । एसोसिएटस उपाध्यक्षय् पवन सोमानी दु ।

महासंघय् महासचिवया नितिं धर्मसुन्दर बज्राचार्ययात ल्यःगु दु । कोषाध्यक्षय् सुदीप श्रेष्ठ दी ।

निम्ह सचिवय् किरणभाइ बज्राचार्य व बाबुराम विश्वकर्मा निर्वाचित जूगु दु । सभां सहकोषध्यक्ष पदय् पद्मसुन्दर शाक्य च्वनादीगु दु ।

प्रवक्ता कथं मनोजकुमार शाहयात ल्यःगु दु ।

देय्न्यंकया लुँवहःया व्यवसायीतय् कुसा संगठन नेपाल सुनचाँदी व्यवसायी महासंघ २०६९ साल फागुन २० गते विधिवत् रूपं दर्ता जूगु खः ।

सरकारं घ्यः चाकू सल्हू कुन्हु सार्वजनिक बिदा बिइगु जुग दु। राष्ट्रिय सभाय् आइतवाः सम्बोधनया झ्वलय् प्रधानमन्त्री केपी शर्मा ओलीं माघी पर्वया लसताय् सरकारं माघ १ गते बिदा बिइगु निर्णय यानागु जानकारी बिःगु दु।

माघीया दिं राष्ट्रिय उत्सवया रुपय् हनिइगु जुगुलि सार्वजनिक बिदा बिइगु निर्णय यानागु खः धक धाःगु खः।

थ्व बिदा थारु जातीया लागि जक मखु, मेगु जातीपिन्स न हना वयाच्वंगु खः। जनताया भावना,आस्थायात कदर यासे बिदा बिइगु निर्णय यानागु खः धका प्रम ओलीं धयादीगु खः। 

यलया कर्मनासा खुसिइ याःगु जग्गा हाउजिङया नामय् दर्ता याःगु द्धपनय् अख्तियार दुरुपयोग अनुसन्धान आयोगं १८ म्हेसित भ्रष्टाचार मुद्दा दायर याःगु दु।

अख्तियारं उमित निगु दुई करोड निगु लाख रुपैयाँया दरं जरिवाना माग दाबी याःगु दु। अख्तियारं नापी कार्यालय यलया प्रमुख बुद्धिमान जैसी, नापी अधिकृत बालेश्वर यादव, सर्वेक्षक केशव थापा मगर, मालपोत कार्यालयया प्रमुख बाबुराम खनाल, नासुपि ख्याम नारायण पौडेल, दिनेश न्यौपाने व खरिदार आत्माराम लुइँटेलयात भ्रष्टाचार मुद्दा तःगु दु ।

अथेहे युरो हाउजिङ प्राली, यूरो ल्याण्ड डेभलपर्स प्रालीया सञ्चालकपि गुणीकाजी मानन्धर, योगेश्वर कृष्ण पराजुली, कृष्ण पराजुली, कृष्णराज श्रेष्ठ, टंक बहादुर श्रेष्ठ, गोपालदास मानन्धर, बविन मानन्धर व उज्जल मानन्धरयात भ्रष्टाचार मुद्दा न्ह्याकुगु खः ।

अख्तियारं काठमाडौं अस्पताल प्रालीया सञ्चालकपि डा. ईश्वरलाल आचार्य व डा. दुर्गामान जोशी नाप मय्जु श्रीमती दुर्गेश नन्दिनी भट्टचनयात न भ्रष्टाचारया आरोप मुद्दा न्ह्याकूगु दु। कर्मनासा खुसिइ व वया जःखः सार्वजनिक जग्गायात मिलेयाना हाउजिङया नामय् दर्ता याःगु आरोप उमित ज्वःगु खः। अख्तियारया दाबी कथं, उगु जग्गा २०२२ सालया नापीइ सार्वजनिक धका च्वयातःगु खः। मिचे याःगु जग्गा करिब ८ रोपनी १२ आना दु।

अख्तियारं सार्वजनिक जग्गा पटक पटक न्यायेगु मिइगु याना च्वपि ३३ म्हेसित न मुद्दा दायर याःगु दु। 

वःगु २४ घण्टाया दुने थप २५९ म्हेसित कोरोना संक्रमण पुष्टि जुगु दु धका स्वास्थ्य तथा जनसंख्या मन्त्रालयं धाःगु दु।

थ्व नाप आःतक नेपालय् २ लाख ६४ हजार ७८० म्हेसित संक्रमित जुइ धुकुगु दु। अथेहे वःगु २४ घण्टाय् ५१३ म्ह कोरोना संक्रमण मुक्त जुया छेँय् लिहावःगु दु। थ्व नाप आःतक २ लाख ५८ हजार ४४१ म्ह थ्यःगु दु ।

देयन्यक सक्रिय संक्रमितपि ४ हजार ४४२ म्ह दु। मन्त्रालयया कथं आःतक पीसीआर विधिपाखे १९ लाख ८२ हजार २४६ म्हेसित परीक्षण याये धुकुगु दु ।

अथेहे वःगु २४ घण्टाया दुने कोरोना संक्रमणं न्याम्ह मन्त । थ्व नाप आःतक कोरोना संक्रमणं सीपि १ हजार ९१७ म्ह थ्यःगु दु।