येँ महानगरपालिकाया मेयर विद्यासुन्दर शाक्यं थौं छगु ज्याझ्वः दथुइ सहिद गंगालाल राष्ट्रिय हृदय केन्दय् अक्सिजन प्लान्टया उलेज्या यानादीगु दु ।

येँ महानगरपालिकां उपलब्ध यागु करीव २ करोड ७५ लाख रुपैयाँ लागतय् स्थापना यागुे प्लान्टपाखे थौंसिने अक्सिजन उत्पादन सुरु जुगु दु।  ४७ लिटरया १३५ सिलिण्डरय् न्हि अक्सिजन उत्पादन यायेगु प्लान्टया क्षमता दु । उकि मध्ये गंगालालय् न्हि करीब ९० सिलिण्डर अक्सिजन खपत जुइ ।

बाँकी अक्सिजन भरे याना मेथाय् छ्वय फइ। यथ्व (अक्सिजन भरे यायेगु) प्रणाली जडान यायेगु धासा ल्य दनिइ । प्लान्टय् ३७ किलोवाटया एअर कम्प्रेसर, ३ डिग्री सेल्सियस तक ख्वाउसे च्वनिइ एअर ड्रायर, १ हजार लिटर क्षमताया एअर ट््याङ्क, निगः अक्सिजन जेनेरेटर लगायत उपकरण दु।

उगु प्लान्ट उलेज्या झवलय् मेयर शाक्यं, गंगालालय् महानगरं अक्सिजन प्लान्ट स्थापना यायेगु निर्णय यानगु इलय् थौं थे अक्सिजनया अत्याधिक माग मदुगु खँ लुमकादीसे उगु इलय्  यानागु निर्णयपाखे आः महामारी व्यवस्थापय् फाइदा जजु धका धयादीगु खः । ‘गंगालाल हृदय केन्द्र व कान्ति बाल अस्पताल याना निगु अस्पतालय् जिमिस अक्सिजन प्लान्ट यानागु खः ।

निगु थासं न्हि करीब निसः ग्वः सिलिण्डर अक्सिजन उत्पादन जुइ । आः छु दिं लिपा हे कान्तिइ न प्लान्ट सुरु जुइ धका धयादीगु खः ।   गंगालालय् आन्तरिक पाइप प्रणालीपाखे अक्सिजन विरामी दु थाय् सिलिण्डर म्वायक  वनिइगु जुगुलि सिलिण्डरया खर्च न बचे जुइ  धका धयादीगु खः । उगु ज्याझवलय् अस्पतालया कार्यकारी निर्देशक डा. चन्द्रमणि अधिकारी, येँ महानगर वडा ३ या अध्यक्ष दीपक के. सी व महानगरया कार्यकारी प्रमुखया न उपस्थिति दुगु खः। 

 स्वास्थ्य मापदण्डया पालना यासे थः व परिवारयात बचे याये फइगु धासे येँ महानगरया मेयर विद्यासुन्दर शाक्यं सरकारं जारी यागु स्वास्थ्य मापदण्डयात नागरिक दायित्व माने यासे पालना यायेत इनाप यानादीगु दु ।

अदृश्य शक्तिनाप ल्वायेत अपु मजु। विषम परिस्थितिइ विवेक, धैर्यता व संयमता थे जागु गुणपाखे परास्त याये फइ । शाक्यं महानगरबासीया नामय् यानादीगु इनापय् धादीगु दु, ‘महामारीनाप सम्बन्धित छु न समस्या जूसा थः नाप उपमेयर वा थः न्ह्यने च्वपि जनप्रतिनिधिपिन्त सम्पर्क यायेत इनाप यानादीगु दु। सम्भावित जोखिम व अप्ठ्यारो परिस्थिति सामना यायेत जिमिगु तयारीयातह निरन्तरता बियाच्वनागु दु।’

‘विश्वभरि द्रुत गतिमा फैलै जुयाच्ंवगु न्हुगु भेरियन्टया कोभिड–१९ येँ न फैलैजुग दु । संघीय राजधानी येँ महानगरपालिका देयन्यक च्वपि नागरिकपि थीथी पेशा व्यवसाय याना वयाच्वपि च्वना च्वंगु दु। विदेशी नागरिकपि तक आवत जावत जुइगु मुख्य केन्द्र दुगु कारणं विश्वव्यापी महामारीया रूपय् फैलै जुगु कोभिड–१९ या संक्रमण थन न द्रुत गतिमा फैलै जुइगु खतरायात मध्यनजर यासे सकसिया सजगता अपने याये मागु आवश्यकता दु। नेपाल सरकारं थुगु सम्बन्धय् जारी यागु आदेश निर्देशन पालना यायेत झी सकसियागु कर्तव्य खः ।’

येँं महानगरपालिका देयया प्रमुख सांस्कृतिक सहर जुगु कारण थनया मौलिक परम्परा, संस्कृति व सम्पदायात जगेर्ना याये मागु दायित्व झीगु न्ह्यने दु । थीथी इलय् थन माने याइगु जात्रापर्वया विशिष्ट महत्व दु । थन च्वंगु मूर्त अमूर्त सम्पदाया संरक्षण व सम्बद्र्धन यायेगु झी सकसिया दायित्व खः।

धार्मिक थासय् थः थःगु परम्परा कथं पूजापाठ नाप प्रार्थना यायेगु चलन दु । अज्यागु सार्वजनिक थासं छम्ह मनूखं मेम्ह मनूयात याउक भाइरस सारे याये फइगु जुगुलि धार्मिक थासय् वना यक्को भीड मयायेत आस्था कथं छेँ च्वना हे नित्य पूजा यायेत इनाप यानागु दु।’ धका मेयर शाक्यं इनाप यानादीगु दु।

वयकलं महानगरवासीपिन्त स्वास्थ्य सम्बन्धि समस्या वं सा वा कोविडबाहेकया विरामीपिन्त उपचारया लागि अस्पताल वने माःसा हटलाइन टेलिफोन नं. ११८० मोवाईल नं. ९८४९८५६६७२, ९८४९६०५४७ व ९८४९८५६६७१ नाप कोभिडया बिरामीपिन्त अस्पताल वनेमाःसा निःशुल्क एम्बुलेन्स सेवा १०२ य् सम्पर्क यायेत मेयर शाक्यं इनाप यागु दु। 

संस्कृति, पर्यटन तथा नागरिक उड्डयनमन्त्री भानुभक्त ढकालयात न कोरोना संक्रमण जुगु दु ।

मन्त्री ढकाल नाप वयकःया जहान इन्दिरा फुयालयात न पनि संक्रमण पुष्टि जुगु दु।

थौं सुथय् स्वाब बिगुलि वयकःपि निम्हसियागु न रिपोर्ट पोजिटिभ वंगु दु धका मन्त्री ढकालया प्रेस संयोजक माधव तिवारीं धागु दु।

मन्त्री ढकालया स्वास्थ्य अवस्था धासा सामान्य दु। तर, मन्त्रीया जहान फुयालयात धासा अस्पताल भर्ना यायेगु तयारी जुयाच्वंगु दु धका धागु दु।

कोरोना भाइरस (कोभिड–१९) या संक्रमणं संविधानसभा सदस्य रबनी चौधरी मन्त ।

कैलालीया  लम्कीचुहा नगरपालिका–६ बागमारा च्वम्ह ४४ दँ दुम्ह चौधरीयात कोरोना संक्रमणं थौं आइतवाः न्हिनय् धनगढीइ मदुगु धका वयकःया परिवारपाखे धागु दु ।

कलेजो व मिर्गौलासम्बन्धी समस्या दुम्ह चौधरी धनगढीया नवजीवन अस्पतालय् उपचारया झ्वलय् मदुगु खः।

शनिवाः जक अस्पताल भर्ना जुम्ह चौधरी आइतवाः हे कोरोना संक्रमण पुष्टि जुगु खः ।

चौधरी २०७० सालय् नेकपा एमालेपाखे संविधानसभा सदस्य जुयादीम्ह खः ।

वंगु २४ घण्टाया दुने ६२३ म्ह मचापिन्त कोरोना संक्रमण पुष्टि जुगु दु ।

स्वास्थ्य मन्त्रालयया कथं ९ दँया क्वयापि १६६ म्ह व १० निसे १९ दँ दुपि ४५७ म्ह याना ६२३ म्ह मचापिन्त कोरोना संक्रमण पुष्टि जुगु दु ।