स्वनिगःया आदिवासी नेवाः व तराईया आदिवासी थारुतय्सं घ्यःचाकु संल्हूयात थःथःगु रितिरिवाज कथं तःजिक हनिइगु दिं खः ।

थ्व नखः नेवाः तयेस जक मखु मेगु जातितय्स नं थःथःगु हे संस्कार व परम्पराकथं हना वयाच्वंगु नखः खः। माघ महिनाया संल्हू घ्यःचाकु नयाः हनेगु संल्हू खः । दक्षिणायनय् दुम्ह सुद्र्यः थ्व कुन्हुनिसें उत्तरायणय् सरे जुयावइ । १२ लाय् दइगु १२ राशीकथं माघ महिना मकर राशीइ लाइगुलिं माघ संल्हूयात मकर संल्हू वा मकर संक्रान्ति नं धाइ । थौंनिसें चा चीहाकः जुजुं वनीइ धइगु धापू दु ।

नेवाः संस्कार कथं घ्यःचाकु संल्हूकुन्हु चाकुइ हाम्वः तयाः दय्कातःगु लड्डु नय् माःगु व थीथी कथं हाम्वः छ्यलेमाःगुलिं थ्व संल्हूयात नेवाःतय्स हाम्वः संल्हू तक धायेगु याः ।थ्वकुन्हु भतीचा अम्बःचुं बुलाः म्वःल्हुयाः, हाम्वः तयाः चिकं बुलेमाःगु, काय् म्ह्याय् पिन्त मामं छ्यनय् हाम्वः तयाः तूया चिकं थाकेयेगु, हाम्वः मिइ क्वय्केमाःगु, हाम्वः नये माःगु अले हाम्वः दान याये माःगु नेवाः संस्कार व परम्परा दु ।

थौंया दिं नेवाः तयेस सँन्या नःसा शत्रु कमजोर जुइ धका धाइ । अथे हे, वाउँगु लाभाया छ्यं न्ह्यय्माः, शत्रुया छ्यं न्ह्ययागु ति जुइ धाइ । घ्यःचाकु व सम्हय्बजि नापं तःखाः, सन्याखुन्हा पलः नं नय्गु याइ ।

अथे हे, थौंया दिं नेवाः तयेस पितृ तर्पण यायेस्य घ्यःचाकु, तौला, न्या, सम्हय्बजि, जाकि, पलः, माय् आदि तयाः दान बीगु न याइ ।

नेपाल प्रहरीया ११ म्ह प्रहरी उपरीक्षक (एसपी) यात प्रहरी वरिष्ठ उपरीक्षक (एसएसपी) य् बढुवा यायेगु सिफारिस याःगु दु। बुधवाः न्हिनय् च्वंगु बढुवा समितिया बैठक लिपा गृह मन्त्रालययात बढुवा सिफारिस याःगु दु ।

प्रहरी प्रधान कार्यालय, नक्सालं प्रकाशन याःगु धलः कथं कृष्णकुमार महत, गोविन्दकुमार शाह, उमाशंकर पञ्जियार, अर्जुन चन्द ठकुरी, जनकराज पाण्डेय, सुरेन्द्रप्रसाद मैनाली, कृष्णहरि शर्मा पोखरेल, चक्रबहादुर सिंह, दिल्लीराज पन्त, मधुसुधन लुइँटेल व मोहनप्रसाद पोखरेलयात एसएसपीइ बढुवा यायेगु सिफारिस याःगु दु।

उकि मध्ये शाह, पञ्जियार व पाण्डेय एआईजी विश्वराज पोखरेलया ब्याचयापि खः। बढुवा सिफारिसय् मेमेपि न थ्व स्वया न्ह्यः अधिकृतया बढुवाय् छुटे जूपि एसपीपि खः। गृहया सिफारिस लिपा मन्त्रिपरिषदं छवाः लिपा यायेग निर्णय याइ ।

नेपाल कम्युनिस्ट पार्टी (नेकपा)या निगु पक्ष प्रचण्ड–माधव समूह व ओली समूह न निर्वाचन आयोगयात लिसः छ्वःगु दु।

निगु हे समूहपाखे पत्र वःगु धका निर्वाचन आयोगया प्रवक्ता राजकुमार श्रेष्ठं जानकारी बिःगु दु । पत्रय् छु लिसः वःगु धाःसा धाःगु मदु । ओली समूहया नेता सुवास नेम्वाङया टोली आयोग वःगु खः।

अथेहे मेगु पक्षया नेता लीलामणि पोखरेलं थःपिन्स बुझे यानागु विवरण न्हापा हे छ्व धुकागु दु धका धाःगु दु । नेता पोखरेलं थज्यागु इलय् संवैधानिक अंगं गल्ती कमजोरी यातकि थुकिइ दुरगामी असर लाइ धका ध्यानाकषर्ण यानागु दु धका धाःगु दु ।

निर्वाचन आयोगं वःगु पुस २३ गते निगु हे समूहयात राजनीतिक दल सम्बन्धी नियमावलीया नियम २५ कथं न्ह्यन्हुया दुने ‘सुधार जुगु विवरण’ पेश यायेत धाःगु खः। आयोगं तोके याःगु म्याद लिपागु दिं थौं निगु समूहपाखे लिसः बिःगु खः ।

सर्वोच्चं प्रतिनिधिसभा विघटन जुइ धुका मन्त्रिपरिषदय् थप नियुक्ति, हेरफेर वा कार्यविभाजन रोके यायेत माग यासे दायर याःगु रिट निवेदन ‘हेर्दाहेर्दै’ तया वइगु माघ ११ गते सुनुवाइ जुइ दु ।

न्यायाधीश विश्वम्भरप्रसाद श्रेष्ठ व सुष्मालता माथेमाया मंकाः इजलासय् म्हिगः सुनुवाइ जुयाच्वंगु इलय् ई अभावया कारण मेगु सुनुवाइया लागि वइगु माघ ११ गतेया लागि तोके याःगु दु। थ्व स्वया न्ह्यः पुस २० गते न्यायाधीश अनिलकुमार सिन्हाया एकल इजलासं सरकार नाप लिखित लिसः माग यासे म्हिगः छलफलया लागि निगु पक्षयात सःतिइगु आदेश जारी याःगु खः।

राष्ट्रपति कार्यालय शीतल निवास, प्रधानमन्त्री व मन्त्रिपरिषदया कार्यालययात विपक्षी दयेका वरिष्ठ अधिवक्ता दिनेश त्रिपाठी व अधिवक्ता लोकेन्द्रबहादुर ओली, केशरजङ्ग केसी, दिनेश लामिछाने न प्रतिनिधिसभा विघटन जुइ धुका मन्त्रिपरिषद् विस्तार मयायेगु माग यासे रिट निवेदन दायर याःगु खः।