कोभिड १९ या कारण ताः ईनिसे बन्द जुयाच्वंगु येँ महानगरपालिका दुने याःगु स्कूल तत्काल खुले जुइ मखू।

येँ महानगरपालिका शिक्षा विभागं थौं बुधवाः जिल्ला विपद् व्यवस्थापन केन्द्रया पदाधिकारी, विज्ञ व जिल्लाया सुरक्षा निकाय प्रमुखपि नाप याःगु सहलह लिपा महानगरपालिकां थथे निष्कर्ष पिकाःगु खः। उगु सहलहय् ब्वति कयादिसे येँ महानगरपालिकाया प्रमुख प्रशासकीय अधिकृत राजेश्वर ज्ञवालीें विदेशय् न यक्को सहरय् कोभिडया कारण स्कूल बन्द जूया च्वंगु धका धयादीसे आः येँ कोभिड नियन्त्रणय् वःगु अवस्था मदुगुलि हथाय् चाये मज्यु धका धयादीगु खः।

येँ प्रमुख जिल्ला अधिकारी कालिप्रसाद पराजुलीं थौं कन्ह्य चिकूया ई जुगुलि थज्यागु इलय् अनलाइन कक्षा प्रभावकारी दय्का छू ई लिपा जक चायेकूसा बालइगु धका धयादीगु खः। ‘आः चिकूया ई, थुगु इलय् विदा न जूइगु खः,’ वयकल धयादीगु दु, ‘स्वास्थ्य मन्त्रालयं स्वनिगलय् जक पुस महिना दुने ५० द्धः एन्टीजेन टेष्ट याये त्यःगु दु। थुगु ईया दुने अनलाइन कक्षायात प्रभावकारी दयेकेगु पाय्छिगु ई खः।’ मस्तय्गु स्वास्थ्य मापदण्ड थःम्हेयिा हे पालना यायेगु समस्या जुइ धका धयादीसे छःगु हे मापदण्ड दयेकेगु व चायेकूगु स्कूलय् अनुगमन यायेगु, स्वास्थ्य मापदण्ड पुरा मजूगु बन्द यायेगुे तयारी याये माःगुलि बःबियादीगु खः।

स्वास्थ्य मन्त्रालयया सहसचिव महेन्द्रमान श्रेष्ठं स्वास्थ्य मन्त्रालयं पुस महिनाय् करिब ५० हजारया एन्टिजेन टेष्ट यायेगु तयारी दुगु धका धयादीसे उकिया अवस्था स्वया जक न्ह्यने वनेत सुझाव बियादीगु खः।

काठमाडौं शिक्षा विकास तथा समन्वय एकाइ प्रमुख नन्दलाल पौडेलं येँ ११ मध्ये ९ वडा स्थानीय तह नं स्कूल सञ्चालन याये धुकुगु दु धका धयादीसे स्कूल सञ्चालन यागुलि कोभिड फैलै जुगुलि सरोकारवाला नाप सहलह यासे न्ह्यने वनेमाः धका धयादीगु खः। येँ महानगरपालिका शिक्षा विभाग प्रमुख नमराज ढकालं दक्को सरोकारवाला निकाय नाप सहलह यासे समन्वय याना न्ह्यने वनेमाः धका धादीगु खः।

येँ महानगरपालिकाया मेयर विद्यासुन्दर शाक्यं थःगु कार्यकालय् येँ दुने ३२ गु हे वडाया वडा भवन व्यवस्थित यायेगु, पुर्ननिर्माण यायेगु व न्हुगु निर्माण यायेगु अभियानयात पूरा याना हे त्वनिगु धका प्रतिवद्धता क्यनादीगु दु।

थौं वडा–२ या कार्यालय भवन शिलान्यास यायेगु झ्वलय् अथे धयादीगु खः। ५ करोड २८ लाख १० हजार ४५६ रुपैयाँ लागत अनुमान दुगु उगु वडा निर्माणया लागि बोलपत्रपाखे न्यु ड्रागन निर्माण सेवां भ्याट नाप ४ करोड १७ लाख १५ हजार ९४३ रुपैयाँ लागतय् कवोल याःगु दु। उगु भनवया शिलान्यास लिपा न्ववानादीसे २०७४ साल स्थानीय निर्वाचन लिपा न्हापागु कार्यपालिका बैठकं महानगरया केन्द्रीय भवन व दक्को वडां थःगु कार्यालय भवन निर्माण यायेगु निर्णय यानागु धका धका धयादीसे उगु निर्णय कार्यान्वय यायेगु झ्वलय् थौं वडा २ कार्यालयया भवन शिलान्यास जूगु दु ।

‘गुलि वडाया कार्यालय तल्ला थपे यायेगु ज्या जुगु दु। गुलि वडां टेण्डर प्रक्रिया न्ह्या वने धुकुगु दु,’ वयकलं, ‘झीगु कार्यकालय् येँ महानगरपालिकाया ३२ गु वडाय् सुविधा सम्पन्न भवन निर्माण याना उगु भवनपाखे सेवा बिइगु प्रतिवद्धता अनुशासर कथं ज्या जुया वयाच्वंगु दु धका धयादीगु खः। ३२ वडागु मध्ये वडा–८ य् सामान्य विवाद दुगु।

उगु थाय् बाहेक मेगु वडाय् विवाद रहित ढंगं पुर्ननिर्माण जुगु दु धका धयादीगु खः।’ मेयर शाक्य थःम्हेसिया जिम्मेवारी सम्हाले याये न्ह्यः अधिकांश वडा भवनपाखे सेवाग्राहीयात सहज सेवा प्रदान यायेत समस्या जुइ कथं ज्या जुगु खनेदु आः दक्कोे वडायात ईकथं विकास याना यकेगु प्रतिवद्धता प्वकादीगु खः।  ‘कोभिड–१९ या कारण आः न यक्को वडाय् दुहावनेत ग्यायेमाःगु अवस्था दु । थज्यागु गुनासो वयाच्वगु दु,’ धका वकलं धयादीगु खः। मेयर शाक्यं वडा–९ व १८ या भवन उलेज्या जुया सेवा प्रवाह सुरु जुइ धुकुगु दु धका जानकारी बियादीगु खः । ‘वडा–३ या भबन निर्माण ९५ प्रतिशत क्वचाये धुकुगु दु ।

वडा–४ या भवन पुस मसान्त दुने क्वचाइ,’ शाक्यं धयादीगु दु, ‘वडा– १४ य् गृह प्रवेश जुइ धुकुगु दु वडा–२६ या भबनपाखे सेवा सुरु जुइ धुकुगु दु। कोभिड–१९ या कारण उलेज्या जक ल्यःदनी ।’ इलय् हे निर्माण सम्पन्न जुइगु आवश्यकता खनेदुगु धका

ज्याझ्वय् धयादीसे वडाध्यक्ष राजेन्द्र श्रेष्ठं भुक्तानीइ समस्या जुइ मखु धका धयादीसे निर्माण यायेगु झ्वलय् निर्माण पक्षं ढिला याये मज्यु धका धयादीगु खः । करीब २१ आना जग्गाय् ३ तलाया वडा भवन निर्माण जुइ त्यःगु खः । भवनय् करीव ६० म्ह मनू न्ह्यनिगु सभा कक्ष व प्रशासनिक कक्षया न ब्यवस्था दु। येँ महानगरपालिकाया इन्जिनियर प्रेमबहादुर श्रेष्ठं वडा–६ य् ढलान ज्या जुइ धुकुगु दु व वडा–१२ य् टेन्डर प्रक्रिया न्ह्या वने धुकुगु दु धका जानकारी बियादीगु खः।  ‘वडा–२२ य् निगु तल्ला ढलान जुइ धुकुगु दु। वडा–२१ व २९ य् टेन्डर प्रक्रिया जुइ धुकुगु दु,’ धका धयादीसे, ‘वडा–३१ य् सिलान्यास जुइ प्रक्रियाय् दु, वडा–१६ टेन्डर प्रक्रिया ल्यःदनी।’ धका धयादीगु खः। थिंलाथ्व द्धितीया ११४१, पुस १ गते 

स्वनिगलय् २४ घण्टाया दुने थप ३९१ म्ह कोरोना संक्रमित जूगु दु धका स्वास्थ्य तथा जनसंख्या मन्त्रालयं धाःगु दु ।

पुष्टि जूपि मिसापि १६३ व मिजंपि २२८ म्ह खः।

थौं येँ जक २९४म्हेसित कोरोना सक्रमित जूगु दु धका मन्त्रालयं धाःगु दु।

अथेहे, ख्वपय् २० म्ह व यलय् ७७ म्हेसित संक्रमित थपे जूगु दु।

वःगु २४ घण्टाया दुने ८४७ म्ह कोरोनामुक्त जूगु दु धका स्वास्थ्य तथा जनसंख्या मन्त्रालयं धाःगु दु।

थ्व नाप आःतक कोरोना संक्रमणमुक्त जूपि २ लाख ३९ हजार ४१६ म्ह थ्यःगु दु।

अथेहे २४ घण्टाय् १३ म्ह सीगु दु।

थ्व नाप आःतक कोरोना संंक्रमणं सीपि १ हजार ७४३ म्ह थ्यःगु दु।

स्वास्थ्य तथा जनसंख्या मन्त्रालयया कथं थौं वःगु २४ घण्टाया दुने थप ७३६ म्ह कोरोना संक्रमण पुष्टि जूगु दु ।

संक्रमण पुष्टि जूपि २९१ म्ह मिसा व मिजंपि ४४५ म्ह खः। थ्व नाप आःतक नेपालय् २ लाख ५० हजार ९१६ म्ह कोरोना संक्रमण खने दुगु दु।

आःतक पीसीआर परीक्षणयापि १८ लाख ४९ हजार १३६ म्ह थ्यःगु दु । २४ घण्टाया दुने ५ हजार ५५५ म्हेसिगु पीसीआर परीक्षण याःगु खः।

देय्न्यकं सक्रिय संक्रमितपि ९ हजार ७५७ म्ह दु । अथेहे ४५२ म्ह क्वारेन्टाइनय् च्वना च्व.गु दु।