अपी पावर कम्पनीयात हकप्रदन निष्कासन अनुमति बिगु दु।

नेपाल धितोपत्र बोर्ड कम्पनीयात वैशाख १९ गते कम्पनीयात १ः०.२९३८ प्रतिशतया अनुपात हकप्रद निष्कासन यायेगु अनुमति बिगु दु ।

कम्पनीं २०७७ फागुन ९ गते हकप्रद सेयर जारी यायेगु अनुमति माग यासे नेपाल धितोपत्र बोर्डय् आवेदन बिगु खः ।

कम्पनीं  प्रतिकत्ता १०० रुपैयाँ अकित मुल्यय् हाल कायम चुक्ता पुँजीया ०.२९३९ प्रतिशत जुइगु ५६ करोड ७० लाख रुपैयाँ बराबरया ५६ लाख ७० हजार कित्ता हकप्रद सेयर जारी यायेगु अनुमति माग यागु खः।

बोर्ड कम्पनीयात उगु हकप्रद सेयर जारी यायेगु स्वीकृत बिगु खः । कम्पनीं  हकप्रद सेयर जारी यायेगु बिक्री प्रबन्धकय् मुक्तिनाथ क्यापीटलयात नियुक्त यागु दु।

सूर्य चिं ज्वना निर्वाचितजुपि लुम्बिनी प्रदेशया प्रदेश सभा सदस्य धर्मबहादुर लाल श्रीवास्तव व अजय शाहीं न मुख्यमन्त्री शङ्कर पोखरेलयात हे समर्थन दु धका धागु दु।

कपिलवस्तु–२ ख पाखे निर्वाचित श्रीवास्तव व नवलपरासी पश्चिम १ ख पाखे निर्वाचित शाहीपिन्स विज्ञप्ति पिकया सूर्य चिंपाखे निर्वाचित जुगुलि थःपि एमाले संसदीय दल हे दुगु प्रतिबद्ध दु धका धयादीगु दु।

कुलप्रसाद केसी तक सरकार गठनया सन्दर्भय् दाबीयासे हस्ताक्षर बदनियत व त्रुटिपूर्ण जुगु धका विज्ञप्तिइ धयातःगु दु ।

‘जिपि नेकपा एमाले प्रदेश संसदीय दलप्रति प्रतिबद्ध दुगु संसदीय दलया नेता माननीय मुख्यमन्त्री शङ्कर पोखरेलप्रति हे समर्थन दु धका स्पष्ट याये चाहे जू’, विज्ञप्तिइ धयातःगु दु ।

कर्णाली प्रदेश सरकारं कोरोना भाइरस (कोभिड–१९) संक्रमणं सीपिनिगु परिवारयात राहत कथं छगु लाख रूपैयाँ बिइगु निर्णय यागु दु।

शुक्रवाः च्वंगु प्रदेश मन्त्रिपरिषदया बैठकं कोरोना संक्रमण सीपिनिगु परिवारयात राहत कथं उगु रकम उपलब्ध यायेगु निर्णय जुगु धका प्रदेश सरकारया प्रवक्ता विमला केसीं जानकारी बिगु दु।

येँ महानगर दुने थीथी थासय् फोहोर उत्पादनया मात्रा ३० निसे ५० प्रतिशत तक घटे जुगु धका वातावरण व्यवस्थापन विभागं धागु दु ।

सामान्य इलय महानगरय् न्हि २५ गः गाडी तक फोहोर ल्याण्डफिल साइटय् वना च्वंगु खः । थौं १३ गः गाडी उखे पाखे वनेगु तयारी दु ।

वातावरण व्यवस्थापन विभागया प्रमुख हरिकुमार श्रेष्ठया कथं व्यवसायिक क्षेत्रय्  यक्को कम जुगु दु सा छेँखापति न कम जुगु दु, सतकय् जम्मा जुइगु फोहोर ५० प्रतिशत क्वहा वंगु दु धका धयादीगु दु ।

अथेहे फोहोरमैला व्यवस्थापन संघया अनुमान भचा फरक खनेदु । संघया महासचिव मीत्र घिमिरेया कथं पिने बन्द जुगुलि मनू तयस छेँ सफा यागु इलय् फोहोर पिहावंगु खः । थ्व न्ह्यागु इलय् न जुइ मखु । उकि आः  फोहोरया मात्रा अझ न घटे जुइगु सम्भावना दु ।

वयकलं उदाहरण बिया धयादीगु दु, वडा ३, ४ व ७ पाखे न्हापा स्वया न्हि ८ ट्रिपर फोहोर संकलन जुइ थाय् आः ६ ट्रिपर जक संकलन जुया च्वंगु दु ।

होटल, रेष्टुरेन्ट, पार्टी प्यालेस बन्द जुगुलि फोहोर उत्पादन जुइगु कम जुगु दु ।

सरकारं राष्ट्रिय जनगणना सम्बन्धी तालिम स्थगित यागु दु ।

कोरोना संक्रमण अप्वोया वंगुुलि थ्व हे वैशाख १६ गतेनिसे सुरु यायेत्यंगु गणक व सुपरिवेक्षकपिनिगु तालिम स्थगित यागु दु।

केन्द्रीय तथ्यांक विभागयया सूचना अधिकारी तिर्थ चौलागाई न जनगणना प्रयोजनया लागि जुया वयाच्वंगु तालिम स्थगित जुगु दु धका जानकारी बिगु दु ।

जनगणना नाप सम्बन्धी थप निर्णय यायेत राष्ट्रिय योजना आयोगया तथ्यांक परिषदया बैठक थौं च्वने त्यंगु दु । सरकारं वइगु आगामी जेठ २५ निसे असार ७ गते तक झीनिक्वंगु राष्ट्रिय जनगणना याये त्यंगु खः ।

जनगणनाया स्थलगत तथ्यांक संकलन यायेत ३९ हजार गणक व आठ हजार सुपरिवेक्षक परिचालन यायेगु योजना दु ।