Display Style:
Column Style
थप २५५९ म्हेसित कोरोना संक्रमण पुष्टि,न्याम्ह सीत
लहनान्युज | चौलाथ्व एकादशी ११४१,बैसाख १० शुक्रवाः
वंगु २४ घण्टाया दुने थप २५५९ म्हेसित कोरोना भाइरस (कोभिड–१९) या संक्रमण पुष्टि जूगु दु ।
९६६४ नमूना परीक्षण यागुलि पीसीआरपाखे ८७९८म्ह व एन्टीजेनपाखे ८६६ म्ह याना जम्मा २५५९ म्हेसित कोरोना संक्रमण पुष्टि जूगु दु।
स्वास्थ्य मन्त्रालयया कथं वंगु २४ घण्टाय् न्याम्हे सिगु ज्याना वंगु दु ।
लुँया भाः न्यासः क्वहावल
लहनान्युज | चौलाथ्व एकादशी ११४१,बैसाख १० शुक्रवाः
लुँया भाः थौं न्यासः क्वहावःगु दु।
म्हिगः तोलाया ९२ हजार २ सय रुपैयाँ जुगु थौं न्यासः क्वहावया ९१७०० रुपैयाँ जूगु दु धका नेपाल सुनचाँदी व्यवसायी महासङ्घं धाःगु दु ।
अथेहे, थौं वहः तोलां झीन्यातका क्वहा वःगु दु।
म्हिगः तोलां १३३५ रुपैयाँ जूगु वहः थौं १३२० रुपैया कारोबार जुगु दु ।
स्वयभ्यूया कर्मराज महाविहार लिसें १७खाः छेँया पुनर्निर्माण क्वचाल
लहनान्युज | चौलाथ्व एकादशी ११४१,बैसाख १० शुक्रवाः
२०७२ सालं भुखाचय् लाना क्षतिग्रस्त जूगु स्वयभ्यू महाचैत्य परिसरय् दूगु कर्मराज महाविहारया पुनः निर्माण क्वचाःगु दु ।
अथेहे पूजारीया कथं ज्या यानावयाच्वम्ह बुद्धाचार्य परिवारपिनिगु १७ खाः छेँ न पुननिंर्माण जूगु स्वयम्भू पुनर्निर्माण समितिया नायः ईश्वरमान डंगोलं जानकारी बियादिल ।
पुनर्निर्माणया नितिं कर्मराज महाविहारया १७औं अवतारी गुरु कर्मपा थिन्ले दोर्जें आर्थिक ग्वाहालि यानादिगु खः । स्वयम्भू परिसरया सलसःनिसें च्वनावयाच्वंपिं बुद्धाचार्य पूजारी परिवारया १७ खाः छेँयात हाउस पुलिङ प्रणालीपाखें छगू हे थासय् पुरातत्व विभागया मापदण्ड कथें छगू हे आकारय् दयेकूगु खः ।
हाउस पुलिङ प्रणालीपाखें निर्माण क्वचाःगु येँया थ्वः न्हापांगु योजना खः । पुनर्निर्माण जूगु संरचनापिनिगु थ्वहे बैशाख १३ गते लःल्हायेगु पत्रकार सम्मेलनय् जानकारी बियादिगु खः ।
कोरोना संक्रमण अप्वसें पशुपतिनाथ द्यःग थौंनिसें बन्द
लहनान्युज | चौलाथ्व एकादशी ११४१,बैसाख १० शुक्रवाः
कोरोनाया संक्रमण अप्वया वनेधुंकाः थौंनिसें पशुपतिनाथ, गुह्येश्वरीलिसें पशुपति क्षेत्रया देगः सर्वसाधारणया लागिं बन्द याःगु दु ।
पशुपति क्षेत्रया देगलय् नित्य पूजा धाःसा मदीगु पशुपति क्षेत्र विकास कोषं न्ह्यथंगु दु । सरकारं स्वास्थ्य मापदण्ड जारी याःगुलिं व हे कथं देगः बन्द यानागु कोषया धापू दु । मेगु व्यवस्था मजूतल्ले पशुपतिनाथ, गुह्येश्वरी लिसेंया देगः बन्द जुइ ।
थगुने नं कोरोनापाखें तापायेत जूगु बन्दाबन्दीया हुनिं गुलातक्क पशुपतिनाथ, गुह्येश्वरीलिसेंया देगः भक्तजनया लागिं बन्द याःगु खः । २०७६ चैत ११ गतेनिसें बन्द जूगु देगः २०७७ पुस १ गते जक चायेकूगु खः ।
देगः बन्द जूगुलिसें पशुपति क्षेत्रया घाट सेवाय् नं सरकारं क्वःछ्यूगु मापदण्ड स्वयां अप्वः मनूत उपस्थित मजुइत कोषं आह्वान याःगु ुदु ।
घाट सेवाय् वइपिं सकसित अनिवार्य रुपं मास्क तयाः स्वास्थ्य सुरक्षाया विधि लीत कोषं आह्वान याःगु दु ।
वैशाख १५ गते निसे खुलामञ्चय् च्वंगु बसपार्क हटे याइगु
लहनान्युज | चौलाथ्व दशमी ११४१,बैसाख ९ बिहीवाः
वैशाख १५ गते निसे खुलामञ्चय् च्वंगु बसपार्क हटे याइगु जुगु दु ।
थौं बिहीवाः येँ महानगरया प्रमुख प्रशासकीय अधिकृत राजेश्वर ज्ञवालीया अध्यक्षताय् यातायात व्यवस्था विभाग व ट्राफिक प्रहरी महाशाखाया अधिकारीपि दथेइ च्वंगु बैठकं अथे निर्णय याःगु खः ।
खुलामञ्च खाली याना अन च्वंगु संरचना हटे याये त्यनागु धका प्रमुख प्रशासकीय अधिकृत ज्ञवाली धाःगु दु । अन सञ्चालन जुयाच्वंगु सार्वजनिक सवारीयात निगु विकल्प बिगु दु।
टिकट काउन्टर तया मध्यम दूरीया गाडी गोंगबु बसपार्क तक सञ्चालन यायेगु । अथेहे चिहाकःगु दूरीया सवारी ‘पिक एण्ड ड्रप’ प्रणालीपाखे चले यायेगु जुइ धका वयकलं धयादीगु दु।
पिक एण्ड ड्रप प्रणालीया गाडीपिन्त सार्वजनिक सूचना प्रकाशन याइ । उकिया आधारय् निवेदक यातायात सञ्चालकपिनिगु पाखे निवेदनया आधारय् महानगर व ट्राफिक प्रहरी महाशाखां व्यवस्थापन याइ धका धयादीगु खः। बसपार्क सारे याना वैशाख १५ गतेया दुने महानगरं भौतिक संरचना हटे यायेगु।
