यलया चापागाउँलय् ५२ दँ न्ह्यः खुया यकूगु बज्रबाराही द्यःया मूर्ति चापागाउँलय् हे प्रतिस्थापन याःगु दु ।

येँया छाउनीया राष्ट्रिय सङ्ग्रहालय तया तःगु मूर्ति म्हिगः सोमवाः सिन्दुर जात्रा याना चापागाउँ बसपार्कया आगँछेय् प्रतिस्थापन याःगु दु। गोदावरी नगरपालिका व बज्रबाराही खः गुठीया मंकाः कुतलं मूर्ति थःगु हे थासय् प्रतिस्थापन याःगु खः।

२०२५ सालय् बज्रबाराही माईया मूर्ति आगछेँयं हे खुया यकूगु खः। लिपा त्रिभुवन विमानस्थलय् वांछ्या तःगु अवस्थाय् लुगु खः धका नगरपालिकाया मेयर गजेन्द्र महर्जनं धयादीगु दु।

कानुनी प्रक्रिया पूरा याना पुरातत्व विभागया निर्णय कथं गोदावरी नगरपालिकाया मेयर, उपमेयर, जिल्ला प्रशासन कार्यालय ललितपुरया प्रतिनिधि, पुरातत्व विभागया प्रतिनिधि व स्थानीय खः गुठीयारया गुठीयारपिनिगु उपस्थितिइ म्हिगः सङ्ग्रहालय प्रमुख जयराम श्रेष्ठं खः गुठीयात मूर्ति विधिवत रुपं हस्तान्तरण याःगु खः।

थ्व हे वइगु वैशाख १३ गते चैत शुक्ल पूर्णिमाया दिं बज्रबाराही माईया जात्रा यायेगु परम्परा दु ।

नेपालय् कोरोना भाइरस सङ्क्रमणया कारण थप ११ म्हेसिगु ज्यान वःगु दु। अथेहे वःगु २४ घण्टाय् जक १७३६ म्हेसित कोरोना सङ्क्रमण पुष्टि जूगु दु ।

८७३८ म्हेसित परीक्षण याःगुलि १७३६ म्हेसित सङ्क्रमण खने दुगु धका स्वास्थ्य मन्त्रालयं धाःगु दु ।

८०५५ म्हेसित पीसीआर परीक्षण यागुलि १६६७ व ६८३ म्हेसिगु एन्टिजेन परीक्षण यागुलि ६९ म्ह सङ्क्रमण खनेदुगु खः।

थौं थपे जुगु नाप नेपालय् कोरोना सङ्क्रमण पुष्टि जूपि आःतक निगु लाख ८७ हजार ५६७ म्ह थ्यःगु दु। अथेहे २५१ म्ह सङ्क्रमणमुक्त जूगु दु । थ्व नाप निगु लाख ७५ हजार ८०६ म्ह थ्यःगु दु ।

आःतक सक्रिय सङ्क्रमितपि ८६५९ म्ह दु। 

हलिं नेवाः दिंया लसताय् क्यानेडियन नेवाः गुथिं टोरोन्टोय् भच्र्युअल रुपं ज्याझ्वः याःगु दु ।

ज्याझ्वलय् क्यानडाया ब्राम्प्टन नगरका मेयर प्याट्रिक ब्राउनया तकं उपस्थिती दुगु खः । ज्याझ्वलय् मेयर ब्राउनं नेवाः समुदायया संस्कृति व सम्पदाया प्रशंसा यासें नेवाः समुदायया उपस्थितिं ब्राम्प्टन नगरया संस्कृतियात तकं तब्याकूगु धयादिल ।

अथे हे हलिं नेवाः दबूया केन्द्रीय नायः सिजन श्रेष्ठं हलिंया थीथी थासय् न्यनाच्वंपिं नेवाःतय्त छधी छप्पँ दय्काः नेवाः संस्कृति, भाषा, सम्पदाया संरक्षण याय्गु आज्जुं प्यदँ न्ह्यःनिसें हलिं नेवाः दिं हनावयागु धयादिल ।

ज्याझ्वलय् ब्रोक बिश्वबिद्यालयया प्रा. डा. टम ओ नील, नेपलिज क्यानेडियन हेरिटेज सेन्टरया नायः डा. हरि गुरुङ, टोरोन्टो बिश्वबिद्यालयस नेवाः बौद्ध धर्मया थीथी पक्षय् पिएच.डी. यानाच्वनादीम्ह ईयन टर्नर, उगु हे बिश्वबिद्यालयस नेवाः बौद्ध धर्म अन्तर्गत ‘बज्रयोगिनी’ बिषयस विद्यावारिधि यानाच्वनादीम्ह आम्बर मूर, सोसियल वर्कर प्रकिशा प्रधान, गुथिया छ्यान्जे डा.प्रज्वल प्रधान, गुथिया न्वकू उत्तम माकःजु, आयुशी अवाल, गुथिया नायः प्रकाश प्रधानलिसें नं हलिं नेवाः दिंया भिन्तुना ब्युसें थःथःगु नुगःखँ तयादीगु ख ।

अथे हे, रंजना सैंजु व अमर सैंजुं सितार व मुर्चुङ्गाय् मंगल धुन थानाः न्यंकादीगु खः । शुभद्रा गुरुङं बुद्ध बन्दना न्यंकादीगु खः । अथे हे, बिमल श्रेष्ठ, प्रकाश प्रधान, रंजना सैजु, अम्बर सैन्जु, लक्ष्मण मुनि श्रेष्ठ, डा. हरि गुरुङ, डा. प्रज्वल प्रधान, सुमन राजवंशी, रबिन प्रधानलिसें नं फागु म्ये, फागु धुन, नेवाः लोक म्ये न्ह्यब्वयादीगु खः । ज्याझ्वः धुंकाः सकलसिनं फागु नं म्हितूगु खः ।