Display Style:
Column Style
मदनकृष्ण श्रेष्ठलिसें ५म्ह छेँजपिं कोरोना संक्रमण
लहानान्युज | चौलाथ्व सप्तमी ११४१,बैसाख ६ सोमवाः
ख्यालि जुजु व कलाकार मदनकृष्ण श्रेष्ठ कोरोना संक्रमित जुयादीगु दु ।
श्रेष्ठलिसें वय्कया परिवारया ५म्ह छेँजयात कोराना संक्रमण जूगु खः ।
कलाकार श्रेष्ठं सोमबाः सामाजिक सञ्जाल फेसबुकपाखें थलिसें काय्, म्ह्याय, भौ व छेयात तकं कोरोना पोजेटिभ जूगु जानकारी बियादिगु खः ।
वय्कलं कोरोनायात हल्का कथं मकायेत सकसित इनाप यानादिगु दु ।
वःगु २४ घण्टाय् थप १२८१ म्ह संक्रमण पुष्टि
लहानान्युज | चौलाथ्व सप्तमी ११४१,बैसाख ६ सोमवाः
वःगु २४ घण्टाया दुने थप १२८१ म्हेसित कोरोना भाइरस संक्रमण पुष्टि जूगु दु।
स्वास्थ्य तथा जनसंख्या मन्त्रालयया कथं ७००१ म्हेसित पीसीआर परीक्षण याःगुलि १२२७ व ५४७ म्हेसित एन्टिजेन परीक्षणय् ५४ म्ह याना १२८१ म्हेसित संक्रमण पुष्टि जुगु खः ।
थ्व नाप नेपालय् कोरोना संक्रमितपि आःतक निगु लाख ८५ हजार ९०० म्ह थ्यःगु दु।
अथेहे सक्रिय संक्रमितपिनिगु ल्याः ७२५४ म्ह थ्यःगु दु। लिपागु २४ घण्टाय् जक कोरोना भाइरस संक्रमणमुक्त जूपि २५५ म्ह थ्यःगु दु ।
कोरोना संक्रमणया कारण थप च्याम्ह थौं सी गु दु ।
सर्वाेच्च अदालतया न्यायाधीशय् चुडाल व सुवेदी नियुक्त
लहानान्युज | चौलाथ्व सप्तमी ११४१,बैसाख ६ सोमवाः
राष्ट्रपति विद्यादेवी भण्डारीं डा. कुमार चुडाल व नहकुल सुवेदीयात सर्वाेच्च अदालतया न्यायाधीशय् नियुक्त यानादीगु दु ।
राष्ट्रपतिं नेपाःया संविधानया धारा १२९ या २ कथं न्याय परिषद्या सिफारिसय् थौं चुडाल व सुवेदीयात नियुक्त याःगु राष्ट्रपति ज्याकूया प्रवक्ता रुपनारायण भट्टराईं पितब्वगु विज्ञप्तिइ न्ह्यथनातःगु दु ।
वय्कपिन्त संसदीय सुनुवाई विशेष समितिं छुं दिं न्ह्यः अनुमोदन यानादिगु खः ।
भिटामिन ए व किमिया वासः नकिगु
लहानान्युज | चौलाथ्व सप्तमी ११४१,बैसाख ६ सोमवाः
सरकारं ५दँ तक्कया मस्तयेत थौं भिटामिन ए व किमिया वासः नकाच्वंंगु दुु ।
थौं त्वफिउपिंमस्तयते कन्हय् नं भिटामिन ए व किमिया वासः नकेगु ज्याझ्व दु । ६ ला निसें ५ दँ तक्कया मस्तयेत भिटामिन ए व दच्छि निसें ५ दँ तक्कया मस्तयेत भिटामिन ए व किमि निगुलिं वासः नकेगु स्वास्थ्य मन्त्रालयं न्ह्यथंगु दु ।
राष्ट्रिय भिटामिन ए ज्याझ्वपाखें सरकारं दँय्दसं भिटामिन ए व किमिया वासः नकावःगु दु । थःपिन्त पायक जुइगु वितरण केन्द्रय् वना मस्तयेत भिटामिन ए व किमिया वासः नकेत मन्त्रालयं सकल अविभावकयात इनाप याःगु दु ।
थुगुसिइि कोरोना संक्रमणया जोखिम दूगुलिं वासः नकेगु थायेतक्क वनिबलय् स्वास्थ्य सुरक्षाया मापदण्ड पालना यायेत मन्त्रालयं इनाप नं याःगु दु ।
वितरण केन्द्रय् म्वःम्वः मयायेत , छम्ह मनू व मेम्ह मनू दथुइ म्होतिइ निगू मिटरया भौतिक दूरी कायम यायेत, अनिवार्य कथं मास्क छ्यलेत , साबुं लःखं तक्वःमछि ल्हा सिलेत व सेनिटाइजर छ्यलेत मन्त्रालयं इनाप याःगु दु ।
विद्यार्थीपिन्त छात्रवृत्ति लःल्हात
लहानान्युज | चौलाथ्व सप्तमी ११४१,बैसाख ६ सोमवाः
नन्दी विद्यार्थी कल्याण कोषपाखें विद्यार्थीपिन्त छात्रवृत्ति लःल्हाःगु दु ।
वंगु शनिबाः छगू ज्याझ्वः यासें किवानिज इन्टरनेशनलया नेपालया ग्वाहालिं कोषं विद्यार्थीपिन्त छात्रवृत्ति लःल्हाःगु खः ।
ज्याझ्वलय् कोषया न्वकू राजेन्द्रमान डंगोलं कोष व कोषं यानावःगु ज्याखँया बारे जानकारी याकादिल । अथे हे, कोषया नायः लक्ष्मण लमसालं सुं नं मचात कमजोर आर्थिक अवस्थाया हे हुनिं शिक्षां बन्चित जुइम्वाःलेमा धइगु थःपिनिगु आज्जु खःगु धयादिल ।
येँ महानगरपालिका वडा नम्बर १ या वडाध्यक्ष भरतलाल श्रेष्ठं समाजपाखें थज्याःगु ग्वाहालि दयाच्वन धाःसा देय् शिक्षाया जलं जहां थीगु धासें कोषया ज्याया प्रशंसा यानादिल ।
ज्याझ्वलय् नन्दी मा.वि.या प्रधानाध्यापक गीता काफ्ले, नन्दी रात्री मा.वि.या प्रधानाध्यापक मोहन प्रसाश शर्मा, कोषया सल्लाहकार लिसें संचालक समितिया नायः तुलसी साय्मि, किवानिज नेपालया डिस्ट्रिक गभर्नर मोहन लम्साल लिसेंया उपस्थिती दुगु खः ।
