वःगु २४ घण्टाया दुने ९६६ म्ह कोरोना संक्रमणमुक्त जूगु दु।

थ्व नाप आःतक संक्रमणमुक्त जूपि २ लाख ४५ हजार ७०९ म्ह थ्यःगु दु।

आःतक नेपालय् सक्रिय संक्रमितपि ७७२९ म्ह थ्यःगु दु। वःगु २४ घण्टाय् कोरोना भाइरस संक्रमणया कारण ३ स्वम्ह सी धुकुगु दु।

थ्व नाप सीपिनिगु ल्या १७९८ म्ह थ्यःगु दु धका स्वास्थ्य तथा जनसंख्या मन्त्रालयं धाःगु दु। 

माधवकुमार नेपालयात अध्यक्ष दय्क्रूगु नेपाल कम्युनिस्ट पार्टी प्रचण्ड–माधव समूहया निर्णय केन्द्रीय कमिटी सदस्य प्रभु साह नं विरोध याःगु दु।

थौं मंगलवाः थापाथली कार्की पार्टी प्यालेसया बैठकं निर्णय यायेवं साह न विरोध याःगु खः ।

तर प्रवक्ता नारायणकाजी श्रेष्ठं प्रस्ताव पारित जुइ धुकुगु धाःसे उगु विषय सहलह जुइ मखु धका धाःग खः।

साह नं निम्ह अध्यक्ष जुइ वलय् नौटंकी खने दइ धका छम्ह हे अध्यक्ष जुइ माःगु धारणा तयादीगु खः।

नेपाली कांग्रेसया केन्द्रीय समिति बैठक सानेपाय् पार्टी कार्यालयय् सुरु जूगु दु।

प्रधानमन्त्री केपी शर्मा ओलीं संसद् विघटन यायेवं ब्बलःगु परिस्थिति व भावी रणनीति तय यायेगु लागि कांग्रेसं बैठक सःतूगु खः।

कांग्रेसं थ्व स्वया न्ह्य न प्रधानमन्त्री ओलीं ल्ह्वःगु पलाः लोकतन्त्र व संविधान विरोधी जुगु धाःसे विरोध याये धुकुगु दु।

सोमवाः कांग्रेस पार्टी कार्यालयय् नेकपाया दाहाल व नेपाल समूह नाप जसपाया नेतापि दुथ्याःगु छगु बैठकपाखे न प्रधानमन्त्रीया उगु पलाः लोकतन्त्र व संविधान विरोधी जूगु निष्कर्ष पिकाःगु खः। 

संसद विघटनया निर्णयविरुद्ध प्रतिनिधिसभाया सदस्यपिन्स रिट बिइत सर्वोच्च अदालत वनेगु तयारी यानाच्वंगु दु।

नेपाल कम्युनिस्ट पार्टीया हे सांसदपि देव गुरुङ, कृष्णभक्त पोखरेल, शशी श्रेष्ठ व रामकुमारी झाँक्रीपि रिट तयेगु लागि मंगलवाः सर्वोच्च वने त्यःगु खः।

उमिसं प्रधानमन्त्रीया सिफारिसय् राष्ट्रपतिं संसद विघटन यायेवं थःपि न्यादँया लागि नागरिकपिनिगु प्रतिनिधित्व यायेगु हकपाखे वञ्चित जूगु धाःसे राष्ट्रपति संसद विघटन यायेगु ज्याय् उत्प्रेषणया आदेशपाखे बदर यायेगु माग याःगु खः।

प्रधानमन्त्रीं संसद विघटन याःगु व निर्वाचनया मिति सिफारिस व उगु  सिफारिसया आधारय् राष्ट्रपतिपाखे संसद विघटनया निर्णयय् जिपि निवेदकपिनिगु न्यादँ तक प्रतिनिधित्व यायेगु हकपाखे वञ्चित जूगु धका निवेदन तःगु खः।

सांसद कृष्णभक्त पोखरेलया कथं रिटय् राष्ट्रपति विद्यादेवी भण्डारी, प्रधानमन्त्री केपी शर्मा ओली व सभामुख अग्निप्रसाद सापकोटायात विपक्षी दयेका तःगु खः।

जनता समाजवादी पार्टी (जसपा)या केन्द्रीय कार्यकारिणी समितिया बैठक सुरु जूगु दु।

तुल्सीलाल स्मृति भवन बालकुमारीइ जुगु बैठकय् संसद विघटनया विरोधय् पार्टी नं कन्ह्य बुधवाः देय्न्यकं प्रदर्शन यायेगुलि सहलह जुयाच्वंगु खः।

उगु बैठकय् संघीय परिषद अध्यक्ष बाबुराम भट्टराई, केन्द्रीय कार्यकारिणी समितिया अध्यक्षपि महन्थ ठाकुर व उपेन्द्र यादवपि  नाप मेपि नेता तय्गु न सहभागी दुगु खः।