Display Style:
Column Style
बसपार्कय् ११२ गु पसः महानगरपालिकां सिलयात
लहनान्युज | चौलाथ्व चौथी ११४१,बैसाख ३ शुक्रवाः
ताः ईनिसे विना सम्झौता सञ्चालन जुयाच्वंगु पुलागु बसपार्क न्ह्यने राष्ट्रिय सभागृहनाप स्वागु सिटी मार्केटय् ११२ गु पसः येँ महानगरपालिकां सिलयाना बिगु दु।
येँ महानगरपालिकाया प्रमुख प्रशासकीय अधिकृत राजेश्वर ज्ञवालीं ताः ईनिसे विना सम्झौता सञ्चालन जुयाच्वंगु व पटक–पटक ताकेता यास वास्था मयागुलि अथे शिलबन्दी यायेमाःगु धका जानकारी बियादीगु खः।
येँ महानगरपालिका राजश्व विभाग प्रमुख डाक्टर शिव अधिकारीं सिटी मार्केटय् व्यवसाय याइपि व्यवासायीपिन्स २०७६ चैत्र तक व्यवसायीपिनिगु संघ पाखे भचा बहाः पूगु खःसा वया लिपा पटक–पटक ताकेता यागु खःसा वास्था मयागुलि सिलबन्दी याये बाध्य जुगु धका जानकारी बियादीगु खः ।
वयकल धयादीगु दु येँ महानगरपालिकाया खरिद विभागं आय ठेक्का बियागु सार्वजनिक सूचना प्रकाशित याःसा तक छु न प्रस्ताव पेश मयागु धका न जानकारी बियादीगु दु ।
नगरप्रहरी प्रमुख धनपती सापकोटां पटक–पटक सूचं बिउसा हटे मयागुलि प्रहरी व नगरप्रहरीं सिल यानगु जानकारी बियादीगु खः ।
मध्यपुरथिमीइ हनिगु नखः “सिन्दुर जात्रा”
लहनान्युज | चौलाथ्व तृतीया ११४१,बैसाख २ बिहीवाः
थिमी लागाय् म्हिगः झःझः धायेका बालकुमारी, विष्णुकुमारी, विष्णुवीर, सिद्धिकालीलिसें ३२गू द्यःखः त्वाःत्वाः पतिकं चाःहिका सिन्दुर जात्रा हन । उगु झ्वलय् द्यः जात्रा यासें थःथम्ह सिन्दुर इला न्ह्यापुसेच्वंक जात्रा हंगु खः ।
विस्केट जात्राया झ्वलय् मध्यपुर थिमीइ जक थुगू नखः नेवाःतय्सं हनावयाच्वंगु दु ।
मू द्यःयात खःतय् तया धिमेबाजं लिसें सिन्दुर जात्रा याइगु चलन दु । जात्रा दक्व चोक, त्वाःत्वालय् थ्यंकी अल भ्mयालं कःसि च्वना सिन्दुर, स्वाँ ह्वःला लसकुस याईगु चलन दु ।
जात्राय् क्वँय् बाजं, भुस्या, धिमे थाना द्यःयात खटय् तयाः थाय् थासय् थ्यंकी अले थःथम्ह सिन्दुर इला न्ह्यापुसेच्वंगु हनिगु नखः जूगुलिं थुगु जात्राया सिन्दर जात्रा धाइगु याः ।
बालकुमारी, विष्णुकुमारी, विष्णुवीर, सिद्धिकालीलिसें द्यःयात थीथी थासय् चाहिका, सिन्दुर ह्वलाः अले धिमेया तालय् प्याखँ हुला जात्रा न्ह्याइपुसेच्वंक हनिगु खः ।
च्याचाः गुन्हूतक्क हनिगु ऐतिहासिक लिसें प्रसिद्ध बिस्का जात्राया ईलय् ख्वःपय् दूगु अष्टमात्रिका, गणेश व भैरवया द्यः लागाय् थीथी जात्रा त जुई उपिं दक्व जात्रा थःथवें स्वापू दूगु जात्रा खः ।
दुमाजुया जात्रा मसिधतले यःसिं थने मज्यूगु परम्परा दूगु स्थानीयपिनिगु धापू दु ।
च्याक्वःखुसी मे प्वाः खनादिल बुद्धकृष्ण श्रेष्ठं
लहनान्युज | चौलाथ्व तृतीया ११४१,बैसाख २ बिहीवाः
बिस्का जात्रा अन्तरगत ख्वपःया बोडे थौं मे प्वा खनिउ जात्रा जुल । थुगुसी बुद्धकृष्ण बाग श्रेष्ठं च्याक्वःखुसी मे प्वा खना जात्रा न्ह्याकल ।
गुकिया नितिं चैतया लिपांगु वा निसें निराहार च्वनादीगु खः । वय्कलं लः जक त्वना च्वनादीगु खः । निरआहार च्वनेबलय् मे छुं नं कथंया स्वाद मदइगु व मे नाइसे च्वनिगु जूगुलिं उपवास च्वनागु श्रेष्ठं धयादिल ।
थुगुसीया जात्राया नितिं बोेडेया नकःमिपिन्सं दयेकूगु ११ इन्चया नटुचा बुद्धकृष्णं मे प्वाः खनादिगु खः । पेशां एम्बुलेन्स चालक जुयादीम्ह बुद्धकृष्णं वंगु दँय् कोरोनाया हुनिं मे प्वाः खनामदिउगु खः ।
थ्वहे दथुई बिस्काः जात्राय् म्हिगः यःसिँ थना म्हिगः हे क्वथल । परम्पराकथं यःसिं दँया लिपांगु दिं थनेमाःगु खः तर म्हिगः यक्वः हे प्रयास याना मंगलबाः चान्ह्य् १२ बजे थंगु यःसिं ग्वतुसेंलि म्हिगः हाकनं थंगु खः ।
यःसिं थनेगु तःक्वमछि प्रयास यासां नं सनिलय्या ६ः३० बजे थनेता ताःलागु खः । वयांलिपाः थ्यंमथ्यं निघौ तक्क तया बहनि ८ः३० क्वथूगु खः ।
ख्वपःय् बिस्काः जात्राया झ्वलय् चैत्र मसान्तया दिं यःसिं थनिइ धाःसा वैशाख संक्रान्तिया दिन क्वथलेगु चलन दु । चैत्र मसान्तया दिं छुं कारण यःसिं थने मफत धाःसा वैशाख संक्रान्तिया हे दिं थना उगु हे दिं क्वथलिगु चलन दु ।
उगु हे तलिलजिकथं म्हिगः थने मफयाच्वंगु यःसिं निघौ तक्क थना क्वथुगु खः । बिस्का जात्रा टौमढीया भैरवनाथया खः साला वैशाख ५ गते क्वचाई ।
विष्णुमती खुसिइ सरसफाइ अभियान सुरु
लहनान्युज | चौलाथ्व द्धितीया ११४१,बैसाख १ बुधवाः
न्हुगु दँ २०७८ या सुथय् संघीय सांसद माननीय जीवनराम श्रेष्ठं शोभा भगवति न्ह्यने सुथय् ७ बजे निसे ९ बजे तक विष्णुमति खुसिइ सरसफाइ अभियान शुरु याःगु खः ।
विष्णुमती जःखः वातावरणयात स्वच्छ तयेत सरसफाइ अभियान सञ्चालन यानागु खः धका सांसद श्रेष्ठं धयादीगु खः ।
हरेक महिनाया लिपागु शनिवाः सुथय ७ बजे निसे ९ बजे तक सरसफाइ अभियान नियमित सञ्चालन जुइ धक धयादीगु खः ।
उगु सरसफाइ अभियानय् माननीय प्रदेशसभा सदस्य अष्टलक्ष्मी शाक्य, येँ महानगरपालिका वडा १५ या अध्यक्ष नाप येँ महानगरपालिका प्रवक्ता ईश्वरमान डंगोल, कामपा १५ वडा सदस्यपि मैयाँलक्ष्मी महर्जन, अधिकार सम्पन्न वाग्मती सभ्यता एकीकृत विकास समिति, स्थाननीय संघसंस्था, बाग्मती नदी सरसफाइया अभियन्ता लिलामणी पोखरेल नाप स्थानीय जनप्रतिनिधि पिनिगु उपस्थिति न दुगु खः।
‘थुगु अभियान जीवन राम श्रेष्ठया जक मखु विष्णुमती सभ्यता नाप स्वाःगु हरेक नागरिकपिनिगु अभियान खः । विष्णुमति खुसिइ प्रदुषित जुया धार्मिक नाप सांस्कृतिक ज्याय् तक असर जुगु दु ।’ सरसफाई अभियानय् सहभागि माननीय प्रदेशसभा सदस्य अष्टलक्ष्मी शाक्यं धयादीगु दु, ‘स्थानीय वासिन्दा, ल्याय्म्ह पुचः, सुसिइ सरसफाइ अभियानकर्ता नाप नेपाली सेना, नेपाल प्रहरी सकसिया विष्णुमती खुसिइ सरसफाइ अभियान न्ह्याकुगु माननीय प्रतिनिति सभा सदस्य जीवनराम श्रेष्ठया ज्याया प्रसंसा यानादीगु खः ।’
वःगु २४ घण्टाय् येँ १७३म्ह कोरोना पुष्टि
शोभा श्रेष्ठ | चौलाथ्व द्धितीया ११४१,बैसाख १ बुधवाः
वःगु २४ घण्टाया दुने थप ६०३ म्हेसित कोरोना भाइरस संक्रमण पुष्टि जुगु दु ।
स्वास्थ्य तथा जनसंख्या मन्त्रालयया कथं देयन्यक ४२८९ म्हेसिगु पीसीआर परीक्षण याःगुलि ५८० म्ह व ४५१ एन्टिजेन परीक्षणय् २३ म्हेसित संक्रमण पुष्टि जुगुु खः ।
वःगु २४ घण्टाय् स्वनिगः दुने जक २५४ म्ह संक्रमित पिहावःगु दु ।
येँ जक १७३म्ह, यलय् ६१ म्ह व ख्वपय् २० म्हेसित संक्रमण पुष्टि जुगु दु धका स्वास्थ्य तथा जनसंख्या मन्त्रालयं धाःगु दु । वःगु २४ घण्टाय् १२९ म्ह कोरोना भाइरस संक्रमणमुक्त जुगु दु।
अथेहे कोरोना संक्रमित जूपि ८० म्ह आईसीयू व २५ म्ह भेन्टिलेटरय् उपचाररत जुयाच्वःगु दु।
मन्त्रालयया कथं सोमबाः निसे बुधबाः तक १३०५३ गु नमुना परीक्षणय् १५३६ म्हेसित कोरोना संक्रमण पुष्टि जुगु खः। अथेहे ४२० म्ह संक्रमणमुक्त जुगु दु ।
आःतक दयन्यक ४०५६ म्ह सक्रिय संक्रमितपि दु । उकि मध्ये ३५९९ म्ह होम आइसोलेसनय् च्वना च्वगु दु ।
