प्रहरी वरिष्ठ उपरीक्षक किरण बज्राचार्यं सोमबाः महानगरीय प्रहरी परिसर यलया प्रमुख कथं जिम्मेवारी न्ह्याकादीगु दु ।

परिसरया निर्वतमान प्रमुख प्रहरी वरिष्ठ उपरीक्षक टेकप्रसाद राईं जिम्मेवारी लःल्हासें बज्राचार्ययात यल जिल्लाया शान्ति सुरक्षा, अपराधया स्थिति व जिल्लाको वस्तुस्थितिबारे सामान्य जानकारी बियाादीगु खः ।

व झ्वलय् वरिष्ठ उपरीक्षक टेकप्रसाद राईं थःगु साथ व ग्वाहालि न्ह्याबलें दयाच्वनीगु नं धयादिल ।

१५ ला प्रहरी प्रमुखया रुपं ज्या यानादीम्ह प्रहरी वरिष्ठ उपरीक्षक राईया गृह मन्त्रालयया मंसिर ५ गतेया निर्णय कथं प्रहरी प्रधान ज्याकू कर्मचारी प्रशासन शाखाय् सरुवा जूगु खः ।

परिसरय् ग्वसाः ग्वःगु समारोहया दथुइ राईयात बिदाई लिसें बज्राचार्ययात स्वागत याःगु खः ।

प्रहरी वरिष्ठ उपरीक्षक बज्राचार्यं जिम्मेवारी कायेधुंकाः नेपाल परम्परागत बौद्ध धर्म संघया पदाधिकारीतय्सं बज्रयानी बौद्ध परम्परा कथं स्वस्ति वाचन याःगु खः ।

राष्ट्रिय युवा महासंघ यलया पदाधिकारीतलिसे खँल्हाबल्हा यासें प्रमुख बज्राचार्यं यलय् अपराध न्यूनीकरण, प्रहरी प्रशासनया जवाफदेहीता थकायेत समुदायलिसे जानाः ज्या यायेगु प्रतिबद्धता प्वंकादिल ।

अपराधया न्यूनीकरण, समुदायमैत्री प्रहरी प्रशासन, जनताया दथुइ प्रहरी प्रशासनप्रति विश्वास व शान्ति सुरक्षा सुदृढ दयेकेगु हे थःगु मू आज्जु जूइगु धासें बज्राचार्यं थुकिया लागिं दक्वं पक्षया साथ व ग्वाहालिया अपेक्षा यानादिल ।

नेपालय् कोरोनामुतm जुपि २ लाख २ हजार ६७ म्ह थ्यःगु दु।

अथेहे २४ घण्टाया दुने कोरोना संक्रमणं १६ म्ह थ्यःगु दु।

आःतक नेपालय् कोरोना संक्रमितपि २ लाख २२ हजार २८८ म्ह थ्यःगु दु। 

वःगु २४ घन्टाया दुने नेपालय् थप १६ म्हेसित कोरोना संक्रमणपि सी धुकुगु दु धका स्वास्थ्य तथा जनसंख्या मन्त्रालयं धाःगु दु।

थप १६ संक्रमित नाप सीपि आःतक १३३७ म्ह थ्यःगु दु।

वःगु २४ घण्टाया दुने स्वनिगलय् १ हजार ७ म्हेसित कोरोना संक्रमितपि थपे जूगु दु धका स्वास्थ्य तथा जनसंख्या मन्त्रालयं धाःगु दु।

थौं सोमवाः संक्रमित पुष्टि जूपि ४५४ म्ह मिसापि व ५५३ म्ह मिजंपि खः।

मन्त्रालयया कथं थौं येँ जक ७७९ म्हेसित कोरोना पुष्टि जूगु दु। अथेहे ख्वपय् ८५ म्ह व यलय् १४३ म्हेसित कोरोना सक्रमित जूगु दु।

थौं देय् यकं संक्रमित पुष्टि जूपि १ हजार ९८० म्ह खः। 

नेपाल संवतया प्रवर्तक शंखधर साख्वाःयात नेपाल सरकारं राष्ट्रिय विभूति घोषणा याःगु लसताय् दँय्दसं न्यायेका वयाच्वंगु शंखधर दिवस छगु ज्याझ्वः दथुइ हने त्यःगु दु।

उगु ज्याझ्वःया नितिं कन्ह्य कछलाथ्व दशमी मंगलवाः कुन्हु येँया लखु तिर्थय् छगु ज्याझ्वः यासे हने त्यःगु खः।

कन्ह्य जुगु ज्याझ्वलय् शंखधरया प्रतिमाया माल्यार्पण याइगु ज्याझ्वः तयातःगु दु। उगु ज्याझ्वः लिपा सुथसिया ८ः३० ताः इलय् नेपाल संवत् आन्दोलनया न्ह्यलुवाः पद्मरत्न तुलाधरया लुमन्तिइ बिचाः मुँज्या न जुइत्यंगु दु ।

उगु जगतसुन्दर ब्वनेकुथिइ बिचाः मुँज्याय् मू पाहां कथं येँ महानगरपालिकाया मेयर विद्यासुन्दर शाक्य झायादीत्यंगु दु ।

बिचाः मुँज्याय् वामपन्थी नेता श्याम श्रेष्ठ, डा. पुष्पराज राजकर्णिकार, मल्ल के. सुन्दर, नेपालभाषा मंकाः खलःया नायः दुर्गालाल श्रेष्ठ व त्रिरत्न शाक्यपिंसं ब्बति काये त्यःगु खः।