Display Style:
Column Style
कलाकार रामकृष्ण महर्जन धिनाः आकाझाकां मन्त
लहनान्युज | चौलाथ्व पारु ११४१,चैत्र ३१ मंगलवाः
किपूया कलाकार नाप च्वमि कलाकार रामकृष्ण महर्जन धिनाः थौं आकाझाकां मन्त ।
योग गुरु जुयाः योगायात निरन्तरता बियाः वयाच्वनादीम्ह धिनाः थौं मंगलवाः किपूया त्रिभुवन विश्वविद्यालयया गान्धी भवनय् योग स्यनाच्वंगु इलय् आकाझाकां ग्वःतुलेवं वय्कः छुं ईलिपा हे मदुगु खः ।
मदुम्ह धिनाःया च्वसां आपालं हे भिडियो संकिपाया नितिं बाखं जीवनयात्रा, मनू मखुम्ह मनू, चरित्र नांया भिडियो संकिपा लिसेलिसें आपालं भिडियो संकिपात भाजु धिनाः नं च्वयादीगु दु । मदुम्ह महर्जन धिनाः नं अतिकं बय् बय् जूगु संकिपा बांलाःम्ह मय्जु, बसन्त ऋतु संकिपा नं च्वयादीगु दुसा थःम्हं म्हूगु गांलिसें थीथी संकिपा व थीथी नेपालभाषाया म्यूजिक भिडियोय् स्यल्लाःगु जीवन्त अभिनय नं यानादीगु दु ।
नेपालभाषा साहित्य, संगीत, संकिपा ख्यःयात ल्यंकातयेमाःगु विचाः ज्वनाः आपालं धयाथें नेपालभाषा ख्यःयात हे प्राथमिकता बियाः पलाः न्ह्याकाः वया च्वनादीम्ह मदुम्ह महर्जन धिनाःया समकालीन कथं थौंकन्हय् अतिकं नांजाःम्ह बरिष्ठ निर्देशक च्वमि लिसें कलाकार पवन जोशीलिसे जानाः आपालं संकिपा निर्माण ज्याय् न्ह्यचिलादीगु खः ।
कमलपूखुया पुननिर्माणया ज्या सन्तोषजनक मजु, मेयर शाक्य
शोभा श्रेष्ठ | चौलाथ्व पारु ११४१,चैत्र ३१ मंगलवाः
येँ महानगरपालिकाया मेयर विद्यासुन्दर शाक्यं कमलपूखुया पुननिर्माणया ज्या सन्तोषजनक मजु धका धयादीसे ठेकेदार कम्पनीयात याकन ज्या सम्पन्न यायेत निर्देशन बियादीगु दु ।
येँ महानगरपालिका वडा–१ या अध्यक्ष भरतलाल श्रेष्ठ, सहरी पूर्वाधार विभागका इञ्जिनियर प्रेम श्रेष्ठ लगायतपि नाप कमलपूखली निरीक्षण यायेगु झ्वलय् मेयर शाक्यं अथे धयादीगु खः । निरीक्षणया झ्वलय् मेय।र शाक्यं जय धनञ्जय कडेँल निर्माण सेवा जेभीया आधिकारिक प्रतिनिधियात अथे धयादीगु खः। मेयर शाक्यं डिजाइन कथं ज्या जुइ माःगु निर्देशन न बियादीगु खः ।
मेयर शाक्यं निरीक्षणया झवलय्् कमलपूखुलि लः ज्याय्केगु ज्या जुयाच्वःगु जानकारी बिःगु दु। ‘चैत मसान्ततक ज्या क्वचायेकेत हामीले ठेकेदार कम्पनीयात अन्तिम मौका बियागु खः,’ शाक्यं पूखुलि क्यना, ‘छु दिं दुने हे पूखुलि लः ज्यायेकेगु तयारी दु धका धयादीगु खः। जिमिसं पुननिर्माणया झ्वलय् आकाश वइगु लः जायकेगु व्यवस्था यानागु दु धका धयादीगु खः।’
सहरी पूर्वाधार विभागया इञ्जिनियर प्रेम श्रेष्ठं आः पूखुलि करीब २० लाख लिटर लः तये धुकागु दु धका जानकारी बियादीगु खः। मेयर शाक्यं पूखुया प्यगु थासय् आकर्षक व संस्कृति खने दयक प्यगु मन्द व पूर्वपाखे मुल लुखाय् याना न्यागु मण्डप दइगु जानकारी बियादीगु दु।
उगु कमल पूखुलि चिल्ड्रेन पार्क, ल्वहिति, अपाङ्गमैत्री चःबि, जिम हल, उधान व सार्वजनिक थाय्या डिजाइन तयार यागु खः। करीब ६ करोड ३६ लाखया लगानीइ निर्माण जुगु उगु पूखुलि बास्तुशास्त्रया आधारय् निर्माण जुयाच्वःगु महानगरपालिकां धाःगु दु।
नेवाःतयेगु तःधंगु नख: पाहाँचह्रे क्वचाल
राम डंगोल | चिल्लागा, प्रतिपदा ११४१, चैत्र ३१ गते मंगलबाः
नेवाःतय्गु तःधंगु नखः पाहाँचह्रे असनय् द्यः ल्वाकुसें म्हिगः क्वचाल । पिशाच चर्तुदर्शी नं धाइगु पाहाँचः¥हे नखः स्वन्हूतक्क न्ह्याइगु या ।
न्हापांगु दिं त्वाः त्वाः पतिकं जमिनय् दुने च्वंगु लुकामाद्यः यात पितहया पूज्याना भ्वय् नयाँ न्ह्यइपुस्सेच्वंका हन । अथेहे निगूग दिं तान्त्रिक विधिकथं पुज्याना दयेकातःगु जाः मरःजा नकल । न्यादँ सिबें क्वःया मस्तय्त उगु मरःजा नकल धाःसा रोग ब्याधी मलाइगु जनविश्वास दु ।
पाहाँचः¥हे नखःया स्वन्हूया दिं म्हिगः असनय् द्यः ल्वाकल । पाहाँचःर्हेया स्वन्हुगु दिनय् असनय् वतु लुँमधि अजिमा, तेबहाः लुँमधि अजिमा व कंग अजिमाया खः ल्वाकूगु खः । असनय् असंभुलु अजिमाया न्ह्यःने खः ल्वाकूगु खः । असंमरु अजिमा लागाय् लुँमरि अजिमाया वतु खः व तेबाहाः खःयात दिकातइ अले कंग अजिमाया द्यःखतं चाःहिलेगु याइ । अनं लिपा तेबाहाः खःलिसे कंग अजिमालिसे मिप्वाः हिलाबुला याना काइगु खः । अथे मिप्वाः हिलाबुला याना काइगुयात हे द्यःखः ल्वाकेगु धाइगु खः ।
द्यः ल्वाकेगु भ्mवलय् असंया छेँ चतामरी, ल्वंचामरी ह्वलाहःगु खः । लिपांगु दिं असंया भिन्तुना गुथिं चतांमरी ह्वलिगु परम्परायात न्ह्याकावचयाच्वंगु दु । थ्वयां न्ह्यः पाहाँचः¥हेया निगूगु दिं चान्ह्य् तिन्ख्यलय् द्यः ल्वाकल । उगु इलय् लुँमरि अजिमा खः कथं वतुया लुँमरि खः व तेबाहाःया लुँमरि खः नापं कंग अजिमायात जात्रा यानाः यंकीगु खः ।
जात्राया झ्वलय् तिंख्यलय् लुँमरि अजिमाया वतु खः व तेबाहाया खः नापं दिकातइ । अले कंग अजिमाया खतं निगः हे द्यःखः चाःहिलेगु नापं वतु खःलिसे मिप्वाः हिलाबुला याना काइगु खः । उकियात हे द्यः ल्वाकेगु धाइ । अथे जात्रा याना हाकनं द्यःखः थःथःगु थासय् यंकेगु चलन दु ।
पाहां चःह्रेया झ्वलय् येँया थीथी द्यःपिनिगु जात्रा याइगु चलन दु । मूल रुपं लुँमरि अजिमा तेबाहा खः, लुँमरि अजिमा वतु खः व कंग अजिमाया जात्रा खःसा मेमेगु द्यःया नं खः कुबियाः जात्रा याना वयाच्वंगु दु । थ्व हे झ्वलय् येँया तक्ति अजिमा, लुँचुभुलु अजिमा, न्हाय्कंत्वाःया अजिमा, नरसिंह आजु, गणेद्यः नापं त्यंगः गणेद्यःया नं जात्रा यात । थःथःगु त्वाःया द्यःयात जात्रा यानाः थाय्थासय् चाःहिइकेगु याना वयाच्वंगु दु ।
शिक्षा मन्त्रालय स्कूल सञ्चालन यायेगु कि बन्द यायेगु धका छलफल
लहानान्युज | चिल्लागा आमैं ११४१,चैत्र ३० सोमवाः
कोरोना संक्रमणया जोखिमं स्कूल सञ्चालन यायेगु कि बन्द यायेगु धइगु विषय शिक्षा मन्त्रालय व सरोकारवाला दथुइ छलफल सुरु जुगु दु।
महामारीया निगुगुे लहर सुरु जुइवं स्कूल सञ्चालनबारे माःगु निर्णयया लागि मन्त्रालयं सरोकारवाला दथुइ सःता छलफल याःगु खः ।
शिक्षा मन्त्री कृष्णगोपाल श्रेष्ठया सचिवालयं मन्त्रालय छलफल जुयाच्वंगु दु धका जानकारी बिःगु दु ।
मस्तय्त कोरोना भाइरसया न्हुगु स्वरुप (युके भेरियन्ट) या संक्रमण उच्च खने दुगुलि कोभिड संकट व्यवस्थापन केन्द्र (सीसीएमसी) नं संक्रमण अप्वोया वःगु धका स्कूल व कलेज कम्ती न स्ववाःया लागि बन्द यायेगु प्रस्ताव याःगु खः।
थिमिइ सिवाः त्वालय् बाँसुरी बाजा प्रशिक्षणया क्वचाल
शोभा श्रेष्ठ | चिल्लागा आमैं ११४१,चैत्र ३० सोमवाः
सिवाः साय्मि खलः संस्कृति विभागया ग्वसालय् बाँसुरी प्रशिक्षण ज्याझ्वः क्वचाःगु दु ।
वःगु २०७६ मंसीर ९ निसे सुरू जुगु बाँसुरी प्रशिक्षण २०७७ चैत २६ गते थिमि–४ या सिवाः त्वालय् बाँसुरी बाजा प्रशिक्षणया समापन ज्याझ्वः जुगु खः ।
च्यालाया दुने क्वचायेकगु लक्ष्य काःगु खःसा कोभिड–१९ या कारणं दथुइ हे दिगु खः । उगु बाँसुरी प्रशिक्षणय् ४२ म्हेसिया ब्बति काःगु धका ज्याझ्वःया संयोजक मनोजलाल मानन्धर धयादीगु खः ।
बाँसुरी प्रशिक्षक धनकाजी भासिमा व बाद्यवादन प्रशिक्षक चयन्द्र भासिमा यानादीगु खः। अथेहे नृत्य प्रशिक्षक बालमुकुन्द प्रजापति व दिपक बज्राचार्य यानादीगु खः ।
स्थानिय मानन्धर समुदाय व नगरपालिकापाखे आर्थिक व्यवस्थापन याःगु खः।
मध्यपुर थिमि नगरपालिकाया मेयर मदनसुन्दर श्रेष्ठ, मध्यपुर वडा नं. ४ व ६ या परिवार, जनप्रतिनिधि, नेवाः पत्रकार राष्ट्रिय दबूया वरिष्ठ उपाध्यक्ष नृपेन्द्रलाल श्रेष्ठ, उपाध्यक्ष रचना श्रेष्ठ, महासचिव, सचिव, कोषाध्यक्ष, सहकोषाध्यक्ष, सदस्यपि नाप केन्द्रीय मानन्धर संघपाखे सहसचिव उदेन न्हूसायमि, भक्तपुर जिल्ला मानन्धर युवा संघया पदाधिकारी, मानन्धर युवा समूहया पदाधिकारी पिनिगु न सहभागिता दुगु खः ।
